LinVB - Job - 32

32:1  Na nsima bato baye basato batiki koyanola Yob, zambi akanisi bobele ’te azali moto se­mba.

32:2  Kasi Eliu, mwana wa Barakel, moto wa Buz, wa etuka ya Ram, asiliki. Asilikeli Yob mingi, zambi Yob akanisi ’te alongi o miso ma Nzambe.

32:3  Asilikeli mpe bani­nga basato, mpo bazalaki na eyano ya solo te, mpe bakokaki kondimisa Yob te ’te asalaki mabe.

32:4  Liboso Eliu alobaki eloko te, mpo baninga bazalaki bakolo ba ye.

32:5  Kasi awa amoni ’te moko wa bango basato akoki koyanola eloko te, akomi koyoka nkanda.

32:6  Na nsima Eliu, mwana wa Barakel, moto wa Buz, alobi : Ngai nazali se mwana, bino bozali bakolo, yango wana nabangaki kolakisa bino mayele ma ngai.

32:7  Nakanisaki : « Tika bakolo báloba, balakisa biso bwanya. »

32:8  Nzokande mayele makouta na elimo, mpema ya Nzambe wa bokasi ekopesa moto bwanya.

32:9  Bokóló bokopesa moto bwanya te, babange banso bayebi mibeko mya bosembo te.

32:10  Yango wana nasengi bino : boyoka ngai, ngai mpe nalingi koyebisa bino mayele ma ngai.

32:11  Ya solo, nazalaki na elikya ’te bokoloba malamu, natiaki matoi mpenza na mayele ma bino, nayoka maloba nini bokozongisela ye.

32:12  Nalandaki bino malamu mpenza, kasi ata moko ayanolaki Yob malamu te, ata moko akweisaki ye na maloba ma ye te.

32:13  Bongo boloba te ’te : « Tokutani na moto wa bwanya, toyoki mateya ma Nzambe, ma bato te. »

32:14  Yob alobaki makambo ma ye na ngai te, ngai nakoyanola ye na mayele ma bino te.

32:15  Tala bango wana, basuki, bazangi eyano, maloba manso masili o monoko mwa bango.

32:16  Nazalaki kozila bango baloba, kasi batiki, bakoki koyanola lisusu eloko te.

32:17  Sikawa ngai moto nakopesa bango eyano, ngai mpe nakolakisa bango mayele ma ngai.

32:18  Nazali na maloba maike, natondi na mango o motema.

32:19  Nayoki libumu lokola nameli vino ya sika mingi, eye elingi kopasola ata libenga lya sika.

32:20  Yango wana nakoloba mpo ’te nazwa mpema, nakofungola monoko mpo ’te nazongisa maloba.

32:21  Ngai nakotala bilongi bya bato te, nakobondela moto moko te.

32:22  Ya solo, naluki kosepelisa moto te, soko nameki, Mozalisi akosukisa ngai noki.