Kapingamarangi - Genesis - 2

2:1  Nia mee huogodoo ala i-di gili di langi i-nua mo i henuailala-nei guu-lawa huogodoo.

2:2  Togo-hidu laangi gei God ne-haga-lawa ana mee huogodoo ala nogo hai, gaa-noho e-hagamolooloo.

2:3  Mee ga-hagadabu togo-hidu laangi gaa-dugu-gee bolo di laangi dabuaahia, idimaa, di laangi deelaa di laangi ne-haga-lawa-ai ana mee ala nogo hai huogodoo, ga-hagamolooloo.

2:4  Deelaa di hai ne-hai-ai nia mee huogodoo ala i-di langi i-nua mo i henuailala. Di madagoaa Yihowah=God ne-hai nia mee ala i-di langi i-nua mo henuailala,

2:5  gei di-maa nogo deai nia laagau tomo i henuailala ai, ge deai nia lii ne-matilitili ai, idimaa, Yihowah=God digi haga-doo dana uwa, ge deai tangada e-haala be e-haga-maluu di gelegele ai.

2:6  Gei nia wai le e-uwa-aga-hua i-lodo tenua ga-haga-tiu di gelegele.

2:7  Gei Yihowah=God gaa-kae ana gelegele i-di gelegele o tenua, ga-haga-noho dana dangada. Mee ga-ili ana madangi mouli gi-nia madauhi o-maa, gei tangada deelaa ga-daamada ga-mouli.

2:8  Gei Yihowah=God gaa-dogi dana hadagee i Eden, i-di bahi-i-dua, gaa-dugu dana daane dela ne-hai gii-noho i-di gowaa deelaa.

2:9  Mee gaa-hai nia hagadilinga laagau madamada huoloo gii-tomo i-golo, gii-huwa i-nia huwa-laagau humalia. Ge tungaalodo di hadagee deelaa, le e-duu-ai di laagau dela e-iai di mouli mo-di laagau dela e-hai gi-iloo-ai di humalia mo-di huaidu.

2:10  Di monowai e-hali i-lodo Eden e-haga-magalillili di hadagee deelaa, gei tua o Eden la-guu-wwae-haa guu-hai nia monowai e-haa.

2:11  Di monowai matagidagi la-go Pishon, e-hali di gili tenua go Havilah.

2:12  Nia goolo e-kida i tenua deelaa, mono daubigi-laagau ala e-hai nia lolo-kala, mono hadu ‘onyx’ dingidingia hagalabagau.

2:13  Di lua monowai la-go Gihon, e-hali di gili tenua o Cush.

2:14  Tolu monowai la-go Tigris, dela e-hali i-bahi-i-dua o Assyria, ge di haa monowai la-go di Euphrates.

2:15  Gei Yihowah=God gaa-dugu tangada gi-lodo di hadagee go Eden e-haga-maluu di-maa ge e-hagaloohi di-maa.

2:16  Mee ga-helekai gi mee, “Goe e-mee di-gai nia huwa-laagau huogodoo i-lodo di hadagee,

2:17  gei goe hudee geina nia huwa o-di laagau dela e-hai tangada gi-iloo di humalia mo-di huaidu. Maa goe gaa-gai di-maa, gei goe gaa-made-hua i-di laangi deelaa.”

2:18  Yihowah=God ga-helekai, “Ma hagalee humalia gi taane ma-gaa-noho modogoia. Au gaa-hai dagu dangada e-hoo a-mee, e-hagamaamaa a-mee.”

2:19  Gei Mee ga-dahi-aga ana gelegele i-hongo di gelegele tenua, gaa-hai ana manu dolodolo huogodoo mono manu mamaangi ga-laha-mai digaula gi tangada gii-mmada a-mee e-gahi ono ingoo, ge deelaa di hai o-nia manu ne-gahi nadau ingoo.

2:20  Gei tangada gaa-gahi nia ingoo nia manu mamaangi huogodoo mono manu dolodolo huogodoo, gei di-maa deai di manu i-lodo digaula e-humalia di hagamaamaa a-mee ai.

2:21  Gei Yihowah=God gaa-hai tangada la-gii-kii danu-mmoe gaa-daa dana iwi i-di wogowogo o-maa, ga-hagabuni di lohongo di-maa.

2:22  Gei Mee gaa-hai dana ahina gi-di iwi wogowogo, ga-laha-mai a-Mee gi taane.

2:23  Gei taane ga-helekai, “Deenei la-go dogu hagadilinga. Di iwi ne-daa i ogu iwi, ge nia goneiga ne-daa i ogu goneiga. Di ingoo o-maa go ‘di ahina’, idimaa mee ne-daa-mai i taane.”

2:24  Deelaa di mee a taane gaa-tanga gi-daha mo dono damana mo dono dinana, ga-buni-anga-hua gi dono lodo, meemaa dogolua gu-hai-hua di mee e-dahi.

2:25  Taane mo-di ahina nau goloo i nau gili ai, ge meemaa hagalee langaadia i ginaua.