Kapingamarangi - Numbers - 22

22:1  Digau Israel ga-lloo-adu gi-mua gaa-dae-adu-loo gi-di gowaa baba i-lodo tenua go Moab, gei digaula ga-haga-duu di-nadau waahale-laa i-di gowaa deelaa i-baahi gi-dua di monowai Jordan, ga-huli-adu gi Jericho.

22:2  Di king o Moab go Balak tama Zippor ne-longono-ia di mee digau Israel ne-hai ang-gi digau Amor,

22:3  gei mee mo digau Moab huogodoo gu-mmaadagu huoloo i digau Israel ala koia e-dogologowaahee.

22:4  Digau Moab ga-helekai ang-gi nia dagi o digau Midian, “Digau dogologowaahee aanei e-limalima-hua di-hagahuaidu tadau henua huogodoo, gadoo be di kau-daane dela e-gai hagalimalima ana geinga i-lodo di gowaa maalama.” Malaa, Balak, di king o digau Moab,

22:5  ga-hagau ana gau kae-hegau gi Balaam, tama Beor, dela e-noho i Pethor i tenua go Amaw i taalinga di monowai Euphrates, ga-helekai gi mee, “Au e-haga-iloo adu gi-di-goe bolo tenua hagatau ne-lloomoi i Egypt, ga-modoho gi-daha gi-nia madagoaa huogodoo, e-hai be digau e-hiihai e-hai-mee gi tadau henua.

22:6  Digaula koia e-dogologo gei e-maaloo-dangihi i gidaadou. Malaa, dumaalia-mai-mua, hanimoi e-haga-halauwa digau aanei. Holongo deenei di ala e-mee di haga-magedaa-ai digaula mo-di hagabagi digaula gi-daha mo tadau henua. Au e-iloo bolo nia daangada ala e-haga-maluagina kooe, gei digaula ga-haadanga-lamalia, gei digau ala e-haga-halauwa kooe le e-haadanga-balua.”

22:7  Nia dagi Moab mo Midian guu-kae nadau hui haga-halauwa, guu-hula gi-baahi o Balaam ga-hagi-anga gi mee nia mee huogodoo Balak ne-helekai gi digaula.

22:8  Balaam ga-helekai gi digaula, “Goodou noho i dogu baahi boo-nei. Daiaa gei-au ga-helekai-adu gi goodou di mee a Dimaadua ma-ga-helekai-mai gi-di-au.” Malaa, nia dagi Moab guu-noho i-baahi o Balaam.

22:9  God ga-hanimoi gi Balaam ga-heeu gi mee, “Ma digau-aha ala i do baahi?”

22:10  Balaam ga-helekai-anga, “Di king o Moab go Balak, tama-daane Zippor, ne-hagau-mai dana hegau deenei:

22:11  Di hai o digau ne-lloomoi i Egypt gu-modoho gi-daha i-lodo tenua hagatau. Mee bolo au gii-hana e-haga-halauwa digaula gii-mee dana heebagi gi digaula gi-magedaa digaula, gi-hagabagi digaula gi-daha mo dono henua.”

22:12  God ga-helekai gi Balaam, “Goe hudee hana madalia digaula, goe hudee haga-halauwa-ina labelaa digau tenua deelaa, idimaa, digaula guu-lawa di-haga-maluagina ko-Au.”

22:13  Ga-hooaga dono daiaa, gei Balaam ga-helekai gi digau kae-hegau aalaa, “Goodou hula gi-di-godou henua, idimaa, Dimaadua hagalee hiihai bolo au e-hana madalia goodou.”

22:14  Digau kae-hegau ga-hagatanga gaa-hula gi Balak ga-helekai gi mee boloo, “Balaam e-de-hiihai di hanimoi madalia gimaadou.”

22:15  Gei Balak ga-hagau labelaa hunu gau kae-hegau gi-mada-dogologo ge mada-aamua i digau ala i-mua.

22:16  Digaula gaa-hula gi-baahi o Balaam, ga-helekai gi mee nnelekai a Balak aanei: “Meenei, goe dumaalia-mai, goe hudee dumaalia gi dahi mee gi-duulia goe gi-daha mo do hanimoi gi dogu baahi!

22:17  Au ga-gowadu gi-di-goe di hui damanaiee, au ga-haga-gila-aga nia mee huogodoo ala e-dangi-iei goe mai gi-di-au. Hudee heheia hanimoi e-haga-halauwa digau aanei.”

22:18  Balaam ga-helekai gi digau kae-hegau aalaa, “Ma e-aha maa Balak bolo ia e-gaamai gi-di-au nia goolo mono silber mono mee hagalabagau huogodoo i dono hale, gei au e-deemee di-oho taganoho Dimaadua, go dogu God, gi-di mee dulii be damana.

22:19  Malaa, goodou noho i dogu baahi boo-nei, gadoo be digau anadilaangi, bolo gi-iloo-eau be Dimaadua dana mee labelaa i-golo e-hagi-mai gi-di-au.”

22:20  Dimaadua ga-hanimoi gi-baahi o Balaam di boo deelaa ga-helekai, “Maa digau aanei ne-lloomoi belee lahi goe, gei goe hana i-muli digaula. Goe hudee hai dahi mee i-daha mo agu mee ala ma-ga-helekai-adu gi-di-goe.”

22:21  Hooaga luada dono daiaa, gei Balaam ga-hagatogomaalia dana ‘donkey’ gaa-hana madalia nia dagi Moab.

22:22  God gu-hagawelewele, idimaa Balaam dela guu-hana. Tangada di-langi o Dimaadua gaa-duu i-hongo di ala belee duuli a-mee dela e-hana i-hongo dana ‘donkey’ mo ana daangada hai-hegau dogolua.

22:23  Di madagoaa di ‘donkey’ ne-mmada gi tangada di-langi dela e-duu i-hongo di ala, e-daahi dana hulumanu, geia gaa-hana gi-daha mo-di ala, ga-ulu gi-lodo nia geinga. Gei Balaam ga-hagamaawa di ‘donkey’ deelaa bolo gii-hana a-mee gi-hongo di ala.

22:24  Tangada di-langi o Dimaadua gaa-duu i-di gowaa madagiigi o-di ala i-mehanga nia abaaba hadu e-lua o-nia hadagee-waini.

22:25  Di madagoaa di ‘donkey’ ne-gidee-ia tangada di-langi, geia ga-menege-adu gi-di abaaba deelaa, mo-di hono di wae Balaam gi-di gili di abaaba, gei Balaam ga-hagamaawa labelaa di ‘donkey’.

22:26  Tangada di-langi deelaa gaa-hana labelaa, gaa-duu i-di gowaa dela koia e-madagiigi o-di ala, di gowaa deelaa e-deemee di-hana-ai di ‘donkey’ gi-di baahi gau-ihala be gau-donu.

22:27  Di madagoaa di ‘donkey’ ne-mmada gi tangada di-langi e-duu i ono mua, geia gaa-dogo-ia gi-lala gi-hongo di gelegele. Balaam gu-hagawelewele huoloo gu-daamada gu-haga-mamaawa di ‘donkey’ gi dana dogodogo.

22:28  Dimaadua gaa-hai di ‘donkey’ deelaa gii-mee di-helekai. Di ‘donkey’ ga-helekai gi Balaam, “Au ne-hai dagu-aha adu gi-di-goe dela goe ga-haga-mamaawa au nia holongo e-dolu?”

22:29  Balaam ga-helekai-anga, “Idimaa goe dela ne-haganneennee au! Au-nei bolo dagu hulumanu i-golo, gei au gu-daaligi goe!”

22:30  Di ‘donkey’ ga-helekai gi Balaam, “Au hagalee go di ‘donkey’ dela nogo heehee-iei goe mai i do dulii? Mai-loo i-mua gaa-dae-mai gi dangi-nei? Ma iai dahi madagoaa i-golo gei au gu-de-hagalongo-adu?” Balaam ga-helekai gi mee, “Deeai.”

22:31  Dimaadua ga-dumaalia ang-gi Balaam gi-gidee-ia tangada di-langi dela e-duu i-hongo di ala e-haga-mmuu dana hulumanu. Balaam gaa-dogo gi-lala i-mua o mee gi-hongo di gelegele.

22:32  Tangada di-langi ga-helekai-anga, “Ma e-aha dela goe e-haga-mamaawa dau ‘donkey’ nnolongo e-dolu? Au ne-hanimoi belee haga-de-aadee goe gi-dee-hana goe i doo ala huaidu.

22:33  Dau ‘donkey’ gu-mmada-mai gi-di-au, deenei di mee a-mee ne-hana-ai gi-daha mo-di ala deenei. Maa nei bolo mee digi hai beelaa, gei au gu-daaligi goe, gei di ‘donkey’ guu-mee dana hana.”

22:34  Balaam ga-helekai-anga, “Au gu-ihala, au digi iloo bolo goe e-duu i ogu mua i-hongo di ala deenei, e-hai-baahi-mai gi-di-au. Malaa, maa goe e-de-hiihai bolo au e-hana, malaa, au gaa-hana gi-muli gi dogu hale.”

22:35  Tangada di-langi ga-helekai gi mee, “Goe hana madalia digau aanaa, malaa goe helekai-hua i agu mee ala ga-hagi-adu gi-di-goe bolo gi-helekai-ai.” Malaa, Balaam gu-madalia nia gau kae-hegau a Balak.

22:36  Balak gu-longono-ia bolo Balaam gu-hanimoi, gei mee guu-hana belee heetugi gi mee i-di waahale go Ar, i taalinga di monowai Arnon, dela i tagageinga o Moab.

22:37  Balak ga-helekai gi Balaam, “Goe ne-aha dela digi hanimoi gi dagu hegau matagidagi? Goe e-hagamaanadu bolo au ga-hagalee gowadu gi-di-goe di hui damana?”

22:38  Balaam ga-helekai-anga, “Au deenei gu-hanimoi. Nia hagadilinga mogobuna-aha ala i dogu baahi? Ma aalaa-hua go nia helekai a God ne-gaamai gi-di-au bolo au gi-helekai-ai, aalaa agu mee e-hai.”

22:39  Malaa, Balaam guu-hana madalia a Balak, meemaa guu-hula gi-di waahale go Huzoth.

22:40  Balak ga-daaligi ana kau mono siibi i-di gowaa deelaa, gaa-kae nia goneiga dulii gi Balaam mo nia dagi ala ne-lloomoi madalia a-mee.

22:41  Hooaga luada dono daiaa, gei Balak gaa-lahi a Balaam gi Bamoth=Baal, di gowaa dela e-mee di-mmada Balaam gi hunu gau Israel.