LinVB - II Peter

Chapter 1

1:1  Ngáí Simóni Pétro, mosáleli mpé apóstolo wa Yézu Krístu, natíndélí bínó mbóte. Bísó na bínó tozwí boyambi bwa motúya monéne, mpô ya bosémbo bwa Nzámbe mpé Mobíkisi wa bísó Yézu Krístu.

1:2  Bótónda na ngrásya mpé na bobóto, áwa boyébí Nzámbe mpé Mokonzi wa bísó Yézu.

1:3  Na ngúyá ya yě enéne Nzámbe akabélí bísó mánso masengélí na bísó mpô tózala na bomoi mpé tósálela yě. Alakísí bísó náni abyángí bísó na nkémbo mpé na ngúyá ya yě.

1:4  Na nkémbo mpé na ngúyá ya yě alakélí bísó makabo malekí manéne mpé akokísí mangó. Bokokíma bôngó mpósá ya mabé maye mazalí kobébisa mokili, mpé bokosangana na bomoi bwa Nzámbe.

1:5  Awa bozalí na boyambi, bóluka kokólisa mabongí ma bínó ; sókó bokólísí mabongí, bókólisa mpé mayéle ;

1:6  sókó bozwí mayéle, bóyéba kokanga mitéma ; sókó boyébí kokanga mitéma, bózala mpé na moléndé ; sókó bozalí na moléndé, bósálela Nzámbe.

1:7  Awa bokosálela Nzámbe, bósálisana bŏ bandeko, sókó bozalí kosálisana bŏ bandeko, bólinga mpé bato bánso.

1:8  Ya sôló, sókó bozalí na mabongí mâná mánso mpé botóndí na mangó, mabongí mâná makosála ’te, áwa boyébí Mokonzi wa bísó Yézu Krístu, bóbimisa misálá mpé bóbóta mbuma.

1:9  Moto azalí na mabo­ngí mâná té, azalí moto wa lolandá, moto akomónoko malámu té : abósání ’te bapétólí yě na masúmu ma yě ma kala.

1:10  Yangó wâná, bandeko, bósála makási mpô ’te bóndima ’te Nzámbe abyángí mpé aponí bínó. Sókó bosálí bôngó, bokokwéya o lisúmu té.

1:11  Bôngó, ntembe té, bakolingisa bínó ’te bóyíngela o Bokonzi bwa lobíko bwa Mokonzi mpé Mobíkisi wa bísó Yézu Krístu.

1:12  Nakotíka té kokundolela bínó mambí maye ntángo ínso, atâ bosílí boyébí mangó mpé bopikámí o bosôló boye boyambí.

1:13  Nakanísí ’te nasengélí nákundolela bínó mangó, áwa nazalí naíno na bomoi.

1:14  Nayébí ’te nakoúmela áwa lisúsu míngi té ; Mokonzi wa bísó Yézu Krístu ayébísí ngáí yangó.

1:15  Kasi nakosála makási mánso mpô ’te, atâ nsima ya bokei bwa ngáí, bókoka naíno kokundola matéya mâná o mitéma mya bínó, mbala na mbala.

1:16  Awa toyébísákí bínó ’te Mokonzi wa bísó Yézu Krístu akozónga na ngúyá ya yě, tolandákí masoló ma mpámba té, maye maútí na mayéle ma bato ; kasi bísó mŏ kó tomónókí nkémbo ya yě na míso.

1:17  Ya sôló, Nzámbe wa nkémbo mpé wa bokonzi, óyo apésí yě lokúmu na nkémbo, alobí na yě maloba maye : Oyo azalí mwána wa ngáí wa bolingo, nakosepelaka yě míngi.

1:18  Bísó mŏ kó toyókákí loláká loye loútákí o likoló, ntángo tozalákí na yě o ngómbá esá­ntu.

1:19  Yangó wâná tozalí koyamba sôló mpenzá maloba ma baproféta ; maloba ma bangó mazalí lokóla mwínda mozalí kongenge o káti ya molílí. Malámu bótála mwínda mwangó téé ntóngó ekotána, mpé monzóto mwa ntóngó mokonge­nge o mitéma mya bínó.

1:20  Libosó mpenzá bóyéba ’te, na mayéle ma yě mŏ kó, moto mŏ kó té akokí kolimbola liloba lyŏ kó lya proféta, liye likomámí o Minkandá Misántu.

1:21  Liloba lya proféta lyŏ kó té lilobámí mpô ya ndinga ya moto ; bobélé Elímo Sántu atíndákí bato básakola o nkómbó ya Nzámbe.

Chapter 2

2:1  Baproféta ba lokutá bazángákí té o ntéi ya bato ; sé bôngó, batéyi ba lokutá bakobima o ntéi ya bínó : bangó bakobimisa mangó­mbá ma lokutá, bakobébisa mitéma mya bato, mpé bakowángana Mokonzi óyo asikólí bangó. Bôngó ba­ngó mŏ kó bakomílukela liwá nokí mpenzá.

2:2  Bato baíké bakolanda ezalela ya bangó ya mobúlú, bakotíka nzelá ya bosôló mpô ya bangó.

2:3  Mpô ya mpósá ya mbóngo bakokósa bínó na maloba ma lokutá mpé bakobótolo bínó bilóko. Basílí kokáta likambo lya bangó út’o kala. Liwá lya bangó likoúmela lisúsu míngi té.

2:4  Ntángo bǎnzelú basálákí lisúmu, Nzámbe abíkísákí bangó té, kasi abwákí bangó o límfelo, o lo­bwákú la molílí. Akangísí bangó kúná kín’o mokolo akokáta makambo ma bangó.

2:5  Ayókélákí mpé bato ba kala mawa té : atíndí Mpela Enéne mpé abomí bato babóyí yě. Abíkísí bobélé bato mwambe. Nówe, ntóma wa bosémbo, azalákí o ntéi ya bangó.

2:6  Lokóla ndakisa o míso ma bato bakoyâ nsima mpé bakobóya Nzámbe, abomí bingumbá Sódoma na Gómora, akómísí byangó mputulú.

2:7  Kasi abíkísí Lót, moto wa bosémbo, óyo azalákí koyóka motéma mpási na bomóni mobúlú mwa bato babé.

2:8  Yě azalákí kofánda o káti ya bangó, mpé mokolo na mokolo azalákí komóno mpé koyóka makambo mabé ma bangó. Makambo maye mazalákí koyókisa motéma mwa yě mwa bosémbo mpási.

2:9  Sôló, Mokonzi akokí kobíkisa o minyóko bato balingí yě ; akokí mpé kobátela bato babé mpô ’te ápésa bangó etúmbu o mokolo mwa likambo.

2:10  Kasi libosó akotúmbola bato bakolandaka mpó­sá ebé ya nzóto mpé bakokínolaka Bokonzi bwa yě. Bazalí bato batóndí na loléndo mpé na lofúndo, bakobángaka té kotúka bǎnzelú.

2:11  Atâ bǎnzelú balekí bangó na ngúyá mpé na bokási, bakofúndaka tŏ bakotóngoko bangó o míso ma Mokonzi té.

2:12  Kasi bato baye ba lofúndo bakotiolaka maye bayébí té. Bazalí lokóla nyama izángí mayéle, iye ikobótamaka mpô ’te bato báka­nga mpé báboma yangó. Sé bôngó, bangó mpé bakokúfa mpô ya mabé ma bangó.

2:13  Bakoyóka mpási mpô ya mpási iye bayókísákí bato basúsu. Bakoyókaka elengi na bolandi mpósá ebé ya bangó o míso ma bato ; bazalí bato ba mbindo, babébá kala. Awa bakolíaka na bínó esíká yŏ kó, ba­kolukaka kotónda na bilóko mpé kokósa bínó.

2:14  Míso ma bangó makolúlaka sé mambí ma bokáli, bakolembeke kosála masúmu té, bakokósaka bato ba motéma motaú. Mitéma mya bangó mimeséní na lokósó la mbóngo. Mabé makwêlí bangó sôló !

2:15  Awa batíkí nzelá sémba, babúngámí na bolandi nzelá ya Balame, mwána wa Béor : yě awélákí mbóngo eye azwí na makambo mazángí bosémbo.

2:16  Kasi bapálélí yě mpô ya mabé asálákí : mpúnda, nyama mpámba, ebandí koloba lokóla moto mpô ’te proféta átíka makambo ma bozóba.

2:17  Bato baye bazalí lokóla máziba makaúká, lokóla mampata matí­ndámí na mompepe mwa ekumbaki. Bakosúka o káti ya molílí makási.

2:18  Na maloba ebelé ma lofúndo mazángí ntína mpé na ezalela ya baye bakolandaka mpósá ya nzóto bakolukaka kosénginya baye batíkí nzelá ya lokutá kala míngi té.

2:19  Bakolakelaka bangó bonsómí, kasi bangó mŏ kó bazalí baómbo ba maye makobébisaka bato ; mpámba té, moto akangémí na elóko, akómí moómbo wa yangó.

2:20  Ya sôló, libosó bayébákí Mokonzi Yézu Krístu Mobíkisi, mpé bakímákí makambo mabé ma nsé ; kasi sikáwa bazóngélí makambo mâná lisúsu mpé bakangémí na mangó, bôngó bakití o mabé malekí mabé ma libosó.

2:21  Malámu sókó bayébákí nzelá ya bosémbo té, kasi bayébí yangó : bazwákí mobéko mosántu mpé batíkí mwangó lisúsu.

2:22  Esálémí na bangó sôló lokóla ekolobamaka o eyélé eye : Mbwá esánzí bilóko, na nsima eyéí kolía byangó lisúsu, mpé : Ngúlu esukwámí bobélé sikáwa, ekeí kobílingana o potopóto lisúsu.

Chapter 3

3:1  Bandeko ba bolingo, bótála monkandá moye mwa míbalé nakomélí bínó. O minkandá míbalé namekí kokundolela bínó ma­téya maye bosílí boyókí, mpô ’te bózala bato ba mayéle ma sôló.

3:2  Nalingí ’te bóku­ndola o mitéma maloba maye baproféta basántu basakóláká, ná mpé mobéko mwa Mokonzi mpé Mobíkisi moye bapóstolo batéyákí.

3:3  Bóyéba malámu ’te o mikolo mya nsúka bato bakoyâ baye bakolanda mpósá ya mitéma mya bangó, bakotiola bato bánso.

3:4  Bakotúna : « Wápi moto óyo alakélákí ’te ako­yâ na nkémbo ? Bankóko ba bísó basílí bawéí, kasí mánso mazalí kotíkala sé lokóla mazalákí út’o libandela lya mokili. »

3:5  Bangó babóyí koyéba na nkô ’te o libandela likoló lizaláká, kasi mabelé mazaláká o nsé ya mái ; na Liloba lya yě Nzámbe abimísákí mabelé út’o nsé ya mái.

3:6  Na nsima, sé mpô ya Liloba lya Nzámbe mabelé mazindákí o mái.

3:7  Sikáwa, mpô ya Liloba lya yě, Nzámbe akobátelaka likoló na nsé téé mokolo akozíkisa bínso na móto. O mokolo mwangó akokáta makambo ma bato bánso mpé akosúkisa baye babóyí yě.

3:8  Kasi, bandeko ba bolingo, bóbósana té ’te o míso ma Mokonzi mokolo mŏ kó mozalí lokóla mibú nkóto yŏ kó, mpé mibú nkóto yŏ kó mizalí lokóla mokolo mŏ kó.

3:9  Bato basúsu bakanísí ’te Mokonzi azalí koúmisa eleko ya kokokisa maye alakélákí ; ezalí bôngó té. Azalí sé kokanga motéma mpô ya bínó, mpô alingí ’te bato bánso bábóngola mitéma, bôngó moto mŏ­kó ábúngama té.

3:10  Kasi Mokolo mwa Mokonzi mokoyâ lokóla moyíbi : mokolo môná etando ya likoló ekolímwa na lokitó la nsómo, mpé bilóko bya likoló bínso bikobéba na móto ; mokili na misálá mya mokili mikomónono lisúsu té.

3:11  Awa bilóko bínso bikosíla sé bô­ngó, bókéba ’te bózala na ezalela esá­ntu ebongí na bato ba Nzámbe.

3:12  Bózila boyéi bwa Mokolo mwa Nzá­mbe, bótía moléndé ’te mokolo môná móyâ nokí. Mokolo môná likoló likozíka na móto, mpé bilóko bínso bikozíka mpé bikonyángwa mpô ya móto makási.

3:13  Kasi lokóla alakélákí bísó, tozalí kozila likoló lya sika mpé mokili mwa sika esíká bosémbo bokozala.

3:14  Yangó wâná, bandeko ba bolingo, áwa bozalí kozila mokolo môná, bótía moléndé mpô ’te bózala na mbindo té, na mabé mŏ kó mpé té, kasi bókútana na Nzámbe na bobóto.

3:15  Bóyéba ’te Mokonzi wa bísó azalí kokanga motéma, apésí bínó bôngó ngrásya mpô ’te bóbíka. Pólo, ndeko wa bísó wa bolingo, akomélí bínó bobélé bôngó na bwányá Nzámbe apésí yě.

3:16  O minkandá mya yě mínso, esíká akotéyaka mambí maye, akolobaka bobélé bôngó. Makambo masúsu yě akomí makopésaka batángi basúsu mwâ kwókósó. Bôngó bato bayékólá té mpé baye bazalí motéma motaú, bakobóngolaka ntína ya maloba mâná ; bakosálaka sé bôngó na Minkandá Misántu misúsu, yangó wâná bazalí komíkitisa o likambo.

3:17  Bandeko, nakébísí bínó. Bókéba ’te baye babúngámí bábénda bínó mpé té ; bákwêisa bínó té, bínó bato bozalí kotía moléndé.

3:18  Ngrásya ékóla o mitéma mya bínó, bókóla mpé o boyébi Mokonzi mpé Mobíkisi wa bísó Yézu Krístu : Nkémbo na yě sikáwa kín’o bileko bínso ! Amen.