WelBeiblNet - Numbers - 3

3:1  Dyma hanes teulu Aaron a Moses pan wnaeth yr ARGLWYDD siarad gyda Moses ar Fynydd Sinai:

3:2  Enwau meibion Aaron oedd Nadab (y mab hynaf), Abihw, Eleasar ac Ithamar.

3:3  Cawson nhw eu heneinio a'u cysegru i wasanaethu fel offeiriaid.

3:4  Ond roedd Nadab ac Abihw wedi marw yn anialwch Sinai wrth ddefnyddio tân o rywle arall i wneud offrwm i'r ARGLWYDD. Doedd ganddyn nhw ddim plant. Felly Eleasar ac Ithamar oedd yn gwasanaethu fel offeiriaid gyda'u tad Aaron.

3:5  Dyma'r ARGLWYDD yn dweud wrth Moses:

3:6  “Tyrd â llwyth Lefi at Aaron, a'u rhoi nhw iddo fel ei helpwyr.

3:7  Byddan nhw'n gwasanaethu Aaron a'r bobl i gyd o flaen pabell presenoldeb Duw. Nhw fydd yn gyfrifol am wneud yr holl waith yn y Tabernacl.

3:8  Byddan nhw'n gofalu am holl offer pabell presenoldeb Duw, ac yn gwasanaethu yn y Tabernacl ar ran pobl Israel.

3:9  Rwyt i roi'r Lefiaid i Aaron a'i feibion fel eu helpwyr. Maen nhw i weithio iddo fe a neb arall.

3:10  Aaron a'i feibion sydd i'w penodi'n offeiriaid. Os ydy unrhyw un arall yn mynd yn rhy agos i'r cysegr, y gosb ydy marwolaeth.”

3:11  A dyma'r ARGLWYDD yn dweud wrth Moses:

3:12  “Dw i wedi cymryd y Lefiaid i mi fy hun, yn lle'r mab cyntaf i ddod allan o groth pob gwraig yn Israel. Fi piau'r Lefiaid,

3:13  am mai fi piau pob mab cyntaf. Rôn i wedi cysegru pob mab ac anifail cyntaf i gael ei eni i mi fy hun, pan wnes i ladd y rhai cyntaf i gael eu geni yng ngwlad yr Aifft. Felly fi piau pob un cyntaf i gael ei eni. Fi ydy'r ARGLWYDD.”

3:14  Yna dyma'r ARGLWYDD yn siarad gyda Moses yn anialwch Sinai:

3:15  “Dw i eisiau i ti gyfri'r Lefiaid, yn ôl eu teuluoedd estynedig a'u claniau – pob dyn, a phob bachgen sydd dros fis oed.”

3:16  Felly dyma Moses yn eu cyfri nhw, fel roedd yr ARGLWYDD wedi dweud wrtho.

3:17  Enwau meibion Lefi oedd Gershon, Cohath a Merari.

3:18  Enwau claniau meibion Gershon oedd Libni a Shimei.

3:19  Enwau claniau meibion Cohath oedd Amram, Its'har, Hebron ac Wssiel.

3:20  Enwau claniau meibion Merari oedd Machli a Mwshi. Y rhain oedd teuluoedd Lefi yn ôl eu claniau.

3:21  Disgynyddion Gershon oedd claniau Libni a Simei –

3:22  sef 7,500 o ddynion a bechgyn oedd dros fis oed.

3:23  Roedd teuluoedd y Gershoniaid i wersylla tu ôl i'r Tabernacl, i'r gorllewin.

3:24  Ac arweinydd y Gershoniaid oedd Eliasaff fab Laël.

3:25  Cyfrifoldeb y Gershoniaid oedd pabell y Tabernacl, y gorchudd, y sgrîn o flaen y fynedfa i babell presenoldeb Duw,

3:26  llenni'r iard oedd o gwmpas y Tabernacl a'r allor, y sgrîn o flaen y fynedfa i'r iard, y rhaffau, a phopeth arall oedd ag unrhyw beth i'w wneud â'r rhain.

3:27  Disgynyddion Cohath oedd claniau Amram, Its'har, Hebron ac Wssiel –

3:28  sef 8,600 o ddynion a bechgyn oedd dros fis oed. Nhw oedd yn gyfrifol am y cysegr.

3:29  Roedd teuluoedd y Cohathiaid i wersylla i'r de o'r Tabernacl.

3:30  Ac arweinydd y Cohathiaid oedd Elitsaffan fab Wssiel.

3:31  Nhw oedd yn gyfrifol am yr Arch, y bwrdd, y menora (sef y stand i'r lampau), yr allorau, unrhyw offer oedd yn cael ei ddefnyddio yn y cysegr, y gorchudd mewnol, a phopeth arall oedd ag unrhyw beth i'w wneud â'r rhain.

3:32  Eleasar, mab Aaron oedd pennaeth arweinwyr y Lefiaid. Roedd ganddo gyfrifoldeb arbennig i oruchwylio'r rhai oedd yn gyfrifol am y cysegr.

3:33  Disgynyddion Merari oedd claniau Machli a Mwshi –

3:34  sef 6,200 o ddynion a bechgyn oedd dros fis oed.

3:35  Arweinydd y Merariaid oedd Swriel fab Afichaïl. Roedden nhw i wersylla i'r gogledd o'r Tabernacl.

3:36  Cyfrifoldeb y Merariaid oedd fframiau'r Tabernacl, y croesfarrau, y polion, y socedi, y llestri i gyd, a phopeth arall oedd ag unrhyw beth i'w wneud â'r rhain.

3:37  Hefyd, polion yr iard i gyd, gyda'i socedi, pegiau a rhaffau.

3:38  Yr unig rai oedd i wersylla ar yr ochr ddwyreiniol, o flaen y Tabernacl, oedd Moses ac Aaron a'i feibion. Nhw oedd yn gyfrifol am y cysegr ar ran pobl Israel. Os oedd unrhyw un arall yn mynd yn rhy agos i'r cysegr, y gosb oedd marwolaeth.

3:39  Nifer y Lefiaid i gyd, gafodd eu cyfri gan Moses ac Aaron, oedd 22,000 o ddynion a bechgyn dros fis oed.

3:40  Yna dyma'r ARGLWYDD yn dweud wrth Moses: “Dw i eisiau i ti gyfri pob un o'r Israeliaid sy'n fab hynaf, o fis oed i fyny, a chofrestru enw pob un.

3:41  Mae'r Lefiaid i gael eu rhoi i mi yn lle meibion hynaf yr Israeliaid – cofia mai fi ydy'r ARGLWYDD. A fi piau anifeiliaid y Lefiaid hefyd, yn lle pob anifail cyntaf i gael ei eni i anifeiliaid pobl Israel.”

3:42  Felly dyma Moses yn cyfrif pob un o feibion hynaf yr Israeliaid, fel roedd yr ARGLWYDD wedi dweud wrtho.

3:43  Y nifer gafodd eu cyfrif a'u cofrestru oedd 22,273.

3:44  Yna dyma'r ARGLWYDD yn dweud wrth Moses:

3:45  “Cymer y Lefiaid yn lle meibion hynaf pobl Israel, ac anifeiliaid y Lefiaid yn lle eu hanifeiliaid nhw. Fi fydd piau'r Lefiaid. Fi ydy'r ARGLWYDD.

3:46  Mae nifer y meibion hynaf ddau gant saith deg tri yn fwy na nifer y Lefiaid. Rwyt i brynu rhyddid i'r dau gant saith deg tri

3:47  drwy gasglu pum darn arian am bob un ohonyn nhw. Dylid ei dalu gydag arian y cysegr, sef darnau arian sy'n pwyso dau ddeg gera yr un.

3:48  Rho'r arian yma i Aaron a'i feibion.”

3:49  Felly dyma Moses yn casglu'r arian i brynu'n rhydd y meibion hynaf oedd dros ben.

3:50  Casglodd 1,365 sicl, sef tua un deg pump cilogram o arian.

3:51  Yna dyma Moses yn rhoi'r arian i Aaron a'i feibion, yn union fel roedd yr ARGLWYDD wedi dweud wrtho.