Kapingamarangi - Zephaniah

Chapter 1

1:1  Aanei nnelekai mai baahi Dimaadua ne-wanga gi Zephaniah i-di madagoaa Josiah tama-daane Amon nogo king i Judah. (Zephaniah la di hagadili ni di king Hezekiah mai Amariah, Gedaliah mo Cushi).

1:2  Dimaadua ga-helekai, “Au gaa-oho gi-daha nia mee huogodoo i henuailala,

1:3  nia daangada mono manu, nia manu mamaangi, mo nia iga. Au gaa-hai digau huaidu gi-hagalee. Au ga-daaligi nia daangada huogodoo, tangada e-dubu-ai. Au go Dimaadua ne-helekai.

1:4  “Au ga-hagaduadua digau Jerusalem mo Judah huogodoo. Au gaa-oho digau haga-muliagina ala e-daumaha gi-di balu-god go Baal, ge deai tangada e-langahia-ia digau hai-mee-dabu tuadimee ala nogo hai-hegau gi mee ai.

1:5  Au ga-daaligi tangada ma-gaa-hana gi-hongo di hale e-daumaha gi-di laa, di malama mo nia heduu. Au ga-daaligi labelaa digau ala e-daumaha-mai gi-di-Au ge e-dowangi i dogu ingoo, ge e-dowangi labelaa i-di ingoo o-di god go Molech.

1:6  Au ga-daaligi digau ala guu-huli gi-muli gu-hagalee daudali Au, digau ala hagalee loomoi gi-di-Au ge dangi-mai bolo gi-dagia ginaadou.”

1:7  Goodou gii-noho deemuu, idimaa di madagoaa gu-hoohoo-mai gei di Tagi go Yihowah gaa-noho gi dono lohongo hagi-aga. Dimaadua gu-hagatogomaalia e-tigidaumaha ana daangada, gei gu-gahi-mai nia hagadaumee gi-ohaa-ina Judah.

1:8  Dimaadua ga-helekai, “Di laangi daaligi dangada deelaa, gei Au ga-hagaduadua digau aamua, nia dama-daane di king, mo digau huogodoo ala e-hai-hegau i-nia hangahaihai o digau henua-gee.

1:9  Au ga-hagaduadua digau huogodoo ala e-daumaha be digau o-di bouli, gei e-gaiaa mo-di dadaaligi dangada belee haa di hale di-nadau dagi gi-nia goloo gaiaa.”

1:10  Dimaadua ga-helekai, “Di laangi deelaa, gei goodou ga-longono nia lee hangihangi i-di bontai e-haga-ingoo di Bontai Iga i Jerusalem. Goodou ga-longono nia lee tangitangi i-di baahi hoou o-di waahale mo nia lee llauehe i-hongo nia dama gonduu.

1:11  Goodou ala e-noho di baahi gi-lala di waahale, goodou gi-tangitangi mo-di lodo-huaidu i-di godou longono di mee deenei, idimaa digau huihui mee huogodoo la-gaa-mmade!

1:12  “Di madagoaa deelaa, gei Au gaa-kae dagu malama, ga-hoologi daangada i Jerusalem. Au ga-hagaduadua digau ala e-bida hagadagadagagee i ginaadou, gaa-bida helekai ang-gi ginaadou boloo, ‘Dimaadua hagalee e-hai dana mee humalia be huaidu!’

1:13  Nadau maluagina gaa-kae gi-daha ge nadau hale ga-mooho. Digaula ga-hagalee noho i-nia hale ala e-hau go ginaadou be e-inu nia waini mai nadau hadagee ala e-dogi.

1:14  “Di laangi aamua o Dimaadua gu-hoohoo-mai, e-hoohoo-mai huoloo ge e-dau-mai hagalimalima! Di laangi deelaa ga-haga-manawa-gee huoloo, digau dauwa haga-mataane la-ga-tangitangi hagauwwou.

1:15  Di laangi deelaa gaa-hai di laangi haingadaa ge haga-lodo-huaidu, di laangi e-mooho, bouli, luuli ge malumalu,

1:16  di laangi e-honu i-nia lee labaa dauwa, nia lee o digau-dauwa ala e-heebagi gi-nia waahale mono hale hagaloohi.

1:17  “Au ga-gaamai nia haingadaa llauehe gi-nia daangada huogodoo, gei digaula ga-heehee be tangada deegida. Digaula gu-ihala mai gi-di-Au, gei dolomeenei nadau dodo ga-haga-hali gi-daha be nia wai, gei nadau huaidina mmade ga-mmoemmoe gaa-pala i-hongo di gelegele.”

1:18  Di laangi o Dimaadua ma-ga-hagi-mai dono hagawelewele, gei nadau silber mono goolo e-deemee di-benebene ginaadou gi-daha mo nadau haingadaa. Henuailala hagatau ga-haga-mooho go di ahi o dono hagawelewele. Mee ga-hagalawa gi-daha hagalimalima nia daangada huogodoo ala e-noho i henuailala.

Chapter 2

2:1  Goodou go di golohenua nadau langaadia ai, huli-mai gi-muli gi godou hagabaubau humalia,

2:2  i-mua godou hagabagi gi-daha be-di lau laagau ne-ili go di madangi, i-mua di hagawelewele a Dimaadua ma-ga-hanadu gi goodou, i-mua di laangi e-gila-ai dono hagawelewele.

2:3  Huli gi Dimaadua, goodou huogodoo go nia daangada humalia o tenua, ala e-daudali ana haganoho. Heia nia mee e-donu, manawa hila-gi-lala i-mua Dimaadua. Holongo goodou ga-hagalee kae di haga-huaidu i-di laangi e-gila-ai di hagawelewele Dimaadua.

2:4  Tangada e-dubu i-lodo di waahale Gaza ai. Ashkelon ga ono daangada ai. Nia daangada o Ashdod ga-hagabagi gi-daha i-lodo di baahi laangi, nia daangada o Ekron ga-hagabagi gi-daha mo di-nadau waahale.

2:5  Goodou digau Philistia ala e-noho i tongotai, goodou ga-haga-huaidu huoloo. Dimaadua guu-hai dana helekai i goodou bolo Ia ga-hagammaa goodou, tangada e-dahi i-goodou e-dubu ai.

2:6  Godou henua i-baahi di tai gaa-hai tenua maalama, gei digau benebene-siibi ga-haga-duu-aga nadau hale mo nia abaaba siibi i-di gowaa deelaa.

2:7  Digau Judah ala e-mouli hua igolo gaa-noho i-hongo godou henua. Digaula ga-haangai nadau siibi i-golo, mo-di kii i-lodo nia hale digau Ashkelon. Yihowah, di-nadau God, gaa-noho i-baahi digaula, gaa-hai digaula gi-maluagina labelaa.

2:8  Yihowah di Gowaa Aamua ga-helekai, “Au gu-longono digau Moab mo Ammon e-haga-huaidu ge e-haganneennee agu daangada, ge e-helekai hagaamu ginaadou bolo ginaadou gaa-kumi nia henua digaula.

2:9  Au dela e-donu bolo Au go Yihowah, go di God mouli o digau Israel, Au e-hagamodu bolo digau Moab mo Ammon la-ga-haga-mooho gi-daha be Sodom mo Gomorrah. Nadau gowaa gaa-hai nia gowaa toolo, ga-mooho gaa-hana-hua beelaa gi-muli, gaa-tomo nia geinga tolo. Agu daangada ala e-mouli hua igolo i-di madagoaa deelaa gaa-hai digaula hagahuaidu, ga kae nadau henua.”

2:10  Deenei di hai e-hagaduadua digau Moab mo Ammon i nadau hagamuamua mo-di haga-haga-huaidu nia daangada Dimaadua di Gowaa Aamua.

2:11  Dimaadua gaa-hai digaula gi-mmaadagu huoloo. Dimaadua ga-hai nia god o henuailala gi-hagalee hai nia mee, gei nia henua huogodoo ga-daumaha ang-gi Mee i-lodo nadau henua donu.

2:12  Dimaadua ga-daaligi labelaa digau Ethiopia gi tulumanu-dauwa.

2:13  Dimaadua ga-hai-hegau gi ono mogobuna e-haga-mooho Assyria. Mee gaa-hai Nineveh gii-hai di waahale ono daangada ai, di anggowaa ono wai ai.

2:14  Nineveh gaa-hai di gowaa e-noho nia hagabuulinga manu, gei nia hagadilinga manu gaa-noho i-golo. Nia manu-‘owl’ gaa-noho i-lodo nia hale mooho aalaa, ga-tangitangi mai i-hongo nia bontai lligi. Nia manu-moeho ga-dolodolo i-nia ngudu nia bontai. Nia laagau-‘cedar’ ala ne-hau-ai nia hale gaa-kae gi-daha.

2:15  Deelaa di hai gaa-hai gi-di waahale dela e-bida hagaamu ono maaloo ge e-hagabaubau bolo ia hagalee haga-huaidu go di mee. Nia daangada di waahale deelaa e-hagabaubau bolo di-nadau waahale e-kaedahi e-aamua i henuailala. Di gowaa deenei gaa-hai di gowaa e-mooho gi-daha ga-hagamolooloo nia manu lodo-geinga! Nia daangada huogodoo ala ma-ga-lloomoi-laa-nei le e-homouli ge mmaadagu.

Chapter 3

3:1  Jerusalem la-gu-haga-huaidu, di waahale de-hagalongo dela e-haga-huaidu ana daangada.

3:2  Jerusalem digi hagalongo gi Dimaadua be e-kae ana aago. Digi hagadagadagagee gi Dimaadua be e-dangi-anga di hagamaamaa.

3:3  Digau aamua Jerusalem e-hai be nia laion ala e-wwolowwolo, ana gau hai-gabunga e-hai gadoo be nia paana lodo-geinga hiigai, e-dumaanga di-dugu di iwi e-dahi gi-hooaga luada.

3:4  Nia soukohp la-hagalee hai nadau hegau, ge e-halahalau-dangada; digau hai-mee-dabu le e-haga-balumee-hua nadau hegau-dabu, ge e-huli nnaganoho a God gi-hai-hua be nadau hiihai.

3:5  Gei Dimaadua e-noho hua igolo i-lodo di waahale deelaa, Mee e-hai di mee donu, hagalee e-hai di-mee hala. Nia luada huogodoo, gei Mee e-hai di tonu gi ana daangada. Gei digau huaidu ala i-golo e-unu-hua i-lodo nadau huaidu hua igolo, ge hagalee langaadia i nadau mee ala e-haihai.

3:6  Dimaadua ga-helekai, “Au gu-daa gi-daha nia henua hagatau, Au gu-oho nadau waahale, guu-dugu nadau abaaba hale mo nia hale hagaloohi haga-mooho. Nia waahale gu-ono daangada ai, nia ala gu-ono daangada ai, tangada e-dahi ne-dubu ai.

3:7  Au ne-hai bolo agu daangada la-ga-haga-madagu Au, gaa-kae agu waalanga, ga-hagalee de-langahia agu agoago ang-gi ginaadou. Gei digaula gu-limalima-hua gu-huaidu-hua be ginaadou anadilaangi.”

3:8  Dimaadua ga helekai, “Taalia-hua, dogu laangi dela ga-du-gi-nua ga-helekai hai-baahi gi-nia henua llauehe. Au gu-hagamaanadu bolo e-hagabudu-mai digaula gi-longono nia mahi o dogu hagawelewele. Henuailala hagatau gaa-oho gi-daha go di ahi o dogu hagawelewele.

3:9  “Nomuli gei Au gaa-huli nia daangada o-nia henua, gei digaula ga-dalodalo-mai gi-di-Au modo-go-Au, hagalee dalodalo gi-nia balu-ieidu. Digaula huogodoo ga-hagalongo-mai gi-di-Au.

3:10  Agu daangada ala ne-modoho gi-daha, ga-tigidaumaha gi-di-Au hogi mai i-di gowaa mogowaa go Ethiopia.

3:11  Di madagoaa deelaa, goodou go agu daangada ga-hagalee langaadia bolo goodou gu-hai-baahi mai gi-di-Au. Au ga-daa gi-daha nia daangada hagamuamua huogodoo, gei goodou ga-hagalee hai-baahi-mai gi-di-Au labelaa i-hongo dagu Gonduu Dabu.

3:12  Au gaa-dugu i-golo nia daangada ala e-manawa hila-gi-lala ge e-haga-lligi ginaadou, ala e-loomoi gi-di-Au i-di hagamaamaa.

3:13  Digau Israel ala e-dubu la-ga-hagalee hai nadau mee hai-gee gi dahi dangada, hagalee hai-kai tilikai be halahalau dangada. Digaula ga-maluagina, ga-noho-baba, hagalee mmaadagu i di-ingoo-hua tangada.”

3:14  Nia daangada Israel, daahili wwolowwolo gi-nua tenetene. Jerusalem, tenetene mai i godou manawa hagatau.

3:15  Dimaadua guu-dugu godou hagaduadua, gu-daa gi-daha godou hagadaumee huogodoo. Yihowah, go di king o Israel, e-madalia goodou, deai godou hadinga bolo goodou ga-mmaadagu ai.

3:16  Di madagoaa ga-hanimoi, gei digaula ga-helekai gi Jerusalem, “Di waahale Zion, hudee madagu! Hudee diagia godou lima gi-lala be nia lima gu-paagege!

3:17  Yihowah, di godou God, e-madalia goodou, ono mogobuna e-gowadu gi goodou di aali. Dimaadua ga-tenetene i goodou. Mai i dono aloho, Mee ga-gowadu gi goodou di mouli hoou. Mee ga-daahili tenetene i goodou,

3:18  e-tenetene gadoo be nia daangada i tagamiami.” Dimaadua ga-helekai, “Au guu-dugu dagu hai dela belee haga-huaidu goodou, gu-daa gi-daha godou langaadia.

3:19  Di madagoaa e-hanimoi, gei Au ga-hagaduadua digau ala e-haga-huaidu goodou. Au ga-haga-dagaloaha digau habehabe, ga-laha-mai gi nadau henua digau ne-lahi gi-daha. Au gaa-huli nadau langaadia gii-hai nia hagalaamua, gei henuailala hagatau ga-hagaamu digaula.

3:20  “Di madagoaa e-hanimoi! Au ga-laha-mai nia daangada gi nadau guongo, go nia daangada ala ne-modoho gi-daha. Au gaa-hai digaula gii-hai nia daangada e-dau i henuailala hagatau, gaa-hai digaula gi-maluagina labelaa!” Aanei nnelekai mai baahi o Dimaadua.