SP - Exodus - 39

39:1  ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה

39:2  ויעשו את האפוד זהב תכלת וארגמן ותולעת שני ושש משזר

39:3  וירקעו את פחי הזהב וקצצו פתלים לעשות בתוך התכלת ובתוך הארגמן ובתוך התולעת השני ובתוך השש מעשה חשב

39:4  כתפות עשה לו חברות על שני קצתיו חבר

39:5  וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר כאשר צוה יהוה את משה

39:6  ויעשו את אבני השהם מוסבת משבצות זהב מפתחות פתוחי חותם על שמות בני ישראל

39:7  וישמו אתם על כתפות האפוד אבני זכרון לבני ישראל כאשר צוה יהוה את משה

39:8  ויעשו את החשן מעשה חשב כמעשה האפוד זהב תכלת וארגמן ותולעת שני ושש משזר

39:9  רבוע היה כפול עשה את החשן זרת ארכו וזרת רחבו .

39:10  וימלאו בו ארבעה טורי אבן טור אדם פטדה וברקת הטור האחד

39:11  והטור השני נפך ספיר ויהלם

39:12  והטור השלישי לשם שבו ואחלמה

39:13  והטור הרביעי תרשיש שהם וישפה מוסבת משבצות זהב במלאתם

39:14  והאבנים על שמות בני ישראל הנה שתים עשרה על שמותם פתוחי חותם איש על שמו לשנים עשר שבט

39:15  ויעשו על החשן שרשרות גבלות מעשה עבות זהב טהור

39:16  ויעשו שתי משבצות זהב ושתי טבעות זהב ויתנו את שתי הטבעות על שני קצות החשן

39:17  ויתנו את שתי עבתות הזהב על שתי הטבעות על קצות החשן

39:18  ואת שתי הקצות שתי העבתות נתנו על שתי המשבצות ויתנם על כתפות האפוד אל מול פניו

39:19  ויעשו שתי טבעות זהב וישמו על שני קצות החשן על שפתו אשר על עבר האפוד ביתה

39:20  ויעשו שתי טבעות זהב ויתנם על שתי כתפות האפוד מלמטה ממול פניו לעמת מחברתו ממעל לחשב האפוד

39:21  וירכסו את החשן מטבעתו אל טבעת האפוד . . . . . בפתיל תכלת להיות על חשב האפוד . ולא יזח החשן מעל האפוד . . . . . . . . . . כאשר צוה יהוה את משה ויעשו את הארים ואת התמים כאשר צוה יהוה את משה

39:22  ויעשו את המעיל . מעשה ארג כליל תכלת

39:23  ופי המעיל בתוכו כפי תחרא שפה לפיו סביב לא יקרע

39:24  ויעשו על שולי המעיל רמוני תכלת וארגמן ותולעת שני ושש משזר

39:25  ויעשו פעמוני זהב טהור ויתנו את הפעמונים . . על שולי המעיל סביב בתוך הרמונים

39:26  פעמון זהב ורמון פעמון זהב ורמון על שולי המעיל סביב לשרת כאשר צוה יהוה את משה

39:27  ויעשו את הכיתנת שש מעשה ארג לאהרן ולבניו

39:28  ואת המצנפת שש ואת פארי המגבעות שש ואת מכנסי הבד שש משזר

39:29  ואת האבניט שש משזר תכלת וארגמן ותולעת שני מעשה רקם כאשר צוה יהוה את משה

39:30  ויעשו את ציץ נזר הקדש זהב טהור ויכתבו עליו מכתב פתוחי חותם קדש ליהוה

39:31  ויתנו עליו פתיל תכלת לתת על המצנפת מלמעלה כאשר צוה יהוה את משה

39:32  ותכל כל עבדת המשכן אהל מועד ויעשו בני ישראל . כאשר צוה יהוה את משה כן עשו

39:33  ויביאו את המשכן אל משה את האהל ואת כל כליו קרסיו קרשיו בריחיו עמדיו ואדניהם

39:34  ואת מכסה עורת האילים המאדמים ואת מכסה עורת התחשים ואת פרכת המסך

39:35  את ארון העדות ואת בדיו ואת הכפרת

39:36  את השלחן ואת כל כליו ואת לחם הפנים

39:37  את המנורה הטהרה ואת נרתיה נרת המערכה ואת כל כליה ואת שמן המאור

39:38  את מזבח הזהב ואת שמן המשחה ואת קטרת הסמים ואת מסך פתח האהל

39:39  את מזבח הנחשת ואת מכבר הנחשת אשר לו ואת בדיו ואת כל כליו את הכיור ואת כנו

39:40  את קלעי החצר ואת עמודיה ואת אדניה ואת המסך לשער החצר את מיתריה ואת יתדתיה ואת כל כלי עבדת המשכן לאהל מועד

39:41  את בגדי השרד לשרת בקדש ואת בגדי הקדש לאהרן הכהן ואת בגדי בניו לכהן

39:42  ככל אשר צוה יהוה את משה כן עשו בני ישראל את כל העבדה

39:43  וירא משה את כל המלאכה והנה עשו אתה כאשר צוה יהוה כן עשו ויברך אתם משה