LinVB - Psalms - 66

66:1  Ya kapita wa bayembi. Nzembo. O mokili mobimba bobetele Nzambe maboko,

66:2  boyembela nkombo ya ye nzembo, bokembela mpe bokumisa ye.

66:3  Boloba na Nzambe : « Osali bikela binene, nguya ya yo eleki, banguna bakomi kobondela yo.

66:4  Bato ba nse mobimba bakumbameli yo, bayembi mpo ya lokumu la nkombo ya yo. »

66:5  Yakani kotala bikela bya Nzambe, biye bikoyokisaka bato nsomo.

66:6  Akaukisaki mbu, ekomi mabelé makasi, mpo ’te bato bakatisa ebale na makolo. Bongo, esengo ya biso se ye !

66:7  Akoyangela seko na nguya enene ! Miso ma ye makokengeleke bikolo binso, baye batombokeli ye bakomeka lisusu te.

66:8  Bato ba bikolo binso, bokumisa Nzambe wa biso, boyemba nzembo ya kokumisa ye.

66:9  Oyo akabeli biso bomoi akobatelaka makolo ma biso mpo totuta libaku te.

66:10  Solo, omekaki biso, e Nzambe, opetolaki biso lokola bakopetolaka palata,

66:11  okotisaki biso o motambo, okangaki loketo la biso makasi,

66:12  olingisaki ’te bato banyata mitó mya biso, tozikaki na móto, tozindaki o mai, kasi na nsima okambaki biso o esika ya bopemi.

66:13  Nayei kotumba mabonza o ndako ya yo, nayei kokokisa bilako bya ngai,

66:14  biye nalakelaki yo na monoko, biye nasakolaki o ntango nayokaki nsomo.

66:15  Nakotumbela yo miboma mya mafuta, milinga mya mpata babali, mpe nakobonza ngombe na ntaba babali.

66:16  Yakani koyoka bino banso bokobangaka Nzambe, nayebisa bino lisolo lya manso ye asali ngai.

66:17  Ntango nazalaki kobondela ye, nabandaki kosakola lokumu la ye.

66:18  Soko o motema nakanaki kosala mabe, mbele Mokonzi andimaki losambo la ngai te.

66:19  Kasi Nzambe andimelaki ngai, ayokaki mabondeli ma ngai.

66:20  Lokumu na Nzambe, oyo andimaki losambo la ngai mpe apimaki ngai bolingi bwa ye te !