Kapingamarangi - Genesis - 29

29:1  Jacob e-hanadu hua i-golo i dono ala dela e-hana gi-nia henua ala i-bahi-i-dua.

29:2  I dono hanadu-hua, geia gaa-mmada gi-di monowai-geli i-lodo di gowaa maalama, nia hagabuulinga-siibi e-dolu i-baahi di-maa, idimaa nia hagabuulinga-siibi le e-inu mai i-di monowai deenei. Di hadugalaa dela e-pono i-di ngudu di monowai deelaa le e-damana.

29:3  Di madagoaa-hua nia hagabuulinga-siibi huogodoo ma-ga-dagabuli-mai gi-golo, gei digau hagaloohi-siibi ga-hagadaga gi-daha di hadu deelaa, ga-haga-inu nadau siibi. Nomuli gei digaula ga-hagadaga-mai di hadu la gi dono lohongo.

29:4  Jacob ga-heeu ang-gi digau hagaloohi-siibi aalaa, “Ogu duaahina-nei, goodou digau o hee?” Gei digaula ga-helekai-anga, “Gimaadou digau Haran.”

29:5  Jacob ge-heeu-adu, “Goodou e-iloo Laban dela go tama a Nahor?” Gei digaula ga-helekai-anga, “Uaa, gimaadou e-iloo.”

29:6  Gei mee ga-heeu labelaa, “Mee e-humalia-hua?” Gei digaula ga-helekai-anga, “Uaa, mee e-maaloo-hua. Mmada, deenei dana dama-ahina go Rachel e-dagi-mai di hagabuulinga-siibi a-maa.”

29:7  Jacob ga-helekai, “Di laangi le e-oodee-hua i-golo, digi dau-mai di madagoaa e-laha-mai nia siibi gi-lodo di abaaba. Haga-inu godou siibi gaa-lahi labelaa digaula gi-di gowaa dela e-miami-ai digaula.”

29:8  Gei digaula ga-helekai-anga, “Gimaadou e-deemee, gaa-dae-loo gi-nia hagabuulinga-siibi huogodoo la-gu i-ginei, gei gimaadou gaa-mee di-hagadaga gi-daha di hadu deelaa, ga-haga-inu madau siibi.”

29:9  Di madagoaa-hua Jacob dela e-leelee hua igolo gi digaula, gei Rachel gu-dau-mai mo ana siibi.

29:10  Gei Jacob gaa-mmada gi Rachel mo-di hagabuulinga-siibi o tamana o-maa go Laban, gei mee ga-hanadu gi-di monowai, ga-hagadaga di hadu la-gi-daha, ga-haga-inu nia siibi a-maa.

29:11  Nomuli, gei Jacob ga-hanadu gi mee ga-hongihongi-adu a-mee mo-di dangi i dono tenetene,

29:12  ga-helekai gi Rachel, “Au tangada e-dau gi do damana, di tama ni Rebecca.” Rachel gaa-hana gaa-lele ga-hagi-anga gi dono damana.

29:13  Laban ga-iloo-ia bolo Jacob la di tama ni dono duaahina-ahina go Rebecca, gei mee gaa-hana gaa-lele belee haga-heetugi ang-gi mee, ga-bulubulu-adu a-mee mo-di hongi-adu a-mee, ga-laha-mai a-mee gi dono hale. Jacob ga-hagi-anga gi mee nia mee huogodoo ala ne-hai.

29:14  Laban ga-helekai, “E-donu bolo goe la di todo ni-oogu.” Jacob gaa-noho i-baahi o mee i-di malama e-dahi.

29:15  Laban ga-helekai gi Jacob, “Idimaa goe dela tangada e-dau-mai gi-di-au, malaa goe hagalee belee ngalua-mai gi-di-au ge doo hui ai. Dehee doo hui dela e-hiihai ginai goe?”

29:16  Laban ana dama-ahina dogolua i-golo, tangada madua dono ingoo go Leah, gei tangada dulii la-go Rachel.

29:17  Nia golomada o Leah la-hagalee-loo e-madanga, gei Rachel la-koia e-madanga ge humalia.

29:18  Jacob e-hiihai huoloo gi Rachel, dela gei mee ga-helekai gi Laban boloo, “Au ga-ngalua-adu gi-di-goe i-nia ngadau e-hidu, gei au gaa-hai dogu lodo gi Rachel.”

29:19  Laban ga-helekai, “Uaa, au e-hiihai e-gowadu a-mee gi-di-goe i dogu wanga a-mee gi tangada i-daha. Malaa, goe dela ga-noho-hua i-kinei.”

29:20  Jacob ga-ngalua gi Laban i Rachel i-nia ngadau e-hidu, gei nia ngadau e-hidu la-guu-hai be nia laangi hua dulii ang-gi deia, idimaa Jacob gu-hiihai huoloo gi Rachel.

29:21  Jacob ga-helekai gi Laban, “Goe dugua-mai gi-di-au a Rachel au gaa-lodo gi mee, idimaa di madagoaa la-gu-dau-mai.”

29:22  Laban gaa-hai dana hagamiami haga-hai-lodo, ga-gahi-mai digau huogodoo di guongo deelaa.

29:23  I-di boo hua deelaa, gei mee ga-laha-mai a Leah hagammuni, gaa-wanga gi Jacob e-pono di lohongo Rachel, gei Jacob gaa-kii i-baahi o mee.

29:24  (Laban ga-wanga dana hege-ahina go Zilpah gi Leah e-hai-ai di hege ni mee.)

29:25  Ga-hooaga luada, gei Jacob ga-iloo-ia bolo ma go Leah, gei Jacob gaa-hana gi Laban ga-helekai gi mee, “Dau maa di-aha dela ne-hai-mai gi-di-au beenei? Au ne-ngalua adu gi-di-goe bolo Rachel e-hai dogu lodo. Goe ne-halahalau au eiaha?”

29:26  Laban ga-helekai-anga, “Deenei di hai dela e-hai i-kinei. Gimaadou e-deemee di-hai di lodo tangada dulii i-mua tangada madua digi hai dono lodo.

29:27  Noho taalia maalia tabu e-dahi i-muli di hagadabu o taga-hai-lodo, gei au ga-gowadu-laa Rachel, maa goe ga-ngalua labelaa i-nia ngadau e-hidu i-golo.”

29:28  Jacob guu-baba ginai. I-muli-hua di tabu e-dahi o-di hagadabu di haga-hai-lodo la-ne-lawa, gei Laban gaa-wanga a Rachel gi Jacob.

29:29  (Laban ga-wanga dana hege-ahina go Bilhah gi Rachel e-hai-ai di hege ni mee.)

29:30  Jacob gaa-kii labelaa i-baahi o Rachel. Mee koia gu-hiihai huoloo gi mee i-hongo Leah. Nomuli, gei Jacob ga-ngalua gi Laban labelaa i-nia ngadau e-hidu i-golo.

29:31  Dimaadua gu-iloo-Ia bolo Jacob la-hagalee aloho-loo i Leah be dono aloho i Rachel, gei Mee gaa-hai Leah gii-mee di-hai ana dama, gei Rachel gi-dee-huwa.

29:32  Leah ga-hai-dama ga-haanau-mai dana dama-daane. Gei mee ga-helekai, “Dimaadua gu-iloo-Ia dogu haingadaa, dolomeenei gei dogu lodo ga-aloho i-di-au.” Gei mee gaa-gahi di ingoo o dana dama bolo “Reuben”.

29:33  Gei mee ga-hai-dama labelaa ga-haanau-mai dana dama-daane, gei mee ga-helekai, “Dimaadua gu-gaamai labelaa dana dama-daane deenei gi-di-au, idimaa Mee dela gu-hagalongo bolo Jacob e-dee moehoni-loo mai gi-di-au.” Gei mee gaa-gahi di ingoo o-maa bolo “Simeon”.

29:34  Gei mee ga-hai-dama labelaa ga-haanau-mai dana dama-daane, gei mee ga-helekai, “Deenei-laa gei dogu lodo ga-noho-mau i dogu baahi, idimaa dela au gu-haanau agu dama dogodolu.” Gei mee gaa-gahi di ingoo o dana dama bolo “Levi”.

29:35  Gei mee ga-hai-dama labelaa ga-haanau-mai dana dama-daane, gei mee ga-helekai, “Dolomeenei gei au ga-hagaamu a Dimaadua.” Gei mee gaa-gahi di ingoo o-maa bolo “Judah”, ga i-nomuli gei Leah gu-hagalee hai ana dama.