Site uses cookies to provide basic functionality.

OK
LEVITICUS
Prev Up Next
Chapter 25
Levi SPMT 25:1  וידבר יהוה אל משה בהר סיני לאמר
Levi SPMT 25:2  דבר אל בני ישראל ואמרת אלהם כי תבאו אל הארץ אשר אני נתן לכם ושבתה הארץ שבת ליהוה
Levi SPMT 25:3  שש שנים תזרע שדך ושש שנים תזמר כרמך ואספת את תבואתה
Levi SPMT 25:4  ובשנה השביעת שבת שבתון יהיה לארץ שבת ליהוה שדך לא תזרע וכרמך לא תזמר
Levi SPMT 25:5  את ספיח קצירך לא תקצור ואת ענבי נזירך לא תבצר שנת שבתון יהיה לארץ
Levi SPMT 25:6  והיתה שבת הארץ לכם לאכלה לך ולעבדך ולאמתך ולשכירך ולתושבך הגרים עמך
Levi SPMT 25:7  ולבהמתך ולחיה אשר בארצך תהיה כל תבואתה לאכל
Levi SPMT 25:8  וספרת לך שבע שבתת שנים שבע שנים שבע פעמים והיו לך ימי שבע שבתת השנים תשע וארבעים שנה
Levi SPMT 25:9  והעברת שופר תרועה בחדש השבעי בעשור לחדש ביום הכפרים תעבירו שופר בכל ארצכם
Levi SPMT 25:10  וקדשתם את שנת החמשים שנה וקראתם דרור בארץ לכל ישביה יובל הוא תהיה לכם ושבתם איש אל אחזתו ואיש אל משפחתו תשבו
Levi SPMT 25:11  יובל הוא שנת החמשים שנה תהיה לכם לא תזרעו ולא תקצרו את ספיחיה ולא תבצרו את נזריה
Levi SPMT 25:12  כי יובל הוא קדש תהיה לכם מן השדה תאכלו את תבואתה
Levi SPMT 25:13  בשנת היובל הזאת תשבו איש אל אחזתו
Levi SPMT 25:14  וכי תמכרו ממכר לעמיתך או קנה מיד עמיתך אל תונו איש את אחיו
Levi SPMT 25:15  במספר שנים אחר היובל תקנה מאת עמיתך במספר שני תבואת ימכר לך
Levi SPMT 25:16  לפי רב השנים תרבה מקנתו ולפי מעט השנים תמעיט מקנתו כי מספר תבואת הוא מכר לך
Levi SPMT 25:17  ולא תונו איש את עמיתו ויראת מאלהיך כי אני יהוה אלהיכם
Levi SPMT 25:18  ועשיתם את חקתי ואת משפטי תשמרו ועשיתם אתם וישבתם על הארץ לבטח
Levi SPMT 25:19  ונתנה הארץ פריה ואכלתם לשבע וישבתם לבטח עליה
Levi SPMT 25:20  וכי תאמרו מה נאכל בשנה השביעת הן לא נזרע ולא נאסף את תבואתנו
Levi SPMT 25:21  וצויתי את ברכתי לכם בשנה הששית ועשת את התבואה לשלש השנים
Levi SPMT 25:22  וזרעתם את השנה השמינת ואכלתם מן התבואה ישן עד השנה התשיעת עד בוא תבואתה תאכלו ישן
Levi SPMT 25:23  והארץ לא תמכר לצמתת כי לי הארץ כי גרים ותושבים אתם עמדי
Levi SPMT 25:24  ובכל ארץ אחזתכם גאלה תתנו לארץ
Levi SPMT 25:25  כי ימוך אחיך ומכר מאחזתו ובא גאלו הקרב אליו וגאל את ממכר אחיו
Levi SPMT 25:26  ואיש כי לא יהיה לו גאל והשיגה ידו ומצא כדי גאלתו
Levi SPMT 25:27  וחשב את שני ממכרו והשיב את העדף לאיש אשר מכר לו ושב לאחזתו
Levi SPMT 25:28  ואם לא מצאה ידו די השיב לו והיה ממכרו ביד הקנה אתו עד שנת היובל ויצא ביבל ושב לאחזתו
Levi SPMT 25:29  ואיש כי ימכר בית מושב עיר חומה והיתה גאלתו עד תם שנת ממכרו ימים תהיה גאלתו
Levi SPMT 25:30  ואם לא יגאל עד מלאת לו שנה תמימה וקם הבית אשר בעיר אשר לא חמה לצמיתת לקנה אתו לדרתיו לא יצא ביבל
Levi SPMT 25:31  ובתי החצרים אשר אין להם חמה סביב על שדה הארץ יחשב גאלה תהיה לו וביבל יצא
Levi SPMT 25:32  וערי הלוים בתי ערי אחזתם גאלת עולם תהיה ללוים
Levi SPMT 25:33  ואשר יגאל מן הלוים ויצא ממכר בית ועיר אחזתו ביבל כי בתי ערי הלוים הוא אחזתם בתוך בני ישראל
Levi SPMT 25:34  ושדה מגרש עריהם לא ימכר כי אחזת עולם הוא להם
Levi SPMT 25:35  וכי ימוך אחיך ומטה ידו עמך והחזקת בו גר ותושב וחי . עמך
Levi SPMT 25:36  אל תקח מאתו נשך ותרבית ויראת מאלהיך וחי אחיך עמך
Levi SPMT 25:37  את כספך לא תתן לו בנשך ובמרבית לא תתן אכלך
Levi SPMT 25:38  אני יהוה אלהיכם אשר הוצאתי אתכם מארץ מצרים לתת לכם את ארץ כנען להיות לכם לאלהים
Levi SPMT 25:39  וכי ימוך אחיך עמך ונמכר לך לא תעבד בו עבדת עבד
Levi SPMT 25:40  כשכיר כתושב יהיה עמך עד שנת היבל יעבד עמך
Levi SPMT 25:41  ויצא מעמך הוא ובניו עמו ושב אל משפחתו ואל אחזת אבתיו ישוב
Levi SPMT 25:42  כי עבדי הם אשר הוצאתי אתם מארץ מצרים לא ימכרו ממכרת עבד
Levi SPMT 25:43  לא תרדה בו בפרך ויראת מאלהיך
Levi SPMT 25:44  ועבדך ואמתך אשר יהיו לך מאת הגוים אשר סביבתיכם מהם תקנו עבד ואמה
Levi SPMT 25:45  וגם מבני התושבים הגרים עמכם מהם תקנו וממשפחתם אשר עמכם אשר הולידו בארצכם והיו לכם לאחזה
Levi SPMT 25:46  והתנחלתם אתם לבניכם אחריכם לרשת אחזה לעלם בהם תעבדו ובאחיכם בני ישראל איש באחיו לא תרדה בו בפרך
Levi SPMT 25:47  וכי תשיג יד גר ותושב עמך ומך אחיך עמו ונמכר לגר תושב עמך או לעקר משפחת גר
Levi SPMT 25:48  אחרי נמכר גאלה תהיה לו אחד מאחיו יגאלנו
Levi SPMT 25:49  או דדו או בן דדו יגאלנו או משאר בשרו ממשפחתו יגאלנו או השיגה ידו ונגאל
Levi SPMT 25:50  וחשב עם קנהו משנת המכרו לו עד שנת היבל והיה כסף ממכרו במספר שנים כימי שכיר יהיה עמו
Levi SPMT 25:51  אם עוד רבות בשנים לפיהן ישיב גאלתו מכסף מקנתו
Levi SPMT 25:52  ואם מעט נשאר בשנים עד שנת היבל וחשב לו כפי שניו ישיב את גאלתו
Levi SPMT 25:53  כשכיר שנה בשנה יהיה עמו לא ירדנו בפרך לעיניך
Levi SPMT 25:54  ואם לא יגאל באלה ויצא בשנת היבל הוא ובניו עמו
Levi SPMT 25:55  כי לי בני ישראל עבדים עבדי הם אשר הוצאתי אותם מארץ מצרים אני יהוה אלהיכם