Kapingamarangi - Matthew - 14

14:1  Di madagoaa deelaa, Herod di tagi o Galilee ga-longono ia di hai o Jesus.

14:2  Mee ga-helekai gi ana daane hai-hegau, “Ma go John Babdais hua dela ne-mouli-aga, i Mee ono mogobuna e-hai ana mee haga-goboina dangada.”

14:3  Idimaa, Herod ne-hai dana haga-iloo bolo gi-kumidia John, gei digaula gaa-nnoo nia lima o-maa, gaa-haa a-mee gi-lodo di hale-galabudi. Mee ne-hai di mee deenei idimaa go Herodias, go di lodo o dono duaahina-daane go Philip.

14:4  John ne-helekai gi Herod boloo, “Ma hagalee donu di hai doo lodo gi Herodias!”

14:5  Herod gu-hiihai bolo ia ga-daaligi a John, geia e-lliga huoloo i digau o Jew ala e-hai bolo John la di soukohp.

14:6  I-di laangi haanau o Herod, tama-ahina a Herodias ne-duu-aga, gaa-hai ana gaalege i-mua digau dogologo. Gei Herod gu-tenetene huoloo,

14:7  gaa-hai dana hagababa, “Au e-hagamodu bolo au ga-gowadu gi-di-goe di-ingoo-hua di mee dela e-hiihai ginai goe!”

14:8  Tama-ahina ga-hagi-anga telekai dono dinana, ga-dangi-anga gi Herod, “Gaamai gi-di-au di libogo o John Babdais i-hongo di pileedi!”

14:9  Di king gu-manawa-gee huoloo i nnelekai tama-ahina deelaa, idimaa mee gu-hagababa i-mua digau tagamiami dogologo bolo ia e-hagagila di hiihai o tama-ahina.

14:10  Mee ga-helekai gi digaula bolo gi-tuudia di uwa o John dela i-lodo di hale-galabudi.

14:11  Digaula ga-gaamai di libogo o-maa i-hongo di pileedi gi tama-ahina, geia gaa-kae gi dono dinana.

14:12  Nia dama-agoago a John ga-lloomoi gaa-kae tuaidina o-maa, gaa-danu, gaa-hula ga-haga-iloo gi Jesus.

14:13  Jesus ne-longono di longo deenei, ge-Ia ga-hagatanga i-di gowaa deelaa, gaa-hana i-di boodi gi-di gowaa lomo modogoia. Gei nia daangada ne-longono-ginaadou dono hana, ga-hagatanga i nadau waahale ga-daudali a-Mee laa-uda.

14:14  I dono doo-aga i-di boodi, ge-Ia ga-gidee digau dogologowaahee, Mee gu-aloho huoloo i digaula, ga-hagahili nadau magi.

14:15  Ga-hiahi-ia di mee, ana dama-agoago ga-mmaanege-adu gi Mee, ga-helekai, “Ma-guu-boo, gei di-maa di anggowaa lomo deenei, hagau-ina digaula gii-hula, e-hui nadau meegai i-lodo nia waahale lligi aalaa.”

14:16  Jesus ga-helekai, “Digaula hagalee hagau. Wanga-ina nia mee digaula e-gai!”

14:17  Digaula ga-helekai gi Mee, “Ma nia palaawaa hua e-lima ge lua dama-iga ala i madau baahi.”

14:18  Jesus ga-helekai, “Gaamai nia maa gi-di-Au.”

14:19  Gei mee ga-helekai gi-nia daangada gii-noho gi-hongo nia geinga tolo, gei Mee ga-dahi-aga nia palaawaa e-lima ge lua dama-iga, gaa-hila gi-di langi, ga-danggee gi God, ga-ginigini nia palaawaa aalaa, gaa-wanga gi ana dama-agoago gi-duwwee gi-nia daangada.

14:20  Digaula huogodoo gu-miami gu-maaluu. Gei nia dama-agoago gaa-haa nia mee ala ne-dubu, guu-hai nia gada e-madangaholu maa-lua.

14:21  Togologo daane ala ne-miami, digau e-lima-mana-(5,000), nia ahina mono dama digi daulia.

14:22  Jesus ga-helekai gi ana dama-agoago gii-kaga gi-hongo di boodi gii-hula i ono mua gi-di baahi i-golo tai deelaa, gei Mee ga-hagau digau dogologo aalaa gii-hula.

14:23  I-muli dana hagau nia daangada gii-hula, gei Mee gaa-hana gi-hongo tama gowaa nnoonua belee dalodalo. Gaa-dae-loo gi-di hiahi, Mee nogo modogoia-hua.

14:24  Di madagoaa deelaa, gei di boodi la-gu i tungaalodo di tai deelaa, gu-huduhudu go nia beau, idimaa, di madangi la-guu-gono-mai i-mua.

14:25  Gaa-dae-loo gi-di boo, mehanga di laa e-dolu mo-di laa e-ono luada, Jesus ga-haele-adu gi digaula i-hongo tai.

14:26  Nia dama-agoago a-Maa gaa-mmada gi-Mee e-haele i-hongo tai, gei gu-wwolowwolo mmaadagu bolo ma di ieidu.

14:27  Di madagoaa-hua deelaa, Jesus ga-helekai gi digaula, “Goodou hagadagadagagee. Ma ko-Au deenei. Goodou hudee mmaadagu!”

14:28  Peter ga-helekai, “Meenei Tagi. E-donu ma Kooe deenaa, helekai-mai gi-di-au gi-haele-adu au gi-di-Goe i-hongo tai.”

14:29  Jesus ga-helekai, “Hanimoi-laa!” Gei Peter ga-doo-iha gi-daha mo-di boodi, gaa-duu gi-hongo tai ga-haele gi Jesus.

14:30  Di madagoaa-hua Peter ne-longono-ia nia mahi o-di madangi, geia gu-madagu ga-daamada ga-abulu gi-lala. Geia gaa-wolo boloo, “Meenei! Hila-mai!”

14:31  Di madagoaa-hua deelaa, Jesus ga-daahi-adu dono lima ga-dahi-aga a-mee, ga-helekai, “Do hagadonu le e-dulii, goe e-aha dela e-manawa-lua?”

14:32  Meemaa gaa-kaga gi-hongo di boodi, gei di madangi guu-kila.

14:33  Ana dama-agoago ga-pala ang-gi Jesus i-hongo di boodi, ga-helekai, “Ma e-donu-hua bolo Goe go Tama a God!”

14:34  Digaula ga-dele-adu, ga-dau-aga i Gennesaret.

14:35  Digau o-di guongo deelaa ga-modongoohia Jesus, ga-haga-iloo gi digau magi o-di gowaa deelaa mono gowaa ala e-hoohoo-mai gi-laha-mai nadau gau magi gi Jesus.

14:36  Digaula ga-tangi gi Mee gi-dumaalia ang-gi digau magi gii-pili-hua gi-di bida o dono gahu, malaa, digau magi huogodoo ala ne-pili gi dono gahu la-guu-hili nadau magi.