Kapingamarangi - Genesis - 24

24:1  Abraham gu-madumadua, gei Dimaadua gu-haga-maluagina a-mee i ana mee huogodoo ala e-hai.

24:2  Mee ga-helekai gi dana dangada hai-hegau dela madua, dela e-dagi ana mee huogodoo, boloo, “Dugu-ina doo lima i-mehanga ogu gadawae, heia dau hagamodudahi.

24:3  Au e-hiihai bolo goe gi-heia dau hagamodudahi i-di ingoo o Yihowah, di God o-di langi mo henuailala, bolo goe hagalee hilihili dau ahina e-hai di lodo dagu dama-daane i-lodo digau Canaan ala i-ginei.

24:4  Goe hana gi-muli gi tenua dela ne-haanau-iei au, e-laha-mai dau ahina dela e-hai di lodo dagu dama-daane go Isaac mai i-lodo ogu gau ala i-golo.”

24:5  Gei tangada hai-hegau ga-heeu, “Dolomaa tama-ahina la-ga-de-hiihai di-diiagi dono guongo, ga-hagalee hanimoi i ogu muli gi tenua deenei. Au ga-hagau dau dama-daane la-gi tenua dela ne-hanimoi-iei goe?”

24:6  Abraham ga-helekai, “Heia gi-humalia gi-dee-lahi-hua dagu dama-daane la-gi-golo.

24:7  Yihowah go di God o-di langi ne-laha-mai au gi-daha mo-di guongo o dogu damana mo-di gowaa o ogu gau. Mee guu-hai dana hagababa hagahumalia mai gi-di-au bolo Ia gaa-wanga tenua deenei gi dogu hagadili. Mee ga-hagau dana dangada-di-langi i oo mua gii-mee di-laha-mai dau ahina e-hai di lodo dagu dama-daane.

24:8  Tama-ahina ma-ga-de-hiihai di-hanimoi i oo muli, gei goe gu-i-daha mo-di hagababa deenei. Gei goe hude lahia dagu dama-daane gi-golo.”

24:9  Gei tangada hai-hegau gaa-dugu dono lima gi-mehanga nia gadawae o Abraham go dono dagi, gaa-hai dana hagababa hagamodudahi bolo ia gaa-hai nia mee a Abraham ala guu-hai ang-gi deia.

24:10  Tangada hai-hegau dela e-dagi nia goloo Abraham, ga-hagatogomaalia ana ‘camel’ madangaholu i-nia manu o dono dagi go Abraham, gaa-hana gi-di waahale dela nogo noho-ai a Nahor i bahi-i-ngeia Mesopotamia.

24:11  Mee ne-dau i-golo, gei mee gaa-hai nia ‘camel’ gi-togo-iha gi-lala i-baahi di monowai-geli i-daha mo-di waahale deelaa. Hiahi-ia di mee, la di madagoaa nia ahina e-loomoi e-kae nadau wai.

24:12  Mee ga-dalodalo, “Meenei Yihowah, di God o dogu dagi go Abraham, gaamai dogu haadanga-lamalia dangi-nei, gei daahia dau hagababa dela ne-hai ang-gi dogu dagi.

24:13  Deenei au i-di monowai-geli dela e-lolloomoi ginai nia ahina o di waahale deenei, e-lloomoi ginai e-kae nadau wai.

24:14  Au ga-helekai gi tei digaula boloo, ‘Hudee heheia-mua, dugu-eia dau loloaabi mo-di dumaalia-mai gi-di-au, au e-inu.’ Maa mee ga-helekai boloo, ‘Inu, gei-au ga-gaamai labelaa agu wai gi au “camel”,’ gei au ga-iloo bolo ma go mee dela guu-dongo Kooe bolo e-hai di lodo dau dama hai-hegau go Isaac. Ma-gaa-hai beenei, gei au ga-iloo bolo Goe gu-daahi dau hagababa ang-gi dogu dagi.”

24:15  Mua dana haga-lawa dana dalodalo, gei Rebecca gaa-dau mo dana loloaabi i-hongo dono bakau. Mee go tama-ahina Bethuel, tama ni tuaahina-daane Abraham go Nahor mo dono lodo go Milcah.

24:16  Mee tama-ahina madanga huoloo, ge digi hai di huaidu, ge-madammaa. Mee ne-hana gi-di monowai i-lala, gaa-udu dana loloaabi wai, ga-hanaga.

24:17  Tangada hai-hegau gaa-lele gi mee, ga-helekai, “Hudee heheia-mua, heia au gi-inu nia wai i dau loloaabi.”

24:18  Gei mee ga-helekai, “Meenei, inu,” mo-di dugu-ia dana loloaabi i dono bakau, ga-daahi gi mee, gei mee ga-inu.

24:19  Mee dela ne-lawa, gei di ahina ga-helekai, “Au ga-huai-aga labelaa agu wai gi au ‘camel’, gaa-hai digaula gi-inu huogodoo i nadau mee ala e-hiihai ginai.”

24:20  Gei mee ga-haga-inu hagalimalima nia ‘camel’ a-maa, gaa-lele labelaa gi-di monowai e-gowaga labelaa ana wai gaa-dae-loo gi-nia ‘camel’ la-gu-inu huogodoo.

24:21  Gei taane le e-daumada a-mee dee-muu, e-mmada be Dimaadua gu-hagagila humalia dono hanimoi.

24:22  Di madagoaa nia ‘camel’ la-guu-lawa di-inu, gei taane ga-dahi-aga dana buulei goolo hui-ngadaa, gaa-wanga gi-di uhi o-maa, ge nia duu-lima goolo e-lua, gaa-wanga gi-nia lima o-maa.

24:23  Gei mee ga-helekai, “Hudee heheia-mua, hagia-mai be do damana la-go-ai, gei di-maa e-oo i-baahi o mee e-kii-ai gimaadou mo ogu ihoo ma-ga-boo-nei?”

24:24  Tama-ahina ga-helekai, “Dogu damana la-go Bethuel, go tama-daane Nahor mo Milcah.

24:25  Gei di-maa e-logo-hua nia geinga mono mee haangai manu i-di-madau hale, gei e-oo-hua di gowaa e-noho-ai goodou.”

24:26  Gei taane la-ga-dogoduli-iha gi-lala ga-daumaha gi Dimaadua,

24:27  mo-di helekai, “Au e-hagaamu Dimaadua, go di God o dogu dagi go Abraham, dela nogo daahi dana hagababa dela ne-hai ang-gi dogu dagi. Dimaadua gu-dugu-mai au gii-hana haga-huudonu gi-nia gau o dogu dagi.”

24:28  Tama-ahina deelaa gaa-lele gi-di hale dono dinana, ga-hagi-anga gi mee nia mee ala ne-hai huogodoo.

24:29  Gei Rebecca dono duaahina-daane go Laban. Gei Laban gaa-lele gi-di malaelae belee hana gi-di gowaa dela e-iai tangada hai-hegau Abraham.

24:30  Laban gu-gidee-ia di buulei uhi mo nia duu-lima ala e-ulu-ai dono duaahina-ahina, gei gu-hagalongo gi Rebecca e-hai nia helekai taane ne-hai ang-gi-deia, gei Laban gaa-hana gi tangada hai-hegau Abraham dela e-duu i-baahi ana ‘camel’ i-di monowai-geli,

24:31  ga-helekai, “Hanimoi i ogu muli, gaa-hula. Goe go taane dela ne-haga-maluagina go Dimaadua. Goe e-duu i ginei eiaha? Au dagu ruum gu-togomaalia adu gi-di-goe i-lodo dogu hale, gei iai di gowaa i-golo e-dugu-ai au ‘camel’.”

24:32  Gei taane gaa-hana gi-lodo di hale, gei Laban gaa-dugu gi-lala nia goloo o-nia ‘camel’, gaa-wanga nadau lau-laagau mono mee haangai manu gi digaula. Gaa-lawa ga-gaamai ana wai gi tangada hai-hegau Abraham mo ono ehoo e-tono nadau wae.

24:33  Di madagoaa nia meegai ala ne-gaamai, gei taane ga-helekai, “Au hagalee miami, ga-miami-laa i-muli agu helekai ala belee hai.” Laban ga-helekai, “Helekai goe.”

24:34  Mee ga-helekai, “Au tangada hai-hegau ni Abraham.

24:35  Dimaadua gu-haga-maluagina dogu dagi guu-hai a-mee gii-hai tangada maluagina. Mee guu-wanga ana llongo-siibi mo kuudi, nia kau, silber, goolo, mo ana hege-ahina mo daane, nia ‘camel’ mono ‘donkey’.

24:36  Sarah go di lodo dogu dagi ne-haanau dana dama-daane, gei mee gu-madua, gei dogu dagi guu-wanga ana mee huogodoo nogo hai-mee ginai la-gi mee.

24:37  Dogu dagi ne-hai au gii-hai dagu hagababa hagamodudahi, bolo au e-hagalongo ang-gi dana helekai hagalabagau. Mee ne-helekai, ‘Hudee hilihilia dau ahina i tenua go Canaan belee hai di lodo dagu dama-daane.

24:38  Goe e-hana gi-di madawaawa o dogu damana, mo ogu gau, ga-hilihili di lodo o dagu dama-daane.’

24:39  Gei-au ga-heeu gi dogu dagi, ‘Ma e-hai behee maa di ahina la-ga-hagalee hanimoi i ogu muli?’

24:40  Gei mee ga-helekai, ‘Dimaadua dela koia e-hagalongo ginai au i-nia madagoaa huogodoo, ga-hagau dana dangada di-langi dalia goe, gaa-hai goe gi-haadanga-lamalia. Goe ga-laha-mai di lodo dagu dama-daane mai i ogu gau donu, mai di hale o dogu damana.

24:41  Ma di ala hua e-dahi deenei dela e-hai goe gi-mehede gi-daha mo dau hagababa hagamodudahi: Maa goe gaa-hana gi ogu gau gei digaula ga-dumaanga, gei goe gu-mehede.’

24:42  “Dogu hanimoi gi-di monowai-geli dangi-nei, gei-au ga-dalodalo boloo, ‘Meenei Yihowah go di God o dogu dagi go Abraham, hudee heheia-mua, gaamai dogu haadanga-lamalia i agu mee ala e-hai.

24:43  Deenei au i-di monowai-geli. Maa iai tama-ahina gu-hanimoi belee kae ana wai, gei-au ga-helekai gi mee bolo au e-inu i dana loloaabi wai,

24:44  gei mee gu-hiihai gei gu-gaamai labelaa ana wai gi agu ‘camel’, deelaa-laa go mee dela gu-hilihili Kooe bolo dela di lodo o tama-daane o dogu dagi.’

24:45  I-mua di haga-lawa dagu dalodalo dee-muu, Rebecca ga-haneia mo dana loloaabi i-hongo dono bakau gaa-hana gi-lala gi-di monowai e-huai ana wai, gei-au ga-helekai gi mee, ‘Hudee heheia-mua, gaamai hunu wai e-inu.’

24:46  Gei mee gu-limalima-hua gu-dugu-iha dana loloaabi i dono bakau mo-di helekai, ‘Inu, gei-au ga-haga-inu labelaa au ‘camel’.’ Malaa, au ga-inu, gei mee ga-haga-inu agu ‘camel’.

24:47  Au ga-heeu gi mee, ‘Do damana la-go-ai?’ Gei mee ga-helekai, ‘Dogu damana la-go Bethuel, go tama-daane a Nahor mo Milcah.’ Gei-au gaa-wanga dagu buulei goolo gi-di uhi o-maa mono duu-lima gi ono lima.

24:48  Gei au ga-dogoduli gi-lala ga-daumaha gi Dimaadua. Au e-hagaamu Dimaadua go di God o dogu dagi go Abraham dela ne-lahi haga-huudonu au gi-nia gau o dogu dagi, dela gu-gidee-au tama-ahina ang-gi tama-daane o dogu dagi.

24:49  Dolomeenei, helekai-mai be maa goolua e-haga-gila di-gulu waawa ang-gi dogu dagi, ge e-hai a-mee hagahumalia, gei goolua ga-dumaalia. Be maa e-deeai, gei goolua gi-helekai haga-huudonu gi-iloo-eau be dehee dagu hai gaa-hai.”

24:50  Laban mo Bethuel ga-helekai, “Idimaa di mee deenei ne-hai-mai i-baahi Dimaadua, gei di-maa hagalee go gimaua belee hai di-mau hiihai.

24:51  Deenei Rebecca, lahia a-mee, hula. Heia a-mee gii-hai di lodo ni tama-daane o doo dagi gii-hai be nia helekai a Dimaadua ne-hai.”

24:52  Tangada hai-hegau Abraham deenei ne-longono-ia telekai deenei, gei mee gu-bala-loo gi-lala gu-daumaha gi Dimaadua.

24:53  Gei mee gaa-dugu-mai gi-daha ana goloo gahu mono silber mono hadu hagalabagau, gaa-wanga gi Rebecca, gei mee guu-wanga ana wanga-dehuia hui-ngadaa gi tuaahina-daane o-maa mo tinana o-maa.

24:54  Tangada hai-hegau Abraham mono daane ala i-baahi o mee ga-miami gei ga-inu, gaa-kii boo i-golo. Digaula ga-aala-aga luada, gei mee ga-helekai, “Dugua-mai au gii-hana labelaa gi dogu dagi.”

24:55  Gei-ogo tuaahina-daane o Rebecca mo tinana o-maa ga-helekai, “Dugu-ina ang-gi tama-ahina gii-noho i madau baahi i tabu e-dahi be nia laangi madangaholu, nomuli gei mee gaa-hana.”

24:56  Gei mee ga-helekai, “Hudee dugua gimaadou gii-noho. Dimaadua guu-hai dogu holongo-nei gii-gila humalia, dugua-mai au gii-hana gi dogu dagi.”

24:57  Gei meemaa ga-helekai, “Gahigahia-malaa tama-ahina gi-hagalongo gidaadou be mee e-helekai bolo-aha.”

24:58  Gei digaula ga-gahi-mai Rebecca, ga-heeu, “Goe e-hiihai e-hana i-muli taane deenei?” Gei mee ga-helekai, “Uaa.”

24:59  Gei meemaa gaa-dugu-anga Rebecca mo dana hege-ahina madua gii-hula i-muli tangada hai-hegau Abraham mo ono ehoo-daane.

24:60  Gei meemaa gaa-wanga di-nau hagaaloho haga-muliagina gi Rebecca i-nia helekai aanei: “Kooe go di-madau duaahina-ahina, goe gii-hai tinana ni digau dogologowaahee! Gei do hagadili gi-gumidia nia waahale o nadau hagadaumee!”

24:61  Rebecca mo ono ehoo dama-ahina gu-togomaalia guu-kaga gi-hongo nia ‘camel’ belee hula i-muli tangada hai-hegau Abraham, gei digaula ga-hagatanga.

24:62  Isaac gu-hanimoi gi lodo-geinga i Beer Lahai Roi, gei mee e-noho i Negev i-bahi-i-ngaaga o Canaan.

24:63  Mee guu-hana haga-hiahi-loo belee heehee i-lodo nia gowaa maalama, geia gaa-mmada gi-nia ‘camel’ e-loomoi.

24:64  Di madagoaa Rebecca ne-gidee-ia Isaac, gei mee gaa-doo gi-lala mo dana ‘camel’,

24:65  ga-heeu gi tangada hai-hegau Abraham, “Ma taane koai dela e-hanimoi gi gidaadou i-di gowaa maalama?” Tangada hai-hegau Abraham ga-helekai, “Mee go dogu dagi.” Gei Rebecca ga-dahi-aga dana mee-gahu-libogo, gaa-gahu ono golomada.

24:66  Tangada hai-hegau ga-hagi-anga gi Isaac ana mee ala ne-hai huogodoo.

24:67  Gei Isaac ga-laha-mai a Rebecca gi-lodo di hale-laa dela nogo noho-ai dono dinana go Sarah, gei Rebecca gaa-hai di lodo ni mee. Isaac gu-aloho i Rebecca, gei gu-haga-manawa lamalia ia i-muli dono dinana ne-made.