SP - Leviticus - 26

26:1  לא תעשו לכם אלילים ופסל ומצבה לא תקימו לכם ואבן משכית לא תתנו בארצכם להשתחות עליה כי אני יהוה אלהיכם

26:2  את שבתתי תשמרו ומקדשי תיראו אני יהוה

26:3  אם בחקתי תלכו ואת מצותי תשמרו ועשיתם אתם

26:4  ונתתי גשמיכם בעתם ונתנה הארץ יבולה ועץ השדה יתן פריו

26:5  והשיג לכם דיש את בציר ובציר ישיג את הזרע ואכלתם לחמכם לשבע וישבתם לבטח בארצכם

26:6  ונתתי שלום בארץ ושכבתם ואין מחריד והשבתי חיה רעה מן הארץ וחרב לא תעבר בארצכם

26:7  ורדפתם את איביכם ונפלו לפניכם לחרב

26:8  ורדפו מכם חמשה מאה ומאה מכם רבבה ירדפו ונפלו איביכם לפניכם לחרב

26:9  ופניתי אליכם והפריתי אתכם והרביתי אתכם והקמתי את בריתי אתכם

26:10  ואכלתם ישן נושן וישן מפני חדש תוציאו

26:11  ונתתי משכני בתוככם ולא תגעל נפשי אתכם

26:12  והתהלכתי בתוככם והייתי לכם לאלהים ואתם תהיו לי לעם

26:13  אני יהוה אלהיכם אשר הוצאתי אתכם מארץ מצרים מהיות להם עבדים ואשברה מטות עולכם ואולך אתכם קוממית

26:14  ואם לא תשמעו לי ולא תעשו את כל המצות האלה

26:15  ואם בחקתי תמאסו ואם את משפטי תגעל נפשכם לבלתי עשות את כל מצותי להפרכם את בריתי

26:16  אף אני אעשה זאת לכם והפקדתי עליכם בחלה את השחפת ואת הקדחת מכלות עינים ומדיבת נפש וזרעתם לריק זרעכם ואכלהו איביכם

26:17  ונתתי פני בכם ונגפתם לפני איביכם ורדו בכם שנאיכם ונסתם ואין רדף אתכם

26:18  ואם עד אלה לא תשמעו לי ויספתי ליסרה אתכם שבע על חטאתיכם

26:19  ושברתי את גאון עזכם ונתתי את שמיכם כברזל ואת ארצכם כנחשה

26:20  ותם לריק כחכם ולא תתן ארצכם את יבולה ועץ השדה לא יתן פריו

26:21  ואם תלכו עמי קרי ולא תאבו לשמע לי ויספתי עליכם מכה שבע כחטאתיכם

26:22  ושלחתי בכם את חית השדה ושכלה אתכם והכריתה את בהמתכם והמעיטה אתכם ונשמו דרכיכם

26:23  ואם באלה לא תוסרו לי והלכתם עמי קרי

26:24  והלכתי גם אני עמכם . בקרי והכיתי אתכם גם אני שבע על חטאתיכם

26:25  והבאתי עליכם חרב נקמת נקם ברית ונאספתם אל עריכם ושלחתי דבר בתוככם ונתתם ביד אויב

26:26  בשברי לכם מטה לחם ואפו עשר נשים לחמכם בתנור אחד והשיבו לחמכם במשקל ואכלתם ולא תשבעו

26:27  ואם בזאת לא תשמעו לי והלכתם עמי בקרי

26:28  והלכתי עמכם בחמת קרי ויסרתי אתכם אף אני שבע על חטאתיכם

26:29  ואכלתם בשר בניכם ובשר בנתיכם תאכלו

26:30  והשמדתי את במתיכם והכרתי את חמניכם ונתתי את פגריכם על פגרי גלליכם וגעלה נפשי אתכם

26:31  ונתתי את עריכם חרבה והשמתי את מקדשכם ולא אריח בריח ניחחכם

26:32  והשמתי אני את הארץ ושממו עליה איביכם הישבים בה

26:33  ואתכם אזרה בגוים והרקתי אחריכם חרב והיתה ארצכם שממה ועריכם יהיו חרבה

26:34  אז תרצה הארץ את שבתתיה כל ימי אשמה ואתם בארץ איביכם אז תשבת הארץ והרצתה את שבתתיה

26:35  כל ימי אשמה תשבת את אשר לא שבתה בשבתתיכם בשבתכם עליה

26:36  והנשארים בכם והבאתי מרך בלבבם בארצות איביהם ורדף אתם קול עלי נדף ונסו מנסת חרב ונפלו ואין רדף

26:37  וכשלו איש באחיו כמפני חרב ורדף אין ולא תהיה לכם תקומה לפני איביכם

26:38  ואבדתם בגוים ואכלה אתכם ארץ איביכם

26:39  והנשארים בכם ימקו בעונם בארצות איביהם ואף בעונות אבתם אתם ימקו

26:40  והתודו את עונם ואת עון אבתם במעלם אשר מעלו בי ואף אשר הלכו עמי בקרי

26:41  אף אני אלך עמם בקרי והבאתי אתם בארץ איביהם או אז יכנע לבבם הערל ואז ירצו את עונם

26:42  וזכרתי את בריתי יעקב ואף את בריתי יצחק ואף את בריתי אברהם אזכר והארץ אזכר

26:43  והארץ תעזב מהם והרצתה את שבתתיה באשמה מהם והם ירצו את עונם יען ביען במשפטי מאסו ואת חקתי געלה נפשם

26:44  ואף גם זאת בהיותם בארצות איביהם לא מאסתים ולא געלתים לכלתם להפר בריתי אתם כי אני יהוה אלהיהם

26:45  וזכרתי להם ברית ראישונים אשר הוצאתי אתם מארץ מצרים לעיני הגוים להיות להם לאלהים אני יהוה

26:46  אלה החקים והמשפטים והתורות אשר נתן יהוה בינו ובין בני ישראל בהר סיני ביד משה