TpiKJPB - Proverbs - 30

30:1  ¶ Ol toktok bilong Agur, pikinini man bilong Jake, yes, tok profet. Dispela man i tok long Itiel, yes, long Itiel na Ukal olsem,

30:2  Tru tumas, mi stap olsem animal moa long wanpela man, na mi no gat gutpela save bilong wanpela man.

30:3  Na tu mi no bin lainim save tru, na tu mi no gat save long samting i holi.

30:4  Husat i bin go antap long heven, o kam daun? Husat i bin bungim win long ol han bilong en i pas bilong pait? Husat i bin pasim ol wara long wanpela klos? Husat i bin strongim olgeta hap bilong dispela graun? Wanem em i nem bilong Em, na wanem em i nem bilong pikinini man bilong Em, sapos yu inap long tokaut?

30:5  Olgeta wan wan tok bilong God em i klin. Em i plang long ol husat i putim bilip bilong ol long Em.

30:6  Yu no ken skruim samting long ol toktok bilong Em, nogut Em i krosim yu, na ol i painimaut pinis yu man bilong giaman.

30:7  ¶ Tupela samting mi bin askim long Yu. No ken tok nogat long mi long ol bipo mi dai.

30:8  Tekewe pasin nating na ol tok giaman i go longwe long mi. No ken mekim mi kamap rabisman o givim mi planti mani samting. Givim mi kaikai wantaim kaikai i fit long skel bilong mi.

30:9  Nogut mi stap pulap, na tok nogat long Yu, na tok, BIKPELA em i husat? O nogut mi stap rabisman, na stil, na kolim nating nem bilong God bilong mi.

30:10  ¶ No ken sutim tok long wanpela wokboi long bikman bilong em, nogut em i tok nogutim yu, na ol i painimaut pinis long yu gat asua.

30:11  I gat wanpela lain manmeri husat i tok nogutim papa bilong ol, na ol i no blesim mama bilong ol.

30:12  I gat wanpela lain manmeri husat i stap klin long ol ai bilong ol yet, na yet ol i no bin waswas long rausim pasin doti bilong ol.

30:13  I gat wanpela lain manmeri, O ol ai bilong ol i antap tru olsem wanem! Na ol i apim ol laplap bilong ai bilong ol.

30:14  I gat wanpela lain manmeri, husat ol tit bilong ol i olsem ol bainat, na ol tit bilong wasket bilong ol i olsem ol naip, bilong kaikai ol rabisman olgeta long dispela graun na rausim ol man i gat nid long namel bilong ol man.

30:15  ¶ Bikpela snek bilong dringim blut i gat tupela pikinini meri, i singaut, Givim, givim. I gat tripela samting i no ting samting em inap tru, yes, fopela samting i no save tok, Em inap,

30:16  Matmat, na bel i no karim pikinini, graun i no pulap long wara, na paia i no save tok, Em inap.

30:17  Ai i wokim pani bilong daunim papa bilong em, na i tingim pasin bilong bihainim tok bilong mama bilong em i samting nating, ol kotkot bilong ples daun bai rausim dispela i go ausait, na ol yangpela igal bai kaikai dispela.

30:18  ¶ I gat tripela samting i winim tingting tumas long mi, yes, fopela samting mi no save long ol,

30:19  Pasin bilong igal long skai, pasin bilong snek antap long ston, pasin bilong sip namel long solwara, na pasin bilong man wantaim yangpela meri.

30:20  Kain pasin bilong meri i bagarapim marit long pasin pamuk em i olsem, em i kaikai, na em i klinim maus bilong em, na tok, Mi no bin mekim pasin nogut.

30:21  Long tripela samting dispela graun i no stap isi, na long fopela samting em i no inap karim,

30:22  Long wokboi taim em i bosim kingdom, na long krankiman taim em i pulap wantaim kaikai,

30:23  Long meri bilong bagarapim bel taim em i marit, na long wokmeri husat bai kisim ol samting bilong bosmeri bilong en bihain.

30:24  ¶ I gat fopela samting i liklik long dispela graun, tasol ol i gat save tru moa yet.

30:25  Ol anis i wanpela lain i no strong, tasol ol i redim kaikai bilong ol long taim bilong biksan.

30:26  Ol koni i ol lain i no gat strong tasol, yet ol i wokim ol haus bilong ol long ol ston.

30:27  Ol grasop i no gat king, tasol olgeta bilong ol i go ausait long ol liklik lain ami.

30:28  Spaida i holim ol samting wantaim ol han bilong en, na em i stap long ol haus bilong ol king.

30:29  ¶ I gat tripela samting i go gutpela, yes, fopela i orait tru long wokabaut bilong ol,

30:30  Laion husat i strong moa namel long olgeta animal, na i no save tanim na ranawe long wanpela samting,

30:31  Grehaun, meme man tu, na king husat i no gat man i ken kirap bilong birua long em.

30:32  Sapos yu bin mekim kranki pasin long yu litimapim yu yet, o sapos yu bin tingting long samting nogut, orait slipim han bilong yu antap long maus bilong yu.

30:33  Tru tumas, wok bilong tantanim susu i bringim bata i kam ausait, na wok bilong tantanim nus i bringim blut i kam ausait. Olsem tasol wok bilong bringim man i kisim belhat tru i mekim pait i kam ausait.