Kapingamarangi - Leviticus - 7

7:1  Aanei nia haganoho di hai nia tigidaumaha ala koia e-dabu e-hui nia mee hala.

7:2  Di manu dela e-tigidaumaha, le e-daaligi i-baahi ngeia di gowaa dudu tigidaumaha, i-di gowaa dela e-daaligi-ai nia manu ala e-hai-tigidaumaha dudu, gei nia dodo le e-llingi gi-nia baahi e-haa o-di gowaa dudu tigidaumaha.

7:3  Nia kiliidi huogodoo o-di manu le e-daa gi-daha ga-tigidaumaha i-hongo di gowaa dudu tigidaumaha deelaa, ala go nia kiliidi o-di hugu, mo nia kiliidi ala i-di gili nia mee ala i-lodo,

7:4  mo nia ‘kidney’ mo nia kiliidi ala i-di gili nia maa, mo nia gowaa ala koia e-humalia i-di gili di ade.

7:5  Tangada hai-mee-dabu gaa-dudu nia kiliidi huogodoo aanei i-hongo di gowaa dudu tigidaumaha e-hai tigidaumaha meegai ang-gi Dimaadua. Deenei di hai o tigidaumaha e-haga-donu.

7:6  Nia daane huogodoo ala e-dau gi-di madahaanau o tangada hai-mee-dabu le e-mee di-gai nia mee tigidaumaha aanei, malaa e-gai hua i-lodo di gowaa dela e-dabu, idimaa ma nia mee e-dabuaahia huoloo aanei.

7:7  Taganoho o tigidaumaha wwede nia huaidu mo tigidaumaha e-haga-donu le e-hai-hua be-di mee e-dahi: nia goneiga o-di manu deelaa la nia mee ni tangada hai-mee-dabu dela ne-hai-tigidaumaha deelaa.

7:8  Di gili o-di manu dela ne-hai-tigidaumaha dudu la di mee ni tangada hai-mee-dabu dela ne-hai-tigidaumaha deenei.

7:9  Nia tigidaumaha huwa-laagau huogodoo ala ne-daa be ne-dunu i-hongo di mee baabaa, be i-hongo di mee pilain mee la nia mee ni tangada hai-mee-dabu dela ne-tigidaumaha nia maa gi Dimaadua.

7:10  Gei nia tigidaumaha huwa-laagau huogodoo ala e-mada, ala gu-unugi gi-nia lolo be e-maangoo-hua, nia mee aanei la nia mee ni digau hai-mee-dabu huogodoo di madawaawa Aaron, nia mee aanei le e-duhe ngaadahi i digaula.

7:11  Deenei di hai o tigidaumaha hagadaubuni ma-gaa-hai ang-gi Dimaadua:

7:12  Maa tangada ga-hai-tigidaumaha deenei belee danggee ang-gi Dimaadua, malaa e-hai gi-tigidaumaha dana manu, ngaadahi mo nia palaawaa ala digi wanga ginai nia ‘yeast’. Nia palaawaa aanei le e-mee-hua di-hai nia palaawaa maadolu ala ne-hai gi-nia palaawaa ne-unugi gi-nia lolo-olib, be nia bagu baabaa ala ne-hunu gi-nia lolo-olib, be nia bagu ala ne-hai gi-nia palaawaa ne-unugi gi-nia lolo-olib.

7:13  E-hagapuni labelaa gi-nia palaawaa ala ne-unugi gi-nia ‘yeast’.

7:14  Mee ga-daa-mai ana mee i-nia hagadilinga palaawaa huogodoo aanei e-hai dana wanga dehuia ang-gi Dimaadua, nia mee aanei le e-hai di mee ni tangada hai-mee-dabu dela ne-llingi nia dodo o-di manu dela ne-tigidaumaha gi-hongo di gowaa dudu tigidaumaha.

7:15  Nia goneiga o-di manu deelaa le e-gai-hua i-di laangi dela ne-tigidaumaha-iei di-maa, hagalee hai gii-dubu nia mee gi dono daiaa.

7:16  Maa tangada ga-gaamai dana mee e-hai dana tigidaumaha hagadaubuni gi-haga-donu-ai dana hagababa dela ne-hai, be mai hua i dono hiihai, malaa nia mee aalaa le e-gai-hua i-di laangi ne-hai tigidaumaha. Ma-guu-dubu nia mee le e-mee-hua di-gai dono daiaa.

7:17  Ma-gaa-dubu nia mee gaa-dolu ono laangi le e-hai gii-dudu.

7:18  Nia goneiga ma-gaa-dubu gaa-dolu ono laangi, gei tangada deelaa la-gaa-gai nia maa, gei Dimaadua la-hagalee manawa-tene gi tigidaumaha a-maa. Tangada deelaa la-hagalee kae dono humalia i dana tigidaumaha deelaa, ma gu-milimilia, gei tangada dela ma-gaa-gai di-maa le e-kae di hagaduadua o-di huaidu o-maa.

7:19  Maa di mee milimilia ang-gi di hai-daumaha gaa-tale gi-nia goneiga aalaa, gei nia goneiga la-hagalee gai, e-dudu. Digau i goodou ala e-madammaa ang-gi di hai-daumaha, aalaa go digau e-mee-hua di-gai nia goneiga aalaa.

7:20  Maa tangada dela e-milimilia geia gaa-gai nia goneiga aalaa, gei mee gu-hagalee dau bolo ia tangada ni Dimaadua.

7:21  E-hai labelaa beenei, maa tangada gaa-gai nia goneiga ala ne-hai-tigidaumaha deenei i-muli dono bili gi-di mee dela e-milimilia ang-gi di hai-daumaha, di-ingoo-hua di mee mai i tangada be mai i-di manu, geia gu-hagalee dau bolo ia tangada ni Dimaadua.

7:22  Dimaadua gaa-wanga gi Moses nia haganoho aanei

7:23  bolo gi-hagi-anga-ina gi digau Israel: Tangada e-gai nia kiliidi kau, kiliidi siibi be nia kiliidi kuudi ai.

7:24  Tangada e-gai nia kiliidi di manu dela ne-made-hua i-deia be ne-daaligi go di manu lodo-geinga ai, e-mee-hua di haga-hai-hegau gi-nia hagadilinga mee ala i-golo.

7:25  Tangada dela ma-gaa-gai nia kiliidi o-di manu dela e-mee di-hai tigidaumaha meegai ang-gi Dimaadua la hagalee dau bolo ia tangada ni Dimaadua.

7:26  Digau Israel la hagalee gai nia dodo o-nia manu mamaangi be nia dodo o-nia manu dolodolo i di-ingoo-hua di gowaa dela ma-gaa-noho-ai digaula.

7:27  Tangada ma-gaa-oho taganoho deenei la-hagalee dau bolo ia tangada ni Dimaadua.

7:28  Dimaadua gaa-wanga gi Moses nia haganoho aanei

7:29  bolo gi-hagi-anga-ina gi digau Israel: Tangada ma-gaa-hai dana tigidaumaha hagadaubuni le e-hai gi-gaamai nia mee dulii i-di tigidaumaha deenei e-hai dana huai wanga-dehuia ang-gi Dimaadua,

7:30  e-gaamai gi ono lima e-hai tigidaumaha meegai. Mee e-gaamai nia kiliidi o-di manu mo tadahada e-hai dana huai wanga-dehuia ang-gi Dimaadua.

7:31  Tangada hai-mee-dabu gaa-dudu nia kiliidi i-hongo di gowaa dudu tigidaumaha, gei tadahada gaa-hai nia mee ni digau hai-mee-dabu.

7:32  Tangada deelaa la-gi-wanga di wae gau-donu o-di manu e-hai dana wanga-dehuia hagalabagau

7:33  ang-gi tangada hai-mee-dabu dela e-tigidaumaha nia dodo mo nia kiliidi o tigidaumaha hagadaubuni.

7:34  Tadahada o-di manu la di wanga-dehuia hagalabagau, mo-di wae gau-donu o-di manu la di wanga-dehuia hagalabagau ala ne-daa go Dimaadua i digau Israel gaa-wanga gi digau hai-mee-dabu. Deenei di mee digau Israel e-hai gi-wanga gi digau hai-mee-dabu i-nia madagoaa huogodoo ala ga-lloomoi.

7:35  Deenei tuhongo Aaron mo ana dama-daane mai i tigidaumaha dudu ang-gi Dimaadua, i-di laangi dela ne-haga-dabu-iei digaula gi tegau o digau hai-mee-dabu.

7:36  I-di laangi deenei dela ne-helekai-iei Dimaadua gi digau Israel bolo gi-wanga-ina gi digaula di baahi tigidaumaha deenei. Deenei taganoho dela e-daudali go digau Israel i-nia madagoaa huogodoo ala ga-lloomoi.

7:37  Aanei nia haganoho di hai o-nia tigidaumaha dudu, mo tigidaumaha huwa-laagau, mo tigidaumaha wwede nia huaidu, mo nia tigidaumaha e-haga-donu, mo nia tigidaumaha haga-dabu, mo nia tigidaumaha hagadaubuni.

7:38  Dimaadua ne-wanga gi Moses nia haganoho aanei i tomo di gonduu Sinai i-di laangi dela ne-helekai-iei mee gi digau Israel bolo gi-heia nadau tigidaumaha.