Kapingamarangi - Nahum

Chapter 1

1:1  Aanei nia helekai di hai o Nineveh, di moe ne-gidee Nahum, tangada mai Elkosh.

1:2  Dimaadua la hagalee dugu-anga gi digau ala e-hagatongaadahi ang-gi-de-Ia, gei e-hagaduadua digau ala e-hai-baahi ang-gi-de-Ia. I-lodo dono hagawelewele, Mee e-hui gi-muli gi digaula.

1:3  Dimaadua la hagalee hagawelewele ngoohia, gei Mee e-maaloo dangihi, hagalee dugu di hagaduadua digau gu-ihala. Di gowaa Dimaadua e-haele-ai, di madangi maaloo e-hanaga, gei nia gololangi la nia dogolia buu gelegele o ono wae.

1:4  Mee e-helekai hua gi-di tai, gei di-maa gu-maangoo. Mee e-hai nia monowai gi-maangoo. Nia gowaa o Bashan guu-mae, di Gonduu Carmel guu-gono luuli, gei nia akai o Lebanon guu-mmade.

1:5  Nia gonduu e-ngalungalua, gei nia dama gonduu e-waiwai i-mua o Dimaadua. Henuailala e-ngalungalua di madagoaa Dimaadua ga-gila-aga; henuailala mo ana daangada huogodoo ga-mmaadagu.

1:6  Dono madagoaa ma-ga-hagawelewele, ma koai dela e-mee di-mouli? Ma koai dela e-mee di-mouli i dono hagawelewele mahi huaidu? Mee gaa-llingi dono hagawelewele lalaula; nia hadugalaa gaa-mama gi-lligi-loo gii-hai nia gelegele dogolia i-mua o Mee.

1:7  Dimaadua le e-humalia; Mee e-duuli ana daangada i nadau madagoaa haingadaa; e-benebene digau ala gaa-huli gi Mee.

1:8  Gadoo be-di labagee damana maaloo, Mee e-daaligi hagatau ono hagadaumee; Mee e-hagammade digau ala e-hai-baahi ang-gi de-Ia.

1:9  Ma di-aha ne-haganoho kooe dela e-hai-baahi gi Dimaadua? Mee gaa-oho goe. Deai tangada e-hai-baahi gi Mee hagalua ai.

1:10  Gadoo be nia laagau duduia geinga maangoo, goodou digau libaliba gaa-tudu gii-wwele gi-daha!

1:11  Tangada e-honu nia hagamamaanadu huaidu e-hai-baahi ang-gi Dimaadua, la-ne-hanimoi i doo baahi, Nineveh.

1:12  Deenei di-mee a Dimaadua e-helekai gi ana daangada Israel, “Ma e-aha digau Assyria le e-maaloo ge dogologowaahee, digaula ga-daaligi ga-hagalee. Au gu-hagaduadua agu daangada, gei Au hagalee hai di-maa labelaa.

1:13  Au ga-hagalawa nia mogobuna-dagi digau Assyria i-hongo goodou, gaa-tuu gi-daha nia daula-baalanga ala e-lawalawa goodou.”

1:14  Deenei telekai a Dimaadua i-di hai o digau Assyria, “Digaula ga-de-hagadili, ga-deemee di-daahi nadau ingoo. Au gaa-oho nia balu-ada i-lodo nia hale daumaha o nadau balu-god. Au e-hagatogomaalia dagu luwa daalunga gi digau Assyria: digaula e-hagalee tau gi-mouli!”

1:15  Mmada, tangada kae hegau e-hanimoi i-hongo nia gonduu mo dana longo humalia! Mee e-hanimoi e-haga-iloo di hagamagedaa! Nia daangada Israel, budu-ina godou laangi hagamiami, wanga-ina gi Dimaadua godou mee ne-hagababa gi Mee. Digau huaidu ga-hagalee-loo e-kae godou henua labelaa. Digaula gu-daaligi hagatau!

Chapter 2

2:1  Nineveh, goe ga-heebagi ginai! Di mahi dela e-oho goe la-gu-hanimoi. Hagatogomaalia-ina doo duuli! Loohia di ala! Hagatogomaalia gi tauwa! (

2:2  Dimaadua gu-togomaalia e-hagagila-aga labelaa di madamada o Israel, dela nogo hai-mee ginai i-mua ono hagadaumee ne-lahi haga-huaidu a-mee.)

2:3  Digau dauwa hagadaumee e-dagidagi nadau duuli mmee, gei e-ulu nia gahu mmee be di-mee e-dahi. Digaula gu-togomaalia e-heebagi! Nadau waga-dauwa e-dabadaba be-di ahi! Nadau hoodo gu-togomaalia!

2:4  Nia waga dauwa gu-lellele giibeni i-hongo nia ala, e-limalima gi-dua mo dai i-lodo di waahale, e-maahina be nia malama, ge e-dabadaba be-di ila.

2:5  Nia dagi-dauwa guu-gahi gi-di gowaa e-dahi, gei e-tingatinga i-di-nadau hula. Digau dauwa ala e-heebagi gi-di waahale gu-limalima-hua di-nadau lellele gi-di abaaba, ga-haga-duu-aga di-nadau mee haga-mooho di abaaba.

2:6  Nia bontai i-baahi di monowai gu-maahuge, di hale king aamua ga-hoohoo ga-mooho.

2:7  Di lodo di king la-guu-lahi galabudi; ana hege e-nguunguu be nia mwuroi, gei e-paapaa nadau hadahada manawa-gee.

2:8  Gadoo be nia wai e-hali-mai di-mee duuli wai mooho, nia daangada e-lloomoi hagalellele i Nineveh! Nia daangada e-tangitangi boloo, “Noho! Noho!” malaa deai tangada e-hana gi-muli ai.

2:9  Kaina nia silber! Kaina nia goolo! Di waahale le e-honu maluagina!

2:10  Nineveh gu-oho gi-daha, gu-diiagi, guu-dugu modogoia! Nia manawa gu-unihagi gi-di madagu; nia duli gu-bolebole, nia mahi gu-hagalee; nia hadumada guu-huli.

2:11  Di gowaa deenei nogo hagaingoo bolo Nineveh, di gowaa nogo noho-ai nia laion, nogo haangai-ai nia dama-laion, di gowaa nogo heehee moholo-ai di laion daane mo-di laion-ahina, nogo hagalee mmaadagu-ai nia dama digaula.

2:12  Di laion gu-daaligi dana manu, ga-hahaahi hagaligiligi gi dono ihoo mo nau dama; gaa-haa di-nau gowaa e-noho-ai gi-nia goneiga ne-hahaahi.

2:13  Dimaadua di Gowaa Aamua ga-helekai, “Au go do hagadaumee! Au gaa-dudu au waga-dauwa. Au gau-dauwa gaa-mmade i-lodo tauwa, gei Au gaa-kae au mee huogodoo ala ne-kae i-baahi digau ala i-golo. Di hiihai o au daangada kae-hegau la-ga-deai tangada e-longono ai.”

Chapter 3

3:1  E-manawa-gee huoloo Nineveh, di waahale daaligi dangada, ge kai tilikai, e-honu maluagina ala ne-kae gi-daha.

3:2  Hagalongo gi-di lee daaligi o-di hali hagamamaawa, di lee mamaawa o-nia wae waga-dauwa e-llele, nia lee nia hoodo ma-gaa-hobo, mo nia haluihalulu o-nia waga-dauwa!

3:3  Nia daangada hongo hoodo gu-llele-adu, nia hulumanu dauwa gu-dabadaba, nia daalo gu-dingidingia! Nnuaidina digau mmade gu-hagabae gi-nua, e-de-iloo be e-dogohia, nia daangada e-tingatinga i-hongo digaula!

3:4  Nineveh go di ahina mouli be-di manu la-gu-hagaduadua. I ono ala halahalau hagalliga, mee guu-dagi nia henua llauehe, gu-hagaduadua digaula, guu-hai digaula gii-hai nia hege ni-aana.

3:5  Dimaadua di Gowaa Aamua e-helekai, “Au ga-hagaduadua goe, Nineveh! Au gaa-daa o goloo, ga-hagammada goe gi nnenua llauehe, gi-langaadia goe.

3:6  Au ga-hagahuaidu goe, ga-haga-balumee goe, gaa-gahu goe gi nia dogolia. Nia daangada ga-daumada goe ga-uli nadau gai.

3:7  Huogodoo ma-ga-mmada-adu gi-di-goe ga-hagammuu gi-muli. Digaula ga-helekai, ‘Nineveh gu-mooho! Koai e-aloho i-mee? Koai e-hiihai e-hagamanawa lamalia a-mee?’ ”

3:8  Nineveh, goe e-mada-humalia i Thebes, di guongo dagi o Egypt? Mee hogi dana monowai i-golo e-duuli ia be-di abaaba, di monowai Nile dela go dono abaaba.

3:9  Mee e-dagi Sudan mo Egypt, ono mogobuna deai ono hagageinga ai. Libya e-buni gi mee ge e-hagamaamaa a-mee.

3:10  Malaa nia daangada o Thebes guu-lahi gi-daha mo nadau henua. Nadau dama gu-daaligi gi-mmademmade i-nia madaaduge o-nia ala huogodoo o-di waahale deelaa. Nadau dagi guu-lahi gi-daha gu-lawalawa gi-nia daula-baalanga, gu-duwweduwwe i digau ala ne-kumi digaula.

3:11  Nineveh, goe gaa-doo gi-lodo di libaliba dadaulia deenei! Goe ga-hagamada labelaa e-lele gi-daha mo o hagadaumee.

3:12  O gowaa abaaba huogodoo gaa-hai be nia laagau-‘fig’ guu-lleu ono huwa: Lullulu di laagau gei nia huwa ga-monnono gi-lodo doo ngudu.

3:13  Au gau-dauwa e-hai be nia ahina, do henua ga-deai dono duuli ai i-mua o hagadaumee. Di ahi gaa-dudu nia baalanga laa-lodo au bontai.

3:14  Hagatogomaalia-ina godou wai ang-gi tuuli di waahale, hagamau-ina godou abaaba dauwa! Unugi-ina nia gelegele gii-hai nia hadu hau-hale, ge hagatogomaalia-ina nia mee hai hadu.

3:15  E-de-hei-eia be di-aha e-hai kooe, gei goe e-dudu-hua gii-made be e-made i-lodo tauwa. Goodou ga-hagammaa gi-daha be nia laagau meegai ma-gaa-gai go nia ‘locust’. Goodou e-hagadili be nia ‘locust’!

3:16  Goodou guu-hai godou gau huihui goloo gii-logo i-nia heduu di langi! Malaa dolomeenei digaula gu-hagalee, digaula e-hai gadoo be nia ‘locust’ ma-gaa-holo nadau bakau, ga-mmaangi gi-daha.

3:17  Godou gau oobidi e-hai gadoo be nia ‘locust’ ala e-noho i-lodo nia laagau i-di laangi magalillili. Malaa, di madagoaa di laa ma-ga-welengina, digaula ga-mmaangi gi-daha, tangada e-iloo di gowaa ne-mmaangi ginai digaula ai.

3:18  Goe, go Tagi aamua o Assyria, o gobinaa la-guu-mmade, au gau aamua gu-kii-hua hagadahi! Au daangada gu-duwweduwwe i-hongo nia gonduu, gei tangada e-lahaia digaula gi nadau hale labelaa ai.

3:19  Godou magi la ono wanii ai, e-deemee di hagahili. Huogodoo ala ga-longono doo mooho ga-tenetene ga-paapaa nadau lima. Ma tangada i-golo guu-tanga gi-daha mo do haihai huaidu e-dee-odi?