Geez - Numbers - 14

14:1  ወኀበረ ፡ ኵሉ ፡ ተዓይን ፡ ወጸርሑ ፡ በቃል ፡ ወበከዩ ፡ ሕዝብ ፡ ኵሎ ፡ ሌሊተ ።

14:2  ወአንጐርጐሩ ፡ ላዕለ ፡ ሙሴ ፡ ወላዕለ ፡ አሮን ፡ ኵሎሙ ፡ ደቂቀ ፡ እስራኤል ፡ ወይቤልዎሙ ፡ ኵሉ ፡ ትዕይንት ፡ ኀየሰነ ፡ ሶበ ፡ ሞትነ ፡ በብሔረ ፡ ግብጽ ፡ እምነ ፡ ንሙት ፡ በዝንቱ ፡ ገዳም ።

14:3  ወለምንት ፡ ይወስደነ ፡ እግዚእ ፡ ውስተ ፡ ይእቲ ፡ ምድር ፡ ከመ ፡ ንደቅ ፡ በውስተ ፡ ቀትል ፡ ወአንስቲያነኒ ፡ ወደቂቅነሂ ፡ ይከውኑ ፡ ሕብልያ ፡ ወይእዜኒ ፡ ይኄይሰነ ፡ ንግባእ ፡ ውስተ ፡ ብሔረ ፡ ግብጽ ።

14:4  ወተባሀሉ ፡ በበይናቲሆሙ ፡ ሀቡነ ፡ ናንግሥ ፡ ለነ ፡ ወንግባእ ፡ ውስተ ፡ ብሔረ ፡ ግብጽ ።

14:5  ወወድቁ ፡ ሙሴ ፡ ወአሮን ፡ በገጾሙ ፡ ቅድመ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ።

14:6  ወኢያሱ ፡ ወልደ ፡ ነዌ ፡ ወእብ ፡ ወልደ ፡ ዬፎኒ ፡ እለ ፡ እምውስቴቶሙ ፡ ለእለ ፡ ርእይዋ ፡ ለይእቲ ፡ ምድር ፡ ሠጠጡ ፡ አልባሲሆሙ ።

14:7  ወይቤልዎሙ ፡ ለኵሉ ፡ ተዓይኒሆሙ ፡ ለደቂቀ ፡ እስራኤል ፡ ምድርሰ ፡ እንተ ፡ ርኢነ ፡ ሠናይት ፡ ጥቀ ፡ ወፈድፋደ ።

14:8  ወለእመሰ ፡ እግዚአብሔር ፡ ኀርየነ ፡ ከመ ፡ ያብአነ ፡ ውስተ ፡ ይእቲ ፡ ምድር ፡ ወይሁበነሃ ፡ ለነ ፤ ምድር ፡ ይእቲ ፡ ለነ ፡ እንተ ፡ ትውሕዝ ፡ ሐሊበ ፡ ወመዓረ ።

14:9  ወባሕቱ ፡ ኢትኩኑ ፡ ከሓድያነ ፡ በእግዚአብሔር ፡ ወኢትፍርህዎሙ ፡ አንትሙ ፡ ለሕዝባ ፡ ለይእቲ ፡ ምድር ፡ እስመ ፡ ንሕነ ፡ ናጠፍኦሙ ፡ ወእስመ ፡ ኀለፈ ፡ መዋዕሊሆሙ ፡ ወእስመ ፡ እግዚአብሔር ፡ ሀለወ ፡ ምስሌነ ፡ ኢትፍርህዎሙ ።

14:10  ወይቤሉ ፡ ኵሉ ፡ ተዓይን ፡ ከመ ፡ ይወግርዎሙ ፡ በእብን ፡ ወአስተርአየ ፡ ስብሐተ ፡ እግዚአብሔር ፡ በደመና ፡ ኀበ ፡ ደብተራ ፡ ዘመርጡል ፡ ለኵሉ ፡ ደቂቀ ፡ እስራኤል ።

14:11  ወይቤሎሙ ፡ እግዚአብሔር ፡ ለሙሴ ፡ እስከ ፡ ማእዜኑ ፡ ይዌሕከኒ ፡ ዝንቱ ፡ ሕዝብ ፡ ወእስከ ፡ ማእዜኑ ፡ ኢየአምኑኒ ፡ በኵሉ ፡ ተአምርየ ፡ ዘገበርኩ ፡ ሎሙ ።

14:12  እቅትሎሙኑ ፡ በሞት ፡ ወአጥፍኦሙ ፡ ወእሬስየከ ፡ ለከ ፡ ወለቤተ ፡ አቡከ ፡ ውስተ ፡ ሕዝብ ፡ ዐቢይ ፡ ዘይበዝኅ ፡ እምነ ፡ ዝንቱ ፡ ፈድፋደ ።

14:13  ወይቤሎ ፡ ሙሴ ፡ ለእግዚአብሔር ፡ ወይሰምዑ ፡ ግብጽ ፡ እለ ፡ እምኔሆሙ ፡ አውፃእኮሙ ፡ ለዝንቱ ፡ ሕዝብ ፡ በኀይልከ ።

14:14  ወይሰምዑ ፡ ኵሎሙ ፡ እለ ፡ ይነብሩ ፡ ውስቴታ ፡ ለዛቲ ፡ ምድር ፡ ከመ ፡ አንተ ፡ እግዚአብሔር ፡ ሀለውከ ፡ ውስተ ፡ ዝንቱ ፡ ሕዝብ ፡ ወአንተ ፡ እግዚኦ ፡ ታስተርኢ ፡ ሎሙ ፡ ከመዘ ፡ ዐይነ ፡ በዐይን ፡ ይትረአይ ፡ ወደመናከ ፡ ቆመት ፡ መልዕልቴሆሙ ፡ ወበዐምደ ፡ ደመና ፡ አንተ ፡ ሖርከ ፡ ቅድሜሆሙ ፡ መዐልተ ፡ ወበዐምደ ፡ እሳት ፡ ሌሊተ ።

14:15  ወለእመ ፡ ቀጥቀጥካሁ ፡ ለዝንቱ ፡ ሕዝብ ፡ ከመዘ ፡ አሐዱ ፡ ብእሲ ፡ ይብሉ ፡ አሕዛብ ፡ እለ ፡ ይሰምዑ ፡ ስመከ ፡ ይብሉ ፤

14:16  እስመ ፡ ስእነ ፡ እግዚአብሔር ፡ አብኦቶሙ ፡ ውስተ ፡ ምድር ፡ እንተ ፡ መሐለ ፡ ሎሙ ፡ ቀተሎሙ ፡ በውስተ ፡ ገዳም ።

14:17  ወይእዜኒ ፡ ለይትላዐል ፡ ኀይልከ ፡ እግዚኦ ፡ በከመ ፡ ትቤ ፡ እንዘ ፡ ትብል ፤

14:18  እግዚአብሔር ፡ ርሑቀ ፡ መዐት ፡ ወብዙኀ ፡ ምሕረት ፡ ወጻድቅ ፡ ዘየኀድግ ፡ ዐመፃ ፡ ወኀጢአተ ፡ ወጌጋየ ፡ ወአንጽሖኒ ፡ ኢያነጽሖ ፡ ለመአብስ ፡ ወይትፈደይ ፡ ኀጣይአ ፡ ወላዲ ፡ ላዕለ ፡ ውሉድ ፡ እስከ ፡ ሣልስት ፡ ወራብዕት ፡ ትውልድ ።

14:19  ኅድግ ፡ ሎሙ ፡ ኀጣይኢሆሙ ፡ ለዝንቱ ፡ ሕዝብ ፡ በከመ ፡ ዕበየ ፡ ምሕረትከ ፡ ወበከመ ፡ መሓሬ ፡ ኮንከ ፡ ሎሙ ፡ እምነ ፡ ብሔረ ፡ ግብጽ ፡ እስከ ፡ ይእዜ ።

14:20  ወይቤሎ ፡ እግዚአብሔር ፡ ለሙሴ ፡ ናሁ ፡ ምህርክዎሙ ፡ በከመ ፡ ትቤ ።

14:21  አላ ፡ ሕያው ፡ አነ ፡ ወሕያው ፡ ስምየ ፡ ወይመልእ ፡ ስብሐቲሁ ፡ ለእግዚአብሔር ፡ ኵሎ ፡ ምድረ ፤

14:22  ከመ ፡ ኵሎሙ ፡ ዕደው ፡ እለ ፡ ርእይዎ ፡ ለስብሐቲየ ፡ ወለተአምርየ ፡ ዘገበርኩ ፡ [በ]ብሔረ ፡ ግብጽ ፡ [ወበገዳም ፡] ወእምዝ ፡ አመከሩኒ ፡ ናሁ ፡ ዓሥር ፡ ዝንቱ ፡ ወኢሰምዑ ፡ ቃልየ ፤

14:23  ከመ ፡ ኢይሬእይዋ ፡ ለይእቲ ፡ ምድር ፡ እንተ ፡ መሐልኩ ፡ ለአበዊሆሙ ፡ ዘእንበለ ፡ ውሉዶሙ ፡ እለ ፡ ሀለው ፡ ምስሌየ ፡ ዝየ ፡ ኵሎሙ ፡ እለ ፡ ኢያአምሩ ፡ ሠናይተ ፡ ወእኪተ ፡ ኵሉ ፡ ንኡስ ፡ ዘአልቦ ፡ ዘያአምር ፡ ሎሙ ፡ እሁባ ፡ ለይእቲ ፡ ምድር ፡ ወኵሎሙ ፡ ባሕቱ ፡ እለ ፡ ወሐኩኒ ፡ ኢይሬእይዋ ።

14:24  ወቍልዔየ ፡ ባሕቱ ፡ ካሌብ ፡ እስመ ፡ ኮነ ፡ ካልእ ፡ መንፈስ ፡ ላዕሌሁ ፡ ወተለወኒ ፡ አበውኦ ፡ ውስተ ፡ ይእቲ ፡ ምድር ፡ እንተ ፡ ውስቴታ ፡ ቦአ ፡ ህየ ፡ ወዘርኡ ፡ ይትዋረሳ ።

14:25  ወዐማሌቅ ፡ ወከናአን ፡ ንቡራን ፡ ውስተ ፡ ቈላተ ፡ አውርዮን ፤ ወአንትሙሰ ፡ ገዐዙ ፡ ወግ ብኡ ፡ ውስተ ፡ ገዳም ፡ ዘፍኖተ ፡ ባሕረ ፡ ኤርትራ ።

14:26  ወይቤሎሙ ፡ እግዚአብሔር ፡ ለሙሴ ፡ ወለአሮን ፡ እንዘ ፡ ይብል ፤

14:27  እስከ ፡ ማእዜኑ ፡ አሰምዖሙ ፡ ነጐርጓሮሙ ፡ ለዛቲ ፡ ትዕይንት ፡ ዘያንጐረጕሩ ፡ እሙንቱ ፡ ደቂቀ ፡ እስራኤል ፡ ላዕሌክሙ ፡ ዘአንጐርጐሩ ፡ በቅድሜየ ።

14:28  በሎሙ ፡ ሕያው ፡ አነ ፡ ይቤ ፡ እግዚአብሔር ፡ እመ ፡ አኮ ፡ ዳእሙ ፡ በከመ ፡ ነበብ[ክሙ] ፡ ውስተ ፡ እ[ዝንየ] ፡ ከማሁ ፡ እገብረክሙ ፡ በዝንቱ ፡ ገዳም ።

14:29  ወይወድቅ ፡ አብድንቲክሙ ፡ ወኵልክሙ ፡ እለ ፡ ተፋቀድክሙ ፡ ወእለ ፡ ተኈለቍክሙ ፡ ዘእም ፡ ፳ዓም ፡ ወላዕሉ ፡ እምኔሁ ፡ ኵልክሙ ፡ እለ ፡ አንጐርጐርክሙ ፡ ላዕሌየ ፤

14:30  ከመ ፡ ኢትበውእዋ ፡ አንትሙ ፡ ለይእቲ ፡ ምድር ፡ እንተ ፡ ሰፋሕኩ ፡ እዴየ ፡ ከመ ፡ አንብርክሙ ፡ ውስቴታ ፡ እንበለ ፡ ካሌብ ፡ ወልደ ፡ ዬፎኒ ፡ ወኢየሱስ ፡ ወልደ ፡ ነዌ ።

14:31  ወደቂቀ ፡ እለ ፡ ትቤሉ ፡ ሕብልያ ፡ ይከውኑ ፡ አበውኦሙ ፡ ውስተ ፡ ይእቲ ፡ ምድር ፡ ወይትዋረስዋ ፡ ለይእቲ ፡ ምድር ፡ እንተ ፡ አንትሙ ፡ ተራሐቅክሙ ፡ እምኔሃ ።

14:32  ወይወድቅ ፡ አብድንቲክሙ ፡ ውስተ ፡ ዝንቱ ፡ ገዳም ።

14:33  ወይትረዐዩ ፡ ደቂቅክሙ ፡ አርብዓ ፡ ዓመ ፡ ውስተ ፡ ገዳም ፤

14:34  በከመ ፡ ኍለቊሆሙ ፡ ለእልክቱ ፡ መዋዕል ፡ እለ ፡ ቦንቱ ፡ ርእይዋ ፡ ለይእቲ ፡ ምድር ፡ አርብዓ ፡ ዕለተ ፤ አሐቲ ፡ ዕለት ፡ ዓመተ ፡ ትከውነክሙ ፡ በእንተ ፡ ኀጢአትክሙ ፡ ወይኩንክሙ ፡ ፵ዓመ ፡ ወታአምሩ ፡ እንከ ፡ መንሱተ ፡ መዐትየ ።

14:35  እስመ ፡ አነ ፡ እግዚአብሔር ፡ ዘነብኩ ፡ ከመ ፡ ከመዝ ፡ እገብራ ፡ ለዛቲ ፡ ትዕይንት ፡ እኪት ፡ እንተ ፡ ኀበረት ፡ ላዕሌየ ፡ በዝንቱ ፡ ገዳም ፡ ለይጥፍኡ ፡ ወበህየ ፡ ለይሙቱ ።

14:36  ወእልክቱ ፡ ዕደው ፡ እለ ፡ ፈነዎሙ ፡ ሙሴ ፡ ከመ ፡ ይርአይዋ ፡ ለይእቲ ፡ ምድር ፡ አመ ፡ ገብኡ ፡ አንጐርጐሩ ፡ በእንቲአሃ ፡ ኀበ ፡ ኵሉ ፡ ተዓይን ፡ ወአውፅኡ ፡ ነገረ ፡ እኩየ ፡ በእንተ ፡ ይእቲ ፡ ምድር ፤

14:37  ወሞቱ ፡ ውእቶሙ ፡ ዕደው ፡ እለ ፡ ይቤልዋ ፡ እኪት ፡ ለይእቲ ፡ ምድር ፡ ወምድርሰ ፡ ሠናይት ፡ ይእቲ ፡ በቅድመ ፡ እግዚአብሔር ።

14:38  ወኢያሱ ፡ ወልደ ፡ ነዌ ፡ ወካሌብ ፡ ወልደ ፡ ዬፎኔ ፡ እለ ፡ ኀይው ፡ እምኔሆሙ ፡ ለውእቶሙ ፡ ዕደው ፡ እለ ፡ ሖሩ ፡ ይርአይዋ ፡ ለይእቲ ፡ ምድር ።

14:39  ወነገሮሙ ፡ ሙሴ ፡ ዘንተ ፡ ነገረ ፡ ለኵሉ ፡ ደቂቀ ፡ እስራኤል ፡ ወላሐወ ፡ ሕዝብ ፡ ጥቀ ።

14:40  ወጌሡ ፡ በጽባሕ ፡ ወዐርጉ ፡ ውስተ ፡ ርእሰ ፡ ደብር ፡ ወይቤሉ ፡ ናሁ ፡ ንሕነ ፡ ነዐርግ ፡ ውስተ ፡ ውእቱ ፡ መካን ፡ ዘይቤለነ ፡ እግዚአብሔር ፡ ከመ ፡ አበስነ ፡ በእንቲአሁ ።

14:41  ወይቤሎሙ ፡ ሙሴ ፡ ለምንት ፡ ለክሙ ፡ ትትዓደው ፡ ቃለ ፡ እግዚአብሔር ፡ ኢኮነ ፡ ሠናይ ፡ ለክሙ ፡ ከመዝ ።

14:42  ኢትዕረጉ ፡ እስመ ፡ አሀለወ ፡ እግዚአብሔር ፡ ምስሌክሙ ፡ ወትወድቁ ፡ ቅድመ ፡ ፀርክሙ ።

14:43  እስመ ፡ ዐማሌቅ ፡ ወከናአን ፡ ሀለው ፡ ህየ ፡ ቅድሜክሙ ፡ ወትወድቁ ፡ በኀፂን ፡ በበይነ ፡ ዘተመየጥክሙ ፡ ወክህድክምዎ ፡ ለእግዚአብሔር ፡ ወኢሀለወ ፡ እግዚአብሔር ፡ ምስሌክሙ ።

14:44  ወተኀይሎሙ ፡ ዐርጉ ፡ ውስተ ፡ ርእሰ ፡ ደብር ፡ ወታቦተ ፡ ሕጉሰ ፡ ለእግዚአብሔር ፡ ወሙሴሂ ፡ ኢተሐውሱ ፡ እምነ ፡ ማእከለ ፡ ትዕይንት ።

14:45  ወወረዱ ፡ ዐማሌቅ ፡ ወከናአን ፡ እለ ፡ ይነብሩ ፡ ውስተ ፡ ውእቱ ፡ ደብር ፡ ወሰደድዎሙ ፡ እስከ ፡ ኤርማ ፡ ወገብኡ ፡ ውስተ ፡ ትዕይንት ።