LinVB - Job - 23

23:1  Na nsima Yob ayanoli :

23:2  Nazali se komilela na botomboki, loboko la ye lozali kofina ngai, ata nazali kokimela.

23:3  E ngai e, soko nayebaki esika bakoki kokuta ye mpe kokoma o ndako ya ye,

23:4  mbele nasambaki o miso ma ye, mpe nalakisaki ye ntina inso ya likambo lya ngai,

23:5  mbele nayoki eyano nini akopesa ngai, bongo nayoka nini alingi.

23:6  Akosamba na ngai na makasi ma ye manso te, kasi akondima koyoka maloba ma ngai.

23:7  Mbele akondima ’te nazali kosamba lokola moto semba, mpe akomono ’te akoki kokitisa ngai te.

23:8  Kasi soko nakei epai ya Esti, azali wana te, to epai ya Westi, nakomono ye te.

23:9  Azala o Nordi, nakoki kozwa ye te, ámibomba o Sudi, nakomono ye te.

23:10  Nzokande ayebi ezalela ya ngai mobimba, ameka ngai, akoyeba ’te nazali peto lokola wolo.

23:11  Nalandaki bobele matambi ma ye, natikaki nzela ya ye te, napengwaki mbala yoko te.

23:12  Natosaki mibeko mya ye, naboyaki myango te, nakumisaki mitindo mya ye, natosaki myango.

23:13  Makambo ye akokata, nani akobongola mango ? Manso makosalema lokola ye moko alingi.

23:14  Awa akati likambo lya ngai, akosala se bongo, se lokola makambo maike akani kosala.

23:15  Yango wana nayoki nsomo o miso ma ye, awa napusi kokanisa yango, nakomi kobanga mingi.

23:16  Nzambe alembisi ngai motema, Mokonzi wa bokasi ayokisi ngai nsomo.

23:17  O kati ya molili nabangi koloba te, ata molili mwa ye mozipi ngai.