Kapingamarangi - Numbers - 10

10:1  Dimaadua ga-helekai gi Moses,

10:2  “Heia nia buu-‘trumpet’ e-lua ne-tugi gi-nia silber belee gahigahi nia daangada gi-di gowaa e-dahi ge gi-haga-iloo di madagoaa e-hagatanga-ai nia daangada.

10:3  Nia lee ili-hagalloo mai nia buu-‘trumpet’ e-lua aalaa ma-ga-ili, nia daangada huogodoo la-gi-dagabuli-mai gi doo gili i-di bontai di Hale-laa dela e-noho-iei Au.

10:4  Maa di buu-‘trumpet’ hua e-dahi dela ma-ga-ili, ge di-maa go nia dagi la-hua o-nia madahaanau llauehe la-gi-dagabuli-mai gi doo gili.

10:5  Nia lee ili hagapodo ma-gaa-hai, gei nia madawaawa e-noho i-bahi-i-dua di waa-hale-laa gi-haga-maanege gi-daha.

10:6  Nia lee ili hagapodo ma-gaa-hai hagalua, gei nia madawaawa i-bahi-i-ngaaga ga-hagatanga gi-daha. Nia ili podo le e-hai dono hadinga bolo e-daamada nia daangada gi-hagatanga e-hula.

10:7  Nia ili lloo le e-hai dono hadinga bolo e-hagadagabuli nia daangada huogodoo gi-di gowaa e-dahi.

10:8  Nia labaa le e-ili go nia dama-daane Aaron, ala go digau hai-mee-dabu. “Taganoho deenei i-lala le e-daudali i-nia madagoaa huogodoo ala ma-ga-loomoi:

10:9  Di madagoaa tauwa i-hongo godou henua, gei goodou e-abaaba goodou i godou hagadaumee ala gu-heebagi-adu, ili-hia di buu-‘trumpet’ e-hagailoo tauwa. Au, go Yihowah go di-godou God, ga-hagamaamaa goodou, ga-benebene goodou gi-daha mo godou hagadaumee.

10:10  Di madagoaa tenetene labelaa — i-di-godou Budu o-di Malama Hoou mo godou daumaha ala i-golo — goodou e-ili nia buu-‘trumpet’ i godou hai-tigidaumaha dudu mo tigidaumaha hagadaubuni. Gei Au ga-hagamaamaa goodou. Au go Yihowah go di-godou God.”

10:11  Di madalua laangi o-di lua malama, di lua ngadau i-muli di hagatanga nia daangada i Egypt, di gololangi i-hongo di Hale-laa Dimaadua ga-hagatanga gi-nua,

10:12  gei digau Israel ga-daamada di-nadau hula gi-daha mo-di Anggowaa o Sinai. Di gololangi gaa-hana gaa-noho i-lodo di Anggowaa o Paran.

10:13  Digaula ga-daamada gaa-hula be nnelekai Dimaadua mai Moses.

10:14  Nia madagoaa e-hagamenege digaula, gei digaula e-hula-hua i-lodo di hagadau dela gu-haganoho matagidagi. Digau ala i-lala tagallebe o-di buini damana dela e-dagi go di madawaawa Judah le e-daamada e-hula matagidagi i dama-buini, e-dagi go Nahshon, tama-daane Amminadab.

10:15  Nethanel tama-daane Zuar e-dagi di madawaawa Issachar,

10:16  Eliab tama-daane Helon e-dagi di madawaawa Zebulun.

10:17  Nomuli, di Hale-laa gaa-dugu gi-lala, gei nia madahaanau llauehe o Gershon mo Merari, ala e-kae di Hale-laa, ga-daamada gaa-hula.

10:18  Nomuli, digau ala i-lala tagallebe o-di buini damana dela e-dagi go di madawaawa Reuben ga-daamada gaa-hula i dama-buini, e-dagi go Elizur tama-daane Shedeur.

10:19  Shelumiel tama-daane Zurishaddai e-dagi di madawaawa Simeon.

10:20  Eliasaph tama-daane Deuel e-dagi di madawaawa Gad.

10:21  Nomuli, di madahaanau o Kohath o-di madawaawa Levi ga-daamada gaa-hula, e-aamo nia goloo daumaha haga-madagu. Digaula ma-gaa-dau-adu, ge di Hale-laa la-guu-lawa di haga-duu-aga labelaa.

10:22  Nomuli, digau ala i-lala tagallebe o-di buini damana dela e-dagi go di madawaawa Ephraim ga-daamada gaa-hula i dama-buini, e-dagi go Elishama tama-daane Ammihud.

10:23  Gamaliel tama-daane Pedahzur e-dagi di madawaawa Manasseh.

10:24  Gei Abidan tama-daane Gideoni e-dagi di madawaawa Benjamin.

10:25  Hagamuliagina, digau ala i-lala tagallebe di buini damana dela e-dagi go di madawaawa Dan ga-daamada gaa-hula i dama buini, i-muli nia buini huogodoo, e-dagi go Ahiezer tama-daane Ammishaddai.

10:26  Pagiel tama-daane Ochran e-dagi di madawaawa Asher.

10:27  Ahira tama-daane Enan e-dagi di madawaawa Naphtali.

10:28  Deenei di hai o-di haele ang-gi nia buini dagidahi, i-nia madagoaa o digau Israel ma-ga-oho nadau hale-laa gaa-hula.

10:29  Moses ga-helekai gi tuaahina o dono lodo go Hobab, tama-daane a Jethro, tangada Midian, “Gimaadou bolo ga-daamada gaa-hula gi tenua Dimaadua ne-helekai-ai bolo e-gaamai gi gimaadou. Mee guu-hai dana hagababa bolo e-hai Israel gi-maluagina, malaa, hanimoi dalia gimaadou, gei gimaadou ga-haga-humalia goe.”

10:30  Hobab ga-helekai, “Deeai, au e-hana gi-muli gi dogu henua.”

10:31  Moses ga-helekai, “Dumaalia hudee diagia gimaadou. Goe e-iloo nia gowaa ala humalia belee noho-iei gimaadou i-di anggowaa, gei goe e-mee di hai tangada hagamaamaa ni gimaadou.

10:32  Maa goe gaa-hana i madau muli, gidaadou ga-hai-mee ngaadahi gi-nia maluagina ala ma-ga-gaamai go Dimaadua gi gimaadou.”

10:33  Digau Israel ga-hagatanga mai i-di gonduu dabu go Sinai, gei digaula gaa-hula i-nia laangi e-dolu. Tebedebe o-di Hagababa Dimaadua le e-kae i-mua i-nia madagoaa huogodoo, e-halahala di-nadau gowaa e-hagamolooloo-ai.

10:34  Nadau hagatanga-mai gi-daha mo nia gowaa huogodoo ala nogo hagamolooloo-ai, gei di baahi gololangi Dimaadua i nadau nua i-di aa.

10:35  Nia madagoaa huogodoo Tebedebe o-di Hagababa la-ga-haga-ngalua, gei Moses ga-helekai, “Meenei Dimaadua, Goe duu gi-nua. Haga-maaheu-ina gi-daha o hagadaumee. Heia digau ala e-hagadugina-e-ginaadou Goe gi-lellele gi-daha mo oo mua.”

10:36  Tebedebe deelaa ma-gaa-noho, gei Moses ga-helekai, “Meenei Dimaadua, Goe hanimoi-malaa gi-lodo di madawaawa Israel deenei, gu-dogologowaahee e-deemee di-dau.”