Kapingamarangi - Genesis - 19

19:1  Nia daangada di-langi dogolua ala ne-dau gi Sodom di hiahi deelaa, gei Lot le e-noho i-di ngudu di bontai di waahale. Mee dela hua ne-gidee-ia meemaa, gei mee ga-du-gi-nua, gaa-hana e-haga-heetugi gi meemaa, gaa-bala-loo gi-lala i-mua meemaa,

19:2  ga-helekai, “Meemaa-nei, au deenei e-hai gulu hegau. Hudee heheia-mua, loomoi gi dogu hale gi-gaugau gulu wae gaa-noho i di boo. Luada gei goolua gaa-ala haga-luada gaa-hula i-di gulu ala.” Gei meemaa ga-helekai, “Deeai, gimaua e-noho i ginei i di waahale.”

19:3  Gei mee e-hagamahi e-dangi-anga-hua gi meemaa, ga-nomuliagi-loo gei meemaa gaa-hula i-muli o mee gi dono hale. Lot gaa-hai gi ono gau hai-hegau gi-dunu-ina nadau palaawaa ge gi-hagatogomaalia-ina tagamiami gi-nia daangada mai i-daha aalaa. Ma-ne-lawa, gei meemaa gu-miami.

19:4  I-mua nia daangada mai i-daha aanei bolo gaa-kii, gei nia daane o Sodom gu-haganiga di hale, go nia daane huogodoo o-di waahale deelaa, digau lligi mo digau mmaadua.

19:5  Digaula gaa-wwolo gi Lot, ga-heeu, “Aahee nia daane ala ne-lloomoi belee noho i do baahi boo-nei? Laha-mai meemaa gi-di malaelae gi gimaadou!” Nia daane o Sodom e-hiihai e-hai di-madau huaidu gi meemaa.

19:6  Lot guu-hana gi malaelae guu-tai di bontai i dono dua,

19:7  ga-helekai gi digaula, “Nia hoo hagaaloho, au e-dangidangi-adu gi goodou bolo goodou gi-hudee heia di-godou hai huaidu damana beenaa.

19:8  Mmada-malaa, au agu dama-ahina dogolua madammaa i-golo. Au ga-laha-mai meemaa gaa-hai-laa ginai godou hiihai, gei hudee heia di-godou hai gi-nia daane aanei. Meemaa nia daangada mai i-daha i dogu hale e-benebene ko-au.”

19:9  Gei digaula ga-helekai, “Tuu i-daha mo gimaadou, kooe tangada mai i-daha! Goe koai dela bolo goe e-aago gimaadou? Tuu i-daha mo gimaadou, gi-dee-hai-adu gi-di-goe di mee koia e-huaidu i madau mee belee hai gi meemaa.” Digaula ga-hono-adu a Lot gi-muli, ga-mmaanege-adu belee oho di bontai.

19:10  Gei nia daane dogolua ala i-lodo di hale, gaa-hudi a Lot gi-lodo di hale gaa-tai di bontai.

19:11  Gei meemaa gaa-hai nia daane huogodoo ala i malaelae gi-dee-gida, gei digaula gu-deemee di-gidee-ginaadou di bontai.

19:12  Nia daangada dogolua ga-helekai gi Lot, “Maa goe oo gau labelaa i ginei, nia dama-daane, be nia dama-ahina, be nia daane dauaga, be tei dangada hua ni-oou e-noho i-lodo di waahale deenei, la-heia gii-hula gi-daha.

19:13  Idimaa, gimaua gaa-oho di gowaa deenei. Dimaadua gu-longono-Ia nia huaidu hai-baahi ang-gi digau aanei, ga-hagau-mai gimaua bolo gi-ohaa Sodom.”

19:14  Lot gaa-hana gi-nia daane ala belee hai-lodo gi ana dama-ahina, ga-helekai, “Hagalimalima, hula gi-daha mo ginei, Dimaadua gaa-oho di gowaa deenei.” Gei meemaa e-maanadu bolo mee e-hai ana dadaagala.

19:15  Heniheni-loo, gei nia daangada di-langi gaa-hai gi Lot gi-hagalimalima, ga-helekai, “Hagalimalima, lahia doo lodo mo au dama-ahina dogolua, hula gi-daha gi-dee-mmade-hua goodou i-di madagoaa di waahale dela ma-gaa-oho.”

19:16  Lot e-hagadaatagi. Malaa, Dimaadua e-dumaalia gi mee, deelaa-laa nia daane dogolua aalaa gaa-kumi nadau lima, gaa-lahi a-mee mo dono lodo mo ana dama-ahina dogolua, gaa-dagi digaula gi-daha mo-di waahale.

19:17  Gei tangada di-langi e-dahi ga-helekai, “Llele gi-mouli goodou! Hudee mmada gi-muli, ge hudee tuu i-di gowaa baba i-mehanga nia gonduu. Llele gi-nia gonduu lligi gi-dee mmade goodou!”

19:18  Gei Lot ga-helekai, “Meenei, dumaalia-mai, hudee heia gimaadou gii-hai beenaa.

19:19  Goe gu-dumaalia mai gi-di-au gu-haga-mouli au. Gei nia gonduu lligi le e-mogowaa-loo. Gei di hagahuaidu ga-dau-mai gi-di-au, gei au gaa-made-hua gei digi dau i-golo.

19:20  Goe e-gidee tama waahale deelaa? Deelaa e-humalia e-hoohoo-mai. Dumaalia-mai au e-hana gi-golo. Ma tama-gowaa hua dulii. Au hagalee lauwa i-golo.”

19:21  Gei tangada di-langi ga-helekai, “Deenaa e-humalia, au e-baba-hua. Au ga-hagalee oho di waahale deelaa.

19:22  Hagalimalima! Llele! Au e-deemee di hai dagu mee, e-tali-hua goodou gii-dau gi-golo.” Idimaa Lot dela e-haga-ingoo di waahale bolo di waahale dulii, gei di waahale deelaa la-guu-gahi dono ingoo bolo Zoar.

19:23  Di laa dela e-hobo i-di madagoaa Lot e-dau i Zoar.

19:24  Di madagoaa hua deelaa, gei Dimaadua ga-haga-doo dana uwa-‘sulphur’ wele gi-hongo nia waahale go Sodom mo Gomorrah.

19:25  Gu-oho nia maa mo-di gowaa maalama mehanga gonduu, ngaadahi mo nia daangada ala i-golo huogodoo, mono mee huogodoo ala e-tomo i-hongo di gowaa deelaa.

19:26  Gei di lodo o Lot guu-mmada gi-muli, geia gu-hamaaloo guu-hai tuludulu toolo.

19:27  Hagaluada-loo dono daiaa, gei Abraham guu-hana hagalimalima gi-di gowaa dela nogo duu-ieia i-mua o Dimaadua.

19:28  Mee ga-mmada-ia gi-lala gi Sodom mo Gomorrah, mo dono gowaa mehanga gonduu, gaa-mmada gi-di huiahi e-buu-aga i tenua deelaa, e-hai be-di huiahi e-buu-aga i-di ulaula damanaiee.

19:29  Di madagoaa God dela ne-oho nia waahale ala i-mehanga nia gonduu dela nogo noho-ai a Lot, gei mee gu-langahieia Abraham, gei e-dumaalia gi Lot gii-hana gi-daha mo-di haingadaa.

19:30  Idimaa Lot e-madagu i-di noho i Zoar, gei mee mo ana dama-ahina dogolua ga-haga-maanege gi-lodo nia gonduu lligi i-nua, gaa-noho i-lodo di bagungoo.

19:31  Tama-ahina-madua ga-helekai gi dono duaahina dulii boloo, “Tau damana la-ga-madumadua, gei di-maa taane ai i tenua deenei e-hai dono lodo mai gi gidaua gii-hai tau dama.

19:32  Hanimoi, gidaua gaa-hai tau damana la-gi-libaliba, gei gidaua gaa-kii i-baahi o-mee gii-hai tau dama mai i-mee.”

19:33  I-di boo hua deelaa, gei meemaa ga-haga-inu a-mee gi-nia waini, gei tama-ahina madua gaa-kii i-baahi o Lot. Gei Lot digi iloo-ia, idimaa, mee gu-libaliba huoloo.

19:34  Dono daiaa gei tama-ahina madua ga-helekai gi dono duaahina dulii boloo, “Au guu-kii i-baahi o-mee anaboo, gei gidaua gaa-hai a-mee gi-libaliba labelaa boo-nei, gei goe gaa-hana gaa-kii i-baahi o-mee. Gei gidaua gaa-hai tau dama mai baahi tau damana.”

19:35  Malaa, di boo deelaa, gei meemaa gaa-hai a-mee gi-libaliba, gei tama-ahina dulii gaa-kii i-baahi o Lot. Gei Lot digi iloo-ia, idimaa, mee gu-libaliba huoloo.

19:36  Di hai deenei ne-hai go nia dama-ahina dogolua a Lot, gu-hai-dama mai baahi di-nau damana donu.

19:37  Tama-ahina madua guu-hai dana dama-daane, gaa-gahi dono ingoo bolo Moab. Go mee dela tangada ne-daamada-ai digau Moab ala dangi-nei.

19:38  Tama-ahina dulii gaa-hai labelaa dana dama-daane, guu-wanga dono ingoo go mee go Ben=ammi. Go mee dela tangada ne-daamada-ai digau Ammon ala dangi-nei.