LinVB - Job - 7

7:1  Bomoi bwa moto awa o nse, bomoi bwa mongamba, mikolo mya ye mizali mya moto bakofutaka mokolo na mokolo.

7:2  Lokola moombo akolukaka malili o nse ya nzete, mpe mosali akozilaka mokolo mwa lifuta,

7:3  nakolekisaka mikolo mya ngai se mpamba, mpe nakomitungisaka na butu.

7:4  Soko nakei kolala, nakomitunaka : « Ntongo etani naino te ? » mpe na ntongo : « Butu boindi naino te ? » mpe kin’o ntongo nakozala motema likolo.

7:5  Nzoto ya ngai etondi na nkusu mpe na makwanza, lomposo la nzoto lopaswani, lokomi na mayina.

7:6  Mikolo mya ngai mikei, mileki mbangu, nakomi lokola ntonga ya mosoni bilamba esili nsinga.

7:7  Nzambe, kanisa ’te bomoi bwa ngai bozali mpema mpamba, nazali koyoka esengo lisusu te.

7:8  Bato bazali koluka ngai, bakomono ngai lisusu te ; miso ma yo makomono ngai te.

7:9  Moto akei o mboka ya bawa, akei bobele ; lokola limpata lilimwi mpe libungi.

7:10  Akozonga lisusu o ndako ya ye te, bandeko ba ye bakomono ye lisusu te.

7:11  Yango wana nakoki kokanga monoko lisusu te, nakoloba, mpo nazali kotatabana, nakomilela mpo nayoki motema mpasi mpenza.

7:12  Nazali nde Mbu enene to ebuki ya mbisi mpo ’te otia mokengeli akengele ngai ?

7:13  Soko namilobeli : « O mbeto nakopema malamu, mpongi ya ngai ekobondo ngai »,

7:14  obangisi ngai na ndoto ebe mpe na mamoni ma nsomo.

7:15  O kati ya motema nayoki mposa ya komiboma na nsinga, nakomi koboya nzoto ya ngai mpe kolula liwa.

7:16  Nalingi nakufa, nakoumela seko te, tika ngai nye, mikolo mizali kokende lokola mpema.

7:17  Moto nde nani mpo ’te opangana na ye bongo, mpo ’te okengele ye bipai binso,

7:18  mpo ’te otunaka ye ntongo inso mpe omekaka ye motema ntango inso ?

7:19  Mokolo nini okotika kotala ngai, mpe okopesa ngai ntango napema ?

7:20  Ata nasumuki, yango esali yo nini ? Yo, monongi wa bato ? Mpo nini ososoli bobele ngai ? Nazali nde kotungisa yo, solo ?

7:21  Oyebi kokanga motema na matumoli ma ngai te ? Oyebi kolimbisa mabe ma ngai te ? Etikali moke nalala o kati ya mabelé ; okoluka ngai, kasi nakozala lisusu te.