Kapingamarangi - Job - 33

33:1  “Deenei laa, Job, goe hagalongo haga-humalia gi agu mee huogodoo ala ga-helekai-ai.

33:2  Au gu-togomaalia di-helekai-aga dagu maanadu.

33:3  Agu helekai huogodoo le e-donu, gei au e-helehelekai i-nia mee ala e-donu.

33:4  Di hagataalunga o God la-ne-hai au, gei di dogidogi o God Mogobuna ne-gaamai gi-di-au di mouli.

33:5  “Helekai-mai be goe e-mee. Hagatogomaalia-ina oo donu.

33:6  Gidaua e-tongaadahi-hua i-mua o God, gidaua ala ne-hai-mai i-nia gelegele.

33:7  Malaa, deai dau mee bolo goe ga-madagu i-di-au ai, au hagalee e-aali i-di goe.

33:8  “Malaa, deenei dagu mee ne-hagalongo-mai i-doo baahi:

33:9  ‘Au digi hai di huaidu, dagu mee hala ne-hai ai. Au e-madammaa, ogu huaidu ai.

33:10  Gei God ga-halahala di mee dela e-hai-baahi-mai gi-di-au, gaa-dugu au be-di hagadaumee ni-oono.

33:11  Mee ga-lawalawa ogu wae gi taula baalanga, gei Mee e-hagadina au i agu mee huogodoo ala e-hai ko-au.’

33:12  “Gei au e-hai-adu gi-di-goe, Job, goe e-hai-gee. God la-koia e-aamua i-nia daangada huogodoo.

33:13  Goe e-aha dela e-haga-huaidu a God bolo Mee hagalee e-helekai gi-nia helekai lagamaaloo o-nia daangada?

33:14  Ma e-aha maa God e-helehelekai i-nia madagoaa huogodoo, gei deai tangada e-hagalongo gi ana helekai ai.

33:15  I-di boo di madagoaa e-kii-ai nia daangada, God e-helekai gi digaula i-lodo nadau midi mo nadau moe.

33:16  Mee gaa-hai digaula gi-hagalongo gi ana helekai ala e-helekai-ai, gei digaula e-mmaadagu i ana helekai.

33:17  God e-helekai belee hai digaula gii-dugu di-nadau haihai huaidu, gei e-abaaba digaula gi-dee-hai digau hagamuamua.

33:18  Mee hagalee dumaalia gi digaula gi-daaligidia, Mee e-daa digaula gi-daha mo nadau mmade.

33:19  God e-hagadonu digaula gi-di magi, gaa-hai nadau huaidina gii-noho mmae.

33:20  Tangada magi e-hagalee e-hiihai e-miami. Ma e-aha maa nia meegai le e-kala, gei mee e-dee-gai.

33:21  Dono huaidina e-hegehege-loo. Goe guu-mee-hua di-mmada gi-nia iwi o-maa.

33:22  Mee gu-hoohoo gi dono madagoaa dela e-hana-ai gi tenua o-digau mmade.

33:23  “Holongo tangada di langi ga-hanimoi e-hagamaamaa a-mee, tangada di langi e-dahi i-digau di-langi e-mana a God, e-haga-langahia gi mee dono duhongo hegau.

33:24  Mai dono dumaalia gei mee ga-helekai boloo, ‘Diagia a-mee! Mee e-hagalee e-hana gi tenua o-digau mmade. Deenei di hui e-hagamehede a-mee.’

33:25  Dono huaidina gaa-tomo hogi ga-dama-daane ge e-maaloo labelaa.

33:26  Mee ga-dalodalo, gei God ga-hagalongo, ga-hagagila talodalo a-maa. Mee ga-daumaha gi God i-di manawa tene, gei God ga-haga-humalia labelaa nia mee huogodoo ala i-baahi o-mee.

33:27  Gei mee ga-helekai-aga i-mua digau dogologo, ‘Au guu-hai di huaidu. Au deai dagu humalia ne-hai ai, gei God gu-haga-dagaloaha au.

33:28  Mee guu-dugu au gi-dee-hana gi tenua o-digau mmade, gei au deenei e-mouli hua igolo.’

33:29  “God e-tataanga e-haihai nia mee huogodoo aanei gi nia daangada.

33:30  Mee e-haga-dagaloaha di mouli o tangada, gaa-hai a-mee gii-noho i-di mouli tenetene.

33:31  “Deenei laa Job, hagalongo gi agu helekai. Noho deemuu gi-helekai au.

33:32  Maa goe dau helekai i-golo, helekai gi-hagalongo au, au e-tenetene i-dagu helekai bolo kooe dela e-donu.

33:33  Maa hagalee, noho deemuu hagalongo-mai, gei au ga-hagi-adu gi-di-goe di hai o-di kabemee.