Kapingamarangi - Luke - 21

21:1  Jesus ga-gidee-Ia digau maluagina e-dugu nadau tigidaumaha gi-lodo di gowaa dugu hadu o-di Hale Daumaha.

21:2  Ge-Ia gu-gidee labelaa di ahina hagaloale ne-made dono lodo e-dugu ana teenedi mmee e-lua.

21:3  Mee ga-helekai, “Au e-hagi-adu gi goodou di tonu bolo di ahina hagaloale ne-made dono lodo, la-ne-dugu ana mee koia e-logo i-nia mee digau huogodoo ala i-golo.

21:4  Idimaa, digau ala i-golo la-ne-tigidaumaha hunu maluagina o nadau maluagina, gei di ahina hagaloale la-ne-wanga go ana mee huogodoo ala belee mouli-ai.”

21:5  Hunu dama-agoago a-Maa e-helehelekai i-di Hale Daumaha, bolo ma e-madamada ge humalia ono hadu, mo ono tigidaumaha ala ne-wanga gi God. Gei Jesus ga-helekai,

21:6  “Godou mee huogodoo ala e-mmada ginai, di madagoaa ga-dau-mai di hadu e-dahi e-dubu i dono lohongo ai. Nia mee huogodoo ga-meheu gi-lala.”

21:7  Digaula ga-heeu gi Mee, “Tangada Agoago, di mee deenei le e-hai ma-gaa-hee? Ma di-aha gaa-hai e-haga-modongoohia bolo deelaa di madagoaa ga-gila-aga di-maa?”

21:8  Jesus ga-helekai, “Gii-pula i goodou gi-de-halahalau go nia daangada. E-logo digau e-helekai i dogu ingoo boloo, ‘Au go Mee,’ gei e-helekai labelaa boloo, ‘Di madagoaa gu-dau-mai!’ Goodou hudee kawe i digaula.

21:9  Goodou hudee mmaadagu i-di godou longono bolo nia dauwa mono hai-baahi i-golo. Nia mee aanei le e-hai-loo gii-kila i-mua, gei hagalee haga-modongoohia bolo di hagaodi la-gu-hoohoo-mai.”

21:10  Gei Mee ga-helekai labelaa boloo, “Nia henua-llauehe ga-heheebagi. Nia henua ala e-dagi go nia king ga-hagadau dadaaligi ginaadou.

21:11  Henuailala ga-ngalungalua. Nia dau-magamaga mono dau-magi gaa-logo i-nia madagoaa huogodoo. Nia mee haga-maehagi ge hagamadagudagu-dangada ga-kila-mai i-di gili di langi.

21:12  I-mua nia mee aanei gaa-hai, gei goodou e-lawalawa e-dadaaligi, e-wanga gi-nia gabunga e-gabunga i-lodo nia synagogee, ge e-kili gi-lodo nia hale-galabudi, ge e-lahi laa-mua nia king mo nia dagi, idimaa goodou e-hagalaamua dogu ingoo.

21:13  Deenei-hua di-godou madagoaa humalia e-hagadele di Longo-Humalia.

21:14  Hagabaubau gi-humalia i-mua di madagoaa, ge hudee hagabaubau e-logo be goodou ga-helekai bolo-aha gi digaula,

21:15  idimaa, Au ga-gowadu gi goodou nia helekai mo di iloo, gei tei i godou hagadaumee e-mee di-hai-baahi be e-hagahuaidu goodou ai.

21:16  Goodou gaa-wanga go godou maadua, godou duaahina-daane, godou gau mo godou ihoo, gei hunu goodou e-daaligi go digaula gii-mmade.

21:17  Digau huogodoo ga-hudiou-adu gi goodou idimaa go dogu ingoo.

21:18  Gei deai di ngaahulu e-dahi i godou libogo e-ngala ai.

21:19  Tuu gii-mau, gei goodou gaa-kae di mouli.

21:20  “Di madagoaa goodou gaa-mmada gi Jerusalem e-hii go nia buini-dauwa, gei goodou gu-iloo-hua bolo ma-gu-hoohoo-hua ga-mooho.

21:21  Gei digau ala i Judea e-hai gii-llele gi-daha gi-nia gonduu, gei digau ala i-lodo di waahale damana Jerusalem e-hai gi-hagatanga gi-daha, gei digau ala i-lodo henua, hagalee hula gi-lodo di waahale damana deelaa.

21:22  Idimaa, nia laangi aalaa la-go nia laangi o-di hagaduadua, e-hai gii-kila nia helekai huogodoo ala guu-hihi gi-lodo di Beebaa-Dabu.

21:23  E-huaidu huoloo ang-gi nia ahina ala e-hai-dama, mono ahina ala nadau dama lligi i-nia laangi aalaa, idimaa, di haingadaa damana ga-dau-mai gi-hongo tenua-nei, gei di hagaduadua a God ga-haneia gi-hongo digau tenua deenei.

21:24  Hunu gau ga-daaligi gi-nia hulumanu-dauwa, gei hunu gau gaa-lahi be digau galabudi gi-nia henua-llauehe huogodoo, gei digau o-di bouli ga-dagadagahi Jerusalem gaa-dae-loo gi nadau madagoaa ma-gaa-lawa.

21:25  “Nia haga-modongoohia gaa-hai gi-di laa mo di malama mo nia heduu i-di langi. Nia henua huogodoo henuailala ga-nadau hagadagadagagee ai, ga-mmaadagu i-di ngoloolo mo di bagibagia o-di moana.

21:26  Nia daangada ga-hagalibelibeina i nadau mmaadagu di tali di-mee dela gaa-hai gi-hongo henuailala, idimaa, nia mogobuna o lodo di ahiaalangi la-ga-hagalee i nadau lohongo.

21:27  Di madagoaa-hua deelaa, gei Tama-Tangada ga-gila-mai, e-hanimoi i-lodo di gololangi mono mogobuna maaloo-dangihi ge madamada.

21:28  Di madagoaa nia mee aanei ga-daamada ga-kila-aga, tuu-i-nua, mmada gi-nua, i-di godou haga-mouli la-gu-hoohoo-mai.”

21:29  Jesus gaa-kai di ala-kai deenei, “Haga-maanadu-ina di laagau-‘fig’ mono laagau huogodoo ala i-golo.

21:30  Goodou mmada gi-nia lau ga-daamada ga-matilitili i-di gili nia manga, gei goodou gu-iloo bolo di madagoaa mahanahana la-gu-hoohoo-mai.

21:31  E-hai gadoo beenei, goodou gaa-mmada gi-nia mee aanei ga-kila-aga, gei goodou gu-iloo bolo Teenua King o God la-gu-hoohoo ga-hanimoi.

21:32  “Goodou gi-langahia bolo nia mee aanei huogodoo la-gaa-hai i-mua di mmade o digau huogodoo ala e-mouli dolomeenei.

21:33  Di langi mo henuailala la-ga-hagalee, gei agu helekai le e-noho-hua beelaa.

21:34  “Gii-pula i goodou. Hudee hagadaadaamee-ina goodou gi-nia haihai hagamiami, mo di inuinu nia dagaao, mo di mamaanadu di mouli dolomeenei, idimaa, di laangi deelaa le e-limalima-hua di-tale-adu gi goodou.

21:35  Di laangi deelaa, le e-hai be-di hele dela e-hanimoi gi-hongo digau huogodoo ala e-noho i-nia gowaa huogodoo i henuailala.

21:36  Gii-noho kanakana, hai-dalodalo i-nia madagoaa huogodoo gii-mee goodou di-llele gi-daha mo nia mee huogodoo ala gaa-hai, gii-mee goodou di-tuu i-mua Tama-Tangada.”

21:37  Jesus e-hai ana agoago i-nia laangi aalaa i-lodo di Hale Daumaha. Hiahi-ia di mee, gei Mee gaa-hana gaa-noho i-di boo i-hongo di Gonduu Olib.

21:38  Hagaluada-loo i-nia laangi aalaa, digau huogodoo e-hula gi-di Hale Daumaha belee hagalongo gi Mee.