LinVB - Job - 12

12:1  Yob ayanoli, alobi :

12:2  Bolobi nde o nkombo ya bato banso ? Soki bino te, bwanya bonso bokosila ?

12:3  Ngai mpe nazali na mayele lokola bino, boleki ngai te. Nani abungi makambo bolobaki ?

12:4  Nzokande baninga ba ngai bazali koseke ngai, zambi nabeleli Nzambe mpo ’te ayanola ngai ; bazali koseke moto malamu mpe wa bosembo.

12:5  Bato ba bomengo bakokinolaka bato ba mawa, bakokweisaka moninga azali kotatabana.

12:6  Kasi bayibi bafandi na boboto o biema bya bango, bakoki kotumola Nzambe, bakozwa likambo te, bakotalaka Nzambe lokola nkisi ya bango !

12:7  Soko olingi, tuna bibwele, biyebisa yo, tuna ndeke ya likolo, ilimbolela yo.

12:8  Nyama ikolandaka o mabelé iteya yo, ata mbisi ya mai iyebisa yo mpo yango.

12:9  O kati ya bikelamo bina binso nani abungi ’te Nzambe asali bongo !

12:10  Bomoi bonso bozali o maboko ma ye, azali nkolo wa bato banso.

12:11  Bakolobaka ’te matoi makosepelaka maloba ma bato, lokola edada ekosepelaka elengi ya bilei.

12:12  Bakolobaka ’te bwanya bokozwama epai ya bakolo mpe mayele mazali na baye bakomi babange.

12:13  Nzokande bwanya na bokasi bozali epai ya Nzambe, ye azali na mayele mpe na malako malamu.

12:14  Ndako ye abuki, ekotongama lisusu te, moto akotisi o boloko, akobima wana lisusu te !

12:15  Soko akangi mbula, biloko binso bikokufa, soko anokisi mbula makasi, mokili mokobeba.

12:16  Akosala mosala mwa ye na bwanya mpe na bokasi, mobungami ná mobungisi bazali o maboko ma ye.

12:17  Akobebisa mayele ma bato ba mayele, mpe akokomisa bazuzi bazoba.

12:18  Akolongola mikumba bakonzi bamemisi, mpe akokangela bango mokaba o loketo.

12:19  Akobungisa mayele ma banganga Nzambe, akolongola bakonzi o ngwende ya bango.

12:20  Akokangisa monoko mwa bato bayebi koloba malamu, akobotolo babange mayele ma kosambisa bato.

12:21  Akosambwisa bankumu ba mboka, akosilisa bokasi bwa bilombe.

12:22  Akolongola molili o bisika bya bozindo. akopelisa mwinda o mboka ya molili.

12:23  Akotombola ekolo, na nsima akokitisa yango ; akopanza bikolo, na nsima akosangisa byango lisusu.

12:24  Akobulinginya mayele ma bakonzi ba bikolo, bakobunga lokola bakobungaka o eliki ezangi nzela,

12:25  bakotambola o molili, bakomono mwinda te, bakobunga nzela lokola momeli masanga akobungaka.