LinVB - Acts - 9

9:1  Saul azalákí bobélé kokánela bayékoli ba Mokonzi mpô ya koboma bangó. Akeí epái ya nganga mokonzi,

9:2  mpé aséngí yě minkandá, ákende na myangó epái ya bato ba sinagóga ya Damásko, mpô ’te, sókó amóní bato bakolandaka nzelá ya Yézu, babáli tǒ básí, áka­nga bangó na minyolólo mpé áka­mba bangó o Yerúzalem.

9:3  Ntángo azalákí kokende mpé akómí penepene na Damásko, na mbálákáká mwínda makási moútákí o likoló, mongengí mpé mozíngí yě.

9:4  Akwéí o nsé, ayókí loláká lolobí na yě : « Saul, Saul, ntína níni ozalí konyókolo ngáí ? »

9:5  Saul atúní : « Mokonzi, yǒ náni ? » Yě azóngísí : « Ngáí nazalí Yézu, óyo ozalí konyókolo.

9:6  Kasi télémé, yíngélá o engumbá, kúná bakoyébisa yǒ níni osengélí kosála. »

9:7  Báníngá bazalákí kotámbola na yě nzelá yǒ kó batélémí, bawéí na nsómo ; bayókákí loláká, kasi bamónókí moto mǒkó té.

9:8  Saul atélémí, kasi, atâ míso ma yě mafungwámí, azalákí komóno elóko té. Basímbí yě na lobóko mpô ya kokende na yě o Damásko.

9:9  Mikolo mísáto azalákí komóno té, kolía té, komele mpé té.

9:10  Ezalákí o Damásko moyékoli mǒkó nkómbó ’te Ananía. Mokonzi abimélí yě o limóní, abéngí yě : « Ananía ! » Oyo azóngísí : « Mokonzi, ngáí óyo. »

9:11  Mokonzi alobí : « Kendé o balabála eye bakobéngaka ‘Sémba’, mpé o ndáko ya Yudási túná moto mǒkó nkómbó ’te Saul wa Társi, azalí kosámbela sikáwa.

9:12  O limóní aútí komóno moto mǒ­kó nkómbó ’te Ananía, óyo ayíngélí o ndáko mpé atíélí yě mabóko mpô ’te ámóno lisúsu. »

9:13  Ananía azóngísí : « Mokonzi, bato baíké bayébísí ngáí makambo ma moto óyo, ná mpé mabé mánso asálákí basántu ba yǒ o Yerúzalem.

9:14  Sikáwa azalí áwa ; banganga bakonzi bapésí yě likokí lya kokanga baye bánso bakobóndelaka nkómbó ya yǒ. »

9:15  Kasi Mokonzi alobí na yě : « Kendé, naponí yě ásálela ngáí ; akosakola nkómbó ya ngáí o bikólo bisúsu, o míso ma bakonzi mpé ma bato ba Israél.

9:16  Ngáí mǒkó nakolakisa yě mpási ínso akosengela koyóka mpô ya nkómbó ya ngáí. »

9:17  Ananía akeí, ayíngélí o ndáko, atíélí Saul mabóko mpé alobí na yě : « Saul, ndeko wa ngáí, Mokonzi Yézu óyo abimélákí yǒ o nzelá eye ozalákí kokende, yě moto atíndí ngáí mpô ’te ómóno lisúsu mpé ótónda na Elímo Sántu. »

9:18  Sé o ntángo êná bilóko lokóla bitekú bilongwí o míso ma yě, mpé Saul abandí komóno lisúsu. Atélémí mpé akúlí batísimo.

9:19  Na nsima abandí kolía, mpé nzóto ya yě eléndí lisúsu. Aúmélí mwâ mikolo epái ya bayékoli o Damásko.

9:20  Sé o ntángo êná abandí kosakola o sinagóga ’te Yézu azalí Mwána wa Nzámbe.

9:21  Baye bánso bayókí yě, bakámwí, balobí : « Moto azalákí konyókolo bato bakosámbelaka nkómbó eye o Yerúzalem, yě té ? Ayákí mpé áwa té mpô ’te ákende na bangó epái ya banganga bakonzi ? »

9:22  Kasi Saul azalákí sé kolénda, mpé alóngí ba-Yúda ba Damásko na botéyi bangó ’te Yézu azalí Krístu sôló.

9:23  Nsima ya mwâ mikolo ba-Yúda bayókání ’te bakoboma yě.

9:24  Kasi Saul ayókí maye bakání kosála yě. Butú mói bazalákí kokéngele bizibeli bya engumbá mpô ya koboma yě.

9:25  Bôngó bayékoli ba yě bakeí na yě na butú, mpé bakitísí yě o ekoló út’o likoló lya efelo ya engumbá.

9:26  Ekómí Saul o Yerúzalem, amekí kokútana na bayékoli, kasi bangó bánso bazalákí kobánga yě, babóyí kondima ’te yě mpenzá akómí moyékoli.

9:27  Bôngó Bárnaba akeí na yě epái ya bapóstolo ; ayébísí bangó ndéngé Saul amónókí Mokonzi o nzelá, maye Mokonzi alobákí na yě, mpé na mpíkó níni asakólákí o nkómbó ya Yézu o Damásko.

9:28  Ut’o mokolo môná azalákí elo­ngó na bapóstolo o Yerúzalem, mpé azalákí kosakola na mpíkó o nkómbó ya Mokonzi.

9:29  Asolólí mpé na ba-Yúda baye bazalákí koloba lokóta la ba-Gréki, mpé awélí ntembe na bangó. Kasi bangó balukí nzelá ya koboma yě.

9:30  Eyókí bandeko bôngó, bakeí kotíka yě o Sezaréa mpé batíndí yě o Társi.

9:31  Eklézya ekómí na bobóto o Yudéa mobimba, o Galiléa mpé o Samaría ; bánso baléndí o boyambi, bazalákí kotósa Mokonzi mpé bakómí baíké na libóndí lya Elímo Sántu.

9:32  Pétro azalákí koleka o bisíká míngi, akeí mpé kotála basántu o Lída.

9:33  Kúná akútání na moto mǒ­kó nkómbó ’te Enéo, moto akúfá makolo ; mbúla mwambe asílí alálí o kitikwálá.

9:34  Pétro alobí na yě : « Enéo, Yézu Krístu abíkísí yǒ, télémé mpé yǒ mǒkó bongísá mbéto ya yǒ. » Sikawâná mpenzá Enéo atélémí.

9:35  Bato bánso ba Lída mpé ba esóbé ya Saron bamóní yě, bayambí Mokonzi.

9:36  O ntéi ya bayékoli ba Yópe eza­lákí mwásí mǒkó nkómbó ’te Tabíta (o lokóta la ba-Gréki Dorkas, lokóla ’te ‘mbólókó’). Azalákí kosálisa bato baíké mpé kokabela babóla makabo.

9:37  Sé o mikolo mîná akómí kobéle mpé awéí. Basukólí nzóto ya yě, mpé babutísí yangó o mokili mwa ndáko.

9:38  Lída ezalí mosíká na Yópe té, yangó wâná ntángo bayékoli bayókí ’te Pétro azalákí kúná, batíndélí yě bato bábalé bábóndela yě : « Yáká nokí epái ya bísó. »

9:39  Nokí Pétro akeí nzelá yǒ kó na bangó. Ekómí yě kúná, bakeí na yě o mokili mwa ndáko. Básí bazéngé bánso bazalákí kolela bayéí kozí­nga yě ; mpé balakísí yě bilambá na miláto miye Dorkas asonókí ntángo azalákí naíno na bangó.

9:40  Pétro abimísí bato bánso o libándá, na nsima afukámí mpé asámbélí. Amíbóngólí epái ya ebembe, alobí : « Tabíta, télémé. » Tabíta afungólí míso, amóní Pétro mpé amífándísí.

9:41  Pétro asímbí yě na lobóko mpé atélémísí yě. Abéngí basántu mpé básí bazéngé, mpé alakísí bangó ’te azalí na bomoi.

9:42  O Yópe mobimba bato bayókí yangó, mpé baíké bakómí koyamba Mokonzi.

9:43  Pétro aúmélí mwâ mikolo o Yópe o ndáko ya moto mǒkó nkómbó ’te Simóni óyo akosálaka mosálá mwa kobongisa mposo ya nyama.