LinVB - Job - 14

14:1  Moto oyo abotami na mwasi, akoumela o mokili te, mikolo mya ye, se mikolo mya mpasi.

14:2  Azali lokola fulele ebimi lelo mpe ekauki lobi, akolimwa mbangu lokola elilingi ya ye.

14:3  Ntina nini okotalaka ye na miso makasi mpe ofundi ye mpo ’te bosamba bino na ye ?

14:4  Nani akoki kobimisa eloko peto o eloko mbindo ? Moto te !

14:5  Awa okateli moto mikolo mingi te, otangeli moto moko moko sanza ya ye, mpe otieli ye ndelo akoki koleka te,

14:6  bongola miso epai esusu, apema naino, mpe asepela lokola mosali o ntango ya bopemi.

14:7  Nzete ezali na elikya ya solo, soko bakati yango, ekoki kobika, ekobimisa nkasa na bitapi bya sika.

14:8  Ata minsisa o mabelé mizali mya kala mpe ntina ya yango ekauki o mabelé,

14:9  soko ezwi mai, ekobimisa nkasa ya sika mpe ekotanda bitapi lokola nzete ebesu.

14:10  Soko moto awei, esili na ye ; mokolo moto awei akokende o esika nini ?

14:11  O mbu enene mai makoki kosila, mai makoki kokauka nye o ebale :

14:12  mowei akoteleme lisusu te, tee likolo likozala, akolala ; akolongwa o mpongi lisusu te.

14:13  E ngai e, soko otindaki ngai o mboka ya bawa, soko obombaki ngai wana tee nkanda ya yo ekosila : soko obosanaki ngai naino tee mokolo okokanisa ngai.

14:14  Mowei akoki nde kosekwa ? mbele namemeki mokumba mwa ngai na mpiko, mpe nazilaki mokolo mwa libiki lya ngai.

14:15  Mbele ntango obengaki ngai, nalingaki kondima noki, awa oyoki mposa ya komono ekelamo ya yo ;

14:16  mbele ata sikawa ozali kotala bisika binso nakotia makolo, olingaki kokanisa masumu ma ngai lisusu te,

14:17  olingaki kokanga masumu ma ngai o libenga ; mpe kobomba mabe ma ngai mamonono te.

14:18  Kasi ngomba ekoki koningana mpe kokweya, ngomba ya mabanga ekoki kobukana mpe kolongwa.

14:19  Mai makoki kopasola mabanga, esika mai mazali koleka, mabelé makobendama ; se bongo okoboma elikya ya bato.

14:20  Okokweisa ye seko, mpe akolimwa, okobebisa elongi ya ye, na nsima okobengana ye.

14:21  Soko bana ba ye bakozwa lokumu, akoyeba te, soko bato bakoyokisa bango nsoni, akomono te.

14:22  Azali koyoka bobele mpasi ya ye moko, mpe komilela mpo ya mawa ma ye moko.