Kapingamarangi - Leviticus - 19

19:1  Dimaadua ga-helekai gi Moses

19:2  gi-helekai gi digau Israel, “Goodou heia goodou gii-dabu, idimaa Au go Yihowah go di-godou God, Au e-dabu.

19:3  Tangada-nei mo tangada-nei i goodou gi-hagalabagau-ina dono dinana mo dono damana, gei gi-hagalabagau-ina di Laangi-Sabad, gii-hai be agu helekai. Au go Yihowah go di-godou God.

19:4  Goodou hudee diagia au, ga-daumaha gi-nia balu-ieidu. Goodou hudee hai god gi-nia baalanga belee daumaha ginai. Ko-Au go Yihowah go di-godou God.

19:5  Di-godou madagoaa ma-ga-daaligi di-godou manu belee hai di-godou tigidaumaha hagadaubuni, goodou haga-gila-ina-aga nia haganoho ala ne-gowadu ko-Au gi goodou, gei-Au ga-tenetene gi tigidaumaha deelaa.

19:6  Nia goneiga o-di manu deelaa le e-gai-hua i-di laangi dela ne-daaligi-ai di manu be dono daiaa. Nia goneiga ala gaa-dubu gaa-dae gi tolu laangi, le e-dudu.

19:7  Idimaa, ma e-milimilia ang-gi di hai-daumaha, gei di-maa tangada gaa-gai di-maa, Au hagalee tenetene gi tigidaumaha deelaa.

19:8  Tangada dela ma-gaa-gai nia maa, le e-haga-balumee nia mee ala ne-hagadabu mai gi-di-Au, gei mee gu-hagalee haga-ingoo bolo tangada i agu daangada.

19:9  “Di-godou madagoaa ma-ga-hadi-ai nia huwa o godou hadagee, gei goodou hudee haadia nia huwa-laagau ala i taalinga godou hadagee, gei goodou hudee lloomoi labelaa gi-muli e-hadi nia huwa-laagau ala ne-dubu.

19:10  Goodou hudee hula labelaa gi-muli gi-lodo godou hadagee-waini gaa-hadi nia ‘grape’ ala ne-de-gidee-goodou ga-diiagi, be ogoogo nia ‘grape’ ala ne-monnono. Diagia nia maa ang-gi digau hagaloale mo digau mai i-daha. Ko-Au go Yihowah go di-godou God.

19:11  “Goodou hudee gaiaa, be hagamagiaa, be hai-kai-tilikai.

19:12  Goodou hudee hai hagababa i dogu ingoo maa goodou hagalee daudali nia maa, idimaa ma e-hagahuaidu dogu ingoo. Ko-Au go Yihowah go di-godou God.

19:13  Goodou hudee hai mee huaidu gi tei dangada, be kae nia mee tangada. Goodou hudee daahia nia hui o godou gau ngalua, hagalee hai gi-duai i-di laangi e-dahi.

19:14  Goodou hudee haganneennee-ina tangada longoduli, be dugu di-godou mee gi-mua tangada deegida bolo gi-hinga a-mee. Hagalongo-mai gi-di-Au: Ko-Au go Yihowah go di-godou God.

19:15  “Goodou heia nia mee humalia ge donu i-di godou madagoaa ma-ga-haganoho di tonu o-di gabunga. Hudee hai-baahi gi digau hagaloale be mmaadagu i digau maluagina.

19:16  Hudee hai-kai-tilikai belee hagahuaidu tangada. Maa tangada ga-gabunga i dono mouli, haga-modongoohia-ina-aga au hagamodongoohia ala e-mee di-hagamaamaa a-mee. Ko-Au go Yihowah.

19:17  “Goe hudee dadaahia i-lodo do manawa nia hagamamaanadu huaidu ang-gi tangada. Hagahumalia-ina nia mee ala e-huaidu i gulu mehanga mo tangada dela i do baahi, gi-dee-dau-hua goe gi-di huaidu.

19:18  Hudee tala di hui ang-gi tangada dela ne-hai dana huaidu adu gi-di-goe, be dadaahia do ginagina i-mee, gei goe gi-aloho i tangada dela i do baahi gii-hai be do aloho i-di-goe. Ko-Au go Yihowah.

19:19  “Goodou hagalongo gi agu haganoho. Goodou hudee wanga-ina godou manu hagagaidala gi-haga-hai-hoo ang-gi nia hagadilinga manu ala i-golo. Hudee dogia nia hagadilinga lii e-lua gi-lodo di hadagee e-dahi. Goodou hudee ulu nia goloo ala ne-hai-mai i-nia hagadilinga gahu e-lua.

19:20  “Ma-ga-modongoohia bolo taane e-kiikii i-baahi dono lodo-hege, gei tama-ahina deelaa la-digi huia e-hagamehede, gei tuai taane gaa-hai di hiihai o taga-hai-lodo gi-di ahina deelaa, malaa, meemaa e-hagaduadua, malaa, hagalee hai gii-mmade, idimaa di ahina deelaa la-di hege.

19:21  Taane deelaa gaa-kae dana dama-siibi-daane gi-di bontai di Hale-laa, e-hai tigidaumaha e-wwede ono hala.

19:22  Malaa, tangada hai-mee-dabu gaa-hai taumaha di haga-madammaa, e-haga-madammaa gi-daha di huaidu o taane deelaa, gei Au go Dimaadua ga-dumaalia ang-gi nia huaidu o taane deelaa.

19:23  “Di-godou madagoaa ma-gaa-dau i tenua go Canaan, gaa-dogi godou hagadilinga lii-laagau, gei goodou gaa-hai bolo nia huwa-laagau aalaa le e-milimilia ang-gi di hai-daumaha i-lodo nia ngadau e-dolu ala i taamada. Di madagoaa deelaa, gei goodou hudee geina nia maa.

19:24  I-di haa ngadau, gei nia huwa-laagau huogodoo le e-kae e-hagadabu, e-hai di wanga-dehuia dela e-hagamodongoohia-aga di-godou danggee mai gi-di-Au, go Dimaadua.

19:25  Gei i-lodo di lima ngadau, gei goodou guu-mee-hua di-gai nia huwa-laagau aalaa. Maa goodou gaa-hai nia mee aanei, gei godou laagau ga-humalia, gei gaa-huwa humalia. Ko-Au go Yihowah go di-godou God.

19:26  “Goodou hudee geina nia goneiga ala nia dodo no-lodo. Hudee hai buubuu.

19:27  Goodou hudee dahia nia ngaahulu ala i-nia baahi godou libogo, be dahi godou ngudu,

19:28  be daa godou gili, be teletele godou huaidina belee haga-modongoohia-aga godou lodo-huaidu gi tangada dela guu-made. Ko-Au go Yihowah.

19:29  “Goodou hudee hagahuaidu-ina godou dama-ahina i di-godou hai digaula gii-hai nia ahina e-huihui nadau huaidina i-lodo nia hale daumaha o digau tuadimee. Maa goodou gaa-hai beenei, gei goodou gaa-huli ang-gi nia balu-ieidu, gei tenua deenei gaa-honu i-nia haihai huaidu.

19:30  Goodou hagalabagau-ina di Laangi-Sabad, gei gi-hagalabagau-ina dogu Hale dabuaahia. Ko-Au go Yihowah.

19:31  “Goodou hudee hula gi-baahi digau ala e-hagadagadagagee gi-nia mouli-dangada. Maa goodou gaa-hai beenei, gei goodou ga-milimilia ang-gi di hai-daumaha. Ko-Au go Yihowah go di-godou God.

19:32  “Hagalabagau-ina digau mmaadua mo-di hagalaamua digaula. Goodou gi-mmaadagu i di-Au, gei gi-hagalongo-mai gi-di-Au. Ko-Au go Yihowah.

19:33  “Hudee heia hagahuaidu digau mai i-daha ala e-noho i-lodo di-godou henua.

19:34  Goodou heia digaula hagahumalia gii-hai be di-godou hai dela e-hai ang-gi godou duaahina o Israel, gei gi-aloho i digaula be di-godou aloho i goodou. Goodou gi-langahia bolo goodou nogo hai digau mai i-daha i-lodo tenua go Egypt i-mua. Ko-Au go Yihowah go di-godou God.

19:35  “Goodou hudee halahalau-ina nia daangada i-di godou hai-hegau gi-di mee hagatau-mee hai-gee, mo-di pauna hai-gee.

19:36  Goodou hai-hegau gi-di mee hagatau-mee dela e-donu, mo-di mee pauna-mee dela e-donu. Ko-Au go Yihowah go di-godou God, gei Au ne-laha-mai goodou gi-daha mo Egypt.

19:37  Goodou haga-gila-ina-aga agu haganoho mono hagababa huogodoo. Ko-au go Yihowah.”