VulgSistine - Sirach - 17

17:1  Deus creavit de terra hominem, et secundum imaginem suam fecit illum.

17:2  Et iterum convertit illum in ipsam, et secundum se vestivit illum virtute.

17:3  Numerum dierum, et tempus dedit illi, et dedit illi potestatem eorum, quae sunt super terram.

17:4  Posuit timorem illius super omnem carnem, et dominatus est bestiarum et volatilium.

17:5  Creavit ex ipso adiutorium simile sibi: consilium, et linguam, et oculos, et aures, et cor dedit illis excogitandi: et disciplina intellectus replevit illos.

17:6  Creavit illis scientiam spiritus, sensu implevit cor illorum, et mala et bona ostendit illis.

17:7  Posuit oculum suum super corda illorum ostendere illis magnalia operum suorum,

17:8  ut nomen sanctificationis collaudent: et gloriari in mirabilibus illius, ut magnalia enarrent operum eius.

17:9  Addidit illis disciplinam, et legem vitae hereditavit illos.

17:10  Testamentum aeternum constituit cum illis, et iustitiam et iudicia sua ostendit illis.

17:11  Et magnalia honoris eius vidit oculus illorum, et honorem vocis audierunt aures illorum, et dixit illis: Attendite ab omni iniquo.

17:12  Et mandavit illis unicuique de proximo suo.

17:13  Viae illorum coram ipso sunt semper, non sunt absconsae ab oculis ipsius.

17:14  In unamquamque gentem praeposuit rectorem:

17:15  et pars Dei, Israel facta est manifesta.

17:16  Et omnia opera illorum velut sol in conspectu Dei: et oculi eius sine intermissione inspicientes in viis eorum.

17:17  Non sunt absconsa testamenta per iniquitatem illorum, et omnes iniquitates eorum in conspectu Dei.

17:18  Eleemosyna viri quasi sacculus cum ipso, et gratiam hominis quasi pupillam conservabit:

17:19  et postea resurget, et retribuet illis retributionem, unicuique in caput ipsorum, et convertet in interiores partes terrae.

17:20  Poenitentibus autem dedit viam iustitiae, et confirmavit deficientes sustinere, et destinavit illis sortem veritatis.

17:21  Convertere ad Dominum, et relinque peccata tua:

17:22  precare ante faciem Domini, et minue offendicula.

17:23  Revertere ad Dominum, et avertere ab iniustitia tua, et nimis odito execrationem:

17:24  et cognosce iustitias et iudicia Dei, et sta in sorte propositionis, et orationis altissimi Dei.

17:25  In partes vade saeculi sancti, cum vivis et dantibus confessionem Deo.

17:26  Non demoreris in errore impiorum, ante mortem confitere. A mortuo quasi nihil, perit confessio.

17:27  Confiteberis vivens, vivus et sanus confiteberis: et laudabis Deum, et gloriaberis in miserationibus illius.

17:28  Quam magna misericordia Domini, et propitiatio illius convertentibus ad se!

17:29  Nec enim omnia possunt esse in hominibus, quoniam non est immortalis filius hominis, et in vanitate malitiae placuerunt.

17:30  Quid lucidius sole? et hic deficiet. Aut quid nequius excogitavit caro et sanguis? et hoc arguetur.

17:31  Virtutem altitudinis caeli ipse conspicit: et omnes homines terra et cinis.