Kapingamarangi - Habakkuk

Chapter 1

1:1  Aanei nia helekai ala ne-hagagida go Dimaadua gi soukohp Habakkuk.

1:2  Meenei Dimaadua, e-waalooloo behee go dogu gahigahi Goe i-nia hagamaamaa i-mua do longono-e-Goe, i-mua do haga-dagaloaha gimaadou gi-daha mo madau haingadaa?

1:3  Goe e-aha dela e-hai au gii-mmada gi-nia hagadilinga huaidu aanei? Goe e-aha dela e-mee di-manawa hagakono i-doo mmada gi-nia hagadilinga haihai huaidu aanei? Di haingadaa damanaiee mo-di haga-huaidu gu-haganiga au, nia lagalagamaaloo mono heebagi guu-hai i-nia gowaa huogodoo.

1:4  Nia haganoho gu-paagege ge gu-balumee-hua, gei-ogo nia donu o-nia gabunga la hagalee kila. Digau huaidu gu-duuli digau ala e-humalia, dela di mee e-hidi-mai-ai nia donu o-nia gabunga gu-huaidu.

1:5  Dimaadua ga helekai gi ana daangada, “Goodou mmada-malaa gi nnenua ala i godou baahi, gei goodou ga-goboina huoloo gi-nia mee ala gaa-mmada ginai goodou. Au gaa-hai dagu mee dela hagalee hagadonu go goodou i-di godou madagoaa ma-ga-longono-goodou di-maa.

1:6  Au ga-hagamaaloo-aga digau o Babylon, digau hagamuamua ge daaligi dangada. Digaula gu-modoho gi-daha i-lodo henuailala hagatau, gu-haga-magedaa nia henua ala i-golo.

1:7  Digaula digau hagamadagudagu-dangada ge-hagalliga. Digaula hagalee hagalongo gi-nnaganoho ala i-golo, gei go nadau haganoho la-hua.

1:8  “Nia hoodo digaula koia e-llele i-nia ‘leopard’, ge hagalee mmaadagu i-nia paana lodo-geinga ala e-hiigai. Digau dauwa llele hoodo digaula e-llele-mai i-nia henua ala mogowaa, nia hoodo digaula e-geligeli nia gelegele. Digaula koia e-llele, e-hai gadoo be-di ‘eagle’ ma-ga-maangi hagalimalima gi dana mee dela belee kumi e-gai.

1:9  “Nia buini-dauwa digaula e-lloomoi e-heebagi, gei nia daangada huogodoo e-mmaadagu huoloo i digaula. Digau ala ne-kumi le e-dogologo gadoo be nia gelegele o tongotai.

1:10  Digaula e-hai nia king hagahuaidu, ge e-gadagada gi-nia dagi aamua. Deai di abaaba dauwa e-mee di-dugu digaula ai; digaula e-haga-bae nia gelegele gii-tale gi-di abaaba, gaa-kaga gi-nua gaa-kumi di guongo deelaa.

1:11  Nomuli, gei digaula gaa-hula, e-hai gadoo be-di madangi. Digau aanei e-hai bolo nadau maaloo la go di-nadau god.”

1:12  Meenei Dimaadua, Goe gu-noho-hua mai taamada. Kooe dela go dogu God dela e-dabu ge dono hagaodi ai. Meenei Dimaadua, go dogu God mo dogu Dangada Hagaloohi, Kooe dela ne-hilihili digau o Babylon, ga-hagamaaloo digaula belee hagaduadua gimaadou.

1:13  Malaa, Goe e-aha dela e-mee di manawa hagakono gi digau huaidu aanei? Goe e-dee-mee di-mmada gi-nia mee huaidu ala e-hai go nia daangada aanei, idimaa Goe dela e-dabu. Gei Goe e-aha dela e-noho deemuu i-di madagoaa digaula ala e-hagahuaidu nia daangada ala koia e-donu i digaula?

1:14  Dehee dau hai dela e-hai gi-nia daangada ala e-hai be nia iga, be e-hai be nia lamu ala nadau dagi e-dagi digaula ai?

1:15  Digau o Babylon le e-kumi nia daangada gi-nia maadau, gadoo be nia iga. E-dagi digaula gi-daha i-lodo di gubenge mo-di wwolowwolo tenetene gi nadau mee ne-kumi!

1:16  Digaula e-daumaha gi di-nadau gubenge mo-di hai nadau tigidaumaha ang-gi nadau gubenge, idimaa nia gubenge digaula la-guu-wanga gi digaula nia mee e-koia e-humalia.

1:17  E-hai behee? Digaula ga-hai-hegau gi nadau hulumanu-dauwa gaa-hana-hua beelaa? Digaula ga-hagahuaidu nia guongo ala i-golo hagalee dumaalia ginai?

Chapter 2

2:1  Au gaa-gaga gi tomo dogu hale hagaloohi, ga-talitali nia mee a Dimaadua ala ma-ga-hagi-mai gi-di-au belee helekai-iei au, mo nia helekai a-Maa mai gi agu helekai hagahuaidu.

2:2  Dimaadua ga-helekai-mai gi-di-au, “Hihia haga-madammaa gi-hongo nia baahi hadu agu mee ala ga-hagi-adu gi-di-goe, gi-dau-ngoohia go nia daangada.

2:3  Hihia gi-lala, idimaa ma digi dae-mai di madagoaa e-kila-ai nia maa. Gei di madagoaa e-limalima-hua di-dae-mai, gei agu mee ala ga-hagi-adu gi-di-goe la-ga-kila-aga. Ma e-aha ma-ga-duai, taalia-hua, idimaa maa e-kila-aga gii-hai be-di mee dela gu-haga-noho, gei hagalee duai.

2:4  Aanei nia helekai, ‘Digau huaidu la-hagalee haga-mouli, gei digau ala e-humalia le e-mouli, idimaa digaula e-manawa-dahi ang-gi Dimaadua.’ ”

2:5  Di maluagina la di mee halahalau-dangada. Digau ala e-hagagailaa le e-hagamuamua, hagalee noho deemuu. Di hagagailaa e-huge dono ngudu gadoo be taalunga, gei digi dohu ang-gi deia be-di made. Deenei di mee e-heheebagi-iei digaula gi-nia henua e-haga-magemagedaa digaula.

2:6  Digau ala ne-magedaa ga-haganneennee digau ala ne-haga-magedaa ginaadou, ga-hagahuaidu digaula, ga-helekai, “Goodou e-kae nia goloo ala hagalee nia mee ni goodou, gei goodou gaa-kae di hagaduadua! E-waalooloo behee go di-godou haga-maluagina goodou i di-godou hono digau ala e-boibana-adu gi goodou bolo digaula gi-huia-adu gi goodou nadau boibana?”

2:7  I-mua di-godou donu-adu gi goodou, gei goodou ala ne-kumi digau ala i-golo, la-gaa-dau gi-lodo di boibana, gaa-hono bolo gi-huia gii-hana laa-hongo godou boibana. Godou hagadaumee ga-lloomoi gaa-hai goodou gi-uli godou gai. Digaula gaa-kae godou goloo.

2:8  Goodou gu-gaiaa nia mee digau o-nia guongo e-logowaahee, gei dolomeenei, digau ala ne-dubu i-nia guongo aalaa, gaa-kae labelaa godou mee, idimaa goodou digau daaligi dangada ge e-hagahuaidu digau henuailala mo nadau waahale.

2:9  E-huaidu adu gi goodou! Goodou ne-haga-maluagina godou madahaanau gi-nia goloo gaiaa, gaa-hai bolo goodou e-duuli godou hale gi-dee-oho go nia daangada!

2:10  Gei-ogo godou madahaanau le e-langaadia i godou hangahaihai, i-di godou oho nia guongo e-logowaahee, malaa, goodou ne-bida gowadu-hua gi goodou di mooho.

2:11  Nia hadu hogi o-di abaaba di waahale e-wwolowwolo e-hai-baahi adu gi goodou, gei nia ogo o-di hale ga-wwolowwolo labelaa di lee deelaa.

2:12  E-huaidu adu gi goodou! Goodou ne-hagamau di-godou waahale gi-di huaidu, ga-haga-duu-aga di-maa gi taaligi nia daangada gii-mmade.

2:13  Digau nia guongo ala ne-kumi go goodou gu-huaidu ang-gi ginaadou i-di nadau ngalua deai ono hadinga ai, gei-ogo di ahi gaa-dudu nia mee huogodoo ala ne-haga-duu go digaula. Ma go Yihowah Koia e-Aamua dela ne-hai nia mee aanei.

2:14  Malaa, gei-ogo henuailala gaa-honu i-di kabemee o-di madamada o Dimaadua, gadoo be-di moana dela e-honu i-nia wai.

2:15  E-huaidu-adu gi goodou! Di-godou hagawelewele gu-haga-balumee ge-hagalangaadia digau ala i godou baahi. Goodou guu-hai digaula gi-heehee tibatiba be digau libaliba.

2:16  Gei di langaadia ga-haga-holi goodou, hagalee go di hagalaamua. Goodou gaa-bida inu gi-libaliba ga-heehee tibatiba. Dimaadua gaa-hai goodou gii-bida inu-mia di ibu o-di hagaduadua, gei Mee gaa-huli di-godou hagalabagau ang-gi di hagalangaadia.

2:17  Goodou guu-hele gi-daha nia waa-laagau o Lebanon, gei dolomeenei, go goodou ala gaa-hele gi-daha. Goodou gu-daaligi nia manu o-di gowaa deelaa, gei dolomeenei nia manu ga-hagamadagudagu goodou. Nia mee aanei la-gaa-hai, idimaa, goodou gu-daaligi godou daangada gii-mmade, gei goodou gu-haga-huaidu digau henuailala mo nadau waahale.

2:18  Dehee tahidamee o-di ada balu ieidu? Ma di mee hua ne-hai gi-nia lima o-nia daangada, gei di-maa e-deemee di-hagi-adu gi goodou nia mee donu. Ma nia humalia-aha ala ne-hai gi digau ala ne-hai eia, ga hidi-mai-iei digaula, ga-hagadagadagagee gi-di-maa, go di god dela e-deemee di-leelee!

2:19  E-huaidu-adu gi goodou! Goodou e-leelee gi-di bida laagau boloo, “Ala!” be e-helekai gi-di hadu boloo, “Du-gi-nua!” E-hai behee? Di ada balu-ieidu e-mee di-haga-modongoohia-adu gi-di-goe dahi mee? Maa e-hii dono gili gi-nia goolo mo nia silber, gei di-maa di mouli i-lodo di-maa ai.

2:20  Dimaadua le e-noho i-lodo dono Hale Daumaha dabu. Digau o henuailala huogodoo gii-noho deemuu i-mua ono hadumada.

Chapter 3

3:1  Deenei talodalo soukohp Habakkuk:

3:2  Meenei Dimaadua, au gu-longono-eau au mee ala ne-hai, gei au gu-hagalabagau Goe huoloo. Gei Goe heia labelaa i-lodo di-madau madagoaa nia mogobuna haga-goboina ala ne-hai Kooe i-mua. Goe gi-manawa dumaalia i-lodo do madagoaa ma-ga-hagawelewele.

3:3  God le e-hanimoi labelaa i Edom. Di God dabu le e-hanimoi i-nia gonduu o Paran. Ono madamada gu-haga-honu lodo di ahiaalangi, gei-ogo dono hagaamu gu-haga-honu henuailala.

3:4  Mee e-hanimoi dalia di maalama o-di ila. Di maahina le e-dabadaba mai i ono lima, di gowaa dela e-dugu hagammuni-ai ono mogobuna.

3:5  Mee e-hagau dana dau-magi i ono mua, gaa-hai gi-di made bolo gi-hanimoi i ono muli.

3:6  Dono madagoaa ma-gaa-duu, gei henuailala ga-ngalungalua. Mee gaa-mmada ang-gi digaula, gei-ogo henuailala ga-bolebole. Nia gonduu llauehe ala ono hagaodi ai, la-gu-mooho. Nia gonduu lligi ala mai i-mua gu-aabulu gi-lala, go nia gonduu lligi ala nogo heehee-iei Mee nonua i-mua-loo.

3:7  Au gu-gidee di mmaadagu o digau Cushan, mo-di uli nia gai o digau Midian.

3:8  Meenei Dimaadua, ma go nia monowai llauehe ala ne-hai Goe gi-hagawelewele? Ma go di moana dela ne-hai Goe gi-hagawelewele huoloo? Goe ne-hanimoi i-hongo nia gololangi. Di gabua o-di madangi dela go do waga-hai-dauwa i do madagoaa ne-gaamai di aali gi au daangada.

3:9  Goe gu-togomaalia e-hai-hegau dau maalei, gu-togomaalia e-puu au amu maalei. Au ila gu-haahi-lua henuailala.

3:10  Di madagoaa nia gonduu ne-gidee-ginaadou Goe, gei digaula gu-polepole. Nia wai gu-malingi-ia i-di langi. Nia wai ala i-baahi i-lala henuailala gu-ngoloolo, gei-ogo nia beau gu-llauehe-mai.

3:11  Di daba o au maalei ala e-llele mo-di maahina o dau daalo dingidingia, la-ne-hai di laa mo-di malama gii-noho de-ngalungalua.

3:12  Goe gu-hagawelewele guu-hana laa-lodo henuailala, i-lodo do hagawelewele huoloo, gei Goe gu-dagadagahi nia henua.

3:13  Goe ne-hana belee haga-dagaloaha au daangada, e-haga-dagaloaha dau king dela ne-hilihili. Goe gu-haga-magedaa di tagi digau huaidu, gu-hagahuaidu ono ehoo.

3:14  Au amu maalei gu-daalo di tagi o-di buini-dauwa digaula i-di nadau madagoaa nogo lloomoi be-di madangi damana e-waluwalu gimaadou gi-lellele dagidahi. Digaula gu-hagapuu gadoo be digau ala e-hagaduadua hagammuni digau hagaloale.

3:15  Au hoodo guu-llele i-hongo di tai, gei di tai la-gu-bagibagia.

3:16  Au ne-longono nia mee aanei, gei au gu-uli ogu gai, ogu malau-ngudu gu-bolebole i dogu madagu.

3:17  Ma e-aha maa nia laagau-‘fig’ la ono huwa ai, gei di-maa nia ‘grape’ e-tomo i-nia hadagee waini ai, gei nia laagau-olib ga hagalee huwa, nia gowaa gu-ono huwa ai, gei di-maa hogi nia siibi huogodoo guu-mmade, gei nia gowaa haangai kau gu ono kau ai,

3:18  malaa, au e-tenetene-hua ge e-manawa lamalia, idimaa, Dimaadua go God dela go dogu Dangada Hagamouli.

3:19  Tagi go Yihowah dela e-hagamaaloo au. Mee dela e-hai au gii-lele maaloo gadoo be-di ee, gaa-hai au gi-hagalee madagu i dahi mee mo-di benebene dogu mouli i-hongo nia gonduu.