WelBeiblNet - Numbers - 23

23:1  A dyma Balaam yn dweud wrth y Brenin Balac, “Adeilada saith allor yma, a pharatoi saith tarw a saith hwrdd i'w haberthu.”

23:2  Dyma Balac yn gwneud hynny, a dyma'r ddau ohonyn nhw yn aberthu tarw a hwrdd ar bob un o'r allorau.

23:3  Yna dyma Balaam yn dweud wrth Balac, “Aros di yma wrth ymyl yr aberthau sy'n cael eu llosgi. Dw i'n mynd i weld os ydy'r ARGLWYDD am ymateb. Bydda i'n rhannu gyda ti beth bynnag fydd e'n ddweud wrtho i.” A dyma Balaam yn mynd i ben bryn anial.

23:4  A dyma Duw yn dod ato. A dyma Balaam yn dweud wrth Dduw, “Dw i wedi codi saith allor, ac wedi aberthu tarw a hwrdd ar bob un ohonyn nhw.”

23:5  A dyma'r ARGLWYDD yn rhoi neges i Balaam, “Dos yn ôl at Balac a rhoi'r neges yma iddo.”

23:6  Pan aeth Balaam yn ôl, roedd y brenin ac arweinwyr Moab yn dal i sefyll yno wrth ymyl yr aberthau oedd yn cael eu llosgi.

23:7  A dyma'r neges roddodd Balaam iddo: “Daeth Balac â fi yma o Aram; daeth brenin Moab â fi o fynyddoedd y dwyrain: ‘Tyrd i felltithio Jacob i mi,’ meddai, ‘tyrd i gondemnio Israel!’

23:8  Ond sut alla i felltithio pan mae Duw ddim yn gwneud? Sut alla i gondemnio'r rhai dydy'r ARGLWYDD ddim am eu condemnio?

23:9  Dw i'n eu gweld nhw o ben y creigiau. Dw i'n eu gwylio nhw o ben y bryniau. Maen nhw'n bobl unigryw, yn wahanol i'r gwledydd eraill.

23:10  Mae Jacob fel llwch – pwy all eu cyfrif? Oes rhywun yn gallu cyfrif eu chwarter nhw? Dw i am farw fel un wnaeth y peth iawn. Dw i am i'r diwedd i mi fod fel eu diwedd nhw.”

23:11  A dyma Balac yn dweud wrth Balaam, “Beth wyt ti wedi'i wneud? Dw i wedi dod â ti yma i felltithio'r gelyn! A dyma ti'n eu bendithio nhw!”

23:12  A dyma Balaam yn ateb, “Rhaid i mi fod yn ofalus fy mod i ddim ond yn dweud beth mae'r ARGLWYDD wedi'i roi i mi.”

23:13  Felly dyma Balac yn dweud wrtho, “Tyrd i rywle arall i edrych arnyn nhw. Fyddi di ddim ond yn gweld rhai ohonyn nhw. Melltithia'r rheiny i mi.”

23:14  Felly dyma Balac yn mynd â Balaam i Gae Soffim (sef ‛Cae'r Gwylwyr‛) ar ben Mynydd Pisga. A dyma fe'n codi saith allor yno, ac yn aberthu tarw a hwrdd ar bob un.

23:15  Dyma Balaam yn dweud wrth Balac, “Aros di yma wrth ymyl yr aberthau sy'n cael eu llosgi, tra dw i'n mynd i gyfarfod yr ARGLWYDD draw acw.”

23:16  A dyma'r ARGLWYDD yn cyfarfod gyda Balaam, ac yn rhoi neges iddo'i rhannu gyda Balac.

23:17  Pan ddaeth Balaam ato, roedd y brenin ac arweinwyr Moab yn dal i sefyll wrth ymyl yr aberthau oedd yn cael eu llosgi. A dyma Balac yn gofyn iddo, “Beth ddwedodd yr ARGLWYDD?”

23:18  A dyma'r neges roddodd Balaam iddo: “Saf ar dy draed, Balac, a gwrando. Gwranda'n ofalus, fab Sippor:

23:19  Nid dyn sy'n dweud celwydd ydy Duw. Dydy e ddim yn berson dynol sy'n newid ei feddwl. Ydy e'n dweud, a ddim yn gwneud? Ydy e'n addo, a ddim yn cyflawni? Na!

23:20  Mae e wedi dweud wrtho i am fendithio; Mae e wedi bendithio, a dw i ddim yn gallu newid hynny.

23:21  Dydy e'n gweld dim drwg yn Jacob, nac yn gweld dim o'i le ar Israel. Mae'r ARGLWYDD eu Duw gyda nhw; mae e wedi'i gyhoeddi yn frenin arnyn nhw.

23:22  Duw sydd wedi dod â nhw allan o'r Aifft; mae e'n gryf fel ych gwyllt.

23:23  Does dim swyn yn gwneud drwg i Jacob, na dewiniaeth yn erbyn Israel. Rhaid dweud am Jacob ac Israel, ‘Duw sydd wedi gwneud hyn!’

23:24  Bydd y bobl yn codi fel llewes, ac yn torsythu fel llew. Fyddan nhw ddim yn gorwedd nes bwyta'r ysglyfaeth ac yfed gwaed y lladdfa.”

23:25  A dyma Balac yn dweud wrth Balaam, “Paid melltithio nhw o gwbl, a paid bendithio nhw chwaith.”

23:26  Ond dyma Balaam yn ei ateb, “Wnes i ddim dweud fod rhaid i mi wneud beth mae'r ARGLWYDD yn ddweud?”

23:27  Yna dyma'r Brenin Balac yn dweud wrth Balaam, “Tyrd, gad i mi fynd â ti i rywle arall. Falle y bydd Duw yn gadael i ti eu melltithio nhw o'r fan honno.”

23:28  A dyma Balac yn mynd â Balaam i ben Mynydd Peor, sy'n edrych dros yr anialwch.

23:29  A dyma Balaam yn dweud wrth Balac, “Adeilada saith allor i mi yma, a pharatoi saith tarw a saith hwrdd i'w haberthu.”

23:30  Dyma'r brenin Balac yn gwneud hynny, ac yn aberthu tarw a hwrdd ar bob un o'r allorau.