TpiKJPB - I Samuel - 17

17:1  ¶ Nau ol Filistin i bungim wantaim ol ami bilong ol long pait, na ol i bung wantaim long Soko, dispela i bilong Juda, na sanapim haus sel namel long Soko na Aseka, long Efes-damin.

17:2  Na Sol na ol man bilong Isrel i bung wantaim, na sanapim haus sel klostu long ples daun bilong Ila, na putim pait long lain i birua long ol Filistin.

17:3  Na ol Filistin i sanap long maunten long wanpela sait, na Isrel i sanap long maunten long arapela sait. Na i gat wanpela ples daun namel long ol.

17:4  Na i gat wanpela nambawan man bilong winim pait i go ausait long kem bilong ol Filistin, nem bilong en em Golaiat, bilong Gat, husat antap bilong em i sikispela kyubit na wanpela span.

17:5  Na em i gat hat ain antap long het bilong em, na em i werim klos pait long wanpela saket ain. Na hevi bilong dispela saket em 5,000 sekel bras.

17:6  Na em i gat ol kapa bras antap long tupela lek bilong em, na plang bilong han bras namel long tupela sol bilong han bilong em.

17:7  Na handel bilong spia bilong tromoi bilong em i stap olsem bikpela hap diwai bilong man bilong wokim laplap. Na hevi bilong het bilong spia bilong tromoi bilong em em 600 sekel ain. Na wanpela i karim wanpela plang i go pas long em.

17:8  Na em i sanap na singaut long ol ami bilong Isrel, na tokim ol, Bilong wanem yupela i kam ausait long putim ol soldia bilong yupela long lain? Ating i yes long mi wanpela Filistin, na yupela i ol wokboi bilong Sol? Yupela makim wanpela man bilong yupela, na larim em i kam daun long mi.

17:9  Sapos em i stap inap long pait wantaim mi, na long kilim mi, orait bai mipela i stap ol wokboi bilong yupela. Tasol sapos mi winim em, na kilim em, orait yupela bai stap ol wokboi bilong mipela, na bihainim mipela.

17:10  Na Filistin i tok, Mi duim ol ami bilong Isrel tude. Givim mi wanpela man, inap long mitupela i ken pait wantaim.

17:11  Taim Sol na olgeta Isrel i harim ol dispela tok bilong dispela Filistin, ol i wari planti, na ol i gat bikpela pret.

17:12  ¶ Nau Devit em i pikinini man bilong dispela man Efrat bilong Betlehem-juda, husat nem bilong em em Jesi. Na em i gat etpela pikinini man. Na dispela man i wokabaut namel long ol man olsem lapun man long taim bilong Sol.

17:13  Na tripela pikinini man bilong Jesi i bikpela moa i go na bihainim Sol long pait. Na ol nem bilong tripela pikinini man bilong em husat i go long pait em Eliap, namba wan pikinini, na bihain long em Abinadap, na namba tri Sama.

17:14  Na Devit em i las. Na tripela i bikpela moa i bihainim Sol.

17:15  Tasol Devit i bin lusim Sol na go bek long givim kaikai long ol sipsip bilong papa bilong em long Betlehem.

17:16  Na dispela Filistin i kam klostu moning na apinun tru, na soim em yet 40 de.

17:17  Na Jesi i tokim pikinini man bilong em Devit, Kisim nau bilong ol brata bilong yu wanpela ifa bilong dispela wit samting i drai olgeta, na dispela tenpela hap bret, na ran i go long kem bilong ol brata bilong yu.

17:18  Na karim dispela tenpela hap sis long kepten bilong 1,000 bilong ol, na luksave long ol brata bilong yu i stap olsem wanem, na kisim mak bilong promis bilong ol.

17:19  Nau Sol, na ol, na olgeta man bilong Isrel, i stap long ples daun bilong Ila, na pait wantaim ol Filistin.

17:20  Na Devit i kirap long moning tru, na lusim ol sipsip long han bilong wanpela wasman, na kisim ol samting, na go, olsem Jesi i bin tok strong long em. Na em i kam long dispela baret bilong hait, taim ami i go ausait bilong pait, na singaut bilong pait.

17:21  Long wanem, Isrel na ol Filistin i bin putim ol lain bilong pait, ami i birua long ami.

17:22  Na Devit i lusim ol samting ol i karim bilong em long han bilong wasman bilong samting ol i karim, na ran i go insait long ami, na kam na tok gude long ol brata bilong em.

17:23  Na taim em i toktok wantaim ol, lukim, dispela man bilong winim pait i kam antap, dispela Filistin bilong Gat, nem bilong en em Golaiat, ausait long ol ami bilong ol Filistin, na toktok bilong bihainim ol dispela wankain toktok stret. Na Devit i harim ol toktok.

17:24  Na olgeta man bilong Isrel, taim ol i lukim dispela man, i ranawe long em, na ol i pret tru.

17:25  Na ol man bilong Isrel i tok, Ating yupela i bin lukim dispela man husat i kam antap? Tru tumas, em i kam antap long duim Isrel. Na em bai stap olsem, long husat man i kilim em, king bai mekim em i kamap maniman wantaim bikpela planti mani samting tru, na em bai givim pikinini meri bilong em long em, na mekim hauslain bilong papa bilong em fri insait long Isrel.

17:26  Na Devit i tokim ol man husat i sanap klostu long em, i spik, Wanem samting bai kamap long man husat i kilim dispela Filistin, na tekewe dispela sem long Isrel? Long wanem, dispela Filistin i no katim skin em i husat, inap long em i ken duim ol ami bilong God i stap laip?

17:27  Na ol lain i bekim tok long em i bihainim dispela pasin, i spik, Olsem tasol ol bai mekim dispela long man husat i kilim em.

17:28  Na namba wan brata bilong em Eliap i harim taim em i toktok wantaim ol man. Na belhat bilong Eliap i kirap i birua long Devit, na em i tok, Bilong wanem yu kam daun long hia? Na yu bin lusim dispela liklik lain sipsip long ples i no gat man wantaim husat? Mi save long bikhet pasin bilong yu, na pasin nogut i stap insait long bel bilong yu. Long wanem, yu bin kam daun inap long yu ken lukim pait.

17:29  Na Devit i tok, Mi bin mekim wanem nau? Ating i yes long i gat as bilong pait?

17:30  Na em i tanim long em long go long narapela, na toktok long toktok i bihainim dispela wankain pasin. Na ol lain i bekim tok long em gen i bihainim dispela wankain pasin bilong bipo.

17:31  ¶ Na taim ol i harim ol dispela toktok Devit i tok, ol i stori gen long ol long ia bilong Sol. Na em i salim tok long bringim em i kam.

17:32  Na Devit i tokim Sol, No ken larim bel bilong wanpela man fel bikos em i tingim em. Wokboi bilong yu bai go na pait wantaim dispela Filistin.

17:33  Na Sol i tokim Devit, Yu no stap inap long go birua long dispela Filistin long pait wantaim em. Long wanem, yu stap wanpela yangpela man tasol, na em i man bilong bikpela pait taim em i yangpela inap long nau.

17:34  Na Devit i tokim Sol, Wokboi bilong yu i lukautim ol sipsip bilong papa bilong em, na wanpela laion i kam, na wanpela bea, na kisim wanpela pikinini sipsip ausait long lain sipsip.

17:35  Na mi go ausait na bihainim em, na paitim em, na kisim bek dispela ausait long maus bilong em. Na taim em i kirap na birua long mi, mi holimpas em long mausgras bilong em, na paitim em, na kilim em i dai.

17:36  Wokboi bilong yu i kilim i dai laion na bea wantaim. Na dispela Filistin i no katim skin bai stap olsem wanpela bilong ol, taim yumi luksave long em i bin duim ol ami bilong God i stap laip.

17:37  Devit i tok moa tu, BIKPELA husat i kisim bek mi ausait long han bilong laion, na ausait long han bilong bea, Em bai kisim bek mi ausait long han bilong dispela Filistin. Na Sol i tokim Devit, Goan, na BIKPELA i ken stap wantaim yu.

17:38  Na Sol i putim klos pait long Devit wantaim klos pait bilong em, na em i putim hat ain antap long het bilong em. Na tu em i putim klos pait long em wantaim wanpela saket ain.

17:39  Na Devit i pasim bainat bilong em antap long klos pait bilong em, na em i laik traim pastaim long i go. Long wanem, em i no bin pruvim dispela. Na David i tokim Sol, Mi no ken go wantaim ol dispela samting. Long wanem, mi no bin pruvim ol. Na Devit i rausim ol long em.

17:40  ¶ Na em i kisim stik bilong em long han bilong em, na makim bilong em faipela ston i no rap liklik i kam ausait long liklik wara, na putim ol long dispela bilum bilong wasman bilong sipsip em i gat, yes, insait long wanpela liklik bek. Na katapel bilong em i stap long han bilong em. Na em i wok long go klostu long dispela Filistin.

17:41  Na dispela Filistin i kam yet na wok long kam klostu long Devit. Na dispela man husat i karim plang i go pas long em.

17:42  Na taim dispela Filistin i lukluk nabaut, na lukim Devit, em i lap long daunim em. Long wanem, em i wanpela yangpela man tasol, na retpela, na pes bilong em i naispela.

17:43  Na dispela Filistin i tokim Devit, Mi wanpela dok, inap long yu kam long mi wantaim ol stik bilong pait? Na dispela Filistin i tok nogutim Devit long ol god bilong em.

17:44  Na dispela Filistin i tokim Devit, Kam long mi, na mi bai givim bodi bilong yu long ol pisin bilong skai, na long ol animal bilong ples kunai.

17:45  Nau Devit i tokim Filistin, Yu kam long mi wantaim bainat, na wantaim spia bilong tromoi, na wantaim plang. Tasol mi kam long yu long nem bilong BIKPELA bilong ol ami, God bilong ol ami bilong Isrel, husat yu bin duim.

17:46  Tude bai BIKPELA i givim yu i kam long han bilong mi. Na mi bai paitim yu, na rausim het bilong yu i lusim yu. Na tude mi bai givim ol daibodi bilong dispela ami bilong ol Filistin long ol pisin bilong skai, na long ol wail animal bilong dispela graun, inap long olgeta dispela graun i ken save long i gat wanpela God i stap long Isrel.

17:47  Na olgeta bilong dispela lain i bung bai save long BIKPELA i no kisim bek wantaim bainat na spia bilong tromoi. Long wanem, pait em i bilong BIKPELA, na Em bai givim yu long han bilong mipela.

17:48  ¶ Na em i kamap olsem, taim dispela Filistin i kirap, na kam na wok long kam klostu long bungim Devit, long Devit i hariap, na ran i go long ami bilong bungim dispela Filistin.

17:49  Na Davit i putim han bilong em insait long bek bilong em, na kisim long dispela ples wanpela ston, na sutim, na paitim dispela Filistin long poret bilong em, inap long dispela ston i go pinis insait long poret bilong em. Na em i pundaun long pes bilong em long graun.

17:50  Olsem na Devit i winim dispela Filistin wantaim katapel na wantaim ston, na paitim dispela Filistin, na kilim em i dai. Tasol i no gat bainat long han bilong Devit.

17:51  Olsem na Devit i ran, na sanap antap long dispela Filistin, na kisim bainat bilong em, na kamautim dispela long paus bilong en, na kilim em i dai, na rausim het bilong em wantaim dispela. Na taim ol Filistin i lukim pinis man bilong winim pait bilong ol i dai pinis, ol i ranawe.

17:52  Na ol man bilong Isrel na bilong Juda i kirap, na singaut, na ran bihainim ol Filistin, inap long yu kam long ples daun, na long ol dua bilong banis bilong Ekron. Na ol man i kisim bagarap bilong ol Filistin i pundaun long rot i go long Saraim, yes, inap long Gat, na inap long Ekron.

17:53  Na ol pikinini bilong Isrel i kam bek long wok bilong ran bihainim ol Filistin, na ol i kisim ol kago bilong pait bilong ol haus sel bilong ol.

17:54  Na Devit i kisim het bilong dispela Filistin, na bringim dispela i go long Jerusalem. Tasol em i putim klos pait bilong em long haus sel bilong em.

17:55  Na taim Sol i lukim Devit i go ausait long birua long dispela Filistin, em i tokim Apner, kepten bilong ami, Apner, dispela yangpela man em i pikinini man bilong husat? Na Apner i tok, Olsem tewel bilong yu i stap laip, O king, mi no save.

17:56  Na king i tok, Yu askim nabaut long dispela bun nating manki em i pikinini man bilong husat.

17:57  Na taim Devit i kam bek long dispela bikpela kilim i dai bilong ol Filistin, Apner i kisim em, na bringim em long ai bilong Sol wantaim het bilong dispela Filistin long han bilong em.

17:58  Na Sol i tokim em, Yangpela man, yu pikinini man bilong husat? Na Devit i bekim tok, Mi pikinini man bilong wokboi bilong yu Jesi, man bilong Betlehem.