VulgConte - Sirach - 31

31:1  Vigilia honestatis tabefaciet carnes, et cogitatus illius auferet somnum.

31:2  Cogitatus præscientiæ avertit sensum, et infirmitas gravis sobriam facit animam.

31:3  Laboravit dives in congregatione substantiæ, et in requie sua replebitur bonis suis.

31:4  Laboravit pauper in diminutione victus, et in fine inops fit.

31:5  Qui aurum diligit, non iustificabitur: et qui insequitur consumptionem replebitur ex ea.

31:6  Multi dati sunt in auri casus, et facta est in specie ipsius perditio illorum.

31:7  Lignum offensionis est aurum sacrificantium: væ illis, qui sectantur illud, et omnis imprudens deperiet in illo.

31:8  Beatus dives, qui inventus est sine macula: et qui post aurum non abiit, nec speravit in pecunia, et thesauris.

31:9  Quis est hic, et laudabimus eum? Fecit enim mirabilia in vita sua.

31:10  Qui probatus est in illo, et perfectus est, erit illi gloria æterna: qui potuit transgredi, et non est transgressus: facere mala, et non fecit:

31:11  ideo stabilita sunt bona illius in Domino, et eleemosynas illius enarrabit omnis Ecclesia sanctorum.

31:12  Supra mensam magnam sedisti? Non aperias super illam faucem tuam prior.

31:13  Non dicas sic: Multa sunt, quæ super illam sunt:

31:14  memento quoniam malus est oculus nequam.

31:15  Nequius oculo quid creatum est? Ideo ab omni facie sua lacrymabitur, cum viderit:

31:16  ne extendas manum tuam prior, et invidia contaminatus erubescas.

31:17  Ne comprimaris in convivio.

31:18  Intellige quæ sunt proximi tui ex teipso:

31:19  utere quasi homo frugi his, quæ tibi apponuntur: ne, cum manducas multum, odio habearis.

31:20  Cessa prior causa disciplinæ: et noli nimius esse, ne forte offendas.

31:21  Et si in medio multorum sedisti, prior illis ne extendas manum tuam, nec prior poscas bibere.

31:22  Quam sufficens est homini eruditio vinum exiguum, et in dormiendo non laborabis ab illo, et non senties dolorem.

31:23  Vigilia, cholera, et tortura viro infrunito:

31:24  somnus sanitatis in homine parco. Dormiet usque mane, et anima illius cum ipso delectabitur.

31:25  Et si coactus fueris in edendo multum, surge e medio, evome: et refrigerabit te, et non adduces corpori tuo infirmitatem.

31:26  Audi me fili, et ne spernas me: et in novissimo invenies verba mea.

31:27  In omnibus operibus tuis esto velox, et omnis infirmitas non occurret tibi.

31:28  Splendidum in panibus benedicent labia multorum, et testimonium veritatis illius fidele.

31:29  Nequissimo in pane murmurabit civitas, et testimonium nequitiæ illius verum est.

31:30  Diligentes in vino noli provocare: multos enim exterminavit vinum.

31:31  Ignis probat ferrum durum: sic vinum corda superborum arguet in ebrietate potatum.

31:32  Æqua vita hominibus vinum in sobrietate: si bibas illud moderate, eris sobrius.

31:33  Quæ vita est ei, qui minuitur vino?

31:34  Quid defraudat vitam? Mors.

31:35  Vinum in iucunditatem creatum est, et non in ebrietatem, ab initio.

31:36  Exultatio animæ et cordis vinum moderate potatum.

31:37  Sanitas est animæ et corpori sobrius potus.

31:38  Vinum multum potatum irritationem, et iram, et ruinas multas facit.

31:39  Amaritudo animæ vinum multum potatum.

31:40  Ebrietatis animositas, imprudentis offensio, minorans virtutem, et faciens vulnera.

31:41  In convivio vini non arguas proximum: et non despicias eum in iucunditate illius:

31:42  verba improperii non dicas illi: et non premas illum repetendo.