PohnOld - Titus

Chapter 1

1:1  PAULUS ladun Kot o wanporon en Iesus Kristus amen, duen poson en me pilipildar en Kot akan o duen erpit en melel ong pai ren Kot;

1:2  O kaporoporeki maur soutuk, me Kot so likam inaukidar mon tapin kaua.

1:3  A ni a ansau a kotin kasansaledar a masan ki padak, me ko ong ia, duen kusoned en Kot atail Saunkamaur.

1:4  Ong Titus nai seri melel ni ata poson ta ieu: Mak o popol sang ren Kot Sam o Kristus Iesus atail Saunkamaur en mi re om!

1:5  Iet karepen ai kamodang uk edi Kreta, pwe koe en kapwaiada, me kaikenta wiauier o kasapwilada saunkoa kan ni kanim karos, due i kakaliki ong uk.

1:6  Saunkoa amen en indand mau, o warok en li ta men, o me na seri kan posonla, o so kaindandeki, me re kamom de sopeik.

1:7  Pwe pisop en pungla, duen saunkoa en Kot amen, der katiwo, der purianikom, der kamom wain, der pamara, der norok moni.

1:8  A ren apwali men kairu o pok ong me mau, o kanongama, o pung, o saraui, o makelekel.

1:9  Kolekoleta masan, me udan pung o koiok ong padak, pwen kak ong panauiki padak en kamaur o kapung ong me katiwo kan.

1:10  Pwe ir me toto me malaun o kapei lokaia o me kaweid sapung, iet eten, kisan men sirkomsais.

1:11  Me mau ong au ar en pinapinla, pwe re kin kawukila toun im toto, o me kin padapadaki, me sota mau, pweki moni.

1:12  Amen irail, pein arail saukop amen inda: Men Kreta me kalap likam, man sued o laualo, nain manga.

1:13  Kadede pot et me melel. Ari, i me koe en kapung kelail ong irail, pwe ren kelailada ni poson.

1:14  O ren der insenoki en Sus oko ar kasoi mal akan o kusoned en aramas akan, me muei sang melel.

1:15  Karos me kon ong makelekel akan, a sota me kon ong me samin o so poson akan, pwe arail lamelame o pil insen arail me samin.

1:16  Re kin inda, me re asa Kot, a ni ar wiawia kan re kin ponsasa i. Irail meid sued, o sopeik, o so koiok ong song en wiawia mau karos.

Chapter 2

2:1  A KOE en padapadakeki duen me kon ong lamalam en kamaur.

2:2  Padaki ong ol ma kan, ren der wukiwuk sili, a ren indand mau o ngenin, o kelail ni poson, o ni limpok, o ni kanongama.

2:3  Pil dueta li ma kan, ren wiawia duen me kon ong saraui kan, ren der likinekine der lidun wain, a ren saunpadak en me mau,

2:4  Pwe ren panaui li pulepul akan, en apapwali ar paud o pok ong nair seri kan.

2:5  Ren lelapok, min, apwali nan im ar akan, kadek, peiki ong ar warok kan, pwe masan en Kot ender lalauela.

2:6  Pil dueta manakap akan, panaui ir, ren lelapok.

2:7  Ni wiawia mau kan karos koe kasaleda pein uk kaalemongi mau amen, ni om padak melel o lelapok.

2:8  Kida padak en kamaur o namenokala, pwe me palian kitail en namenokala, o sota diar me sued kot men karaune kitail.

2:9  Padaki ong ladu kan, me ren peiki ong ar saumas ni meakaros ren kaperen ir ada, o ren der katiwo.

2:10  Ren der pirap, a irail en mau o melel ong irail, pwe ren kalinganada lamalam en Kot atail Saunkamaur ni meakaros.

2:11  Pwe mak en Kot pwarado kamaureda aramas akan karos.

2:12  O padapadaki ong kitail, me kitail en muei sang meakan me doo sang Kot o inong sued en sappa, ap lelapok, o pung, o dadaureta me kon ong ni sappa et.

2:13  O auiauiki kapor mau, o sansal lingan en atail Kot lapalap o atail Saunkamaur Kristus Iesus.

2:14  Me sokonpaudeki pein i ki kitail, pwen dore sang kitail sapung karos, o kamakelekel ong pein i aramas, me a pan sapwilim aneki, me kin nantiong wiawia mau karos.

2:15  Mepukat padake kida, o panauiki, o kapung kelail ong; sota amen me pan mamale kin uk.

Chapter 3

3:1  KATAMAN kin irail ren peiki ong monsap o me manaman akan, o ren apwali wiawia mau karos.

3:2  Der lalaue amen, der akamai, a en kamantik, o opampap ong aramas akan karos.

3:3  Pwe kitail pil pweipwei mas o, o sopeik, o salongala, o papa song en inong o madong sued akan, kokoa me sued, o peirin, pakailok, o kailongki amen amen.

3:4  A kalangan o limpok en Kot atail Saundor lao pwarado,

3:5  A kotin dore kitail la kaidin pweki pein atail wiawia pung, a pein a kupur ki paptais en kaipwi kap o kawilia kap ren Ngen saraui.

3:6  Me a kotin kupura dong kitail kaualap ren Iesus Kristus atail Saundor.

3:7  Pwe kitail en pung kila a mak, pwen sosoki maur soutuk duen at kaporopor.

3:8  Melel padak pot et o i men, koe en nantiong kaweweda, pwe irail, me posonla Kot, en kadoke kin ir wiawia mau, mepukat me mau o kon ong aramas akan.

3:9  A liki sang peidok mal akan, o padok en tiak kan, o akamai, o akamai ki kapung, pwe mepukat sota kadepa o me mal.

3:10  Aramas likin panau amen, panaui pan mepak de riapak ap muei sang i.

3:11  Pwe koe asa, me i me sapung o kin wia dip, a kadeikada pein i.

3:12  I lao kadar wong uk Artemas de Tikikus, koe madang dong ia, Nikopolis, pwe i kileledier me i pan kauson wasa o ni ansaun kapau.

3:13  Saunkawewe Senas o Apolos kadara dong ia madang. Sauasa ira, pwe ira de anane meakot.

3:14  O naitail akan en porisok o koiokki ong wiawia mau, pwe ren der so wa ’rail.

3:15  Karos, me mi re i, kin ranamau wong uk. Ranamau wong karos, me kin pok ong kit ni poson. Mak o en mi re omail karos!