Kapingamarangi - Titus

Chapter 1

1:1  Mai baahi o Paul, tangada hai-hegau a God, ge tangada agoago-hagau ni Jesus Christ. Au ne-hilihili-aga ge ne-hagau belee hagamaamaa nia hagadonu o-nia dama a God ala gu-hilihili, ge dagi digaula gi-di tonu dela e-haga-modongoohia-mai go tadau hai daumaha,

1:2  dela e-hagamau-mai i-di hagadagadagagee gi-di mouli dee-odi. God hagalee dilikai, gu-hagababa-mai gi gidaadou di mouli deenei, i-mua taamada henuailala.

1:3  Dono madagoaa humalia, gei Mee gu-haga-modongoohia ana helekai. Mee gu-higi-mai gi-di-au nnelekai aanei, malaa, au e-hagadele nia maa mai di hagatau a God, tadau Hagamouli.

1:4  Au e-hihi-adu gi-di-goe Titus, dagu dama-daane donu mai i-di hagadonu dela e-hai-mee ginai gidaua. God tadau Damana, mo Jesus Christ go tadau Dangada Hagamouli gi-dugu-adu tumaalia mo-di aumaalia.

1:5  Au ne-dugu goe i Crete belee hai gii-donu nia mee ala belee hai gii-hai, ge e-hilihili-aga nia daangada mmaadua-daumaha o-nia guongo huogodoo. Goe gi-langahia agu helekai aanei ne-hagi-adu:

1:6  Tangada madua-daumaha le e-hai tangada deai dahi mee hala i dono baahi ai, mee e-hai-lodo gi-di ahina hua-e-dahi, gei ana dama e-hai gii-hai nia dama hagadonu, hagalee hai gii-hai nia dama huaidu be de-hagalongo.

1:7  Idimaa di tagi taumaha dela e-madamada humalia i nnegau a God, geia e-hai gii-hai tangada deai dahi mee hala i dono baahi ai. Mee hagalee hagalaamua ia, be e-hagawelewele hagalimalima, be e-inuinu nia dagaao, be e-heebagi, be e-hagagailaa gi-nia bahihadu.

1:8  Mee gi-benebene-ina nia daangada huogodoo, geia gi-aloho i-nia mee huogodoo ala e-humalia. Mee e-hai gii-mee di-dagi dono huaidina, gii-donu, gii-dabu, ge gii-pula i-deia.

1:9  Mee gii-mau-dangihi gi nnelekai e-donu, ala guu-lawa di-agoago, gii-mee ia di-hagamaaloo-aga nia daangada i-nia agoago ala e-donu, mo-di haga-modongoohia nia hala o digau ala e-hai-baahi gi-di agoago deenei.

1:10  E-dogologo digau ne-huli gi-daha mo nia hai daumaha digau o Jew, ala e-agoago gi-nia daangada nia agoago hai-baahi gi-nia agoago ala e-donu mo di halahalau digaula gi nadau balu-helekai.

1:11  Gei e-humalia gi-dugua nia agoago digaula, idimaa, digaula gu-hagahinihini nia beneinei e-logo gi nadau agoago e-dee-tau, go nia agoago haga-langaadia dangada bolo gii-kumi nadau bahihadu.

1:12  Dahi soukohp mai digau o Crete ne-helekai boloo, “Digau o Crete la digau hai-kai-tilikai i-nia madagoaa e-logo. Digaula e-huaidu be nia manu lodo-geinga, digaula e-hagatoo ge hagalugai.”

1:13  Nia helekai aanei le e-donu, dela e-hidi-mai-iei goe, belee wou gi digaula, gii-mee-ai ginaadou di hai-mee gi-di hagadonu maaloo,

1:14  mo-di dugu di-nadau hagadagadagagee gi-nia kai namua o digau o Jew, mo nia haganoho nia daangada ala ne-gaamai-hua i-baahi digau ala guu-kili gi-daha di tonu.

1:15  Nia mee huogodoo e-madammaa anga-hua gi digau ala e-madammaa, gei deai di mee madammaa ang-gi digau huaidu ge de-hagadonu ai, idimaa, nadau hagamamaanadu mo-di hagi-aga nadau manawa la-gu-huaidu.

1:16  Digaula e-helekai bolo ginaadou e-iloo a God, gei nadau hangahaihai hagalee tau gi nadau helekai. Digaula e-hagadugina ge de-hagalongo, e-deemee di-hai dahi mee humalia.

Chapter 2

2:1  Malaa, agoago-ina nia mee ala mai di agoago dela e-donu.

2:2  Agoago gi-nia daane mmaadua gi-madammaa nadau mouli, gi-dagia nadau huaidina i-di tonu, mo-di pula i ginaadou. Digaula gi-maaloo i-di nadau hagadonu, mo-di aloho, mo-di hagamahi i-lodo nadau haingadaa.

2:3  Nia ahina mmaadua gii-hai-hua be di-maa, agoago-ina bolo digaula gi-mouli be nia ahina ala e-mouli madammaa. Digaula gi-hudee dili helekai tilikai, be e-hege gi nia dagaao. Digaula gi-agoago-ina nia agoago ala e-humalia,

2:4  gii-mee-ai ginaadou di-aago nia dama-ahina gi-aloho i nadau lodo, mo nadau dama,

2:5  gii-pula i ginaadou, ge gi-madammaa nadau mouli. Digaula gii-hai nia ahina hai-hegau humalia i nadau hale, mo-di dugu-anga ginaadou gi nadau lodo, gi-de-helekai hua huaidu digau ala i-golo i nnelekai a God.

2:6  Agoago gi-nia dama-daane hogi gii-bida pula i-ginaadou.

2:7  Goe gii-hai tangada e-kawe go nia daangada i o hangahaihai humalia i-nia mee huogodoo. Goe gi-manawa-dahi labelaa mo-di donu gi au agoago.

2:8  Goe hai-hegau gi nnelekai ala e-donu, ala hagalee ono huaidu ai, bolo o hagadaumee aalaa la-gi-langaadia ginaadou, i-di nadau deemee di-helekai hagahuaidu gidaadou.

2:9  Nia hege gi-daudalia nadau dagi, mo-di haga-tenetene-ina digaula i nia hagadilinga mee huogodoo, gi-hudee helekai hai-baahi ang-gi digaula,

2:10  hudee gaiaa nadau mee i digaula. Digaula gi-haga-modongoohia-aga-ina nadau mouli humalia mo-di manawa-dahi i-nia madagoaa huogodoo, gi-gidee nia daangada nadau hangahaihai, ga-hagaamu nia agoago i-di hai o God, go tadau Dangada Hagamouli.

2:11  Idimaa, God gu-haga-modongoohia dono dumaalia belee haga-mouli-ai nia daangada huogodoo.

2:12  Tumaalia deenei e-agoago-mai gi gidaadou gi-kilia gi-daha tadau mouli de-hagadonu a God, mo nia hiihai huaidu o henuailala, gei gi-iloo di bida benebene humalia tadau mouli, mo-di mouli hai-donu ge dabu i henuailala-nei,

2:13  i tadau talitali di Laangi Aamua dela e-kanakana go gidaadou, go di madagoaa dela ma-ga-gila-mai-ai di madamada o tadau God Aamua mo tadau Dangada Hagamouli go Jesus Christ.

2:14  Mee guu-wanga-dehuia dono huaidina i gidaadou, belee daa-mai gidaadou gi-daha mo nia mee huaidu huogodoo, mo-di haga-madammaa gidaadou, bolo gii-hai gidaadou nia dama donu ni-aana ala e-hiihai-hua e-hai nia mee humalia.

2:15  Agoago-ina nia mee aanei, mo-di hai-hegau i o mogobuna i do hagamaaloo-aga, mo-di helekai gii-donu digau ala e-hagalongolongo gi au helekai. Goe hudee heia digaula gi-haga-balumee-ina goe.

Chapter 3

3:1  Haga-langahia-ina gi-nia daangada gi-daudalia nadau dagi mo nadau gau aamua, ge gi-hagalongo gi digaula, ge gi-haga-kila-aga-ina nia mee huogodoo ala e-humalia.

3:2  Agoago-ina gi digaula gi-hudee hagahuaidu-ina nia daangada, gei gii-noho-baba mo-di hagadau-aaloho. Nia madagoaa huogodoo, digaula gi-haga-modongoohia-ina di-nadau hila-gi-lala gi-nia daangada huogodoo.

3:3  Di madagoaa i-mua, gei gidaadou nogo dadaulia, de-hagalongo, ge hala. Gidaadou nogo hai nia hege ni-di hiihai huaidu, mo nnagadilinga balu-tene huogodoo. Gidaadou nogo mouli labelaa mo-di hiihai e-hagahuaidu digau ala i-golo, mo-di hudiou. Digau ala i-golo nogo de-hiihai-mai gi gidaadou, gei gidaadou nogo de-hiihai labelaa gi digaula.

3:4  Gei di madagoaa tumaalia o God tadau Dangada Hagamouli mo dono aloho ne-gila-mai,

3:5  Mee ne-haga-mouli gidaadou. Hagalee mai i tadau hegau humalia ala ne-hai go gidaadou, gei mai-hua i dono manawa-dumaalia ne-aloho i gidaadou, ga-haga-mouli gidaadou mai di Hagataalunga-Dabu, dela e-haga-haanau hoou gidaadou, e-dugu-mai di mouli hoou mo dana haga-madammaa gidaadou.

3:6  God gu-dugu-ia di Hagataalunga-Dabu gi tadau nua gu-dohu-hua, mai i Jesus Christ, tadau Dangada Hagamouli,

3:7  bolo gii-mee-ai gidaadou di-donu i-baahi o God mai i dono dumaalia, mo-di kae di mouli dee-odi dela e-hagadagadagagee ginai gidaadou.

3:8  Aanei la nnelekai e-donu. Au e-hiihai huoloo bolo goe gi-agoago-ina hagamahi i-nia mee aanei ang-gi digau ala gu-hagadonu a God, gi-hiihai ginaadou di dugu-anga nadau madagoaa e-hai nadau hegau humalia. Nia mee aanei e-humalia, gei ono hadinga i-golo ang-gi nia daangada huogodoo.

3:9  Haga-paa gi-daha mo nia haga-donudonu balumee, mo-di hagatau nia ingoo o tadau maadua-mmaadua, mo nia lagamaaloo mo-di heheebagi i-di gili nnaganoho. Nia mee ala beenei, hagalee ono hadinga ai.

3:10  Goe aago-ina haga-lua digau ala e-hidi-mai-ai tee-buni, ga-nomuli, diagia digaula.

3:11  Goe gu-iloo bolo digau beenei, digau hua gu-huaidu. Gei nadau huaidu e-haga-modongoohia bolo digaula e-hai-gee.

3:12  Dogu madagoaa ma-ga-hagau-adu a Artemas be go Tychicus gi-di-goe, gei goe hagamahi, hanimoi gi-di-au i Nicopolis, idimaa, au gu-hagamaanadu bolo au e-noho i-golo i-di madagoaa magalillili.

3:13  Goe hagamahi labelaa hagamaamaa-ina a Zenas, tangada gabunga haganoho, mo Apollos, gii-mee-ai meemaa di-nau hagatanga e-hula, gei goe gii-mmada be nia mee ala e-hiihai ginai meemaa la-gu-i-golo.

3:14  Heia tadau daangada gi-iloo di dugu-anga nadau madagoaa e-hai nadau hegau humalia, gei gi-hagatogomaalia gi-nia mee ala e-hiihai ge donu ginai digaula, gi-dee mouli-hua ginaadou i-di mouli balumee.

3:15  Digau huogodoo aanei i dogu baahi e-hagau-adu nadau hagaaloho. Hagadae-ina madau hagaaloho gi tadau ihoo hagaaloho ala e-aaloho i-gidaadou i-lodo di hagadonu. Tumaalia o God gi-madalia goodou huogodoo.