CopSahBible2 - Sirach - 23

23:1  ⲡϫⲟⲉⲓⲥ ⲡⲓⲱⲧ ⲡϫⲟⲉⲓⲥ ⲙⲡⲁⲱⲛϩ ⲙⲡⲣⲕⲁⲁⲧ ⲛⲥⲱⲕ ϩⲙ ⲡⲉⲩϣⲟϫⲛⲉ ⲁⲩⲱ ⲙⲡⲣⲕⲁⲁⲧ ⲉϩⲉ ⲛϩⲏⲧⲟⲩ

23:2  ⲛⲓⲙ ⲡⲉⲧⲛⲁⲉⲓⲛⲉ ⲛϩⲉⲛⲙⲁⲥⲧⲓⲅⲝ ⲉϫⲛ ⲛⲁⲙⲉⲉⲩⲉ ⲁⲩⲱ ⲟⲩⲥⲃⲱ ⲛⲥⲟⲫⲓⲁ ⲉϫⲛ ⲡⲁϩⲏⲧ ϫⲉⲕⲁⲥ ⲛⲛⲉⲩϯⲥⲟ ⲉϫⲛ ⲛⲁⲙⲛⲧⲁⲧⲥⲟⲟⲩⲛ

23:3  ϫⲉ ⲛⲉⲛⲁⲟⲃϣⲥ ⲁϣⲁⲓ ⲛⲧⲉⲛⲁⲛⲟⲃⲉ ⲣϩⲟⲩⲟ ⲛⲧⲁϩⲉ ⲙⲡⲉⲙⲧⲟ ⲉⲃⲟⲗ ⲛⲛⲁϫⲁϫⲉ ⲁⲩⲱ ⲛⲧⲉⲡⲁϫⲁϫⲉ ⲣⲁϣⲉ ⲙⲙⲟⲓ

23:4  ⲡϫⲟⲉⲓⲥ ⲡⲓⲱⲧ ⲡⲛⲟⲩⲧⲉ ⲙⲡⲁⲱⲛϩ ⲙⲡⲣϯ ⲛⲁⲓ ⲛⲟⲩⲙⲛⲧⲧⲁⲥⲃⲁⲗ

23:5  [ⲁⲩⲱ ⲕⲧⲟ] ⲉⲃⲟⲗ ⲙⲙⲟⲓ ⲛⲛⲉⲡⲓⲑⲩⲙⲓⲁ

23:6  [ⲙⲡⲣ]ⲧⲣⲉⲟⲩⲙⲛⲧⲙⲁⲓⲥϩⲓⲙⲉ [ⲧⲁ]ϩⲟⲓ ⲙⲛ ⲟⲩⲟⲩⲱϣ ⲛⲧⲉ ⲑⲏ ⲙⲡⲣⲧⲁⲁⲧ ⲉⲧⲟⲟⲧⲥ ⲛⲟⲩⲯⲩⲭⲏ ⲛⲁⲧⲃⲁⲗ ⲧⲉⲥⲃⲱ ⲛⲧⲧⲁⲡⲣⲟ

23:7  ⲥⲱⲧⲙ ⲛⲁϣⲏⲣⲉ ⲉⲧⲉⲥⲃⲱ ⲛⲧⲧⲁⲡⲣⲟ ⲁⲩⲱ ⲡⲉⲧϩⲁⲣⲉϩ ⲉⲣⲟⲥ ⲛⲛⲉϥⲧⲁⲕⲟ

23:8  ⲁⲩⲱ ⲥⲉⲛⲁⲧⲁϩⲟⲥ ϩⲓ ⲛⲉϥⲥⲡⲟⲧⲟⲩ ⲡⲣⲉϥⲣⲛⲟⲃⲉ ⲙⲛ ⲡⲣⲉϥⲥⲁϩⲟⲩ ⲙⲛ ⲡϫⲁⲥⲓϩⲏⲧ ⲛⲁⲥⲕⲁⲛⲇⲁⲗⲓⲍⲉ ⲛϩⲏⲧⲟⲩ

23:9  ⲙⲡⲣⲧⲥⲁⲃⲉⲣⲱⲕ ⲉⲱⲣⲕ ⲁⲩⲱ ⲙⲡⲣⲧⲟⲡⲕ ⲉⲧⲁⲩⲉⲡⲣⲁⲛ ⲙⲡⲉⲧⲟⲩⲁⲁⲃ

23:10  ⲛⲑⲉ ⲅⲁⲣ ⲛⲟⲩϩⲙϩⲁⲗ ⲉⲩϫⲛⲟ ⲙⲙⲟϥ ⲛϩⲁϩ ⲛⲥⲟⲡ ⲉⲛϥⲛⲁⲣⲃⲟⲗ ⲁⲛ ⲉⲥⲏϣⲉ ⲧⲁⲓ ⲧⲉ ⲑⲉ ⲙⲡⲉⲧⲱⲣⲕ ⲉϥⲧⲁⲩⲟ ⲙⲡⲣⲁⲛ ⲛϩⲁϩ ⲛⲥⲟⲡ ⲉⲛϥⲛⲁⲧⲃⲃⲟ ⲁⲛ ⲉⲛⲟⲃⲉ

23:11  ⲟⲩⲣⲱⲙⲉ ⲛⲣⲉϥⲁϣⲁⲓ ⲛⲱⲣⲕ ϥⲛⲁⲙⲟⲩϩ ⲛⲁⲛⲟⲙⲓⲁ ⲁⲩⲱ ⲛⲛⲉⲙⲁⲥⲧⲓⲅⲝ ⲕⲁⲡⲉϥⲏⲓ ⲉϥϣⲁⲛⲣϩⲧⲏϥ ⲡⲉϥⲛⲟⲃⲉ ⲛϩⲏⲧϥ ⲕⲁⲛ ⲉϥϣⲁⲛⲟⲃϣϥ ⲁϥⲣⲛⲟⲃⲉ ⲥⲛⲁⲩ ⲁⲩⲱ ⲉϣⲱⲡⲉ ⲛⲧⲁϥⲱⲣⲕ ⲉⲡϫⲓⲛϫⲏ ⲛϥⲛⲁⲧⲙⲁⲉⲓⲟ ⲁⲛ ⲡⲉϥⲏⲓ ⲅⲁⲣ ⲛⲁⲙⲟⲩϩ ⲙⲙⲟⲭⲥ

23:12  ⲟⲩϣⲁϫⲉ ⲉϥϭⲟⲟⲗⲉ ⲙⲡⲙⲟⲩ ⲛⲛⲉⲩϭⲛⲧϥ ϩⲛ ⲧⲉ[ⲕⲗ]ⲏⲣⲟⲛⲟⲙⲓⲁ ⲛⲓⲁⲕⲱⲃ ⲛⲁⲓ ⲅⲁⲣ ⲧ[ⲏⲣ]ⲟⲩ ⲛⲁⲟⲩⲉ ⲛⲛⲣⲙⲛⲛⲟ[ⲩⲧⲉ] ⲁⲩⲱ ⲛⲉ…ⲛⲧⲟⲩ ϩⲛ ⲛⲟⲃⲉ

23:13  ⲙⲡⲣⲧ[ⲥⲁⲃ]ⲉⲧⲉⲕⲧⲁⲡⲣⲟ ⲉⲥⲃⲱ ⲉⲥϩⲟⲟⲩ ϫⲉ ⲟⲩⲛϣⲁϫⲉ ⲛⲛⲟⲃⲉ ⲛϩⲏⲧⲥ

23:14  ⲁⲣⲓⲡⲙⲉⲉⲩⲉ ⲙⲡⲉⲕⲉⲓⲱⲧ ⲙⲛ ⲧⲉⲕⲙⲁⲁⲩ ⲉⲕⲛⲁⲥⲱⲟⲩϩ ⲅⲁⲣ ⲉϩⲟⲩⲛ ϩⲛ ⲧⲙⲏⲧⲉ ⲛϩⲉⲛⲛⲟϭ ⲙⲏⲡⲟⲧⲉ ⲛⲅⲣⲡⲱⲃϣ ⲙⲡⲉⲩⲙⲧⲟ ⲉⲃⲟⲗ ⲛⲅⲣⲥⲟϭ ⲛⲧⲉⲕⲧⲟⲡⲥ ⲛⲅⲟⲩⲱϣ ⲉⲛⲉⲙⲡⲟⲩϫⲡⲟⲕ ⲛⲅⲥϩⲟⲩⲣⲡⲉϩⲟⲟⲩ ⲛⲧⲁⲩⲙⲁⲥⲧⲕ

23:15  ⲟⲩⲣⲱⲙⲉ ⲉϥⲧⲁⲡⲏⲩ ⲉϩⲛϣⲁϫⲉ ⲛⲛⲟϭⲛⲉϭ ⲛⲛⲉϥϫⲓⲥⲃⲱ ⲛⲛⲉϥϩⲟⲟⲩ ⲧⲏⲣⲟⲩ

23:16  ϩⲱⲃ ⲥⲛⲁⲩ ⲛⲉϣⲁⲩⲧⲁϣⲉⲛⲟⲃⲉ ⲁⲩⲱ ⲡⲙⲉϩϣⲟⲙⲛⲧ ϣⲁϥⲉⲓⲛⲉ ⲛⲟⲩⲟⲣⲅⲏ

23:17  ⲟⲩⲯⲩⲭⲏ ⲛϩⲏⲧ ϣⲏⲙ ⲛⲑⲉ ⲛⲟⲩⲕⲱϩⲧ ⲉϥⲙⲟⲩϩ ⲁⲩⲱ ⲟⲩⲣⲱⲙⲉ ⲙⲡⲟⲣⲛⲟⲥ ϩⲙ ⲡⲥⲱⲙⲁ ⲛⲧⲉϥⲥⲁⲣⲝ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ⲉⲙⲡϥϫⲉⲣⲉⲟⲩⲕⲱϩⲧ ⲟⲉⲓⲕ ⲛⲓⲙ ϩⲟⲗϭ ⲛⲟⲩⲣⲱⲙⲉ ⲙⲡⲟⲣⲛⲟⲥ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ⲉⲙⲡϥⲙⲟⲩ

23:18  ⲟⲩⲣⲱⲙⲉ ⲉϥⲧⲱⲟⲩⲛ ϩⲓ ⲡⲉϥϭⲗⲟϭ ⲉϥϫⲱ ⲙⲙⲟⲥ ϩⲙ ⲡⲉϥϩⲏⲧ ϫⲉ ⲛⲓⲙ ⲡⲉⲧⲛⲁⲩ ⲉⲣⲟⲓ ⲡⲕⲁⲕⲉ ⲙⲡⲁⲕⲱⲧⲉ ⲁⲩⲱ ⲛ[ⲓϫ]ⲟ ϩⲱⲃⲥ ⲙⲙⲟⲓ [ⲙⲛ] ⲗⲁⲁⲩ ⲛⲁⲩ ⲉⲣⲟⲓ ⲉⲓⲣϩ[ⲟⲧⲉ] ϩⲏⲧϥ ⲛⲛⲓⲙ ⲙⲡⲉⲧϫⲟⲥⲉ ⲛⲁⲣⲡⲙⲉⲉⲩⲉ [ⲁⲛ] ⲛⲛⲁⲛⲟⲃⲉ

23:19  ⲛⲃⲁⲗ ⲛⲛⲣⲱⲙⲉ ⲛⲉⲧϥⲣϩⲟ[ⲧⲉ] ϩⲏⲧⲟⲩ ⲛϥⲉⲓⲙⲉ ⲁⲛ ϫⲉ ⲛⲃⲁⲗ ⲙⲡϫⲟⲉⲓⲥ ⲟ ⲛⲟⲩⲟⲉⲓⲛ ⲉⲡⲣⲏ ⲛⲟⲩⲧⲃⲁ ⲛⲕⲱⲃ ⲉⲩϭⲱϣⲧ ⲉϫⲛ ⲛⲉϩⲓⲟⲟⲩⲉ ⲧⲏⲣⲟⲩ ⲛⲛⲣⲱⲙⲉ ⲁⲩⲱ ⲉⲩⲛⲁⲩ ⲉⲙⲙⲁ ⲉⲑⲏⲡ

23:20  ⲉⲙⲡⲁⲧϥⲥⲛⲧⲛⲕⲁ ⲛⲓⲙ ⲥⲉⲟⲩⲟⲛϩ ⲉⲣⲟϥ ⲁⲩⲱ ⲟⲩⲟⲛ ⲛⲓⲙ ⲙⲛⲛⲥⲁ ⲧⲣⲉϥϫⲟⲕⲟⲩ ⲉⲃⲟⲗ

23:21  ⲥⲉⲛⲁϫⲓⲕⲃⲁ ⲙⲡⲁⲓ ϩⲛ ⲛⲉⲡⲗⲁⲧⲓⲁ ⲛⲟⲩⲡⲟⲗⲓⲥ ⲁⲩⲱ ⲥⲉⲛⲁϭⲟⲡϥ ϩⲙ ⲡⲉⲧⲉⲙⲡϥⲙⲉⲉⲩⲉ ⲉⲣⲟϥ

23:22  ⲧⲁⲓ ⲟⲛ ⲧⲉ ⲑⲉ ⲛⲟⲩⲥϩⲓⲙⲉ ⲉⲥⲛⲁⲕⲁⲡⲉⲥϩⲁⲓ ⲛⲥⲱⲥ ⲛⲥϫⲡⲉϣⲏⲣⲉ ⲙⲛ ⲕⲉⲟⲩⲁ

23:23  ϣⲟⲣⲡ ⲙⲉⲛ ϫⲉ ⲁⲥⲣⲁⲧⲥⲱⲧⲙ ⲛⲥⲁ ⲡⲛⲟⲙⲟⲥ ⲙⲡⲉⲧϫⲟⲥⲉ ⲡⲙⲉϩⲥⲛⲁⲩ ϫⲉ ⲁⲥⲣⲛⲟⲃⲉ ⲉⲡⲉⲥϩⲁⲓ ⲡⲙⲉϩϣⲟⲙⲛⲧ ⲛⲧⲁⲥⲣⲛⲟⲉⲓⲕ ϩⲛ ⲟⲩⲡⲟⲣⲛⲓⲁ ⲁⲩⲱ ⲁⲥϫⲡⲉϣⲏⲣⲉ ⲙⲛ ⲕ[ⲉⲟⲩⲁ]

23:24  ⲉⲩⲉⲛⲧⲁⲓ ⲉⲃⲟⲗ ⲉⲧⲙⲏⲧⲉ ⲛⲟⲩⲙⲏⲏϣⲉ ⲁⲩⲱ ⲉⲩⲉϭⲛⲡϣⲓⲛⲉ ⲛⲛⲉⲥϣⲏⲣⲉ

23:25  ⲛⲛⲉⲛⲉⲥϣⲏⲣⲉ ϫⲉⲛⲟⲩⲛⲉ ⲉⲃⲟⲗ ⲁⲩⲱ ⲛⲉⲛⲉⲥⲕⲗⲁⲇⲟⲥ ⲧⲁⲩⲉⲕⲁⲣⲡⲟⲥ

23:26  ⲥⲛⲁⲕⲁⲡⲉⲥⲣⲡⲙⲉⲉⲩⲉ ⲉⲛ[ⲥⲁϩⲟⲩ …]

23:27  ⲁⲩⲱ ⲥⲉ[ⲛⲁⲉ]ⲓⲙⲉ ⲛϭⲓ ⲛⲉⲛⲧⲁⲩϣⲱ[ϫⲡ] ϫⲉ ⲙⲛ [ⲡⲉⲧ]ⲛⲁⲛⲟⲩϥ ⲉⲑⲟⲧⲉ ⲙⲡϫⲟ[ⲉⲓⲥ] ⲁⲩⲱ ⲙⲛ ⲡⲉⲧϩⲟⲗϭ ⲉϯϩⲧⲏⲕ ⲉⲛⲉϥⲉⲛⲧⲟⲗⲏ