SPVar - Deuteronomy - 32

32:1  האזינו השמים ואדברה ותשמע הארץ אמרי פיי

32:2  יערף כמטר לקחי ותזל כטל אמרתי כשעירים עלי דשא וכרביבים עלי עשב

32:3  כי בשם יהוה אקרא והבו גדל לאלהינו

32:4  הצור תמים פעלו כי כל דרכיו משפט אל אמונה ואין עול צדיק וישר הוא

32:5  שחתו לו לא בני מום דור עקש ופתלתל

32:6  הליהוה תגמלו זאת עם נבל ולא חכם הלוא הוא אביך קנך הוא עשך ויכוננך

32:7  זכרו יומת עולם בינו שנת דר ודר שאל אביך ויגידך זקניך ויאמרו לך

32:8  בהנחל עליון גוים בהפרידו בני אדם יצב גבלות עמים למספר בני ישראל

32:9  כי חלק יהוה עמו יעקב חבל נחלתו ישראל

32:10  יאמצהו בארץ המדבר ובתהללות ישמנהו יסבבנהו ויבננהו ויצרנהו כאישן עינו

32:11  כנשר יער קנו ועל גוזליו ירחף יפרש כנפיו ויקחהו ישאהו על אברתו

32:12  יהוה בדד ינחנו ואין עמו אל נכר

32:13  ירכבהו על במתי הארץ יאכלהו תנופת שדי יינקהו דבש מסלע ושמן מחלמש צור

32:14  חמת בקר וחלב צאן עם חמת כרים ואילים בני בשן ועתודים עם חלב כליות חטה ודם ענב תשתה חמר יאכל יעקב וישבע

32:15  ישמן ישרון ויבעט שמנת עבית כשית ויטש אלה עשהו וינבלו צור ישועתו

32:16  יקנאהו בזרים ובתועבת יכעסהו

32:17  יזבחו לשדים לא אלה אלהים לא ידעום חדשים מקרב באו לא שערום אבתיכם

32:18  צור ילדך תשא ותשכח אל מהללך

32:19  וירא יהוה וינאץ מכעס בניו ובנתיו

32:20  ויאמר אסתיר פני מהם ואראה מה אחריתם כי דור הפכות הם בנים לא האמן בם

32:21  הם קנאוני בלא אל כעסוני באבליהם ואני אקניאם בלא עם בגוי נבל אכעיסם

32:22  כי אש קדחה באפי ותוקד עד שאל תחתית תאכל ארץ ויבולה תלהט מוסדי הרים

32:23  אספה עליהם רעות וחצי אכלה בם

32:24  מזה רעב לחמו רשף קטף מררים ושן בהמות אשלח בם עם חמת זחלי עפר

32:25  מחוץ תשכל חרב ומחדרים אימה גם בחור גם בתולה וינק עם איש שיבה

32:26  אמרתי אפיהם אשבית מאנוש זכרם

32:27  לו לא כעס איבי אגור פן ינכרו צרינו פן יאמרו ידנו רמה ולא יהוה פעל כל זאת

32:28  כי גוי אבד עצותם ואין בהם תבונה

32:29  ולא חכמו וישכלו זאת ויבינו לאחריתם

32:30  איך ירדף אחד אלף ושנים יניסו רבבה אם לא צורם מכרם ויהוה הסגירם

32:31  כי לא כצורנו צורם ואיבינו פללים

32:32  כי מגפן סדם גפנם ומשדמות עמרה ענביהם ענבי ראש ואשכלי מררות למו

32:33  חמת תנינים יינם וראש פתנים אך זרי

32:34  הלוא הוא כנוס עמדי חתום באוצרתי

32:35  ליום נקם ושלם לעת תמוט רגלם כי קרוב יום אידם וחש עתידת למו

32:36  כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב

32:37  ואמרו איה אלהימו צור חסיו בו

32:38  אשר חלב זבחיהם יאכלו וישתו יין נסכם יקומו ויעזרוכם יהיו עליכם סתרה

32:39  ראו עתה כי אני אני הוא ואין אלהים עמדי אני אמית ואחיה מחצתי ואנכי ארפא ואין מידי מציל

32:40  כי אשא אל השמים ידי ואמרתי חי אנכי לעלם

32:41  אם שנתי ברק חרבי ותאחז במשפט ידי אשיב נקם לצרי ולמשנאי אשלם

32:42  אשכיר חצי מדם וחרבי תאכל בשר מדם חלל ושביה מראש פרעת אויב

32:43  הרנינו גוים עמו כי דם עבדיו יקם ונקם ישיב לצריו וכפר אדמת עמו

32:44  ויבא משה וידבר את כל דברי השירה הזאת באזני העם הוא ויהושע בן נון

32:45  ויכל משה מדבר את הדברים האלה אל כל ישראל

32:46  ויאמר אליהם שימו לבבכם על כל הדברים אשר אנכי מעיד בכם היום אשר תצום את בניכם לשמר ולעשות את כל דברי התורה הזאת

32:47  כי לא דבר רק הוא מכם כי הוא חייכם ובדבר הזה תאריכון ימים על האדמה אשר אתם עברים את הירדן שמה לרשתה

32:48  וידבר יהוה אל משה בעצם היום הזה לאמר

32:49  עלה אל הר העברים הזה הר נבא אשר בארץ מואב אשר על פני יריחו וראה את ארץ כנען אשר אני נתן לבני ישראל לאחזה

32:50  ומות בהר אשר אתה עלה שמה והאסף אל עמך כאשר מת אהרן אחיך בהר ההר ויאסף אל עמו

32:51  על אשר מעלתם בי בתוך בני ישראל במי מריבת קדש מדבר צן על אשר לא קדשתם אתי בתוך בני ישראל

32:52  כי מנגד תראה את הארץ ושמה לא תבוא אל הארץ אשר אני נתן לבני ישראל