Esperanto - Mark - 15

15:1  Tuj matene la ĉefpastroj, farinte interkonsilon kun la pliaĝuloj kaj skribistoj kaj la tuta sinedrio, ligis Jesuon kaj forkondukis lin kaj transdonis lin al Pilato.

15:2  Kaj Pilato demandis lin: Ĉu vi estas la Reĝo de la Judoj? Kaj responde li diris al li: Vi diras.

15:3  Kaj la ĉefpastroj multe lin akuzis.

15:4  Kaj Pilato denove lin demandis: Ĉu vi respondas nenion? vidu, pri kiom da aferoj oni vin akuzas.

15:5  Sed Jesuo ankoraŭ nenion respondis, tiel ke Pilato miris.

15:6  Ĉe tiu festo li kutimis liberigi al ili unu malliberulon, iun ajn, kiun ili pripetis.

15:7  Kaj estis unu, nomata Barabas, katenita kun la ribelintoj, kiuj en la ribelo faris mortigon.

15:8  Kaj suprenveninte, la homamaso komencis peti lin pri tio, kion li kutimis fari por ili.

15:9  Kaj Pilato respondis al ili, dirante: Ĉu vi volas, ke mi liberigu al vi la Reĝon de la Judoj?

15:10  Ĉar li eksciis, ke pro envio la ĉefpastroj transdonis lin.

15:11  Sed la ĉefpastroj instigis la homamason, ke prefere li liberigu al ili Barabason.

15:12  Kaj Pilato, denove respondante, diris al ili: Kion do mi faru al tiu, kiun vi nomas Reĝo de la Judoj?

15:13  Kaj ili denove ekkriis: Krucumu lin.

15:14  Kaj Pilato diris al ili: Kial? kian malbonon li faris? Sed ili des pli ekkriis: Krucumu lin.

15:15  Kaj Pilato, volante kontentigi la homamason, liberigis al ili Barabason, kaj, skurĝinte Jesuon, transdonis lin, por esti krucumita.

15:16  Kaj la soldatoj forkondukis lin en la korton, kiu estas la Pretorio, kaj kunvokis la tutan kohorton.

15:17  Kaj ili vestis lin per purpuro, kaj plektinte dornan kronon, surmetis ĝin al li;

15:18  kaj ili komencis aklami lin: Saluton, Reĝo de la Judoj!

15:19  Kaj ili frapis lian kapon per kano, kaj kraĉis sur lin, kaj ekgenuinte, kliniĝis al li.

15:20  Kaj mokinte lin, ili demetis de li la purpuran veston, kaj surmetis liajn proprajn vestojn. Kaj ili elkondukis lin, por krucumi lin.

15:21  Kaj ili devigis al servado unu preterpasanton, venantan de la kamparo, Simonon, Kirenanon, patron de Aleksandro kaj Rufo, ke li portu lian krucon.

15:22  Kaj ili kondukis lin al la loko Golgota, tio estas, Loko de Kranio.

15:23  Kaj ili donis al li vinon kun mirho enmiksita, sed li ne akceptis ĝin.

15:24  Kaj ili krucumis lin kaj dividis inter si liajn vestojn, ĵetante lotojn sur ili, kion ĉiu el ili ricevu.

15:25  Kaj estis la tria horo, kaj ili krucumis lin.

15:26  Kaj la surskribo de lia akuzo estis surskribita: LA REĜO DE LA JUDOJ.

15:27  Kaj kun li ili krucumis du rabistojn, unu dekstre kaj unu maldekstre de li.

15:28  Kaj plenumiĝis la Skribo, kiu diras: Kaj li estis alkalkulita al krimuloj.

15:29  Kaj la preterpasantoj insultis lin, balancante la kapon, kaj dirante: Ha, ha! vi, kiu detruas la sanktejon kaj konstruas ĝin en la daŭro de tri tagoj,

15:30  savu vin, deirante de la kruco.

15:31  Tiel same ankaŭ la ĉefpastroj, mokante inter si kun la skribistoj, diris: Aliajn li savis; sin mem li ne povas savi.

15:32  La Kristo, la Reĝo de Izrael, deiru ja nun de la kruco, por ke ni vidu kaj kredu. Kaj tiuj, kiuj estis krucumitaj kun li, insultis lin.

15:33  Kaj kiam venis la sesa horo, fariĝis mallumo sur la tuta lando ĝis la naŭa horo.

15:34  Kaj je la naŭa horo Jesuo kriis per laŭta voĉo: Eloi, Eloi, lama sabaĥtani; tio estas: Mia Dio, mia Dio, kial Vi forlasis min?

15:35  Kaj iuj el la apudstarantoj, aŭdinte, diris: Jen li vokas Elijan.

15:36  Kaj unu kuris, kaj plenigis spongon per vinagro, kaj metinte ĝin sur kanon, donis al li trinki, dirante: Lasu; ni vidu, ĉu venos Elija, por depreni lin.

15:37  Sed Jesuo, eliginte laŭtan krion, ellasis for la spiriton.

15:38  Kaj la kurteno de la sanktejo disŝiriĝis en du pecojn de supre ĝis malsupre.

15:39  Kaj kiam la centestro, kiu apudstaris kontraŭ li, vidis, ke li tiamaniere ellasis for la spiriton, li diris: Vere ĉi tiu viro estis Filo de Dio.

15:40  Estis ankaŭ virinoj, rigardantaj de malproksime, inter kiuj estis Maria Magdalena, kaj Maria, la patrino de Jakobo la malgranda kaj de Joses, kaj Salome;

15:41  kiuj sekvis lin, kiam li estis en Galileo, kaj servadis al li; kaj multaj aliaj virinoj, kiuj suprenvenis kun li en Jerusalemon.

15:42  Kaj kiam jam vesperiĝis, pro tio, ke estas la Preparado, tio estas, la tago antaŭ sabato,

15:43  venis Jozef el Arimateo, honorinda konsilanto, kiu mem atendadis la regnon de Dio; kaj li kuraĝe eniris al Pilato, kaj petis la korpon de Jesuo.

15:44  Kaj Pilato miris, ĉu li jam mortis; kaj alvokinte la centestron, li demandis lin, ĉu li de longe estas mortinta.

15:45  Kaj sciiĝinte de la centestro, li donis al Jozef la korpon.

15:46  Kaj li aĉetis tolaĵon, kaj deprenis lin kaj envolvis lin en la tolaĵo, kaj metis lin en tombon, kiu estis elhakita el ŝtonego; kaj li alrulis ŝtonon al la enirejo de la tombo.

15:47  Kaj Maria Magdalena, kaj Maria, la patrino de Joses, vidis, kien oni metis lin.