CSlElizabeth - Job - 38

38:1  Преставшу же Елиусу от беседы, рече Господь Иову сквозе бурю и облаки:

38:2  кто сей скрываяй от Мене совет, содержай же глаголы в сердцы, Мене же ли мнится утаити?

38:3  Препояши яко муж чресла твоя: вопрошу же тя, ты же Ми отвещай.

38:4  Где был еси, егда основах землю? Возвести ми, аще веси разум.

38:5  Кто положи меры ея, аще веси? Или кто наведый вервь на ню?

38:6  На чемже столпи ея утверждени суть? Ктоже есть положивый камень краеуголный на ней?

38:7  Егда (сотворены) быша звезды, восхвалиша Мя гласом велиим вси Ангели Мои.

38:8  Заградих же море враты, егда изливашеся из чрева матере своея исходящее:

38:9  положих же ему облак во одеяние, мглою же пових е:

38:10  и положих ему пределы, обложив затворы и врата:

38:11  рех же ему: до сего дойдеши и не прейдеши, но в тебе сокрушатся волны твоя.

38:12  Или при тебе составих свет утренний, денница же весть чин свой,

38:13  ятися крил земли, оттрясти нечестивыя от нея?

38:14  Или ты, брение взем, от земли создал еси животно, и глаголиваго сего посадил еси на земли?

38:15  Отял же ли еси от нечестивых свет, мышцу же гордых сокрушил ли еси?

38:16  Пришел же ли еси на источники моря, во следах же бездны ходил ли еси?

38:17  Отверзаются же ли тебе страхом врата смертная, вратницы же адовы видевше тя убояшася ли?

38:18  Навыкл же ли еси широты поднебесныя? Повеждь убо ми, колика есть?

38:19  В коей же земли вселяется свет, тме же кое есть место?

38:20  Аще убо введеши мя в пределы их, аще же ли и веси стези их?

38:21  Вем убо, яко тогда рожден еси, число же лет твоих много.

38:22  Пришел же ли еси в сокровища снежная, и сокровища градная видел ли еси?

38:23  Подлежат же ли тебе в час врагов, в день браней и рати?

38:24  Откуду же исходит слана, или разсыпается юг на поднебесную?

38:25  Кто же уготова дождю велию пролияние, и путь молнии и грома,

38:26  одождити на землю, на нейже несть мужа, пустыню, идеже человека несть в ней,

38:27  насытити непроходиму и ненаселену, и прозябнути исход злака?

38:28  Кто есть дождю отец? Кто же есть родивый капли росныя?

38:29  Из чиего чрева исходит лед? Слану же на небеси кто родил,

38:30  яже нисходит яко вода текущая? Лице нечестива кто устраши?

38:31  Разумел же ли еси соуз Плиад, и ограждение Орионово отверзл ли еси?

38:32  Или отверзеши знамения небесная во время свое? И вечернюю звезду за власы ея привлечеши ли?

38:33  Веси же ли пременения небесная, или бывающая вкупе под небесем?

38:34  Призовеши же ли облак гласом? И трепетом воды великия послушает ли тя?

38:35  Послеши же ли молнии, и пойдут? Рекут же ли ти: что есть?

38:36  Кто же дал есть женам ткания мудрость, или испещрения хитрость?

38:37  Кто же изчисляяй облаки премудростию, небо же на землю преклонил,

38:38  разлияся же яко земля прах, спаях же е, аки каменем, на четыри углы?

38:39  Уловиши же ли львам ядь, и душы змиев насытиши ли?

38:40  Убояшася бо на ложах своих и седят в дебрех уловляюще.

38:41  Кто же врану уготова пищу? Птичищи бо его ко Господу воззваша, облетающе брашна ищуще.