Site uses cookies to provide basic functionality.

OK
LEVITICUS
Prev Up Next
Chapter 25
Levi CSlEliza 25:1  И рече Господь к Моисею на горе Синайстей, глаголя:
Levi CSlEliza 25:2  глаголи сыном Израилевым и речеши к ним: егда внидете в землю, юже Аз даю вам, и почиет земля, юже Аз даю вам, субботы Господу.
Levi CSlEliza 25:3  Шесть лет да сееши ниву твою, и шесть лет да режеши виноград твой и собереши плод его:
Levi CSlEliza 25:4  в седмое же лето суббота, покой да будет земли, суббота Господня: нивы твоея сеяти и винограда твоего резати не будеши,
Levi CSlEliza 25:5  и сама собою произрастающая нивы твоея да не пожнеши, и винограда отлучения твоего да не собереши: лето покоя будет земли.
Levi CSlEliza 25:6  И будут субботы земли яди тебе, и рабу твоему и рабыни твоей, и наемнику твоему и обиталнику прилежащему к тебе,
Levi CSlEliza 25:7  и скотом твоим и зверем сущым на земли твоей да будет всяк плод его в снедь.
Levi CSlEliza 25:8  И исчислиши себе седмь лет покоя, седмь лет седмижды: и будут тебе седмь седмин лет, четыредесять девять лет.
Levi CSlEliza 25:9  И возвестите трубным гласом во всей земли вашей месяца седмаго в десятый день месяца: в день очищения возвестите трубою во всей земли вашей.
Levi CSlEliza 25:10  И освятите лето, пятьдесятое лето, и разгласите оставление на земли всем живущым на ней: лето оставления знамение сие будет вам: и да отидет кийждо вас в притяжание свое, и кийждо во отечество свое отидете.
Levi CSlEliza 25:11  Оставления знамение сие будет вам, лето пятьдесятое, лето будет вам: ни сеяти, ниже жати будете, еже само произникнет на ней, и да не объемлеши освященных (Богу) ея:
Levi CSlEliza 25:12  яко оставления знамение есть, свято да будет вам: от нив ядите плоды ея:
Levi CSlEliza 25:13  и в лето оставления знамения сего да возвратится кийждо в притяжание свое.
Levi CSlEliza 25:14  Аще же отдаси куплею ближнему твоему, или аще притяжеши от ближняго твоего, да не оскорбляет человек ближняго:
Levi CSlEliza 25:15  по числу лет по знамении, да притяжеши от ближняго, по числу лет плодов да продастся тебе.
Levi CSlEliza 25:16  Якоже аще более лет, умножит притяжание его, и якоже аще мнее лет, уменшит притяжание его: яко число плодов его, тако да продаст тебе.
Levi CSlEliza 25:17  Да не оскорбит человек ближняго, и да убоишися Господа Бога твоего: Аз Господь Бог ваш.
Levi CSlEliza 25:18  И сотворите вся оправдания Моя и вся суды Моя, сохраните же и сотворите я, и вселитеся на земли уповающе.
Levi CSlEliza 25:19  И даст земля плоды своя, и снесте в сытость, и вселитеся на ней уповающе.
Levi CSlEliza 25:20  Аще же речете: что ясти будем в седмое лето сие, аще не сеем, ни собираем плодов своих,
Levi CSlEliza 25:21  и послю благословение Мое вам в лето шестое, и сотворит плоды своя на три лета:
Levi CSlEliza 25:22  и посеете в лето осмое, и снесте от плодов ветхих даже до лета девятаго: дондеже приспеют плоды ея, снесте ветхая ветхих.
Levi CSlEliza 25:23  И земля да не продастся во утверждение: Моя бо есть земля, яко пришелцы и приселницы вы есте предо Мною:
Levi CSlEliza 25:24  и по всей земли одержания вашего, искуп дадите земли.
Levi CSlEliza 25:25  Аще же нищетствует брат твой, иже с тобою, и продаст от одержания своего, да приидет ужик ближний ему и искупит продание брата своего.
Levi CSlEliza 25:26  Аще же не будет кому ужика, и возможет рука его обрести доволен искуп его,
Levi CSlEliza 25:27  и исчислит лета продания его, и воздаст еже излише имать, человеку емуже продано бе оное, и возвратится во одержание свое.
Levi CSlEliza 25:28  Аще же не обрящет рука его доволное, еже отдати ему, да будет проданое купившему е даже до шестаго лета оставления, и изыдет во оставление, и возвратится во одержание свое.
Levi CSlEliza 25:29  Аще же кто продаст дом обитаемый во граде огражденнем, и будет искупление его, дондеже исполнится: лето дний будет искупление его.
Levi CSlEliza 25:30  Аще же не искупит, дондеже скончается лето все, да укрепится дом сущий во граде имущем ограждение в твердость купившему его, в роды его, и не возвратится во оставление.
Levi CSlEliza 25:31  Домы же иже на селех, имже несть окрест их ограждения, к селу земли да приложатся: искупуемы всегда да будут, и во оставление да возвратятся.
Levi CSlEliza 25:32  И гради левитстии, домы градов одержания их, искупуемы да будут всегда левитом.
Levi CSlEliza 25:33  И иже аще искупит от левит: и изыдет продание домов града одержания их во оставление, яко домы градов левитских одержание их, посреде сынов Израилевых.
Levi CSlEliza 25:34  И села отделеная градом их да не продадутся, яко одержание вечное сие их есть.
Levi CSlEliza 25:35  Аще же нищетствует брат твой, иже с тобою, и изнеможет руками у тебе, заступи его яко пришелца и приселника, да поживет брат твой с тобою:
Levi CSlEliza 25:36  да не возмеши от него лихвы, ниже более (данаго), и убоишися Бога твоего: Аз Господь: и поживет брат твой с тобою.
Levi CSlEliza 25:37  Сребра твоего да не даси ему в лихву, и ради прибытка не даси ему пищей твоих.
Levi CSlEliza 25:38  Аз Господь Бог ваш, изведый вы из земли Египетския, еже дати вам землю Ханаанску, яко быти Мне Богу вашему.
Levi CSlEliza 25:39  Аще же оубожает брат твой у тебе, и продастся тебе, да не поработает тебе работы рабския:
Levi CSlEliza 25:40  аки наемник или пришлец да будет тебе, даже до лета оставления делати будет у тебе,
Levi CSlEliza 25:41  и да изыдет от тебе, и дети его с ним в лето оставления, и да отидет в род свой, и во одержание отчее свое возвратится,
Levi CSlEliza 25:42  понеже раби Мои суть сии, ихже изведох из земли Египетския, да не продастся проданием рабиим:
Levi CSlEliza 25:43  да не отяготиши его трудом, и убоишися Господа Бога твоего.
Levi CSlEliza 25:44  И раб и рабыня, иже ще будут у тебе от язык, иже окрест тебе суть, от тех да притяжете раба и рабыню.
Levi CSlEliza 25:45  И от сынов приселничих, иже суть в вас, от сих притяжете, и от сродников их, елицы аще будут в земли вашей, да будут вам во одержание,
Levi CSlEliza 25:46  и да разделите я детем вашым по вас, и да будут вам во одержание во век: братии же вашея, сынов Израилевых, кийждо брата своего да не отяготит его в трудех.
Levi CSlEliza 25:47  Аще же обрящет рука пришелца или приселника иже у тебе, и обнищав брат твой продастся к пришелцу или приселнику иже у тебе, или родившемуся от рода пришелча,
Levi CSlEliza 25:48  по продании ему, искуп да будет ему, един от братий его да искупит его:
Levi CSlEliza 25:49  брат отца его, или сын брата отца его, да искупит его, или от свойственных плоти племене его искупит его: аще же возможет рука его, искупит себе,
Levi CSlEliza 25:50  да сочтется с притяжавшим его, от лета в неже продася ему даже до лета оставления, и будет сребро продания его аки день наемника: от лета до лета да будет с ним.
Levi CSlEliza 25:51  Аще же кому множае лет будет, против тех отдаст искуп свой, от сребра продания своего.
Levi CSlEliza 25:52  Аще же мало останется от лет до лета оставления, и да сочтет ему по летом его, и отдаст искуп его аки наемник:
Levi CSlEliza 25:53  от года до года да будет с ним: да не отяготиши его трудом пред тобою.
Levi CSlEliza 25:54  Аше же не искупится по сим, да изыдет в лето оставления сам и дети его с ним:
Levi CSlEliza 25:55  яко Мои сынове Израилевы раби суть, отроцы Мои сии суть, ихже изведох из земли Египетския: Аз Господь Бог ваш.