Kapingamarangi - Jeremiah - 23

23:1  “E-huaidu ang-gi nia dagi ala e-hagabagi gi-daha gei e-dadaaligi agu daangada!”

23:2  Deenei di mee a Dimaadua, dela go di God o Israel e-helekai-ai i-di hai o-nia dagi ala belee benebene ana daangada, “Goodou ala gu-hagabagi agu daangada la-gi-daha, gu-duidui digaula gi-daha-loo. Goodou gu-hagalee benebene digaula. Malaa, Au ga-hagaduadua goodou i godou huaidu ala ne-hai.

23:3  Gei Au ga-haga-dagabuli-mai agu daangada ala ne-hagabagi gi-nia henua i-daha, gi-loomoi gi di-nadau henua donu, gi-hagadili i-golo, gi-dogologowaahee.

23:4  Gei Au gaa-dugu agu dagi e-dagi digaula, gei agu daangada ga-hagalee lliga be e-mmaadagu i dahi mee, gei deai hogi dahi dangada bolo gaa-ngala ai. Ma ko-Au go Dimaadua ne-helekai.”

23:5  Dimaadua ga-helekai, “Di madagoaa ga-dau-mai, gei Au ga-hilihili-aga dagu Dangada dela e-hai donu mai di madawaawa David e-hai di King. Di King deenei gaa-dagi i-di kabemee, gei Mee gaa-hai go nia mee ala e-donu gei e-humalia i-hongo tenua deenei.

23:6  I dono madagoaa dela e-king-ai, gei digau Judah ga-hagalee lliga i dahi mee, gei digau Israel gaa-noho i-di aumaalia. Digaula ga-haga-ingoo di King deenei bolo ‘Yihowah go tadau Hagamouli’.”

23:7  Dimaadua ga-helekai, “Di madagoaa ga-dau-mai, gei nia daangada ga-hagalee hagamodudahi i dogu ingoo, bolo Au go di God Mouli dela ne-dagi-mai digau Israel gi-daha mo Egypt,

23:8  gei digaula ga-hagamodu i dogu ingoo bolo Au go di God Mouli dela ne-laha-mai digau Israel mai i tenua dela i bahi-i-ngeia, mo mai i-nia henua huogodoo ala ne-hagabagi ginai, gei digaula gaa-noho i-lodo di-nadau henua donu.”

23:9  Ogu lodo gu-manawa-gee, gei gu-bolebole huoloo i-di hai o-nia soukohp tilikai. Au guu-hai be tangada gu-libaliba huoloo, guu-hai be tangada guu-honu i-nia waini no-lodo, idimaa i Dimaadua mo ana helekai dabuaahia.

23:10  Tenua deenei la-guu-honu i digau ala hagalee manawa-dahi ang-gi Dimaadua. Digaula e-mouli huaidu gei e-ngalua huaidu gi nadau mogobuna. Idimaa i-nia helekai haga-halauwa a Dimaadua ala ne-hidi-mai-ai tangihangi damana dela gu-haga-honu i-lodo tenua deenei, gei nia hagadili i-nia gowaa dogi-mee gu-mae-ia gi-lala.

23:11  Dimaadua ga-helekai, “Nia soukohp mo digau hai-mee-dabu la di-nadau god ai, gei Au gu-gidee hogi digaula e-hai nadau huaidu i-lodo di Hale Daumaha.

23:12  Nia ala ala e-hula-ai digaula nonua, la-ga-malali ge e-bouli. Au gaa-hai digaula gi-tibatiba ga-tingatinga gi-lala. Au gaa-dugu digaula gi-lodo nia haingadaa llauehe. Di madagoaa e-hagaduadua-ai digaula la-gu-dau-mai. Ma ko-Au go Dimaadua ne-helekai.

23:13  “Au gu-gidee nia huaidu o-nia soukohp o Samaria, digaula e-hai nadau kokohp i-di ingoo o Baal, gaa-hai agu daangada la-gi-hula-gee.

23:14  Gei Au gu-gidee nia huaidu o-nia soukohp o Jerusalem, nia mee ala e-haihai go digaula la-koia e-huaidu gi-nonua-loo. Digaula e-hai di huaidu hai be-di manu, gei e-kai tilikai. Digaula e-hagamaamaa nia daangada gi-heia di huaidu, malaa, deai tangada e-mee di-lawa gi-daha mo-di huaidu ai. Mai gi-di-Au, digaula guu-hai digau huaidu gadoo be digau Sodom, guu-hai digau huaidu gadoo be digau Gomorrah.”

23:15  Dimaadua di Gowaa Aamua ga-helekai-aga i-di hai o-nia soukohp o Jerusalem: “Deenei-laa, Au gaa-dugu ang-gi digaula gi-gaigai nadau laagau mmala, gei e-inu nadau wai-poisin, idimaa, digaula la-gu-hagadele nadau agoago huaidu laa-lodo tenua hagatau.”

23:16  Dimaadua di Gowaa Aamua ga-helekai gi digau Jerusalem, “Goodou hudee hagalongo gi-nia helekai o-nia soukohp ala e-leelee-ai, idimaa, digaula e-haa goodou gi-nia hagadagadagagee tilikai. Digaula e-agoago-adu gi goodou i-nia mee hua mai i nadau hiihai, gei hagalee go agu mee ne-helekai-ai.

23:17  Digaula e-haihai ang-gi nia daangada ala hagalee hiihai e-hagalongo-mai gi-di-Au, bolo digaula ga-humalia ang-gi ginaadou, ga-manawa lamalia ang-gi ginaadou. Digaula e-haihai labelaa gi digau ala gu-hamaaloo nadau lodo, bolo deai di haingadaa e-tale ang-gi ginaadou ai.”

23:18  Gei au ga-helekai, “Deai dahi soukohp i-nia soukohp aalaa e-iloo-ia nia hagamaanadu ala i-lodo di manawa o Dimaadua ai, gei deai dahi soukohp i digaula bolo gu-longono-ia be gu-modongoohia-ia ana helekai ai, be gu-hagalongo hagahumalia gi ana helekai.

23:19  Dono hagawelewele la di madangi damana, go di madangi gawe-uwa dela e-haneia laa-hongo nia libogo o digau huaidu,

23:20  e-hagalee-loo e-lawa-loo, gaa-dae-loo gi God gu-haga-gila-aga nia mee huogodoo ala belee hai. Di madagoaa ma-ga-dau-mai, gei ana daangada huogodoo ga-gidee-laa e-ginaadou di hai o-nia mee aanei.”

23:21  Dimaadua ga-helekai, “Au digi hagau-ina-adu nia soukohp aanei, digaula ne-bida lloo-adu-hua i ginaadou. Au hogi digi wanga dagu helekai e-dahi gi digaula, gei digaula e-helekai-aga i dogu ingoo.

23:22  Maa nei bolo digaula gu-iloo-ginaadou nia hagamaanadu ala i-lodo dogu manawa, gei digaula guu-mee di-hagadele agu helekai gi-nia daangada, gaa-dugu digaula gi-daha mo nadau mouli huaidu mo nadau hangaahai huaidu ala nogo hai go digaula.

23:23  Au go di God dela e-noho i-nia madagowaa huogodoo, hagalee noho-hua i-di gowaa e-dahi.

23:24  Deai tangada bolo ia gaa-bala hagammuni gi-di gowaa dela e-deemee di-gidee-Au ia ai. Goodou digi iloo bolo Au e-noho-hua i-nia madagowaa huogodoo i-di langi mo henuailala?

23:25  Au e-iloo nia mee ala gu-helekai go nia soukohp aanei ala e-bida dili-hua nadau kai-tilikai i dogu ingoo, ga-haihai bolo ma ko-Au ne-wanga gi ginaadou agu helekai i-lodo nadau midi.

23:26  E-waalooloo-loo behee go di hai o-nia soukohp aanei ala e-aago huaidu agu dama gi nadau helekai tilikai ala ne-bida haga-noho go ginaadou?

23:27  Digaula e-hagamaanadu bolo nadau midi ala e-kai ang-gi agu daangada, bolo ga-hidi-mai-ai digaula ga-de-langahia-e-ginaadou dogu ingoo, gadoo be nadau maadua-mmaadua ala i-mua i-di nadau de-langahia-e-ginaadou dogu ingoo gaa-huli ang-gi Baal.

23:28  Soukohp dela guu-hai dana midi, geia gi-hai-hua bolo dana maa di midi hua dela ne-hai, gei soukohp dela gu-hagalongo gi agu helekai, geia gi-hagadele-ina agu helekai i-di manawa-dahi. Dehee-laa di humalia o-di geinga maangoo ma-ga-hagatau ang-gi di laagau-‘wheat’ hai-palaawaa?

23:29  Agu helekai le e-hai gadoo be-di ulaula o-di ahi gei e-hai gadoo be-di haamaa dela e-tugi haga-ligiligi di hadugalaa.

23:30  Gei Au hogi e-hai-baahi ang-gi soukohp dela e-kae nnelekai o tuai soukohp ga-hagadele bolo nia helekai mai dogu baahi.

23:31  Gei Au hogi e-hai-baahi ang-gi nia soukohp ala e-bida hau nadau helekai, ga-hagadele ang-gi nia daangada bolo nia helekai mai i dogu baahi.

23:32  Mmada, ko-Au go Dimaadua deenei e-helekai! Au e-hai-baahi gi-nia soukohp ala e-hagi-aga nadau midi tilikai. Digaula e-hagi-aga nadau midi tilikai, e-hai agu dama la-gii-hala i nadau hai-kai tilikai mo nadau mee hagapuu. Au digi hagaulia-adu be ne-hai digaula gi-loo-adu. Deai di hagamaamaa ne-hai go digaula ang-gi nia daangada aanei ai. Ma ko-Au go Dimaadua ne-helekai.”

23:33  Gei Dimaadua ga-helekai-mai, “Jeremiah, maa tangada mai i agu daangada, be soukohp, be tangada hai-mee-dabu, ga-heeu-adu gi-di-goe boloo, ‘Nia helekai mai baahi o Dimaadua la di-aha?’ Malaa goe ga-helekai gi mee boloo, ‘Kooe go di haga-daamaha ang-gi Dimaadua. Gei Mee gaa-lawa i-di-goe.’

23:34  Maa tangada i agu daangada be soukohp be tangada hai-mee-dabu ga-helekai-aga i telekai deenei, ‘Di haga-daamaha ang-gi Dimaadua,’ gei Au ga-hagaduadua a-mee mo dono madahaanau.

23:35  Malaa deenei di hai o tangada dela ga-helekai i dana heeu ang-gi ono ehoo hagatenetene mo ono duaahina, boloo, ‘Nnelekai bolo-aha ala ne-hai go Dimaadua? Dimaadua la-ne-helekai bolo-aha?’

23:36  Digaula gi-de-hai-hegau-gee gi telekai deenei, ‘Di haga-daamaha ang-gi Dimaadua.’ Maa tangada ma-gaa-hai di-mee deenei, gei Au ga-haga-daamaha a-mee gi agu agoago. Nia daangada gu-gaui-gee nia helekai o di-nadau God, di God mouli deeodi, Yihowah di Gowaa Aamua.

23:37  Jeremiah, heeu-ina gi-nia soukohp boloo, ‘Dimaadua la-ne-helekai-adu gi goodou bolo-aha? Mee ne-helekai bolo-aha?’

23:38  Maa digaula ga-hagalee hagalongo gi agu helekai, ga-helekai-hua telekai deenei, ‘Di haga-daamaha ang-gi Dimaadua’, agoago-ina gi digaula, bolo

23:39  Au gaa-lahi digaula gaa-kili gi tenua mogowaa-loo gi-daha mo Au, digaula mo di-nadau waahale dela ne-wanga ko-Au gi digaula mo nadau maadua-mmaadua ala i-mua.

23:40  Au gaa-wanga gi digaula di haga-langaadia mo-di haadanga-balua deeodi dela e-deemee di haga-delangahia, gaa-hana-hua beelaa.”