Pohnpeian - Habakkuk

Chapter 1

1:1  Iet mahsen me soukohp Apakuk patohwansang rehn KAUN-O nan kaudiahl kei.

1:2  Maing KAUN, ia erein ei kin patohwan liklikweriong komwi oh peksawas, a komwi ahpw sohte ketin karonge oh doareikitasang nan at apwal laud?

1:3  Dahme komw ketin mweidkihong ie I en patopatohwan soangen sapwung oh suwed pwukat? Ia duwen omwi kak ketin kanengamahiong mahmahsanih soangen wiewia suwed wet? Apwal laud kin kapiliepene, akamai oh pei kin wiewiawi wasa koaros.

1:4  Pil kosonned solahr manaman, oh pwungen kopwung sohte kin pweida. Aramas suwed kan kin powehdi me pwung kan, ihme kahrehda pwungen kopwung kan suwedlahr.

1:5  KAUN-O eri mahsanihong sapwellime aramas akan, “Kumwail kilang wehi teikan oh tehk mwahu, kumwail ahpw pahn pwuriamweikihla kowahlap. I pahn wiahda mehkot kapwuriamwei, ahpw kumwail sohte pahn kamehlele, mehnda ma kumwail pahn rong koasoiepe.

1:6  Pwe I pahn kakehlakahla mehn Papilonia kan, wehi lemei oh loallap. Re kin kakahnseli nin sampah oh kalowehdi wehi teikan.

1:7  Aramas kamasepwehk oh kelemw kei irail; re sohte kin pohnese kosonned pwe arailohte.

1:8  “Neirail oahs akan marahrahsang lepard kan, pil kommwad sang kidien wel duhpek kan. Neirail soundak oahs kan kin tangatang kohdo sang nan sahpw doh kan; neirail oahs kan kin sarep nanpwel. Re marahra, rasehng ikel me kin pihrdiong pohn seike.

1:9  “Arail karis en sounpei kan kin kohkodohng mahwen, oh aramas koaros kin masak irail. Tohtohn me re pahn salihedi kan pahn duwehte tohtohn piken ni oaroahr.

1:10  Re kin mwamwahliki nanmwarki kan, oh kin wiahki soupeidi kan ar mehn kepit. Sohte kelen mahwen me kak kapweiekiraildi, pwe re kin koasoakehda pwehl peiankihda kehl kan oh kalowehdi.

1:11  Mwuhr, re ahpw kin kohkohla, rasehng kisinieng. Soangen aramas pwukat kin wiahki ar koht pein arail kehlail.”

1:12  Maing KAUN, komwi kin ketikette sang mwohn tepin kawa. Komwi ei Koht sarawi oh soutuk. Maing KAUN, ei Koht oh soundoar, komwi me ketin pilada mehn Papilonia pwukat oh kakehlahda irail pwe re en kalokei kiht.

1:13  Eri, ia duwen omwi kak kanengamahiong aramas loallap suwed pwukat? Edin perenomwi kan me nohn sarawi, oh sohte konehng mahsanih me suwed, kahrehda komwi pil sohte kin kupwurperenki wiewia suwed en aramas akan. Eri, dahme komwi ketin nennenkihlahte nindokon ar komwkomwomwala aramas pwukat me uhdahn pwung sang irail?

1:14  Ia duwen omwi kak ketin wiahki aramas mwahmw de mwuten loahng ehu me sohte ar kaun me pahn kaweid irail?

1:15  Mehn Papilonia kan kin kolkihdi aramas akan kehs likamwete irail mwahmw kei. Re kin ruwahdekirailla nan uhk oh ngisingiski ar perenki seikarail!

1:16  Re ahpw kin pwongih oh meirongohng ar uhk kan, pwehki ar kin paiamwahuki uhk pwuko.

1:17  Ia duwe, re pahn wie doadoahngki neirail kedlahs kohkohlahte, oh komwomwkihla wehi kan ni arail lemei?

Chapter 2

2:1  I pahn douda nan ei imwen iroir, oh awiawih dahme KAUN-O pahn mahsanihong ie pwe I en patohwanda oh dahme e pahn ketin sapengki ei kaulim kat.

2:2  Eri, KAUN-O ketin sapeng ie, mahsanih, “Ntingihedi pohn ekei pelien takai dahme I pahn mahsanihong uhk, pwe aramas en kak mengeiki wadek.

2:3  Ntingihedi, pwehki e saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.

2:4  Eri, iet mahseno: ‘Me suwed kan sohte pahn mour; ahpw me pwung kan pahn momourte pwehki ar loalopwoatohng Koht.’ ”

2:5  Kepwehpwe, iei dipwisou widing. Aramas mehwo kin aklapalap oh sohte meleilei; re rasehng mehla me sohte kin medla. Ihme kahrehda re kin mahmahwenkihong wehi kan sohte tokedi oh kalokalowehdi.

2:6  Me lohdi kan kin kepitki irail kan me kaloweiraildi oh mwamwahlikin irail. Re kin nda, “Kumwail kin kulihada dipwisou me kaidehn amwail, ahpw kumwail pahn ale lokolok. Ia erein amwail pahn nannantihong en kepwehpwehkihla amwail kin idingki me pweipwandohng kumwail kan en pwainohng kumwail ar pweipwand?”

2:7  Mwohn amwail pahn pehmada, kumwail kan me kalowedier meteikan pahn mihla nan pweipwand oh pil idihdohng en pwainla uwen pweipwei me pahn kohla pohn amwail pweipwand. Amwail imwintihti kan pahn kohdo oh karrerihkumwailda. Re pahn kulihasang amwail dipwisou kan.

2:8  Kumwail kulihalahr tohn wehi tohto-a met irail kan me pitla pahn kulih kumwail pwehki amwail kamaramas oh wiakauwe tohn sampah oh arail kahnimw kan.

2:9  Meid suwediong kumwail! Kumwail kakepwehpwehkilahr amwail peneinei kan dipwisoun kul kan, oh songosong en perehdi dewemwail kan pwe aramas en dehr kauwehla.

2:10  Ahpw amwail peneinei kan namenengkilahr amwail wiewia kan. Ni amwail kauwehla wehi tohto, kumwail pil kahrehiong pein kumwail en mwomwla.

2:11  Pwe pil takain kelen ihmw kan kin weriwerki ar uhwong kumwail, oh limwoahr en ngihlo kin peipeido sang ni rehun ihmw kan.

2:12  Meid suwediong kumwail! Kumwail poahsoanehkihda kahnimw ehu suwed oh kauwekihda kamaramas.

2:13  Tohn wehi kan me kumwail kalowehdi luwetkihla doadoahk laud kan me soh katepe, oh kisiniei ahpw isikala mehkoaros me re kauwada. KAUN-O, Wasa Lapalap, me ketin wiadahr mepwukat.

2:14  Ahpw sampah pahn direkihla marain lingaling en KAUN-O, rasehng madau eh kin direkihla pihl.

2:15  Meid suwediong kumwail! Ni amwail lingeringer kowahlap kumwail mwamwahliki oh kanamenekihala mehn mpamwail kan. Kumwail kahrehiong irail en wasawasasseli, rasehng me sakaula men.

2:16  Ahpw namenek me pil pahn kipeikumwaildi, a kaidehn wahu. Pein kumwail pahn sakaula oh wasawasasseli. KAUN-O me pahn kupwurehda pwe kumwail en nimala pein noumwail dahl en lokolok, oh e pahn ketin wekidohng wahupamwail ni kanamenek.

2:17  Kumwail pelehdihsang tuhkehn nanwel en Lepanon; eri, met kumwail me pahn uhd palapaldi. Kumwail kemehla mahn akan wasao; eri, met mahn akan me pahn uhd kamasangkumwailda. Mepwukat pahn wiawi pwehki amwail kamaramas oh wiakauwe tohn sampah oh arail kahnimw kan.

2:18  Ia katepen dikedik en eni? Pwe wiepen pehn aramaste, oh e sohte kak nda mehkot me mehlel. Soangen kamwahu da me e kin wiahiong sounwiepe kan pwe re en koapworopworki-koht menet sohte pil kak lokaia!

2:19  Meid suwediong kumwail! Pwe kumwail kin ndaiong lepin tuhke lep, “Pirida!” de ong takai ehu me sohte kin lokaia, “Pwourda!” Ia duwe, dikedik en eni men kak kasalehiong kaudiahl ehu? Mehnda ma e kidikidkipene kohl oh silper, ahpw sohte mour loale.

2:20  KAUN-O kin ketiket nan Tehnpese Sarawi; eri, sampah pokon en nennenla mwohn silangi.

Chapter 3

3:1  En soukohp Apakuk eh kapakap:

3:2  Maing KAUN, I patohwan rongehr duwen wiepen nin limomwi kan, oh e audehkiniehda lemmw kowahlap. Eri, komwi ketin pwurehng wiahda nan at ahnsou manaman lapalap akan me komwi ketin wiadahr mahs. Komw ketin kupwurkalahngan, nan pil sapwellimomwi engieng.

3:3  Koht ketin sapasapahldohsang Edom; Koht me sarawio ketiket kohdo sang pohn dohl akan en Paran. Sapwellime lingan kin kipehdi pahnlahng, oh kapingpe pil kin kadirehla sampah pokon.

3:4  E kin ketiket kohdo, rasehng lingaling en lioal; marain kin piripirsang nin lime kan, wasa me sapwellime roson oh manaman kin rirsang aramas.

3:5  E kin ketin kadarodo mwowe soumwahu lusulus, oh ketin ruwese mehla en idawehndo.

3:6  Ni eh kin ketin uhdi, sampah kin itikekda, oh sampah kin rerrerki ni eh kin ketin kommoalehdi. Nahna poatopoat kan rengkdier; dohl en kawa ko karakarahkala, dohl kan me e kin ketin keid powe keilahn aio.

3:7  I kilangehr duwen mehn Kusan kan ar masepwehkadahr oh mehn Midian kan ar rerrer.

3:8  Ia duwe, Maing KAUN, pillap akan me kahngiangihkomwidahr? Madau me kahredahr omwi engieng kowahlap? Komwi ketiket kohdo pohn depwek kan; depwek en melimel, iei tehnweromwi, ni omwi ketikihdo manaman en powehdi ong sapwellimomwi aramas akan.

3:9  Komw ketin onopadahr en doadoahngki sapwellimomwi ketieu, onopadahr en kadar sapwellimomwi arep kan. Sapwellimomwi lioal pwalangpeseng sampah.

3:10  Ni nahna kan ar kilangkomwihda, re rerrer; pihl pwilipwildihdo sang pahnlahng. Kepin madau kan ngiringirisek, oh iloak kan lalaudlahr.

3:11  Ketipin oh maram uhdi nan deura, pwehki lingen sapwellimomwi arep me piripirseli, oh pwehki lingen sapwellimomwi ketieu lingaling.

3:12  Nan sapwellimomwi engieng komw ketin kotehwei pohn sampah; nan sapwellimomwi engieng komw ketin tiakedi wehi kan.

3:13  Komw ketieila pwe komwi en ketin doarehla sapwellimomwi aramas akan, pwe komwi en ketin doarehla sapwellimomwi nanmwarki pilipildahro. Komw ketin kalowedier sounkaweid en me suwed akan, oh pil ketin kamwomwala ienge kan.

3:14  Sapwellimomwi arep doakoahdi kaunen nah karis ni ar kohkodohn pwakihkitpeseng, rasehng melimel kalaimwun ehu, oh pohnmwahso, duwehte irail kan me kin kahpwalihala me semwehmwe kan ni rir.

3:15  Sapwellimomwi oahs akan tangatangseli pohn sehd, eri, iloak laud akan pwudopwudkihda.

3:16  Ni ei kin rongada mepwukat, I kin rerada, kilin ewei kat kin wie rerrerki ei masepwehk. Paliwereiet kin mwoatoredi, oh nehi kat pil dipekelekel. A I pahn meleilei oh kasikasik ahnsou me Koht pahn ketin kaloke irail kan me kin mahweniong kiht.

3:17  Mehnda ma tuhke pik kan sohte pahn wa, oh sohte wahn wain me pwarada nan mwetin wain kan; mehnda ma tuhke olip kan sohte pahn wa, oh sohte wahnsahpw nan mohs akan; mehnda ma sihpw koaros pahn mehla, oh wasahn kamwenge kou pahn tehnla;

3:18  ahpw I pahn pereperen oh nsenamwahu, pwehki KAUN-O Koht, iei ei sounkomour.

3:19  KAUN-O, Wasa Lapalahpie, kin ketin kakehlaiehda. Ihme me pil ketin wiahiong ie I en tang marahra, rasehng tie men, oh I sohte pahn perki mehkot ni ei pahn alialuseli pohn nahna kan.