CSlElizabeth - Mark - 1

1:1  Зачало Евангелиа Иисуса Христа, Сына Божия,

1:2  якоже есть писано во пророцех: се, Аз посылаю Ангела Моего пред лицем Твоим, иже уготовит путь Твой пред Тобою.

1:3  Глас вопиющаго в пустыни: уготовайте путь Господень, правы творите стези Его.

1:4  Бысть Иоанн крестяй в пустыни и проповедая крещение покаяния во отпущение грехов.

1:5  И исхождаше к нему вся Иудейская страна и Иерусалимляне: и крещахуся вси во Иордане реце от него, исповедающе грехи своя.

1:6  Бе же Иоанн оболчен власы велблужди, и пояс усмен о чреслех его, и ядый акриды и мед дивий.

1:7  И проповедаше, глаголя: грядет Креплий мене вслед мене, Емуже несмь достоин преклонься разрешити ремень сапог Его:

1:8  аз убо крестих вы водою: Той же крестит вы Духом Святым.

1:9  И бысть во онех днех, прииде Иисус от Назарета Галилейскаго и крестися от Иоанна во Иордане.

1:10  И абие восходя от воды, виде разводящася небеса и Духа яко голубя, сходяща Нань.

1:11  И глас бысть с небесе: Ты еси Сын Мой возлюбленный, о Немже благоволих.

1:12  И абие Дух изведе Его в пустыню.

1:13  И бе ту в пустыни дний четыредесять, искушаемь сатаною, и бе со зверьми: и Ангели служаху Ему.

1:14  По предании же Иоаннове, прииде Иисус в Галилею, проповедая Евангелие Царствия Божия

1:15  и глаголя, яко исполнися время и приближися Царствие Божие: покайтеся и веруйте во Евангелие.

1:16  Ходя же при мори Галилейстем, виде Симона и Андреа брата (того) Симона, вметающа мрежи в море: беста бо рыбаря.

1:17  И рече има Иисус: приидита вслед Мене, и сотворю вас быти ловца человеком.

1:18  И абие оставльша мрежи своя, по Нем идоста.

1:19  И прешед мало оттуду, узре Иакова Зеведеова и Иоанна брата его, и та в корабли строяща мрежа:

1:20  и абие воззва я. И оставльша отца своего Зеведеа в корабли с наемники, по Нем идоста.

1:21  И внидоша в Капернаум: и абие в субботы вшед в сонмище, учаше.

1:22  И дивляхуся о учении Его: бе бо учя их яко власть имый, и не яко книжницы.

1:23  И бе в сонмищи их человек в дусе нечисте, и воззва,

1:24  глаголя: остави, что нам и Тебе, Иисусе Назарянине? Пришел еси погубити нас: вем Тя, кто еси, Святый Божий.

1:25  И запрети ему Иисус, глаголя: умолчи и изыди из него.

1:26  И стрясе его дух нечистый, и возопи гласом великим, и изыде из него.

1:27  И ужасошася вси, якоже стязатися им к себе, глаголющым: что есть сие? (и) что учение новое сие, яко по области и духовом нечистым велит, и послушают Его?

1:28  Изыде же слух Его абие во всю страну Галилейску.

1:29  И абие из сонмища изшедше, приидоша в дом Симонов и Андреов со Иаковом и Иоанном.

1:30  Теща же Симонова лежаше огнем жегома: и абие глаголаша Ему о ней.

1:31  И приступль воздвиже ю, емь за руку ея: и остави ю огнь абие, и служаше им.

1:32  Позде же бывшу, егда захождаше солнце, приношаху к Нему вся недужныя и бесныя.

1:33  И бе весь град собрался к дверем.

1:34  И изцели многи зле страждущыя различными недуги: и бесы многи изгна, и не оставляше глаголати бесы, яко ведяху Его Христа суща.

1:35  И утро, нощи сущей зело, востав изыде, и иде в пусто место, и ту молитву деяше.

1:36  И гнаша Его Симон и иже с ним:

1:37  и обретше Его, глаголаша Ему, яко вси Тебе ищут.

1:38  И глагола им: идем в ближния веси и грады, да и тамо проповем: на сие бо изыдох.

1:39  И бе проповедая на сонмищих их, во всей Галилеи, и бесы изгоня.

1:40  И прииде к Нему прокажен, моля Его и на колену припадая пред Ним, и глаголя Ему, яко, аще хощеши, можеши мя очистити.

1:41  Иисус же милосердовав, простер руку, коснуся его, и глагола ему: хощу, очистися.

1:42  И рекшу ему, абие отиде от него прокажение, и чист бысть.

1:43  И запрещь ему, абие изгна его:

1:44  и глагола ему: блюди, ни комуже ничесоже рцы: но шед покажися иерееви и принеси за очищение твое, яже повеле Моисей, во свидетелство им.

1:45  Он же изшед начат проповедати много и проносити слово, якоже ктому не мощи Ему яве во град внити: но вне в пустых местех бе. И прихождаху к Нему отвсюду.