CSlElizabeth - Habakkuk

Chapter 1

1:1  Видение, еже виде Аввакум пророк.

1:2  Доколе, Господи, воззову, и не услышиши? Возопию к Тебе обидимь, и не избавиши?

1:3  Вскую мне показал еси труды и болезни, смотрити страсть и нечестие? Противу мне бысть суд, и судия вземлет.

1:4  Сего ради разорися закон, и не производится в совершение суд: яко нечестивый преобидит праведнаго, сего ради изыдет суд развращен.

1:5  Видите, презорливии, и смотрите, и чудитеся чудесем и изчезните: понеже дело Аз делаю во днех ваших, емуже не имате веровати, аще кто исповесть вам.

1:6  Зане, се, Аз возставляю Халдеи, язык горький и борзый, ходящий по широтам земли, еже наследити селения не своя:

1:7  страшен и явлен есть, от него суд его будет, и взятие его от него изыдет:

1:8  и изскочат паче рысей кони его и быстрее волков аравийских, и поедут конницы его и устремятся издалеча и полетят аки орел готов на ядь.

1:9  Скончание на нечестивыя приидет, сопротивляющыяся лицам их противу, и соберет яко песок пленники.

1:10  И той над царьми посмеется, и мучителие играние его, и той над всякою тверделию поругается, и обложит вал, и возобладает ею.

1:11  Тогда пременит дух и прейдет и помолится: сия крепость богу моему.

1:12  Неси ли Ты искони, Господи Боже, Святый мой? И не умрем. Господи, на суд учинил еси его, и созда мя обличати наказание его.

1:13  Чисто око еже не видети зла и взирати на труды болезненныя: вскую призираеши на презорливыя? Премолчаваеши, егда пожирает нечестивый праведнаго?

1:14  И сотвориши человеки яко рыбы морския и яко гады не имущыя старейшины.

1:15  Скончание удою восхити и привлече его мрежею и собра его сетьми своими: сего ради возвеселится и возрадуется сердце его:

1:16  сего ради пожрет мрежи своей и покадит сеть свою, яко теми разблажи часть свою и пищи своя избранныя:

1:17  сего ради прострет мрежу свою и присно избивати языков не пощадит.

Chapter 2

2:1  На стражи моей стану, и взыду на камень, и посмотрю еже видети, что возглаголет во мне и что отвещаю на обличение мое.

2:2  И отвеща Господь ко мне и рече: впиши видение, и яве на дске, яко да постигнет читаяй я.

2:3  Зане еще видение на время, и просияет в конец, а не вотще: аще умедлит, потерпи ему, яко идый приидет и не умедлит.

2:4  Аще усумнится, не благоволит душа моя в нем: праведник же (мой) от веры жив будет.

2:5  Презорливый же и обидливый муж и величавый ничесоже скончает: иже разшири аки ад душу свою, и сей яко смерть ненасыщен: и соберет к себе вся языки и приимет к себе вся люди.

2:6  Не сия ли вся на него притчу приимут и гадание в повесть его? И рекут: горе умножающему себе не сущая его, доколе? И отягчающему узу свою тяжце.

2:7  Яко внезапу востанут угрызающии его, и ободрятся наветницы твои, и будеши в разграбление им.

2:8  Понеже ты пленил еси страны многи, пленят тя вси оставшии людие крове ради человечи и нечестия земли и града и всех живущих на ней.

2:9  Горе лихоимствующым лихоимство злое дому своему, еже учинити на высоте гнездо свое, еже исторгнути от руки злых.

2:10  Умыслил еси стыдение дому своему, скончал еси люди многи, и согреши душа твоя.

2:11  Зане камень из стены возопиет, и хрущь от древа возглаголет сия:

2:12  у, люте созидающему град кровьми и уготовляющему град неправдами.

2:13  Не сия ли суть от Господа Вседержителя? И оскудеша людие мнози огнем, и языцы мнози изнемогоша:

2:14  яко наполнится вся земля ведения славы Господни, якоже вода многа в мори покрыет я.

2:15  Горе напаяющему подруга своего развращением мутным, и упоявающему, яко да взирает к пещерам их.

2:16  Сытость безчестия от славы испий и ты: сердце, поколеблися и сотряснися: обыде о тебе чаша десницы Господни, и собрася безчестие на главу твою.

2:17  Занеже нечестие Ливаново покрыет тя, и страсть зверей престрашит тя, крове ради человечи и нечестия земли и града и всех живущих на ней.

2:18  Что пользует изваяное, яко изваяша е? Создаша слияние, мечтание ложное, яко упова создавый на создание свое, сотворити кумиры немыя.

2:19  У, люте глаголющему ко древу: ободрися, востани: и камению: возвысися: и то есть мечтание, и сие есть скование злата и сребра, и всякаго духа несть в нем.

2:20  Господь же во храме святем Своем: да убоится от лица Его вся земля.

Chapter 3

3:1  Молитва Аввакума пророка с песнию. Господи, услышах слух Твой и убояхся:

3:2  Господи, разумех дела Твоя и ужасохся: посреде двою животну познан будеши: внегда приближитися летом, познаешися: внегда приити времени, явишися: внегда смутитися души моей во гневе, милость (Твою) помянеши.

3:3  Бог от юга приидет, и Святый из горы Приосененныя чащи: покры небеса добродетель Его, и хваления Его исполнь земля.

3:4  И сияние Его яко свет будет: рози в руках Его, и положи любовь державну крепости Своея.

3:5  Пред лицем Его предидет слово, и изыдет на поле при ногу Его.

3:6  Ста, и подвижеся земля: призре, и растаяша языцы: стрышася горы нуждею, и растаяша холми вечнии, шествия вечная Его,

3:7  за труд видеша селения Ефиопская, убоятся и кровы земли Мадиамския.

3:8  Еда в реках прогневаешися, Господи? Еда в реках ярость Твоя? Или в мори устремление Твое? Яко всядеши на кони Твоя, и яждение Твое спасение.

3:9  Наляцая налячеши лук Твой на скиптры, глаголет Господь: реками разсядется земля.

3:10  Узрят тя и поболят людие, расточая воды шествия Его: даде бездна глас свой, высота привидения своя:

3:11  воздвижеся солнце, и луна ста в чине своем: во свете стрелы Твоя пойдут, в блистании молний оружий Твоих.

3:12  Прещением умалиши землю и яростию низложиши языки.

3:13  Изшел еси во спасение людий Твоих, спасти помазанныя Твоя, вложил еси во главы беззаконных смерть, воздвигл еси узы даже до выи в конец:

3:14  разсекл еси во изступлении главы сильных, сотрясутся в ней: разверзут узды своя яко снедаяй нищий тай.

3:15  И навел еси на море кони Твоя, смущающыя воды многи.

3:16  Сохранихся, и убояся сердце мое от гласа молитвы устен моих, и вниде трепет в кости моя, и во мне смятеся крепость моя: почию в день скорби моея, да взыду в люди пришелствия моего.

3:17  Зане смоковь не плодопринесет, и не будет рода в лозах: солжет дело маслинное, и поля не сотворят яди: оскудеша овцы от пищи, и не будет волов при яслех.

3:18  Аз же о Господе возрадуюся, возвеселюся о Бозе спасе моем.

3:19  Господь Бог мой сила моя, и учинит нозе мои на совершение, и на высокая возводит мя, еже победити ми в песни Его.