SPVar - Deuteronomy - 1

1:1  אלה הדברים אשר דבר משה אל כל ישראל בעבר הירדן במדבר בערבה מול סוף בין פראן ובין תפל ולבן וחצרות ודי זהב

1:2  אחד עשר יום מחורב דרך הר שעיר עד קדש ברנע

1:3  ויהי בארבעים שנה בעשתי עשר חדש באחד לחדש דבר משה אל בני ישראל ככל אשר צוה יהוה אתו אליהם

1:4  אחרי הכתו את סיחון מלך האמרי אשר ישב בחשבון ואת עוג מלך הבשן אשר ישב בעשתרות באדרעי

1:5  בעבר הירדן בארץ מואב הואל משה באר את התורה הזאת לאמר

1:6  יהוה אלהינו דבר אלינו בחורב לאמר רב לכם שבת בהר הזה

1:7  פנו וסעו לכם ובאו הר האמרי ואל כל שכניו בערבה בהר ובשפלה בנגב ובחוף הים ארץ הכנעני והלבנון עד הנהר הגדול נהר פרת

1:8  ראו נתתי לפניכם את הארץ באו ורשו את הארץ אשר נשבעתי לאבתיכם לאברהם ליצחק וליעקב לתת לזרעם אחריהם

1:9  ואמר אליכם בעת ההיא לאמר לא אוכל לבדי שאת אתכם

1:10  יהוה אלהיכם הרבה אתכם והנכם היום ככוכבי השמים לרב

1:11  יהוה אלהי אבתיכם יסף עליכם ככם אלף פעמים ויברך אתכם כאשר דבר לכם

1:12  איכה אשא לבדי טרחכם משאכם וריבכם

1:13  הבו לכם אנשים חכמים ונבונים וידעים לשבטיכם ואשימם בראשיכם

1:14  ותענו אתי ותאמרו טוב הדבר אשר דברת לעשות

1:15  ואקח את ראשי שבטיכם אנשים חכמים וידעים ואתן אתם ראשים עליכם שרי אלפים ושרי מאות שרי חמשים ושרי עשרות ושטרים לשבטיכם

1:16  ואצוה את שפטיכם בעת ההיא לאמר שמעו בין אחיכם ושפטתם צדק בין איש ובין אחיו ובין גרו

1:17  לא תכירו פנים במשפט כקטן כגדול תשמעון לא תגורו מפני איש כי המשפט לאלהים הוא והדבר אשר יקשה מכם תקריבון אלי ושמעתיו

1:18  ואצוה אתכם בעת ההיא את כל הדברים אשר תעשון

1:19  ונסעה מחורב ונלכה את כל המדבר הגדול והנורא ההוא אשר ראיתם דרך הר האמרי כאשר צוה יהוה אלהינו אתנו ונבא עד קדש ברנע

1:20  ואמר אליכם באתם עד הר האמרי אשר יהוה אלהינו נתן לנו

1:21  ראה נתן יהוה אלהיך לפניך את הארץ עלה רש כאשר דבר יהוה אלהי אבתיך לך אל תירא ואל תחת

1:22  ותקרבון אלי כלכם ותאמרו נשלחה אנשים לפנינו ויחפרו לנו את הארץ וישבו אתנו דבר את הדרך אשר נעלה בה ואת הערים אשר נבוא עליהן

1:23  וייטב בעיני הדבר ואקח מכם שנים עשר אנשים איש אחד לשבט

1:24  ויפנו ויעלו ההרה ויבאו עד נחל אשכול וירגלו אתה

1:25  ויקחו בידם מפרי הארץ ויורדו אלינו וישבו אתנו דבר ויאמרו טובה הארץ אשר יהוה אלהינו נתן לנו

1:26  ולא אביתם לעלות ותמרו את פי יהוה אלהיכם

1:27  ותרגנו באהליכם ותאמרו בשנאת יהוה אתנו הוציאנו מארץ מצרים לתת אתנו ביד האמרי להשמידנו

1:28  אנה אנחנו עלים ואחינו המיסו את לבבנו לאמר עם גדול ורב ממנו וערים גדלות ובצרות בשמים וגם בני ענקים ראינו שם

1:29  ואמר אליכם לא תערצון ולא תיראון מהם

1:30  יהוה אלהיכם ההלך לפניכם הוא ילחם לכם ככל אשר עשה אתכם במצרים לעיניכם

1:31  ובמדבר אשר ראית אשר נשאך יהוה אלהיך כאשר ישא איש את בנו בכל הדרך אשר הלכתם עד באכם עד המקום הזה

1:32  ובדבר הזה אינכם מאמינם ביהוה אלהיכם

1:33  ההלך לפניכם בדרך לתור לכם מקום לחנותכם באש לילה להראתכם בדרך אשר תלכו בה ובענן יומם

1:34  וישמע יהוה את קול דבריכם ויקצף וישבע לאמר

1:35  אם יראה איש באנשים האלה הדור הרע הזה את הארץ הטובה אשר נשבעתי לאבתיכם

1:36  זולתי כלב בן יפנה הוא יראנה ולו אתן את הארץ אשר דרך בה ולבניו יען כי מלא אחרי יהוה

1:37  גם בי התאנף יהוה בגללכם לאמר גם אתה לא תבוא שמה

1:38  יהושע בן נון העמד לפניך הוא יבוא שמה אתו החזק כי הוא ינחלנה את ישראל

1:39  וטפכם אשר אמרתם לבז יהיה ובניכם הם יבאו שמה ולהם אתננה והם יירשוה

1:40  ואתם פנו וסעו לכם המדברה דרך ים סוף

1:41  ותענו ותאמרו אלי חטאנו ליהוה אלהינו אנחנו נעלה ונלחמנו ככל אשר צונו יהוה אלהינו ותחגרו איש את כלי מלחמתו ותהינו לעלות ההרה

1:42  ויאמר יהוה אלי אמר להם לא תעלו ולא תלחמו כי אינני בקרבכם ולא תנגפו לפני איביכם

1:43  ואדברה אליכם ולא שמעתם ותמרו את פי יהוה אלהיכם ותזידו ותעלו ההרה

1:44  ויצא העמלקי והכנעני הישב בהר ההוא לקראתכם וירדפו אתכם כאשר תעשינה הדברים ויכתו אתכם בשעיר עד חרמה

1:45  ותשבו ותבכו לפני יהוה ולא שמע יהוה בקולכם ולא האזין אליכם

1:46  ותשבו בקדש ימים רבים כימים אשר ישבתם