Kapingamarangi - Luke - 4

4:1  Jesus ga-hagatanga i Jordan, geia guu-honu i-di Hagataalunga-Dabu dela ne-lahi a-Mee gi-lodo di anggowaa.

4:2  Gei Mee gaa-noho i-lodo di anggowaa i-nia laangi e-madahaa, ga-hagamada go Setan. I-lodo nia laangi aalaa, gei Mee digi miami, gu-hiigai huoloo.

4:3  Setan ga-helekai gi Mee, “Maa Goe di Tama ni God, helekai gi-di hadugalaa deenei gii-hai di palaawaa.”

4:4  Jesus ga-helekai, “Ma-guu-lawa di-hihi i-lodo di Beebaa-Dabu boloo, ‘Ma hagalee go nia palaawaa la-hua ala e-mee di-haga-mouli tangada.’ ”

4:5  Setan gaa-lahi labelaa a-Mee gi-di gowaa nnoonua, ga-haga-mmada a Mee gi-nia henua huogodoo i henuailala i tama-madagoaa bodobodo,

4:6  ga-helekai gi mee, “Au ga-gowadu gi-di-Goe nia mogobuna mahi huogodoo aanei mo nia maluagina huogodoo. Huogodoo gu-dugu-mai gi-di-au, gei au e-mee-hua di-wanga nia maa gi tangada dela e-hiihai ginai au.

4:7  Nia mee aanei huogodoo ga-gowadu gi-di-Goe, maa Goe ga-daumaha-mai.”

4:8  Jesus ga-helekai, “Ma-guu-lawa di-hihi i-lodo di Beebaa-Dabu boloo, ‘Daumaha ang-gi Dimaadua go doo God, go Mee hua dela e-hai-hegau ginai goe!’ ”

4:9  Setan gaa-lahi labelaa a-Mee gi Jerusalem, gaa-dugu a-Mee gi-hongo tahuhu o-di Hale Daumaha, ga-helekai gi Mee, “Maa goe di Tama ni God, hobo-ia gi-daha mo di gowaa deenaa.

4:10  Idimaa, ma-guu-lawa di-hihi i-lodo di Beebaa-Dabu boloo, ‘God ga-helekai gi ana gau di-langi gi-benabena-ina Goe gi-humalia.’

4:11  “Guu-hai labelaa boloo, ‘Digaula gaa-kumi-laa Goe gi-dee tale oo wae gi-nia hadu.’ ”

4:12  Jesus ga-helekai, “Ma-guu-lawa di hihi boloo, ‘Goe hudee hagamada-ina Dimaadua, go doo God.’ ”

4:13  Di madagoaa Setan ne-lawa di hagamadamada Jesus, gei mee ga-hagatanga gi-daha mo Mee i tama-madagoaa bodobodo.

4:14  Jesus gu-maaloo mai i-di Hagataalunga-Dabu, ge-Ia gaa-hana gi-muli gi Galilee. Dono longo guu-dele i-nia madagowaa huogodoo ala i-golo.

4:15  Gei Mee e-hai ana agoago i-lodo nia synagogee digaula, huogodoo gu-haga-hagaamu a-Mee.

4:16  Jesus gaa-hana gi Nazareth, di gowaa dela ne-tomo-aga-ieia, ga-ulu gi-lodo synagogee i-di Laangi-Sabad be dana hai nogo haihai. Gei Mee ga-duu-aga belee dau dana Beebaa-Dabu.

4:17  Gei digaula ga-gaamai di beebaa soukohp Isaiah gi Mee, ge-Ia gaa-huge di beebaa deelaa, gaa-dau di gowaa dela e-hihi boloo,

4:18  “Di Hagataalunga o Dimaadua la-gu i dogu baahi. Mee gu-hagatulu Au gi-agoago-ina di Longo-Humalia ang-gi digau hagaloale. Mee ne-hagau-mai Au gi-hagadele-ina gi digau ala e-lawalawa gi-maahede, mo digau ala e-dee-gida gi-gidee, gi-haga-maahede-ina digau ala e-noho i-lodo di haingadaa,

4:19  gi-hagadele-ina bolo di madagoaa gu-dae-mai, go di madagoaa Dimaadua e-haga-dagaloaha ana daangada.”

4:20  Jesus gaa-wini di beebaa deelaa, gaa-wanga gi tangada hai-hegau, gaa-noho gi-hongo dono lohongo. Huogodoo ala i-lodo synagogee, e-daumada a-Mee,

4:21  gei Mee ga-daamada ga-helekai, “Digau-nei, dangi-nei nia helekai di Beebaa-Dabu ala gu-longono-goodou, la-gu-kila-aga i tadau baahi!”

4:22  Digaula huogodoo guu-tene gi Mee huoloo, gei gu-goboina i-nia helekai humalia aalaa, ala ne-loomoi i-baahi o-Mee. Digaula ga-helekai, “Mee hagalee go tama-daane Joseph?”

4:23  Jesus ga-helekai gi digaula, “Au e-iloo bolo goodou ga-helekai nia helekai podo mai gi-di-Au boloo, ‘Togidaa, hagahili-ina goe!’ Gei goodou ga-helekai-mai labelaa boloo, ‘Gi-heia i-lodo do guongo-donu nia mee haga-goboina ala ne-longono-ai gimaadou bolo ne-hai Kooe i Capernaum.’ ”

4:24  Gei Mee ga-duudagi-adu-hua, ga-helekai, “Goodou gi-iloo, bolo ma soukohp e-hagalabagau i-lodo dono guongo-donu ai.

4:25  “E-donu bolo nia ahina guu-mmade nadau lodo e-dogologowaahee i Israel i-di madagoaa soukohp Elijah, i-di madagoaa di uwa digi doo i-lodo nia ngadau e-dolu mo di baahi, mo tau-magamaga damana guu-gahu tenua deelaa.

4:26  Gei Elijah digi hagau-ina gi dahi dangada i-lodo Israel, gei ne-hagau hua gi-di ahina tuadimee gu-made dono lodo dela e-noho i Zarephath i-lodo tenua go Sidon.

4:27  Gadoo be-di madagoaa soukohp Elisha, nogo iai di magi genegene i Israel, gei deai tangada i digaula ne-hili ga-madammaa ai, dela-hua go Naaman, tangada o Syria.”

4:28  Digau huogodoo nogo i-lodo synagogee gu-hagawelewele huoloo i-di nadau longono nia helekai aanei.

4:29  Digaula gaa-lahi a Jesus gi-daha mo di waahale gi tomo di gonduu dela ne-hau-ai di-nadau waahale, belee bale a-Mee gii-doo gi-di gowaa helemodu.

4:30  Gei Jesus gaa-hana laa-lodo digaula, gaa-hana gi-daha mo digaula.

4:31  Nomuli, Jesus gaa-hana gi Capernaum, di waahale i Galilee, ga-agoago gi-nia daangada i-di Laangi-Sabad.

4:32  Nia daangada huogodoo gu-goboina i-nia agoago a-Maa, i Mee e-agoago i-di mogobuna.

4:33  Taane i-lodo synagogee, iai di hagataalunga huaidu i ono lodo, mee gaa-wolo gi-nua,

4:34  “Jesus o Nazareth, ma di-aha e-hiihai ginai Goe i gimaadou? Goe ne-hanimoi belee hagahuaidu gimaadou? Aahaa, au e-iloo-eau Goe tangada dabuaahia kae-hegau a God!”

4:35  Jesus ga-hagabuhi gi-di hagataalunga huaidu, “Noho dee-muu, ulu-mai gi-daha mo taane deenaa!” Gei di hagataalunga huaidu ga-hagahinga taane gi-lala i-mua digaula, ga-ulu gi-daha mo mee ge digi hai dana huaidu gi mee.

4:36  Nia daangada huogodoo gu-goboina ga-helehelekai, “Ma nia helekai aha aanei? Mee e-mogobuna di helekai gi nia hagataalunga huaidu, gei digaula e-ulu-mai gi-daha!”

4:37  Di longo o Jesus guu-dele i-nia madagowaa huogodoo i-lodo tenua deelaa.

4:38  Jesus ga-hagatanga gi-daha mo synagogee, gaa-hana gi-di hale o Simon. Tinana di lodo Simon e-magi welengina huoloo. Digaula ga-helekai gi Jesus i-di ahina deelaa.

4:39  Jesus ga-menege-adu gi mee, ga-helekai gi-di magi welengina gi-ulu-mai gi-daha. Di magi welengina gu-ulu-mai gi-daha, mee ga-ala-aga, ga-nnoo i-nua, ga-hagamaamaa digaula.

4:40  Hiahi-ia di-mee, digau huogodoo ala nadau ihoo magi i-nia hagadilinga magi e-logo, ga-laha-mai digaula gi Jesus. Mee gaa-dugu ono lima gi-hongo digaula huogodoo, e-hagadau dagidahi, ga-hagahili digaula.

4:41  Nia hagataalunga huaidu ala e-ulu gi-daha mo digau dogologo e-wwolowwolo, “Goe go Tama a God!” Jesus gu-bule digaula, digi dumaalia gi digaula gi-helekai, i digaula gu-iloo bolo Mee go di Mesaia.

4:42  Hooaga haga-luada-loo, Jesus gaa-hana gi-daha mo di waahale gi-di gowaa lomo modogoia. Gei nia daangada ga-daamada ga-halahala a-Mee, ga-gidee a-Mee, ga-tangi gi Mee bolo gi-hudee hagatanga gi-daha mo ginaadou.

4:43  Mee ga-helekai gi digaula, “Au e-hai-loo gi-agoago di Longo-Humalia o Teenua King o God gi-nia waahale labelaa ala i-golo, idimaa, deelaa di mee a God ne-hagau-mai ginai Au belee hai.”

4:44  Mee ga-agoago i-lodo nia synagogee i-lodo tenua hagatau deelaa.