CopSahBible2 - Sirach - 34

34:1  ϣⲁⲣⲉⲧⲟⲩϣⲏ ⲛⲣⲟⲉⲓⲥ ⲙⲡⲣⲙⲙⲁⲟ ⲃⲱⲗ ⲉⲃⲟⲗ ⲛⲛⲉϥⲥⲁⲣⲝ ⲁⲩⲱ ϣⲁⲣⲉⲡⲉϥⲣⲟⲟⲩϣ ⲥⲁϩⲉⲫⲓⲛⲏⲃ ⲉⲃⲟⲗ ⲙⲙⲟϥ

34:2  ϣⲁⲣⲉⲡⲣⲟⲟⲩϣ ⲛⲟⲩⲟⲩϣⲏ ⲛⲣⲟⲉⲓⲥ ⲁⲡⲁⲓⲧⲓ ⲛⲟⲩⲣⲉⲕⲣⲓⲕⲉ ⲁⲩⲱ ϣⲁⲣⲉⲟⲩϩⲓⲛⲏⲃ ⲧⲁⲗϭⲉⲟⲩϣⲱⲛⲉ ⲉϥⲛⲁϣⲧ

34:3  ϣⲁⲣⲉⲡⲣⲙⲙⲁⲟ ϩⲓⲥⲉ ⲉϥⲥⲱⲟⲩϩ ⲉϩⲟⲩⲛ ⲛⲛⲉϥⲭⲣⲏⲙⲁ ⲁⲩⲱ ϣⲁϥⲥⲉⲓ ⲛⲛⲉϥⲧⲣⲩⲫⲏ ϩⲛ ⲟⲩⲙⲟⲧⲛⲉⲥ

34:4  ⲁⲩⲱ ϣⲁⲣⲉⲫⲏⲕⲉ ϩⲓⲥⲉ ϩⲙ ⲡϣⲱⲱⲧ ⲙⲡⲉϥⲁϩⲉ ⲁⲩⲱ ϣⲁϥⲣϭⲣⲱϩ ϩⲛ ⲧⲙⲟⲧⲛⲉⲥ

34:5  ⲡⲉⲧⲙⲉ ⲛⲟⲩⲛⲟⲩⲃ ⲛϥⲛⲁⲧⲙⲁⲓⲟ [ⲁⲛ] ⲁⲩⲱ ⲡⲉⲧⲡⲏⲧ ⲛⲥⲱϥ ⲛⲁⲙⲟⲩϩ […] ⲉⲩⲧⲁⲕⲟ ⲛⲁϥ

34:6  ⲁϩⲁϩ ⲅⲁⲣ ϩⲉ ⲉⲧⲃⲉ ⲡⲛⲟⲩⲃ ⲁⲩⲱ ⲁⲡⲉⲩⲧⲁⲕⲟ ϣⲱⲡⲉ ⲙⲡⲉⲩⲙⲧⲟ ⲉⲃⲟ[ⲗ]

34:7  ⲟⲩϣⲉ ⲛϫⲣⲡ ⲡⲉ ⲛⲟⲩⲟⲛ ⲛⲓⲙ ⲉⲧϣⲙϣⲉ ⲛⲁϥ ⲁⲩⲱ ⲉⲣⲉⲁⲑⲏⲧ ⲛⲓⲙ ⲛⲁⲧⲁⲕⲟ ⲛϩⲏⲧϥ

34:8  ⲛⲁⲓⲁⲧϥ ⲙⲡⲣⲙⲙⲁⲟ ⲉⲛⲧⲁⲩϩⲉ ⲉⲣⲟϥ ⲉϥⲟⲩⲁⲁⲃ ⲁⲩⲱ ⲡⲉⲧⲉⲙⲡϥⲟⲩⲁϩϥ ⲛⲥⲁ ⲟⲩⲛⲟⲩⲃ

34:9  ⲛⲓⲙ ⲡⲉ ⲧⲁⲣⲛⲙⲁⲕⲁⲣⲓⲍⲉ ⲙⲙⲟϥ ⲁϥⲣϩⲛϣⲡⲏⲣⲉ ⲅⲁⲣ ϩⲙ ⲡⲉϥⲗⲁⲟⲥ

34:10  ⲛⲓⲙ ⲡⲉⲛⲧⲁⲩⲇⲟⲕⲓⲙⲁⲍⲉ ⲙⲙⲟϥ ⲛϩⲏⲧϥ ⲁϥϫⲱⲕ ⲉⲃⲟⲗ ⲧⲁⲣⲉϥϣⲱⲡⲉ ⲉⲩϣⲟⲩϣⲟⲩ ⲛⲓⲙ ⲡⲉⲧⲉⲟⲩⲛϣϭⲟⲙ ⲙⲙⲟϥ ⲉⲡⲁⲣⲁⲃⲁ ⲉⲙⲡϥⲡⲁⲣⲁⲃⲁ ⲁⲩⲱ ⲉⲣⲡⲉⲑⲟⲟⲩ ⲉⲙⲡϥⲉⲓⲣⲉ

34:11  ⲛⲉϥⲁⲅⲁⲑⲟⲛ ⲛⲁⲧⲁϫⲣⲟ ⲡⲉ ⲁⲩⲱ ⲟⲩⲛⲟⲩⲉⲕⲕⲗⲏⲥⲓⲁ ⲛⲁϫⲱ ⲛⲧⲉϥⲙⲛⲧⲛⲁ

34:12  ⲉϣⲱⲡⲉ ⲉⲕϣⲁⲛϩⲙⲟⲟⲥ ϩⲓ ⲟⲩⲛⲟϭ ⲛⲧⲣⲁⲡⲉⲍⲁ ⲙⲡⲣⲟⲩⲏⲛ ⲛⲣⲱⲕ ⲉⲣⲟⲥ ⲁⲩⲱ ⲙⲡⲣϫⲟⲟⲥ ϫⲉ ⲟⲩⲛϩⲁϩ ϩⲓⲱⲱⲥ

34:13  [ⲁⲣⲓⲡⲙⲉⲉⲩ]ⲉ ϫⲉ ⲡⲃⲁⲗ ⲙⲡⲡⲟⲛⲏⲣⲟⲥ ϩⲟⲟⲩ [ⲁⲩ]ⲱ ⲟⲩ ⲡⲉⲧⲥⲟⲛⲧ ⲉϥϩⲟⲟⲩ ⲉⲡⲃⲁⲗ [ⲉⲧⲃⲉ ⲡ]ⲁⲓ ϥϯⲣⲙⲉⲓⲏ ⲛⲛⲁϩⲣⲛ ϩⲟ ⲛⲓⲙ

34:14  […]ⲛⲁⲛⲁⲩ ⲉⲣⲟϥ ⲙⲡⲣⲥⲟⲩⲧⲛⲧⲟⲟⲧⲕ ⲉⲣⲟϥ ⲁⲩⲱ ⲙⲡⲣϩⲉϫϫⲧⲉⲕϭⲓϫ ⲛⲙⲙⲁϥ ϩⲛ ⲧϫⲏ

34:15  [ⲉⲓⲙⲉ] ⲉⲛⲁⲡⲉⲧϩⲓⲧⲟⲩⲱⲕ ⲉⲃⲟⲗ ⲙⲙⲟⲕ ⲁⲩⲱ ⲙⲉⲕⲙⲟⲩⲕⲕ ⲉϫⲛ ϩⲱⲃ ⲛⲓⲙ

34:16  ⲟⲩⲱⲙ ⲛⲑⲉ ⲛⲟⲩⲣⲱⲙⲉ ⲛⲛⲉⲧϩⲁⲣⲱⲕ ⲁⲩⲱ ⲙⲡⲣⲧⲁⲡⲧ ⲛⲣⲱⲕ ⲙⲏⲡⲟⲧⲉ ⲛⲥⲉⲙⲉⲥⲧⲱⲕ

34:17  ⲉⲧⲃⲉ ⲧⲉⲥⲃⲱ ⲕⲁⲧⲟⲟⲧⲕ ⲉⲃⲟⲗ ⲛϣⲟⲣⲡ ⲁⲩⲱ ⲙⲡⲣⲣⲁⲧⲥⲉⲓ ⲙⲏⲡⲟⲧⲉ ⲛⲅϫⲱⲣⲡ

34:18  ⲉⲕϣⲁⲛϩⲙⲟⲟⲥ ϩⲛ ⲧⲙⲏⲧⲉ ⲛϩⲛⲙⲏⲏϣⲉ ⲙⲡⲣⲥⲟⲩⲧⲛⲧⲟⲟⲧⲕ ⲉⲃⲟⲗ ϩⲁ ⲧⲉⲩϩⲏ

34:19  ⲉϣϫⲉ ⲛⲁⲛⲟⲩⲡⲣⲱϣⲉ ⲛⲟⲩⲣⲱⲙⲉ ⲉϥⲧⲥⲁⲃⲏⲩ ⲁⲩⲱ ⲙⲉϥϫⲗϩⲏⲥ ⲡⲉ ϩⲓ ⲡⲉϥϭⲗⲟϭ

34:20  ϣⲁⲕⲱⲃϣ ⲉⲕⲙⲟⲧⲛ ⲉⲕϣⲁⲛⲣⲡⲣⲱϣⲉ ϣⲁⲕⲧⲱⲟⲩⲛ ⲉϩⲧⲟⲟⲩⲉ ⲉⲣⲉⲡⲉⲕϩⲏⲧ ⲙⲙⲟⲕ ⲉⲣⲉⲟⲩⲙⲕⲁϩ ⲛⲟⲩϣⲏ ⲛⲣⲟⲉⲓⲥ ⲙⲛ ⲟⲩⲭⲟⲗⲏ ⲙⲛ ⲟⲩⲟⲣⲅⲏ ⲛⲟⲩⲣⲱⲙⲉ ⲛⲁⲧⲥⲉⲓ

34:21  ⲉϣⲱⲡ[ⲉ ⲇ]ⲉ ⲁϥϫⲓⲧⲕ ⲛϭⲟⲛⲥ [ϩⲛ ϩⲉⲛ]ϭⲓⲛⲟⲩⲱⲙ ⲧⲱⲟⲩⲛ ⲛⲅⲕⲁⲃⲟⲗ ⲛⲅⲙⲧⲟⲛ

34:22  ⲥⲱⲧⲙ ⲉⲣⲟⲓ ⲡⲁϣⲏⲣⲉ ⲛⲅⲧⲙⲥⲟϣ[ϥⲧ] ⲁⲩⲱ ⲕⲛⲁϩⲉ ⲉⲛⲁϣⲁϫⲉ ϩⲛ ⲑⲁⲏ ⲡⲉ ϣⲱⲡⲉ ⲉⲕⲛⲁϣⲧ ϩⲛ ⲛⲉⲕϣⲁϫⲉ ⲧⲏⲣⲟⲩ ⲁⲩⲱ ⲙⲛⲗⲁⲁⲩ ⲛϣⲱⲡⲉ ⲛⲁⲧⲱⲙⲛⲧ ⲉⲣⲟⲕ ⲡⲉ

34:23  ϣⲁⲣⲉⲛⲉⲥⲡⲟⲧⲟⲩ ⲥⲙⲟⲩ ⲉⲡⲉⲧⲣⲟⲟⲩⲧ ⲉϫⲛ ⲡⲟⲉⲓⲕ ⲁⲩⲱ ⲧⲙⲛⲧⲙⲛⲧⲣⲉ ⲙⲡⲉϥⲁⲛⲁⲓ ⲛϩⲟⲧ

34:24  ϣⲁⲣⲉⲟⲩⲡⲟⲗⲓⲥ ⲕⲣⲙⲣⲙ ⲉⲩⲡⲟⲛⲏⲣⲟⲥ ⲉϫⲛ ⲡⲟⲉⲓⲕ ⲁⲩⲱ ⲧⲙⲛⲧⲙⲛⲧⲣⲉ ⲛⲧⲉϥⲡⲟⲛⲏⲣⲓⲁ ⲟⲣϫ

34:25  ⲙⲡⲣⲣⲥⲁⲩⲏⲣⲡ ⲁⲡⲏⲣⲡ ⲅⲁⲣ ⲧⲁⲕⲉϩⲁϩ

34:26  ⲡⲁϣ ⲡⲉϣⲁϥⲇⲟⲕⲓⲙⲁⲍⲉ ⲙⲡⲗⲁⲓⲛ ϩⲛ ⲡⲟϣⲙⲉϥ ⲧⲁⲓ ⲧⲉ ⲑⲉ ⲙⲡⲏⲣⲡ ⲉϣⲁϥⲇⲟⲕⲓⲙⲁⲍⲉ ⲙⲫⲏⲧ ⲙⲡϫⲁⲥⲓϩⲏⲧ ϩⲛ ⲡⲙⲓϣⲉ

34:27  ⲟⲩⲙⲧⲟⲛ ⲡⲉ ⲡⲏⲣⲡ ϩⲛ ⲡⲁϩⲉ ⲙⲡⲣⲱⲙⲉ ⲉⲕϣⲁⲛⲥⲟⲟϥ ϩⲛ ⲟⲩⲣⲱϣⲉ ⲁϣ ⲧⲉ ⲧⲙⲟⲧⲛⲉⲥ ⲙⲡⲉⲧⲉⲛϥⲥⲉⲏⲣⲡ ⲁⲛ ϫⲉ ⲛⲧⲟϥ ⲡⲉⲛⲧⲁⲩⲥⲟⲛⲧϥ ⲉⲩⲟⲩⲛⲟϥ ⲛⲣⲣⲱⲙⲉ

34:28  ⲟⲩⲧⲉⲗⲏⲗ ⲛϩⲏⲧ ⲙⲛ ⲟⲩⲟⲩⲛⲟϥ ⲙⲯⲩⲭⲏ ⲡⲉ ⲡⲏⲣⲡ ⲉⲕϣⲁⲛ ⲥⲟⲟϥ ϩⲛ ⲟⲩⲣⲱϣⲉ ⲛⲡⲉⲟⲩⲟⲉⲓϣ

34:29  ⲟⲩⲥⲓϣⲉ ⲛⲟⲩⲯⲩⲭⲏ ⲡⲉ ⲥⲉⲟⲩⲏⲣⲡ ⲉⲛⲁϣⲱϥ

34:30  ϣⲁⲣⲉ ⲡϯϩⲉ ⲧⲁϣⲉⲡϭⲱⲛⲧ ⲙⲡⲁⲑⲏⲧ ⲟⲩϫⲣⲟⲡ ⲛⲁϥ ⲙⲛ ⲟⲩϫⲟⲕϫⲕ ⲙⲛ ⲟⲩϩⲧⲟⲡ ⲉϥⲧⲥⲃⲕⲟ ⲛⲧϭⲟⲙ ⲉϥⲉⲓⲣⲉ ⲙⲡⲡⲱⲗϩ

34:31  ⲙⲡⲣϫⲡⲓⲉ ⲡ ⲉⲧ ϩⲓ ⲧⲟⲩⲱⲕ ϩⲛ ⲟⲩⲙⲁ ⲛⲥⲉ-ⲏⲣⲡ ⲁⲩⲱ ⲙⲡⲣⲥⲟϣϥϥ ϩⲙ ⲡⲉϥⲟⲩⲛⲟϥ