CSlElizabeth - Nahum

Chapter 1

1:1  Пророчество о Ниневии: книга видения Наума сына Елкесеева.

1:2  Бог ревнив и мстяй Господь, мстяй Господь с яростию, Господь мстяй сопостатом Своим и потребляяй сам враги Своя.

1:3  Господь долготерпелив, и велика крепость Его, и очищаяй не очистит Господь: в скончании и трусе путь Его, и облацы прах ног Его:

1:4  запрещаяй морю и изсушаяй е и вся реки опустошаяй. Умалися Васанитида и Кармил, и процветающая Ливана оскудеша:

1:5  горы потрясошася от Него, и холми поколебашася, и ужасеся земля от лица Его, вселенная и вси живущии на ней.

1:6  От лица гнева Его кто постоит? И кто сопротивится во гневе ярости Его? Ярость Его растаевает власти, и камение сотрошася от Него.

1:7  Благ Господь терпящым Его в день скорбения, и знаяй боящыяся Его:

1:8  и в потопе пути скончание сотворит: востающыя и враги Его поженет тма.

1:9  Что помышляете на Господа? Скончание Сам сотворит, не отмстит дважды купно в скорби:

1:10  понеже до основания своего оляденеет, и аки блющь и оплетающься снеден будет, и аки трость сухоты полна.

1:11  Из тебе изыдет помысл на Господа злый, совещаваяй сопротивная.

1:12  Сия глаголет Господь: обладаяй водами многими, и сице разступятся, и слух твой не услышится ктому:

1:13  и ныне сокрушу жезл его от тебе и узы твоя расторгну.

1:14  И заповесть о тебе Господь, не разсеется от имене твоего ктому: от дому бога твоего потреблю изваянная и слиянная положу гроб твой, яко скори (есте).

1:15  Се, на горах ноги благовествующаго и возвещающаго мир: празднуй, Иудо, праздники твоя, воздаждь обеты твоя, зане не приложат ктому еже проити сквозе тебе во обетшание: скончася и извержеся.

Chapter 2

2:1  Взыде вдыхаяй в лице твое, отемляй от оскорбления: усмотри путь, укрепи чресла, возмужай крепостию зело:

2:2  понеже отврати Господь укоризну Иаковлю, якоже укоризну Израилеву: зане отрясающии отрясоша я и лозы их растлиша.

2:3  Оружия силы их от человек, мужы сильныя играющыя во огни: брозды колесниц их в день уготования его, и конницы возмятутся на путех,

2:4  и смятутся колесницы и сплетутся на стогнах: вид их яко свещы огненны, и яко молния протекающая.

2:5  И помянутся старейшины их, и побегнут в день, и изнемогут в пути своем, и потщатся на забрала его, и уготовят предния стражбы своя.

2:6  Врата градная отверзошася, и царства падоша, и имение открыся.

2:7  Сия же восхождаше, и рабыни ея ведяхуся, яко голубицы воркующя в сердцах своих:

2:8  и Ниневиа, аки купель водная воды ея, и тии бежаще не сташа, и не бе взирающаго.

2:9  Расхищаху сребро, расхищаху злато, и не бяше конца имения ея: отяготишася паче всех сосудов вожделенная ея.

2:10  Истрясение и вострясение, и воскипение и сердца сокрушение, и разслабление колен и болезни по всем чреслом, и лице всех, аки опаление котла.

2:11  Где есть виталище львов и пажить сущая львичищем? Камо иде лев, еже влезти тамо львичищу, и не бяше устрашающаго.

2:12  Лев восхити доволная львичищем своим и удави львицам своим, и наполни ловитвы гнездо свое и виталище свое похищения.

2:13  Се, Аз на тя, глаголет Господь Вседержитель, и пожгу дымом множество твое, и львы твоя пояст оружие: и потреблю от земли ловитву твою, и не услышатся ктому дела твоя.

Chapter 3

3:1  О, граде кровей, весь лживый, полн неправды! Не осяжется ловитва.

3:2  Глас бичей и глас труса колес, и коня текуща и колесницы шумящия,

3:3  и конника едуща, и блистающа меча и блистающих оружий, и множества язвеных и тяжкаго падения, и не бяше конца языком ея: и изнемогут в телесех своих от множества блужения.

3:4  Блудница добра и приятна, началница волхвований, продающая языки во блужении своем и племена в чародеяниих своих.

3:5  Се, Аз на тя, глаголет Господь Бог Вседержитель, и открыю задняя твоя к лицу твоему, и покажу языком срамоту твою и царствам безчестие твое,

3:6  и возвергу на тя огнушение по нечистотам твоим, и положу тя в притчу.

3:7  И будет, всяк видяй тя снидет с тебе и речет: окаянная Ниневиа, кто постенет по ней? Откуду взыщу утешение ей?

3:8  Уготовити часть, устроити струну, уготовити часть Аммону, живущая в реках, вода окрест ея, ейже начало море, и вода забрала ея:

3:9  и Ефиопиа крепость ея и Египет, и несть конца бегству твоему: и Фуд и Ливиане быша помощницы ея.

3:10  И сия в преселение пойдет пленница, и младенцы ея разбиют в началех всех путий ея, и о всех славных ея вергут жребия, и вси воеводы ея свяжутся путы.

3:11  И ты упиешися и будеши презрена, и ты сама себе взыщеши помощи от враг.

3:12  Вся твердели твоя яко смоквичие стражу имущее: аще поколеблются, впадут во уста ядущаго.

3:13  Се, людие твои, яко жены в тебе: врагом твоим отворяема отворятся врата земли твоея, и пояст огнь вереи твоя.

3:14  Воду одержания восхити себе сама и утверди твердели твоя: влези в брение и поперися в плевах, утверди паче плинфа.

3:15  Тамо пояст тя огнь, потребит тя мечь, поядят тя аки прузи, и отягчаеши аки мшица.

3:16  Умножила еси купли твоя паче звезд небесных: мшицы устремишася и возлетеша.

3:17  Возскочи аки пруг смесник твой, аки акрида восходящая на ограду в день студеный: солнце взыде, и отлете, и не познася место ея: люте им!

3:18  Воздремашася пастуси твои, царь Ассирийск успи сильныя твоя, воздвигошася людие твои на горы, и не бяше приемлющаго.

3:19  Несть цельбы сокрушению твоему, разгореся язва твоя: вси слышащии весть твою восплещут руками о тебе: понеже на кого не найде злоба твоя всегда?