Kapingamarangi - II Peter

Chapter 1

1:1  Mai Simon Peter, tangada hai-hegau ge tangada agoago-hagau ni Jesus Christ, ang-gi digau ala guu-kae di hagadonu mai i-di tonu o tadau God, mo tadau Dangada Hagamouli go Jesus Christ, ala guu-kae di hagadonu hagalabagau be madau hagadonu.

1:2  Tumaalia mo-di noho i-di aumaalia gi-tomo-aga i godou baahi, i-di-godou iloo God mo tadau Dagi go Jesus.

1:3  Nia mogobuna o God la-ne-gaamai gi gidaadou nia mee huogodoo ala e-hiihai ginai bolo gi-mouli-ai gidaadou madammaa mai tadau iloo a-Mee dela ne-gahigahi gidaadou gi-hai-mee ngaadahi gi ono madamada mo ono humalia.

1:4  Deenei dana hai ne-gaamai gi gidaadou ana wanga-dehuia aamua ge hagalabagau ala ne-hagababa-mai gi gidaadou. Nia wanga-dehuia aanei la-ga-kila-aga i godou baahi, goodou gaa-mee di-haga-paa gi-daha mo nia hiihai huaidu o henuailala, gei goodou ga-hai-mee gi-di mouli o God.

1:5  Mai di hadinga deenei, goodou hagamahi gi-haga-punia nia haihai humalia gi godou hagadonu, haga-punia godou kabemee gi nia haihai humalia,

1:6  haga-punia di iloo di benebene godou huaidina gi di kabemee, haga-punia di manawa-hagakono i-nia madagoaa haingadaa gi di-godou iloo di benebene godou huaidina, haga-punia di manawa madammaa gi-di manawa-hagakono i-nia madagoaa haingadaa,

1:7  haga-punia di manawa dumaalia gi godou mouli madammaa, haga-punia di aloho gi godou manawa dumaalia.

1:8  Idimaa, aanei nia haihai mouli humalia belee hai-mee ginai goodou; maa goodou gaa-honu i-nia maa, nia maa gaa-hai godou mouli gii-kila mo di huwa humalia, i godou iloo tadau Dagi go Jesus Christ.

1:9  Tangada dela hagalee hai-mee gi nia mee aanei, geia tangada deegida, gu-de-langahia bolo ono huaidu mai-i-mua la-gu-haga-madammaa gi-daha.

1:10  Malaa, ogu duaahina-nei, hagamahi gi-nonua heia di gahigahi mo-di hilihili a God la-gii-dohu gaa-hana-hua beelaa. Maa goodou gaa-hai beenei, gei goodou ga-hagalee kili gi-daha godou hagadonu.

1:11  Idimaa, deenei di hai gaa-mee di-gowadu gi goodou di-tonu dogomaalia e-ulu i Tenua e-dee-odi dela e-hai-mee ginai tadau Dagi, Tangada Hagamouli Jesus Christ.

1:12  Malaa, au ga-haga-langahia-adu gi goodou i-di hai o-nia mee aanei i-nia madagoaa huogodoo, ma e-aha maa goodou gu-iloo, gei guu-dogi gii-mau gi-nia agoago e-donu ala guu-kae go goodou.

1:13  Au e-hagamamaanadu bolo ma di mee e-donu mai dogu baahi i dogu hagalangalangahia-adu nia mee aanei i dogu madagoaa e-mouli-iei au.

1:14  Idimaa, au gu-iloo bolo dogu huaidina la-gu-hoohoo ga-hagalee, be-di hai o tadau Dagi go Jesus Christ dela ne-haga-modongoohia-mai gi-di-au.

1:15  Malaa, au e-hai agu mee ala e-mee di-gowadu gi goodou di mee e-haga-langahia goodou nia mee aanei i-nia madagoaa huogodoo i-muli dogu made.

1:16  Gimaadou hagalee haga-mau madau agoago mai i-nia helekai tilikai adu gi goodou, i-di aali o-di hanimoi o tadau Dagi go Jesus Christ. Gimaadou guu-mmada gi madau golomada gi dono aamua.

1:17  Gimaadou nogo i-golo i-di madagoaa God Tamana ne-wanga gi Mee di aamua, mo-di madamada, mai i-di lee o Tamana dela ne-haneia gi-hongo Jesus mai i-di gowaa madamada huoloo, e-helekai, “Deenei go dagu Dama e-aloho-iei Au, e-tene huoloo ginai au.”

1:18  Gimaadou ne-longono di lee e-haneia i-di langi, i-di madau madagoaa nogo madalia a-Mee i-hongo di gonduu dabu.

1:19  Malaa, gimaadou gu-hagalongo gi-nia haga-modongoohia ala ne-agoago-mai go nia soukohp gu-iloo bolo nia maa e-donu. E-humalia goodou gii-mmada ginai, gei gi-hagalabagau-ina, idimaa, ma e-hai gadoo be-di maalama dela e-maahina i-lodo di gowaa bouli, gaa-dae-loo gi-di maalama o-di luada, gei di maalama o-di heduu luada ga-maahina lodo godou manawa.

1:20  Malaa, i-mua nia mee huogodoo, deenei di-godou mee e-hai gi-langalangahia, bolo tangada e-mee di-haga-donudonu dahi helekai kokohp i-lodo di Beebaa-Dabu ai.

1:21  Idimaa, dahi helekai kokohp e-hanimoi i-di hiihai o tangada ai, gei di Hagataalunga-Dabu dela e-huwahuwa nadau helekai mai baahi o God.

Chapter 2

2:1  Nia soukohp dilikai gu-kila-aga i-baahi digau Israel, ga-kila-aga labelaa i godou baahi. Digau agoago tilikai ga-hagahuaidu goodou, gaa-hai nadau agoago tilikai, gei digaula ga-haga-de-iloo di Tagi dela ne-haga-mouli ginaadou, gei digaula gaa-bida hagahuaidu ginaadou.

2:2  Malaa, digau dogologo ga-daudali nadau hangaahai huaidu. Mai i nadau hangaahai, gei nia daangada ala i-golo ga-leelee huaidu i-di ala haga-mouli dela e-donu.

2:3  Digau agoago tilikai aalaa, la digau hagagailaa, digaula ga-maluagina i nadau hagi-adu gi goodou nia kai-tilikai. Tangada dela ga-hagi-aga digaula la-gu-togomaalia mai taamada, gei tangada dela ga-hagahuaidu digaula, le e-noho-hua ge kanakana!

2:4  God hagalee dumaalia gi digau di-langi ala gu-ihala. Mee ne-kili digaula gi-lodo di gowaa hagaduadua, di gowaa dela e-lawalawa-ai digaula i-lodo di bouli, e-tali di Laangi Hagi-aga.

2:5  God digi dumaalia ang-gi digau i-mua, ge-Ia ne-wanga toloo gi digau ala e-de-hagalongo. Mee ne-haga-dagaloaha a Noah dela ne-hagadele di mouli e-donu, mo ono ehoo dogohidu.

2:6  God gu-oho nia waahale Sodom mo Gomorrah, ge-Ia ne-dudu nia maa gii-wwele. Mee ne-hai digaula beelaa, belee haga-modongoohia di hai dela ma-ga-hai ang-gi digau de-hagalongo.

2:7  God gu-haga-dagaloaha Lot, taane humalia, dela guu-kae nia hagamada haingadaa mai i-nia haihai huaidu o digau de-hagalongo.

2:8  Taane humalia deenei e-noho i-baahi digaula i-nia laangi huogodoo, gu-gidee, gu-longono i nadau haihai huaidu, gei mee gu-lodo-huaidu huoloo.

2:9  Malaa, Dimaadua e-iloo dana hai dela e-haga-dagaloaha digau ala e-mouli-madammaa gi-daha mo nadau hagamada, ge e-iloo labelaa dana hai dela e-daahi digau huaidu i-lodo di hagaduadua, gaa-dae-loo gi-di Laangi Hagi-aga,

2:10  kaedahi la-go digau ala e-haga-gila-aga nia hiihai huaidu o nadau huaidina, ge e-haga-balumee nia mogobuna dagi o God. Digau agoago tilikai aanei le e-hagamamaanadu-hua ang-gi ginaadou ge e-hagamuamua. Digaula hagalee hagalaamua digau madamada ala i-nua, gei e-leelee huaidu i digaula.

2:11  Digau-di-langi koia e-maaloo ge koia e-mahi i-nia gau agoago dilikai aanei, gei digaula hagalee leelee huaidu i digaula i-mua nia hadumada o Dimaadua.

2:12  Gei digau aanei e-daudali-hua nadau hiihai, digaula e-hai gadoo be nia manu lodo-geinga ala ne-haanau belee kumi e-daaligi. Digaula e-leelee huaidu i-nia mee ala e-de-iloo-ginaadou, gei digaula ga-daaligi gadoo be nia manu lodo-geinga.

2:13  Digaula ga-hagaduadua gi-di hagaduadua dela nogo hai go digaula gi-nia daangada. Deenei di-nadau tene e-hai nia mee huaidu huogodoo gi-modongoohia bolo aanei nia mee ala e-hiihai ginai nadau huaidina. Digaula e-haga-langaadia ge hagahuaidu godou hagamiami i-di nadau madalia goodou e-miami, gei e-hiihai e-halahalau goodou i-di madagoaa deelaa!

2:14  Digaula hagalee halahala nadau mee, ala-hua e-hiihai gi-di huaidu hai be-di manu. Nadau hiihai e-hai nia huaidu la-hagalee dohu ginai. Digaula e-dagi digau paagege gi-lodo di huaidu. Nadau manawa e-hiihai huoloo gi-di hagagailaa. Digaula guu-noho i-lala di haga-halauwa a God!

2:15  Digaula gu-diiagi di ala huudonu gu-de-gidee-ginaadou. Digaula gu-daudali di ala o Balaam, tama-daane Beor, dela ne-aloho i-nia bahihadu ala ne-kumi koia i dono hai nia mee hala,

2:16  gei guu-wou ginai i ana hai huaidu. Dana ‘donkey’ dela e-deemee di-leelee, gu-leelee i-di lee dangada, gei guu-hai soukohp deelaa gii-lawa ana mee huaidu.

2:17  Digau agoago tilikai aanei le e-hai gadoo be nia monowai ne-maangoo, ge e-hai gadoo be nia gololangi ala e-angiangina i-di madangi. God gu-hagatogomaalia di lohongo digaula i-di gowaa llala bouli dongoeho.

2:18  Idimaa, digaula e-hai nadau kai ono hadinga ai, hagaamu ginaadou, gei e-hai nia hai huaidu o tuaidina belee hai digau ala ne-daamada ne-loomoi gi-daha mo digau ala e-noho i-lodo di hala, gii-too gi-lodo di huaidu.

2:19  Digaula e-hagababa gi digaula di noho i-di aumaalia, gei ginaadou la nia hege o nia mee ala ga-daaligi ginaadou, idimaa, tangada la di hege ni nia mee ala e-noho-ieia no-lala.

2:20  Maa nia daangada guu-huli gi-daha mo nia mogobuna huaidu o henuailala i-di nadau donu ang-gi tadau Dagi, go tadau Haga-mouli go Jesus Christ, gaa-kae labelaa go nia mogobuna aanei, nia daangada ala beenei la-koia gu-huaidu i-di hagaodi gi-muli i ginaadou i-di matagidagi.

2:21  Ma koia e-humalia ang-gi digaula di-de-iloo di ala dela e-donu, e-koia e-humalia i-di iloo di-maa, gaa-lawa gaa-huli gi-daha mo taganoho dabu dela ne-wanga gi digaula.

2:22  Nia mee ala ne-hai ang-gi digaula le e-haga-modongoohia-aga nia bida-agoago aanei bolo e-donu, “Di paana le e-gai labelaa ono lualua” gei: “Di biigi dela gu-gaugau, le e-hana labelaa e-haga-dagadaga i-lodo nia gulugulua.”

Chapter 3

3:1  Ogu ihoo hagaaloho-nei, deenei dagu lua lede adu gi goodou. I-lodo nia lede aanei, au e-hagamahi e-haga-maalama-aga goodou i-nia hagamaanadu madammaa i dogu haga-langahia-adu gi goodou nia mee aanei.

3:2  Goodou gi-langahia nia helekai nia soukohp ala ne-helekai-ai i-mua-loo, mo taganoho o Tagi go Tangada Hagamouli ne-agoago-adu go godou gau agoago-hagau.

3:3  I-mua nia mee huogodoo, gei goodou e-hai gi-iloo bolo i-lodo nia laangi ala ga-hoohoo gi-di hagaodi, gei nia daangada ga-kila-aga, gaa-bida dagi nadau mouli gi nadau hiihai huaidu. Digaula gaa-hai dadaagala i goodou,

3:4  ga-heheeu boloo, “Mee digi hagababa-adu bolo Ia e-hanimoi? Mee i-hee? Madau maadua-mmaadua guu-mmade, nia mee huogodoo e-hai-hua be nia maa mai taamada henuailala!”

3:5  Digaula hagalee hiihai e-daahi nia helekai a God ala ne-hai i-mua, ala ne-hai di langi mo henuailala. Henuailala ne-hai gi-nia wai, gei ne-hai mai i-nia wai,

3:6  gei nia wai labelaa ala ne-mooho-ai henuailala i-mua, go nia wai o toloo damana.

3:7  Gei di langi mo henuailala dolomeenei, le e-benebene go nia helekai a God belee oho go di ahi. E-dugu gi-di Laangi Hagi-aga, di laangi e-hagahuaidu-ai digau de-hagalongo.

3:8  Ogu ihoo hagaaloho-nei, goodou gi-hudee de-langahia di mee deenei: Di laangi e-dahi mo nia ngadau e-mana-(1,000) le e-hai-hua be-di mee e-dahi i-baahi o God.

3:9  Dimaadua la-hagalee duai dana haga-gila-aga dana hagababa, be-di hai o-nia hagamaanadu o-hunu daangada. Gei Mee e-hagakono dono manawa i-goodou, idimaa, Mee hagalee hiihai bolo tangada e-dahi e-hudu gi-daha, Mee e-hiihai bolo nia daangada huogodoo gi-maalui gi-daha mo nadau huaidu.

3:10  Di Laangi o Tagi le e-hanimoi gadoo be tangada gaiaa. I-di Laangi deelaa, gei di langi ga-hagalee i-di madagoaa di lee haga-madagudagu-dangada gaa-hai, nia mee huogodoo i-di gili di langi gaa-wwele i-di ahi, ga-mooho, gei henuailala mo nia mee huogodoo ala i-no-lodo ga-hagalee.

3:11  Maa nia mee aanei la-ga-mooho beenei, gei goodou la-ga-mouli behee dolomeenei? Godou mouli gii-dabu ang-gi God, gi-dugu-anga gi Mee

3:12  i-di godou madagoaa dela e-talitali di laangi o God. Goodou heia nia mee ala e-mee gi-limalima-mai di-maa, di Laangi dela e-wele di langi i-nua, ga-mooho, gei nia mee o lodo di ahiaalangi ga-waiwai i-di welengina.

3:13  Gidaadou e-talitali nia mee a God ala ne-hagababa, aalaa go di langi hoou mo henuailala hoou, di gowaa dela gaa-noho-ai nia daangada ala e-hai nia mee e-donu.

3:14  Ogu ihoo hagaaloho-nei, di-godou madagoaa dela e-talitali di Laangi deelaa, goodou hagamahi gi-madammaa i-mua o God, gii-noho i-di aumaalia i dono baahi.

3:15  Goodou mmada gi-humalia gi-di manawa-hagakono o Dimaadua adu gi goodou, i dono gowadu gi goodou di madagoaa humalia e-haga-mouli-ai goodou, be-di hai o tadau ihoo hagaaloho go Paul dela ne-hihi-adu gi goodou, e-hai-hegau i-di iloo-mee dela ne-wanga go God gi mee.

3:16  Aanei nia mee e-helekai-iei mee i-lodo ana lede huogodoo. Nia mee haingadaa i-golo i-lodo ana lede. Digau ala e-de-kabemee mo digau ala e-manawa-logo e-haga-donudonu nia maa gi-hai-gee, be di-nadau hai dela e-hai labelaa gi-nia helekai i-lodo di Beebaa-Dabu. Malaa, digaula e-bida oho ginaadou.

3:17  Ogu ihoo hagaaloho, goodou gu-iloo nia mee aanei. Pula i goodou, gi-dee dagi-hua goodou gi-daha go nia agoago hai-gee o-nia daangada huaidu aanei, gaa-too-ai goodou gi-daha mo di-godou lohongo humalia.

3:18  Gei goodou gi-hagamahi i-di godou haga-tomo-aga i-lodo tumaalia mo di kabemee o tadau Dagi, go tadau Dangada Hagamouli, go Jesus Christ i godou baahi. Di hagaamu mo-di hagalabagau gi-madalia a-Mee, dolomeenei, gaa-hana-hua beelaa. Amen.