Kapingamarangi - Jeremiah - 17

17:1  Dimaadua ga-helekai, “Goodou go digau Judah, di pen baalanga la-ne-hihi godou huaidu, mo-di ngudu di pen hadu-maaloo la-guu-lawa di-hihi godou huaidu gi-lodo godou manawa, ge guu-paa gi-di gili nia madaaduge o godou gowaa dudu-tigidaumaha.

17:2  Godou daangada e-hai nadau hai-daumaha i-nia gowaa dudu-tigidaumaha mono ada-mee ala ne-haga-duu-aga gi-di god-ahina Asherah i-baahi nia laagau mangamanga huogodoo mo i-di ulu gi-nua o-nia gowaa nnoonua,

17:3  mo i-hongo nia gonduu ala i-lodo di gowaa maalama. Au ga-dumaalia gi godou hagadaumee gi-kaina godou goloo hagalabagau idimaa go godou huaidu huogodoo ala ne-hai i-lodo di-godou henua.

17:4  Tenua dela ne-gowadu ko-Au gi goodou gaa-kumi go godou hagadaumee, gei Au gaa-hai goodou gii-hai nia hege ni godou hagadaumee i-lodo tenua dela digi iloo-e-goodou, idimaa go dogu hagawelewele e-hai gadoo be-di ahi, ga-ulaula gaa-hana-hua beelaa.”

17:5  Dimaadua ga-helekai, “Au ga-haga-halauwa nia daangada ala ne-huli gi-daha mo Au, ala e-hagadagadagagee gi-nia daangada dangada, di maaloo o tangada la di-mee e-made.

17:6  Nia hagadilinga daangada beenei le e-hai gadoo be nia geinga i-lodo di anggowaa, ala e-tomo-aga i-di gowaa maangoo, i-lodo nia gelegele mmala, i-di gowaa dela hagalee tomo nia laagau. Deai di-mee humalia e-gila i-baahi o digaula ai.

17:7  “Gei Au gaa-hila ang-gi nia daangada ala e-hagadagadagagee mai gi-di-Au.

17:8  Digaula e-hai gadoo be-di laagau dela e-tomo i taalinga di monowai, ono-aga e-hula e-tale i-nia wai. Di laagau deelaa la-hagalee e-madagu i-di welengina o-di laa, idimaa ono lau la-hagalee e-mae, e-hagalee e-uli ono gai. I-di madagoaa ma-ga-deai di uwa ai, ono huwa la-hagalee e-odi.

17:9  “Koai e-mee di-iloo-ia di hagahonu o-di manawa o tangada? Ma deai di mee e-honu di halahalau be di-maa ai, deai dono humalia e-gila-mai ai.

17:10  Ko-Au go Dimaadua e-halahala gei e-hagadina nia hagamaanadu o-nia daangada, gei Au e-hagamada nia manawa digaula. Au e-hui gi tangada-nei mo tangada-nei gi-di hai dela e-tau ang-gi dono mouli, gii-hai be ana hangaahai.”

17:11  Tangada dela e-kumi ana bahihadu i-di hai huaidu, ia e-hai gadoo be-di manu dela e-hagabaa di ngogo ge hagalee di-mee ne-dugu koia. I dono madagoaa e-dama-daane e-maaloo, gei ono goloo ga-hagalee, gaa-dae gi-di hagaodi o dono mouli, gei mee gaa-hai-hua tangada boiboi.

17:12  Tadau Hale Daumaha e-hai gadoo be-di lohongo king madamada, dela e-duu i-hongo di gonduu nnoonua mai hua namua.

17:13  Meenei Dimaadua go Kooe dela e-hagadagadagagee ginai Israel. Digau huogodoo ala ma-gaa-hudu Goe gi-daha gei ginaadou ga-langaadia. Digaula ga-hagalee, gadoo be nia ingoo ala ne-hihi gi-hongo nia gelegele, idimaa digaula ne-diiagi Goe, go Dimaadua, dela go di monowai haga-mouli.

17:14  Meenei Dimaadua, haga-hili-ina au, gei au ga-humalia huoloo. Benebene-ina au, gei au gaa-doo gi-daha mo-di haingadaa. Ma Kooe hua dela e-haga-hagaamu ko-au!

17:15  Nia daangada ga-helekai-mai gi-di-au, “Aahee nia helekai hagamadagudagu mai baahi o Dimaadua ne-hai-mai gi gimaadou? Haga-kila-aga-ina nia maa dolomeenei!”

17:16  Meenei Dimaadua, au digi dangi hagamahi-adu gi-di-Goe gi-dugua-mai di haingadaa gi-hongo digaula. Au hagalee e-hiihai bolo di haingadaa gii-tale gi digaula. Meenei Dimaadua, Goe e-iloo nia mee aanei, Goe e-iloo-hua agu helekai aanei.

17:17  Hudee heia nia mee haga-madagudagu dangada gi-tale-mai gi-di-au. Go Kooe hua go dogu gowaa e-bala ginai au i-di madagoaa haingadaa.

17:18  Goe gi-hagatee-ina digau ala e-dadaaligi au. Meenei Dimaadua, Goe gi-haga-dagaloaha-ina au. Goe haga-madagudagu-ina digaula, gei hudee heia au gi-madagu. Dugua di haingadaa la-gi-hongo digaula, gei gi daaligidia digaula gi-hagalee.

17:19  Dimaadua ga-helekai-mai, “Jeremiah, hana hagailoo-ina agu helekai gi-nia daangada i-di ngudu di Bontai o-nia Daangada, i-di gowaa dela e-ulu gi-lodo mo e-ulu gi-daha nia king o Judah i-di waahale deelaa, nomuli gei goe gaa-hana gi-nia ngudu o-nia bontai huogodoo ala i-golo o Jerusalem.

17:20  Helekai gi nia king mo nia daangada huogodoo o Judah ala e-noho i Jerusalem ala e-ulu i-nia bontai di waahale deenei, bolo ginaadou gi-hagalongo gi-humalia gi agu helekai.

17:21  Helekai gi digaula bolo maa digaula e-hagalabagau nadau mouli, digaula la-gi-hudee aamo-mee i-di Laangi-Sabad, gi-hudee aamo-mee ga-ulu gi-lodo nia bontai o Jerusalem i-di Laangi-Sabad,

17:22  be e-gaamai nadau mee gi-daha mo nadau hale i-di Laangi-Sabad. Digaula gi-hudee ngalua i-di Laangi-Sabad, gi-heia di laangi la-gii-dabu be dagu hai ne-haganoho gi nadau maadua-mmaadua i-mua.

17:23  Nadau maadua-mmaadua digi hagalongo be hagalee haga-angadia-e-ginaadou agu haganoho, gei digaula gu-haga-hamaaloo-hua nadau lodo, gu-hagalee e-hagalongo-mai be e-daudali agu agoago.

17:24  “Helekai gi-nia daangada aanei bolo digaula belee hagalongo gi agu haganoho huogodoo. Digaula hagalee e-kae nadau mee gaa-hula ga-ulu gi-lodo nia bontai di waahale deenei i-di Laangi-Sabad. Digaula gi-haga-gila-ina-aga di Laangi-Sabad gii-hai be-di laangi hagamadagu, digaula hudee hai gi-ngalua.

17:25  Maa digaula gaa-hai beelaa, gei nadau king mo nadau gau aamua ma-ga-ulu gi-lodo nia bontai o Jerusalem, digaula ga-hai-mee gi-nia mogobuna King David ala nogo hai-mee ginai. Digaula ga-madalia digau Judah mo Jerusalem e-hula i-nia waga hongo-henua mono hoodo, gei di waahale o Jerusalem gaa-honu dangada i-nia madagoaa huogodoo.

17:26  Nia daangada ga-loomoi i-nia dama-waahale i Judah, mo i-nia guongo ala e-haganiga mai daha Jerusalem. Digaula ga-loomoi i tenua Benjamin, i tono nia dama gowaa nnoonua, mo tomo nia gonduu, mo i-bahi-i-ngaaga o Judah. Digaula e-lloomoi e-gaamai nadau tigidaumaha gi dogu Hale Daumaha, nia tigidaumaha dudu, mo nnagadilinga tigidaumaha ala i-golo, nia tigidaumaha golee-laagau, nia tigidaumaha ‘incense’, mo nia tigidaumaha danggee.

17:27  Gei digaula gi-hagalongo-mai gi-di-Au mo-di hagalabagau-ina di Laangi-Sabad gii-hai be-di laangi hagamadagu. Digaula hagalee e-aamo nadau mee i-di nadau ulu-adu gi-lodo nia bontai o Jerusalem i-di laangi deelaa, gei maa digaula gaa-hai-hua nia mee aanei, gei Au gaa-dudu nia bontai Jerusalem. Di ahi deelaa gaa-dudu nia hale o Jerusalem, tangada e-mee di-diinai di-maa ai.”