Kekchi - Psalms - 104

104:1  Tinqˈue xlokˈal li nimajcual Dios chi anchal lin chˈo̱l. At Ka̱cuaˈ, at inDios, kˈaxal nim la̱ cuanquilal. Numtajenak la̱ lokˈal ut la̱ nimajcual cuanquilal.

104:2  Numtajenak la̱ lokˈal. La̱at li cutan saken. La̱at cayi̱b li choxa chanchan nak cahel jun li tˈicr.

104:3  Cayi̱b la̱ naˈaj takecˈ saˈ xbe̱n li haˈ. Eb li chok nequeˈcˈanjelac cha̱cuu joˈ la̱ carruaje. Ut nacatbe̱c saˈ li ikˈ.

104:4  Cayi̱b li ikˈ chokˈ a̱takl. Ut cayi̱b li rakˈ ca̱k re ta̱cˈanjelak cha̱cuu.

104:5  Cayi̱b li ruchichˈochˈ saˈ xnaˈaj ut incˈaˈ ta̱ecˈa̱nk.

104:6  Kˈaxal cham li palau ut incˈaˈ nacˈutun li chˈochˈ. Nujenak li haˈ ut incˈaˈ quicˈutun li tzu̱l.

104:7  Riqˈuin la̱ cuanquil caye re li haˈ nak tixchˈutub rib, ut saˈ junpa̱t quixchˈutub rib. Saˈ junpa̱t qui-el nak quirabi lix ya̱b la̱ cux.

104:8  Li haˈ quinumeˈ saˈ xbe̱neb li tzu̱l ut co̱ saˈ li ru takˈa saˈ li naˈajej li cayi̱b chokˈ xnaˈaj li haˈ.

104:9  Ut caqˈue retalil bar ta̱numekˈ lix naˈaj li haˈ re nak incˈaˈ chic tixtzˈap xbe̱n li ruchichˈochˈ.

104:10  La̱at catyi̱ban reheb li cocˈ yuˈam haˈ ut li cocˈ nimaˈ li nalajeˈnumeˈ saˈ xya̱nkeb li tzu̱l.

104:11  Aˈan li haˈ nequeˈrucˈ chixjunileb li xul ut eb li bu̱r li cuanqueb saˈ qˈuicheˈ nak nequeˈchakic reheb. Nequeˈrucˈ li haˈ toj retal nequeˈcˈojla xchˈo̱leb.

104:12  Saˈ eb li rukˈ li cheˈ li cuanqueb chire li nimaˈ eb li cocˈ xul li nequeˈrupupic chiru choxa nequeˈxqˈue lix soqueb ut nequeˈbichan.

104:13  La̱at nacatˈakresi li chˈochˈ riqˈuin li hab li nacatakla chak saˈ choxa li cuancat cuiˈ. Nacatˈakresi li chˈochˈ toj retal nacˈojla xchˈo̱l li chˈochˈ.

104:14  Nacaqˈue chi qˈui̱c li pim re nak ta̱cua̱nk xcuaheb li xul. Ut nacaqˈue ajcuiˈ chi qˈui̱c li acui̱mk re nak ta̱cˈanjelak chiru li cui̱nk chokˈ xtzacae̱mk.

104:15  Nacaqˈue lix tzacae̱mk re nak ta̱cua̱nk xmetzˈe̱u li cui̱nk. Nacaqˈue li vino ut nacaqˈue li aceite re nak ta̱sahokˈ saˈ xchˈo̱l.

104:16  Nacaqˈue li hab chi nabal saˈ xbe̱n li cheˈ li cuan Líbano. Nacatˈakresiheb li chacalteˈ li cacuau la̱at.

104:17  Saˈ eb li rukˈ li cheˈ aˈan nequeˈxyi̱b xsoqueb li xul li nequeˈrupupic ut aran nequeˈxyi̱b xsoc li ni̱nki xicanel xul cigueña.

104:18  Eb li yuc nequeˈcuan saˈ eb li ni̱nki tzu̱l ut eb li imul nequeˈcuan saˈ xya̱nk li pec.

104:19  Cayi̱b li po re xberesinquil li cutan junju̱nk ut li chihab. Li sakˈe ac naxnau jokˈe ta̱oc.

104:20  La̱at caqˈue li kˈojyi̱n ut eb li xul li cuanqueb saˈ qˈuicheˈ nequeˈel chi be̱c chiru li kˈojyi̱n.

104:21  Eb li cakcoj li toj sa̱jeb japjo̱queb reheb nak yo̱queb chixsicˈbal lix tzacae̱mk li nacaqˈue.

104:22  Nak nasake̱u nequeˈxic chi cua̱rc saˈ lix naˈajeb.

104:23  Ut eb li cristian nequeˈxic saˈ lix trabajeb nak nasake̱u ut toj ecuu nequeˈsukˈi cuiˈchic saˈ li rochocheb.

104:24  At Ka̱cuaˈ, cˈajoˈ xlokˈal li cˈanjel li quilaja̱ba̱nu. Chixjunil li cˈanjel aˈin quilaja̱ba̱nu riqˈuin la̱ naˈleb. Li ruchichˈochˈ nujenak riqˈuin chixjunil li us quilaja̱ba̱nu.

104:25  Lix ni̱nkal ru palau la̱at catyi̱ban re chi kˈaxal ni̱nk. Ut chi saˈ cuanqueb nabal li xul incˈaˈ naru rajlanquil xban xqˈuialeb, joˈ ni̱nk joˈ cocˈ.

104:26  Eb li ni̱nki jucub nequeˈbe̱c chiru li palau. Ut saˈ li palau cuan li nimla xul li cayi̱b Leviatán xcˈabaˈ. Aran nabatzˈun saˈ li palau.

104:27  Chixjunileb li xul aˈin a̱cuiqˈuin nequeˈoybenin. Nequeˈroybeni nak la̱at ta̱qˈue lix tzacae̱mkeb saˈ xkˈehil.

104:28  La̱at nacaqˈue reheb lix tzacae̱mkeb ut eb aˈan nequeˈxcˈul. Nacaqˈue lix tzacae̱mkeb ut nequeˈcuaˈac toj retal nacˈojla xchˈo̱leb riqˈuin li cˈaˈru nequeˈxtzaca.

104:29  Nak la̱at incˈaˈ chic ta̱qˈue lix tzacae̱mkeb, teˈoc xxiu. Cui la̱at ta̱cuisi lix musikˈeb, teˈca̱mk ut teˈsukˈi̱k cuiˈchic chˈochˈ.

104:30  Abanan la̱at ta̱qˈueheb cuiˈchic chi yoˈla̱c re̱kaj ut acˈobresinbilak chic li ruchichˈochˈ.

104:31  Lokˈoninbil taxak ru li nimajcual Dios chi junelic kˈe cutan. Ut chisahokˈ taxak saˈ xchˈo̱l li Ka̱cuaˈ riqˈuin li cˈaˈru quilajxba̱nu.

104:32  Caˈaj cuiˈ naril li ruchichˈochˈ li Dios, ut li ruchichˈochˈ na-ecˈan saˈ xnaˈaj. Caˈaj cuiˈ naxtochˈ caˈchˈin li tzu̱l ut na-el xsibel.

104:33  Junelic tinbicha xlokˈal li Ka̱cuaˈ joˈ najtil tincua̱nk saˈ ruchichˈochˈ. Junelic tinqˈue xlokˈal li Dios toj chirix incamic.

104:34  Chicuulak ta chiru li Ka̱cuaˈ li cˈaˈru nincˈoxla chirix. Li Ka̱cuaˈ aˈan li naqˈuehoc xsahil inchˈo̱l.

104:35  Cheˈisi̱k ta saˈ ruchichˈochˈ eb laj ma̱c ut cheˈsachekˈ ta ruheb li incˈaˈ useb xnaˈleb. Aban la̱in tinqˈue xlokˈal li Ka̱cuaˈ chi anchal inchˈo̱l. Lokˈoninbil taxak ru li nimajcual Dios.